ന്യൂസ് ഡെസ്ക്, മലയാളം യുകെ
സ്പെയിനിലെ അൽമെറിയ പ്രവിശ്യയിൽ പടർന്നുപിടിച്ച കാട്ടുതീയിൽ കുടുങ്ങിയ ബ്രിട്ടീഷ് ദമ്പതികളെ ഗുരുതരമായി പൊള്ളലേറ്റ നിലയിൽ രക്ഷപ്പെടുത്തി. ബെദാർ പ്രദേശത്തിന് സമീപത്തെ ഒരു താഴ്വരയിൽ അർധബോധാവസ്ഥയിൽ കണ്ടെത്തിയ ഇവർക്ക് ശരീരത്തിന്റെ ഏകദേശം 40 ശതമാനത്തോളം ഭാഗങ്ങളിൽ പൊള്ളലേറ്റതായി അധികൃതർ അറിയിച്ചു. ഹെലികോപ്റ്റർ വഴി ആശുപത്രിയിലെത്തിച്ച ഇരുവരും തീവ്രപരിചരണ വിഭാഗത്തിൽ ചികിത്സയിലാണ്.
അൽമെറിയയിലെ ലോസ് ഗല്ലാർദോസ്–ബെദാർ മേഖലകളിലുണ്ടായ കാട്ടുതീയിൽ ഇതുവരെ 13 പേർ മരിച്ചതായി റിപ്പോർട്ടുണ്ട്. ആയിരത്തിലധികം പേരെ സുരക്ഷിത കേന്ദ്രങ്ങളിലേക്ക് മാറ്റിപ്പാർപ്പിച്ചിരിക്കുകയാണ്. നിരവധി വിദേശികളാണ് മരിച്ചവരിലും കാണാതായവരിലും ഉൾപ്പെട്ടിരിക്കുന്നത്. ശക്തമായ കാറ്റും 40 ഡിഗ്രി സെൽഷ്യസിന് മുകളിലെ ചൂടും തീ അതിവേഗം വ്യാപിക്കാൻ കാരണമായതായി അധികൃതർ വ്യക്തമാക്കി.
അഞ്ഞൂറിലധികം രക്ഷാപ്രവർത്തകരും വിമാനങ്ങളും ഹെലികോപ്റ്ററുകളും ഉപയോഗിച്ചുള്ള വ്യാപകമായ ശ്രമങ്ങൾക്കൊടുവിൽ തീയുടെ വ്യാപനം നിയന്ത്രണവിധേയമായതായി സ്പാനിഷ് അധികൃതർ അറിയിച്ചു. മരിച്ചവരെയും കാണാതായവരെയും തിരിച്ചറിയുന്നതിനായി ഡിഎൻഎ പരിശോധനകൾ പുരോഗമിക്കുകയാണ്. കാലാവസ്ഥാ വ്യതിയാനത്തെ തുടർന്നുണ്ടാകുന്ന അതിശക്തമായ ചൂടും വരൾച്ചയും ഇത്തരം കാട്ടുതീകൾ കൂടുതൽ രൂക്ഷമാക്കുന്നതായി വിദഗ്ധർ മുന്നറിയിപ്പ് നൽകി.
Leave a Reply