ന്യൂസ് ഡെസ്ക്, മലയാളം യുകെ
സഫോൾക്ക് പ്രദേശത്ത് പടരുന്ന വൻ കാട്ടുതീ കൂടുതൽ വ്യാപിച്ചതോടെ അധികൃതർ അതീവ ജാഗ്രത പ്രഖ്യാപിച്ചു. സൈസ്വെൽ ബി ആണവനിലയത്തിൽ നിന്ന് ഏതാനും മൈൽ അകലെയുണ്ടായ തീപിടിത്തം 150 ഹെക്ടറിലധികം പ്രദേശത്തേക്ക് വ്യാപിച്ചതായി റിപ്പോർട്ടുണ്ട്. ശക്തമായ കാറ്റും വരണ്ട കാലാവസ്ഥയും തീ നിയന്ത്രണത്തെ ദുഷ്കരമാക്കുന്ന സാഹചര്യത്തിൽ അഗ്നിശമനസേനയുടെ പ്രവർത്തനം തുടരുകയാണ്. തീ പൂർണമായി അണയ്ക്കാൻ ഇനിയും 36 മണിക്കൂർ വരെ വേണ്ടിവരുമെന്നാണ് മുന്നറിയിപ്പ്.
തീപിടിത്തത്തെ തുടർന്ന് നിരവധി കുടുംബങ്ങളെ സുരക്ഷിത കേന്ദ്രങ്ങളിലേക്ക് മാറ്റി. നിരവധി അഗ്നിശമന സേനാംഗങ്ങളും ഫയർ എൻജിനുകളും ഹെലികോപ്റ്ററുകളും രക്ഷാപ്രവർത്തനത്തിൽ ഏർപ്പെട്ടിട്ടുണ്ട്. തീ ബാധിച്ച പ്രദേശത്തിന്റെ വിസ്തൃതി ലണ്ടനിലെ ഹൈഡ് പാർക്കിനേക്കാൾ വലുതാണെന്നാണ് അധികൃതരുടെ വിലയിരുത്തൽ. സഫോൾക്കിലെ സമീപഗ്രാമങ്ങളിലെ താമസക്കാർ ഇത്രയും വലിയ കാട്ടുതീ മുമ്പ് കണ്ടിട്ടില്ലെന്ന് പ്രതികരിച്ചു.
ആണവനിലയത്തിന് നേരിട്ട് ഭീഷണിയില്ലെന്ന് അധികൃതർ വ്യക്തമാക്കിയിട്ടുണ്ടെങ്കിലും സൈസ്വെൽ ബി ‘ഹൈ അലർട്ട്’ നിലയിലാണ്. വിവിധ സുരക്ഷാ സംവിധാനങ്ങൾ പ്രവർത്തനസജ്ജമാണെന്നും റിയാക്ടറിന്റെ സുരക്ഷയെ ബാധിക്കുന്ന സാഹചര്യമില്ലെന്നും വിദഗ്ധർ അറിയിച്ചു. അതേസമയം, കാലാവസ്ഥാ വ്യതിയാനവും അതിതീവ്ര ചൂടും യൂറോപ്പിൽ കാട്ടുതീകളുടെ വ്യാപനം വർധിപ്പിക്കുകയാണെന്ന മുന്നറിയിപ്പും ശക്തമാകുകയാണ്.
Leave a Reply