റിയാദ്: സൗദി അറേബ്യയിൽ നിരോധിച്ച മരുന്നുകൾ ലഗേജിൽ കണ്ടെത്തിയതിനെ തുടർന്ന് മലയാളി നേഴ്സ് ഫിലോമിനയെ സൗദി പൊലീസ് കസ്റ്റഡിയിലെടുത്തു. വയനാട് സുൽത്താൻ ബത്തേരി അയ്യങ്കൊല്ലി സ്വദേശിനിയായ ഫിലോമിന (32) റിയാദിലെ കിങ് ഫഹദ് ആശുപത്രിയിൽ കഴിഞ്ഞ മൂന്ന് വർഷമായി നേഴ്സായി ജോലി ചെയ്തുവരികയായിരുന്നു. വാർഷികാവധി കഴിഞ്ഞ് സൗദിയിലേക്ക് മടങ്ങുന്നതിനിടെ ജിദ്ദ വിമാനത്താവളത്തിൽ വച്ചാണ് ഇവരെ അധികൃതർ തടഞ്ഞുവച്ചത്. സംഭവത്തിൽ ജിദ്ദയിലെ ഇന്ത്യൻ കോൺസുലേറ്റും ഇടപെട്ടിട്ടുണ്ട്.
ഈ മാസം 10ന് ബെംഗളൂരുവിൽനിന്നുള്ള വിമാനത്തിലാണ് ഫിലോമിന ജിദ്ദയിലെത്തിയത്. അവിടെനിന്ന് കണക്ഷൻ വിമാനത്തിൽ റിയാദിലേക്ക് പോകാനായിരുന്നു പദ്ധതി. ജിദ്ദ വിമാനത്താവളത്തിലെത്തിയശേഷം രാത്രി 8.30ഓടെ പിതാവ് രവിക്കും ഭർത്താവ് ജോണിനും ഫിലോമിന ശബ്ദസന്ദേശം അയച്ചിരുന്നു. വിമാനത്താവളത്തിലെ ഉദ്യോഗസ്ഥർ തന്നെ തടഞ്ഞുവച്ചതായും ലഗേജ് കൊണ്ടുപോയതായും ഫോൺ കൈമാറാൻ ആവശ്യപ്പെട്ടതായും സന്ദേശത്തിൽ അറിയിച്ചിരുന്നു. ഇതിനു പിന്നാലെ ഫിലോമിനയുമായി ബന്ധപ്പെടാൻ കഴിയാതായതോടെ കുടുംബം ആശങ്കയിലായി.
തുടർന്ന് ബന്ധുക്കളും സാമൂഹിക പ്രവർത്തകരും നടത്തിയ അന്വേഷണത്തിലാണ് ഫിലോമിന സൗദി പൊലീസ് കസ്റ്റഡിയിലാണെന്ന വിവരം ലഭിച്ചത്. സൗദിയിൽ നിരോധിച്ച മരുന്നുകൾ കൈവശം വച്ചതുമായി ബന്ധപ്പെട്ടാണ് നടപടി സ്വീകരിച്ചതെന്ന് ജിദ്ദയിലെ ഇന്ത്യൻ കോൺസുലേറ്റ് സ്ഥിരീകരിച്ചതായാണ് റിപ്പോർട്ട്. സംഭവത്തിൽ ഇന്ത്യൻ അധികൃതർ ഇടപെട്ടിട്ടുണ്ട്. ഫിലോമിനയുടെ കാര്യത്തിൽ ആവശ്യമായ നിയമനടപടികൾക്കും തുടർനടപടികൾക്കുമായി ശ്രമങ്ങൾ പുരോഗമിക്കുകയാണ്. സംഭവവുമായി ബന്ധപ്പെട്ട കൂടുതൽ വിവരങ്ങൾ പുറത്തുവന്നിട്ടില്ല.
Leave a Reply