ന്യൂസ് ഡെസ്ക്, മലയാളം യുകെ
ബ്രിട്ടനിലെ സൗത്ത് യോർക്ക്ഷെയറിലുള്ള യോർക്ക്ഷെയർ വൈൽഡ്‌ലൈഫ് പാർക്കിൽ കടുവയുടെ ആക്രമണത്തിൽ മരിച്ച വില്യം ചാപ്മാന്റെ (24) മരണവുമായി ബന്ധപ്പെട്ട അന്വേഷണത്തിൽ കൂടുതൽ വിവരങ്ങൾ പുറത്ത്. സ്കിസോഫ്രീനിയ സ്ഥിരീകരിച്ചിരുന്ന ചാപ്മാന് നേരത്തേ പലതവണ സൈക്കോസിസ് ബാധയുണ്ടായിരുന്നതായി ഡോൺകാസ്റ്റർ കൊറോണർ കോടതിയിൽ നടന്ന പ്രാഥമിക വിചാരണയിൽ വെളിപ്പെടുത്തി. ഒക്ടോബർ 10നാണ് മൃഗശാലയിലെ കടുവക്കൂട്ടിലേക്ക് കടന്ന ചാപ്മാനെ അൾട്ടായി എന്ന സൈബീരിയൻ കടുവ ആക്രമിച്ചത്. ഗുരുതര പരുക്കുകളേറ്റ യുവാവ് സംഭവസ്ഥലത്തുതന്നെ മരിച്ചു.
ഡോൺകാസ്റ്ററിൽ താമസിച്ചിരുന്ന ചാപ്മാൻ സ്വയംതൊഴിൽ അടിസ്ഥാനത്തിൽ ഓൺലൈൻ വ്യാപാരം നടത്തിവരികയായിരുന്നു. മാനസികാരോഗ്യ പ്രശ്നങ്ങളുണ്ടായിരുന്നെങ്കിലും സ്വതന്ത്രമായി ജീവിച്ചിരുന്ന യുവാവ് പ്രാദേശിക മാനസികാരോഗ്യ സേവനങ്ങളുടെ പരിചരണത്തിലായിരുന്നുവെന്ന് അന്വേഷണത്തിൽ വ്യക്തമായി. മരണത്തിനു മുൻപ് മാനസികാരോഗ്യ സേവനങ്ങളുമായി ബന്ധപ്പെട്ട് മകന് ലഭിച്ച പരിചരണത്തെക്കുറിച്ച് കുടുംബം നിരവധി ആശങ്കകൾ ഉന്നയിച്ചതായി കൊറോണർ കോടതിയെ അറിയിച്ചു. ഇതേത്തുടർന്ന് റോദർഹാം, ഡോൺകാസ്റ്റർ, സൗത്ത് ഹംബർ എൻഎച്ച്എസ് ഫൗണ്ടേഷൻ ട്രസ്റ്റ് സ്വതന്ത്ര അന്വേഷണം ആരംഭിച്ചിട്ടുണ്ട്.
സംഭവദിവസം ഉച്ചയ്ക്ക് 1.30ഓടെ രണ്ട് വേലികൾ മറികടന്നാണ് ചാപ്മാൻ കടുവയുടെ കൂട്ടിലേക്ക് പ്രവേശിച്ചതെന്നാണ് അന്വേഷണത്തിൽ ലഭിച്ച വിവരം. കടുവയുമായുള്ള സമ്പർക്കത്തെ തുടർന്നുണ്ടായ ഒന്നിലധികം ഗുരുതര പരുക്കുകളാണ് മരണകാരണമെന്ന് പോസ്റ്റ്മോർട്ടം റിപ്പോർട്ടിൽ വ്യക്തമാക്കുന്നു. മൃഗശാലയുടെ സുരക്ഷാ ക്രമീകരണങ്ങളെ കുറിച്ച് ഡോൺകാസ്റ്റർ സിറ്റി കൗൺസിലും അന്വേഷണം നടത്തുന്നുണ്ട്. ആക്രമണത്തിൽ ഉൾപ്പെട്ട കടുവയെ ദയാവധം ചെയ്യില്ലെന്ന് അധികൃതർ അറിയിച്ചു. സംഭവത്തിൽ പൂർണ വിചാരണ 2027 മാർച്ച് 18ന് നടക്കും.
Leave a Reply