ന്യൂസ് ഡെസ്ക്, മലയാളം യുകെ
ലണ്ടൻ ∙ ലണ്ടനെ ബർമിങ്ഹാം, മാഞ്ചസ്റ്റർ, ലിവർപൂൾ, ഗ്ലാസ്ഗോ എന്നിവയുമായി ബന്ധിപ്പിക്കുന്ന ബ്രിട്ടനിലെ പ്രധാന റെയിൽ ഓപ്പറേറ്ററായ അവന്തി വെസ്റ്റ് കോസ്റ്റ് അടുത്ത വർഷം മാർച്ച് 7 മുതൽ വീണ്ടും പൊതുമേഖലയിലാകുമെന്ന് ബ്രിട്ടീഷ് സർക്കാർ പ്രഖ്യാപിച്ചു. യാത്രക്കാരുടെ നിരന്തര പരാതികളും സർവീസ് നിലവാരത്തിലെ വീഴ്ചകളും പരിഗണിച്ചാണ് കരാർ പുതുക്കാതെ സർക്കാർ നേരിട്ട് നിയന്ത്രണം ഏറ്റെടുക്കാൻ തീരുമാനിച്ചത്.
ഈ വർഷം ഏപ്രിൽ മുതൽ ജൂൺ വരെയുള്ള കാലയളവിൽ ബ്രിട്ടനിലെ റെയിൽ ശൃംഖലയിൽ ഏറ്റവും കൂടുതൽ സർവീസ് റദ്ദാക്കലുകൾ രേഖപ്പെടുത്തിയ കമ്പനികളിലൊന്നായിരുന്നു അവന്തി വെസ്റ്റ് കോസ്റ്റ്. തിരക്കേറിയ പാതകളിൽ പതിവായി വൈകല്യങ്ങളും അമിത തിരക്കും നേരിട്ടതോടെ യാത്രക്കാർ കടുത്ത അസംതൃപ്തി പ്രകടിപ്പിച്ചിരുന്നു. ലണ്ടൻ–മാഞ്ചസ്റ്റർ റൂട്ടിലെ ചില യാത്രകൾക്ക് ഉയർന്ന നിരക്കുകളും വിമർശനത്തിനിടയാക്കിയിരുന്നു.
ഗ്രേറ്റ് ബ്രിട്ടീഷ് റെയിൽവേസ് 2027 മുതൽ സമ്പൂർണ മേൽനോട്ടം ഏറ്റെടുക്കുന്നതിനുള്ള പദ്ധതിയുടെ ഭാഗമായാണ് ലേബർ സർക്കാർ വിവിധ റെയിൽ സേവനങ്ങളെ പൊതുമേഖലയിലേക്ക് തിരിച്ചുകൊണ്ടുവരുന്നത്. ഇതിനകം നിരവധി ഓപ്പറേറ്റർമാർ സർക്കാർ നിയന്ത്രണത്തിലായിട്ടുണ്ട്. കൂടുതൽ നിക്ഷേപവും മെച്ചപ്പെട്ട സമയപാലനവും യാത്രക്കാർക്ക് മുൻഗണന നൽകുന്ന സേവനവുമാണ് ലക്ഷ്യമെന്ന് സർക്കാർ അറിയിച്ചു.
Leave a Reply