ജയ്പുർ: ബോംബ് ഭീഷണിയെ തുടർന്ന് ജർമനിയിലെ ഫ്രാങ്ക്ഫർട്ടിൽ നിന്ന് ന്യൂഡൽഹിയിലേക്ക് വരികയായിരുന്ന എയർ ഇന്ത്യ വിമാനം ജയ്പുരിൽ അടിയന്തരമായി ഇറക്കി. ബുധനാഴ്ച രാവിലെ 9.45ഓടെയായിരുന്നു സംഭവം. എയർ ഇന്ത്യയുടെ എഐ 2030 ബോയിങ് ഡ്രീംലൈനർ വിമാനമാണ് ജയ്പുർ വിമാനത്താവളത്തിൽ സുരക്ഷിതമായി ഇറക്കിയത്. വിമാനത്തിലുണ്ടായിരുന്ന യാത്രക്കാരും ജീവനക്കാരും സുരക്ഷിതരാണെന്ന് അധികൃതർ അറിയിച്ചു.
വിമാനം ഇറങ്ങിയതിനു പിന്നാലെ സുരക്ഷാ ഉദ്യോഗസ്ഥർ സ്ഥലത്തെത്തി പരിശോധന നടത്തി. യാത്രക്കാരെ സുരക്ഷിതമായി പുറത്തിറക്കിയ ശേഷമാണ് വിവിധ സുരക്ഷാ വിഭാഗങ്ങൾ വിമാനത്തിൽ വിശദമായ പരിശോധന നടത്തിയത്. പരിശോധനയിൽ സംശയാസ്പദമായ ഒന്നും കണ്ടെത്തിയില്ലെന്നും ലഭിച്ച ഭീഷണി സന്ദേശം വ്യാജമാണെന്ന് പിന്നീട് സ്ഥിരീകരിച്ചതായും റിപ്പോർട്ടുകൾ പറയുന്നു. സംഭവത്തെ തുടർന്ന് വിമാനത്താവളത്തിൽ സുരക്ഷാ നടപടികൾ ശക്തമാക്കി.
ഭീഷണി സന്ദേശത്തിന്റെ ഉറവിടം കണ്ടെത്തുന്നതിനായി സുരക്ഷാ ഏജൻസികൾ അന്വേഷണം ആരംഭിച്ചിട്ടുണ്ട്. യാത്ര തടസ്സപ്പെട്ടവർക്കായി യാത്ര പുനഃക്രമീകരിക്കാനോ ടിക്കറ്റ് തുക പൂർണമായി തിരികെ നൽകാനോ എയർ ഇന്ത്യ സൗകര്യം ഒരുക്കിയതായി റിപ്പോർട്ടിൽ പറയുന്നു. വിമാനത്തിന് നേരെയുണ്ടായ ഭീഷണിയുടെ പശ്ചാത്തലത്തിൽ സന്ദേശം അയച്ചവരെ കണ്ടെത്താനുള്ള നടപടികൾ തുടരുകയാണ്.
Leave a Reply