ന്യൂസ് ഡെസ്ക്, മലയാളം യുകെ
കോവിഡ് മഹാമാരിക്കാലത്ത് പ്രിയപ്പെട്ടവരെ നഷ്ടപ്പെട്ട കുടുംബങ്ങൾ മുൻ ബ്രിട്ടീഷ് ആരോഗ്യമന്ത്രി മാറ്റ് ഹാൻകോക്കിനെ പ്രിവി കൗൺസിലിൽനിന്ന് പുറത്താക്കണമെന്ന് പ്രധാനമന്ത്രിയോട് ആവശ്യപ്പെടുന്നു. കെയർ ഹോമുകളിലെ മരണങ്ങളുമായി ബന്ധപ്പെട്ട അന്വേഷണ റിപ്പോർട്ട് പുറത്തുവന്നതിനു പിന്നാലെയാണ് ആവശ്യം ശക്തമായത്. കോവിഡ്-19 ബെറീവ്ഡ് ഫാമിലീസ് ഫോർ ജസ്റ്റിസ് യുകെ എന്ന സംഘടനയാണ് ഹാൻകോക്കിനെതിരെ നടപടി ആവശ്യപ്പെട്ട് നിവേദനം ആരംഭിച്ചത്. ഏകദേശം 7,000 പേരെ പ്രതിനിധീകരിക്കുന്ന സംഘടനയുടെ ആരോപണമനുസരിച്ച്, മഹാമാരിക്കാലത്ത് കെയർ ഹോമുകളെ സംരക്ഷിക്കുന്നതിൽ ഹാൻകോക്ക് പരാജയപ്പെടുകയും കുടുംബങ്ങളെ തെറ്റിദ്ധരിപ്പിക്കുകയും ചെയ്തു. അദ്ദേഹത്തിന്റെ നടപടികൾ ഒഴിവാക്കാമായിരുന്ന ആയിരക്കണക്കിന് മരണങ്ങൾക്ക് കാരണമായെന്നാണ് സംഘടനയുടെ ആരോപണം.
കോവിഡ് അന്വേഷണ കമ്മീഷന്റെ ആറാമത്തെ റിപ്പോർട്ടിൽ കെയർ ഹോമുകളിലെ സുരക്ഷാ വീഴ്ചകളും മുന്നൊരുക്കങ്ങളുടെ അഭാവവും രൂക്ഷമായി വിമർശിച്ചിരുന്നു. ആശുപത്രികളിൽനിന്ന് കോവിഡ് പരിശോധന നടത്താത്ത രോഗികളെ കെയർ ഹോമുകളിലേക്ക് മാറ്റിയതും ആവശ്യത്തിന് പരിശോധനാ സംവിധാനങ്ങളും വ്യക്തിഗത സുരക്ഷാ ഉപകരണങ്ങളും (PPE) ലഭ്യമാക്കാത്തതും ഗുരുതരമായ പ്രശ്നങ്ങളായി റിപ്പോർട്ട് ചൂണ്ടിക്കാട്ടി. മഹാമാരിയെ നേരിടാനുള്ള തയ്യാറെടുപ്പുകളുടെ ഭാഗമായി 2016-ൽ നടത്തിയ എക്സർസൈസ് സിഗ്നസ് പരിശീലനത്തിൽ സാമൂഹിക പരിചരണ മേഖലയുടെ അടിയന്തര ശേഷി വർധിപ്പിക്കണമെന്ന് നിർദേശിച്ചിരുന്നെങ്കിലും അത് നടപ്പാക്കിയില്ലെന്നും റിപ്പോർട്ടിലുണ്ട്. മഹാമാരിക്കാലത്ത് കെയർ ഹോമുകളിലെ താമസക്കാരിൽ 43,000 പേർ കോവിഡ് ബാധയോടെ മരിച്ചതായും റിപ്പോർട്ട് വ്യക്തമാക്കുന്നു. കെയർ ഹോമുകൾക്ക് സംരക്ഷണവലയം തീർത്തുവെന്ന ഹാൻകോക്കിന്റെ മുൻ അവകാശവാദത്തെയും അന്വേഷണ കമ്മീഷൻ അധ്യക്ഷ ബറോണസ് ഹെതർ ഹാലറ്റ് ചോദ്യം ചെയ്തു.
മുൻ മന്ത്രിമാർക്കും മുതിർന്ന രാഷ്ട്രീയ നേതാക്കൾക്കും ദേശീയ സുരക്ഷയുമായി ബന്ധപ്പെട്ട രഹസ്യവിവരങ്ങൾ ലഭ്യമാക്കാൻ കഴിയുന്ന പ്രിവി കൗൺസിലിൽനിന്ന് ഹാൻകോക്കിനെ നീക്കണമെന്നാണ് കുടുംബങ്ങളുടെ ആവശ്യം. സാധാരണയായി അംഗങ്ങൾ സ്വയം രാജിവയ്ക്കുകയോ പ്രധാനമന്ത്രിയുടെ ശുപാർശയിൽ രാജാവ് അംഗത്വം റദ്ദാക്കുകയോ ചെയ്താലാണ് പുറത്താക്കൽ നടക്കുക. 2011-ൽ എംപിമാരുടെ ചെലവുകളുമായി ബന്ധപ്പെട്ട കുറ്റങ്ങളിൽ ശിക്ഷിക്കപ്പെട്ട മുൻ ലേബർ മന്ത്രി എലിയറ്റ് മോർലിയെ പ്രിവി കൗൺസിലിൽനിന്ന് പുറത്താക്കിയിരുന്നു. കോവിഡ് കാലത്തെ സാമൂഹിക അകലം പാലിക്കൽ ചട്ടങ്ങൾ ലംഘിച്ചതിനെത്തുടർന്ന് സഹായിയായ ജിന കൊളാഞ്ചലോയുമായുള്ള ബന്ധം വിവാദമായതിനു പിന്നാലെ 2021 ജൂണിലാണ് ഹാൻകോക്ക് ആരോഗ്യമന്ത്രി സ്ഥാനം രാജിവച്ചത്. പുതിയ റിപ്പോർട്ടിന്റെ പശ്ചാത്തലത്തിൽ അദ്ദേഹത്തിന്റെ ഉത്തരവാദിത്തം പരസ്യമായി അംഗീകരിക്കപ്പെടണമെന്നാണ് ദുരിതബാധിത കുടുംബങ്ങൾ ആവശ്യപ്പെടുന്നത്.
Leave a Reply