മുംബൈ: വിവാഹത്തിന് വിസമ്മതിച്ചതിനെത്തുടർന്ന് യുവതിയെ ആയിരം അടി താഴ്ചയുള്ള കൊക്കയിലേക്ക് തള്ളിയിട്ടു കൊലപ്പെടുത്തിയ കേസിൽ കാമുകൻ അറസ്റ്റിൽ. മഹാരാഷ്ട്രയിലെ കോലാപൂർ ജില്ലയിൽ ഗാർഗോട്ടി സ്വദേശിനിയും മൂന്നാം വർഷ എൻജിനീയറിങ് വിദ്യാർഥിനിയുമായ തരുൺ നായിക് (23) ആണ് കൊല്ലപ്പെട്ടത്. സംഭവത്തിൽ കാമുകൻ ശ്രീപദ് വഡാറിനെ (25) പൊലീസ് അറസ്റ്റ് ചെയ്തു. ഭൂദർഗഡ് താലൂക്കിലെ പാട്ഗാവ് ഗ്രാമത്തിനു സമീപമുള്ള നായക്വാഡി വെള്ളച്ചാട്ടത്തിനടുത്താണ് സംഭവം. ഒക്ടോബർ ഒൻപതിനായിരുന്നു കൊലപാതകം.
അഞ്ചു വർഷമായി പ്രണയത്തിലായിരുന്ന ഇരുവരും തമ്മിൽ അടുത്തിടെ അകൽച്ചയുണ്ടായിരുന്നു. നാലു മാസം മുൻപ് യുവതിയുടെ വിവാഹം മറ്റൊരാളുമായി ഉറപ്പിച്ചതോടെ ശ്രീപദുമായുള്ള ബന്ധത്തിൽനിന്ന് പിന്മാറാൻ യുവതി ശ്രമിച്ചു. വിവാഹത്തിനു മുൻപുള്ള അവസാന കൂടിക്കാഴ്ചയെന്നു പറഞ്ഞാണ് ശ്രീപദ് യുവതിയെ വിനോദസഞ്ചാര കേന്ദ്രത്തിലേക്ക് വിളിച്ചുവരുത്തിയത്. അവിടെവച്ച് ബന്ധം തുടരാനാവില്ലെന്ന് യുവതി വ്യക്തമാക്കിയതോടെ ഇരുവരും തമ്മിൽ വാക്കേറ്റമുണ്ടായി. ഇതിനു പിന്നാലെയാണ് ശ്രീപദ് യുവതിയെ കൊക്കയിലേക്ക് തള്ളിയിട്ടതെന്നാണ് പൊലീസ് പറയുന്നത്.
സംഭവത്തിനുശേഷം വീട്ടിലെത്തിയ ശ്രീപദ്, യുവതിയെ കാണാനില്ലെന്ന് ബന്ധുക്കളെ അറിയിച്ചു. വെള്ളം എടുക്കാൻ പോയ സമയത്താണ് യുവതിയെ കാണാതായതെന്നായിരുന്നു ഇയാളുടെ വിശദീകരണം. പൊലീസിനോടും ഇതേ മൊഴി ആവർത്തിച്ചെങ്കിലും മൊഴിയിലെ വൈരുധ്യങ്ങൾ സംശയത്തിനിടയാക്കി. തുടർന്നുള്ള ചോദ്യം ചെയ്യലിൽ പ്രതി കുറ്റം സമ്മതിച്ചതായി പൊലീസ് അറിയിച്ചു. പിന്നീട് നടത്തിയ പരിശോധനയിലാണ് യുവതിയുടെ മൃതദേഹം കണ്ടെത്തിയത്. സംഭവത്തിൽ കൂടുതൽ അന്വേഷണം തുടരുകയാണ്.
Leave a Reply