ന്യൂസ് ഡെസ്ക്, മലയാളം യുകെ
ലണ്ടൻ: സോഷ്യൽ കെയർ സംവിധാനത്തിന് ദീർഘകാല പരിഹാരം കണ്ടെത്തുന്നതിനായി എല്ലാ പ്രധാന രാഷ്ട്രീയ പാർട്ടികളുമായും സഹകരിച്ച് മുന്നോട്ടു പോകുമെന്ന് ബ്രിട്ടീഷ് പ്രധാനമന്ത്രി ആൻഡി ബേൺഹാം പ്രഖ്യാപിച്ചു. വർഷങ്ങളായി പ്രതിസന്ധിയിലായ ഈ മേഖലയെ പുനഃസംഘടിപ്പിക്കാൻ കക്ഷിരാഷ്ട്രീയത്തിനപ്പുറം ചർച്ചകൾ വേണമെന്നാണ് അദ്ദേഹത്തിന്റെ നിലപാട്. ലേബർ, കൺസർവേറ്റീവ്, ലിബറൽ ഡെമോക്രാറ്റ് നേതാക്കൾ തമ്മിൽ പ്രാഥമിക ആശയവിനിമയം നടന്നതായും ബേൺഹാം വ്യക്തമാക്കി. സാമൂഹിക പരിചരണ രംഗത്തെ വീഴ്ചകൾ ദേശീയ ആരോഗ്യ സേവനമായ എൻ.എച്ച്.എസിനും വലിയ സമ്മർദം സൃഷ്ടിക്കുന്നുണ്ടെന്ന് അദ്ദേഹം ചൂണ്ടിക്കാട്ടി.
ബുധനാഴ്ച നടത്താനിരിക്കുന്ന സുപ്രധാന പ്രസംഗത്തിന് മുന്നോടിയായി നടത്തിയ പ്രതികരണത്തിലാണ് ബേൺഹാം നിലപാട് വ്യക്തമാക്കിയത്. നിലവിലെ സംവിധാനത്തിൽ അടിസ്ഥാനപരമായ മാറ്റങ്ങൾ വരുത്തി എൻ.എച്ച്.എസ് മാതൃകയിൽ സേവനം ലഭ്യമാക്കുന്ന പുതിയ സംവിധാനം രൂപീകരിക്കണമെന്നാണ് അദ്ദേഹത്തിന്റെ ആഗ്രഹം. പരിചരണ ചെലവുകൾക്ക് പരിധി നിശ്ചയിക്കുന്ന മാതൃകയേക്കാൾ പൊതുസേവന തത്വത്തെ അടിസ്ഥാനമാക്കിയുള്ള ദേശീയ പരിചരണ സംവിധാനം കൂടുതൽ ഫലപ്രദമാകുമെന്നാണ് വിലയിരുത്തൽ. സ്കോട്ട് ലൻഡിലെ മാതൃകപോലെ വ്യക്തിഗത പരിചരണ ചെലവ് സർക്കാർ വഹിക്കുകയും താമസ–ഭക്ഷണ ചെലവുകൾ കുടുംബങ്ങൾ വഹിക്കുകയും ചെയ്യുന്ന ഇടത്തരം പരിഹാരവും പരിഗണനയിലുണ്ട്.
അതേസമയം, പരിഷ്കാരങ്ങൾക്കുള്ള ധനസമാഹരണം സംബന്ധിച്ച് രാഷ്ട്രീയ ഭിന്നതകൾ തുടരുകയാണ്. നികുതി വർധനയിലൂടെയോ അധിക വായ്പയിലൂടെയോ ധനം കണ്ടെത്തുന്ന പദ്ധതികളെ പിന്തുണയ്ക്കില്ലെന്ന് കൺസർവേറ്റീവ് നേതാവ് കെമി ബാഡനോക് വ്യക്തമാക്കി. സർക്കാർ ചെലവ് ചുരുക്കി മാത്രം പദ്ധതികൾ നടപ്പാക്കണമെന്നാണ് അവരുടെ ആവശ്യം. മറുവശത്ത്, ലിബറൽ ഡെമോക്രാറ്റുകളും ഗ്രീൻ പാർട്ടിയും ചർച്ചകൾക്ക് പിന്തുണ പ്രഖ്യാപിച്ചിട്ടുണ്ടെങ്കിലും കുടുംബ പരിചരണക്കാരുടെ താൽപര്യങ്ങൾ സംരക്ഷിക്കണമെന്നും ആവശ്യപ്പെട്ടു. നിലവിൽ 23,250 പൗണ്ടിൽ താഴെ സ്വത്തുള്ളവർക്കു മാത്രമാണ് സർക്കാർ സഹായം ലഭിക്കുന്നത് എന്നതിനാൽ, പുതിയ പരിഷ്കാരങ്ങൾ ലക്ഷക്കണക്കിന് കുടുംബങ്ങളെ ബാധിക്കാനിടയുണ്ടെന്നാണ് വിലയിരുത്തൽ.
Leave a Reply