തിരുവനന്തപുരം: സംസ്ഥാനത്ത് ഞായറാഴ്ച രാത്രിയും തിങ്കളാഴ്ച പുലർച്ചെയും ശക്തമായ മഴ തുടരുന്നതിനിടെ വിവിധ ജില്ലകളിൽ പ്രളയഭീഷണി ശക്തമായി. കോട്ടയത്ത് മീനച്ചിലാറിലെ ജലനിരപ്പ് ഉയരുന്നതിൽ ആശങ്ക നിലനിൽക്കുമ്പോൾ പത്തനംതിട്ടയിൽ പമ്പാനദിയിലെ ജലനിരപ്പും ക്രമാതീതമായി ഉയരുകയാണ്. ശബരിമല വനമേഖലയിൽ അതിശക്തമായ മഴ തുടരുന്നതിനാൽ പലയിടങ്ങളിലും മണ്ണിടിച്ചിലും മണ്ണൊലിപ്പും റിപ്പോർട്ട് ചെയ്തു. മൂവാറ്റുപുഴയാറിലും തൊടുപുഴയാറിലും ജലനിരപ്പ് അപകടനില പിന്നിട്ടതോടെ നദീതീരവാസികൾക്ക് ജാഗ്രതാ നിർദേശം നൽകി. തിരുവനന്തപുരം മുതൽ എറണാകുളം വരെയുള്ള ഏഴ് ജില്ലകളിൽ ഓറഞ്ച് അലർട്ടും സംസ്ഥാനത്തെ എല്ലാ ജില്ലകളിലും യെല്ലോ അലർട്ടും തുടരുകയാണ്.
കോട്ടയം–ആലപ്പുഴ മേഖലകളിൽ മഴക്കെടുതി രൂക്ഷമായി. മീനച്ചിലാറിന്റെ വൃഷ്ടിപ്രദേശങ്ങളിൽ കഴിഞ്ഞ 24 മണിക്കൂറിൽ 10 സെന്റിമീറ്റർ മഴ ലഭിച്ചതോടെ നദിയിൽ ജലനിരപ്പ് മൂന്ന് അടി വരെ ഉയരാൻ സാധ്യതയുണ്ടെന്ന് മുന്നറിയിപ്പ് നൽകി. പാല–ഈരാറ്റുപേട്ട, പാല–ഏറ്റുമാനൂർ ഉൾപ്പെടെയുള്ള റോഡുകളിൽ വെള്ളം കയറി ഗതാഗതം തടസ്സപ്പെട്ടു. പുതുപ്പള്ളി, പാലാ, കുമരകം, അയ്മനം തുടങ്ങിയ മേഖലകളിൽ ജാഗ്രത ശക്തമാക്കി. ആലപ്പുഴയിലെ എടത്വ മുട്ടാർ പഞ്ചായത്ത് പൂർണമായും ഒറ്റപ്പെട്ട നിലയിലാണ്. അപ്പർ കുട്ടനാട്ടിൽ വീടുകളിലും വ്യാപാര സ്ഥാപനങ്ങളിലും വെള്ളം കയറി വ്യാപക നാശനഷ്ടമുണ്ടായി. ഓണച്ചന്തയ്ക്കായി സംഭരിച്ചിരുന്ന സാധനങ്ങളും പല വ്യാപാര സ്ഥാപനങ്ങളിലും വെള്ളത്തിൽ നശിച്ചു.
ഇടുക്കി ജില്ലയിലെ മലങ്കര, കല്ലാർകുട്ടി, പാംബ്ല ഡാമുകളുടെ ഷട്ടറുകൾ തുറന്നതോടെ താഴ്ന്ന പ്രദേശങ്ങളിൽ ജാഗ്രത ശക്തമാക്കി. പമ്പാനദിയിലെ മൂഴിയാർ ഡാമും തുറക്കാനുള്ള സാധ്യത കണക്കിലെടുത്ത് താഴ്ന്ന പ്രദേശങ്ങളിലുള്ളവർ ദുരിതാശ്വാസ ക്യാംപുകളിലേക്ക് മാറാൻ അധികൃതർ നിർദേശം നൽകി. സംസ്ഥാനത്തെ മഴസാഹചര്യം വിലയിരുത്താൻ മുഖ്യമന്ത്രി ജില്ലാ കലക്ടർമാരുടെയും ബന്ധപ്പെട്ട മന്ത്രിമാരുടെയും അടിയന്തിര യോഗം വിളിച്ചു. വിവിധ ജില്ലകളിലെ രക്ഷാപ്രവർത്തനങ്ങളും ദുരിതാശ്വാസ പ്രവർത്തനങ്ങളും യോഗത്തിൽ വിലയിരുത്തും. അതേസമയം മഴക്കെടുതിയുമായി ബന്ധപ്പെട്ട് സംസ്ഥാനത്ത് മരണസംഖ്യ 15 ആയി ഉയർന്നതായി റിപ്പോർട്ടുകൾ സൂചിപ്പിക്കുന്നു.
Leave a Reply