സംസ്ഥാനത്തെ റബ്ബർ കർഷകർക്ക് ആശ്വാസമായി റബ്ബറിന്റെ താങ്ങുവില കിലോഗ്രാമിന് 250 രൂപയായി ഉയർത്തി സർക്കാർ ഉത്തരവിറക്കി. ഇതുവരെ 200 രൂപയായിരുന്ന താങ്ങുവിലയാണ് 50 രൂപ വർധിപ്പിച്ചത്. ധനകാര്യ വകുപ്പിന്റെ ഉത്തരവ് പ്രകാരം ജൂലൈ 3 മുതൽ നൽകിയ ബില്ലുകൾക്ക് പുതിയ നിരക്ക് ബാധകമാകും. ബജറ്റിൽ പ്രഖ്യാപിച്ച വാഗ്ദാനം നടപ്പാക്കുന്നതിന്റെ ഭാഗമായാണ് നടപടി.
റബ്ബർ കൃഷിയുടെ ഉൽപാദനച്ചെലവ് ഗണ്യമായി ഉയർന്ന സാഹചര്യത്തിൽ താങ്ങുവില വർധിപ്പിക്കണമെന്ന ആവശ്യം കർഷകരും റബ്ബർ ഉൽപാദക സംഘടനകളും ഏറെ നാളായി ഉന്നയിച്ചുവരികയായിരുന്നു. വളം, തൊഴിലാളി വേതനം, ടാപ്പിങ് ചെലവ് തുടങ്ങിയവ വർധിച്ചതോടെ ചെറുകിട കർഷകർ പ്രതിസന്ധി നേരിട്ടിരുന്നു. മധ്യകേരളത്തിലും മലയോര മേഖലയിലുമുള്ള ആയിരക്കണക്കിന് കുടുംബങ്ങളുടെ പ്രധാന വരുമാന മാർഗമായ റബ്ബർ കൃഷിക്ക് ഈ തീരുമാനം വലിയ പിന്തുണയാകുമെന്നാണ് വിലയിരുത്തൽ.
രാജ്യത്തെ സ്വാഭാവിക റബ്ബർ ഉൽപാദനത്തിന്റെ വലിയ പങ്കും കേരളത്തിൽ നിന്നാണ് ലഭിക്കുന്നത്. അതിനാൽ റബ്ബർ വിലയിലെ മാറ്റങ്ങൾ സംസ്ഥാനത്തിന്റെ ഗ്രാമീണ സമ്പദ്വ്യവസ്ഥയെയും നേരിട്ട് ബാധിക്കുന്നു. വിപണിവിലയിലെ ചാഞ്ചാട്ടങ്ങൾക്കിടയിൽ സർക്കാർ ഉറപ്പു നൽകുന്ന താങ്ങുവില കർഷകർക്ക് കൂടുതൽ സുരക്ഷ നൽകുമെന്നാണ് പ്രതീക്ഷ. പുതിയ ഉത്തരവ് പ്രാബല്യത്തിൽ വരുന്നതോടെ റബ്ബർ കൃഷിയിൽ തുടരാൻ കൂടുതൽ ആത്മവിശ്വാസം ലഭിക്കുമെന്നും കർഷക സംഘടനകൾ പ്രതികരിച്ചു.
Leave a Reply