ന്യൂസ് ഡെസ്ക്, മലയാളം യുകെ
കൃത്രിമബുദ്ധി (എഐ) സാങ്കേതികവിദ്യയുടെ ഉപയോഗം വർധിപ്പിക്കുന്നതിന്റെ ഭാഗമായി ജീവനക്കാരുടെ എണ്ണം കുറയ്ക്കാനൊരുങ്ങി ബ്രിട്ടീഷ് ബാങ്കിങ് സ്ഥാപനമായ ബാർക്ലേസ്. ആഗോളതലത്തിൽ ഏകദേശം 5,000 ജോലികൾ വെട്ടിക്കുറയ്ക്കാനാണ് ബാങ്കിന്റെ തീരുമാനം. ഇതിൽ 1,000 തസ്തികകൾ ഇതിനകം ഒഴിവാക്കിയിട്ടുണ്ട്. ഈ വർഷം അവസാനത്തോടെ 4,000 തസ്തികകൾ കൂടി ഇല്ലാതാക്കും. ബാങ്കിന്റെ ആഗോള ജീവനക്കാരുടെ ഏകദേശം അഞ്ച് ശതമാനത്തെയാണ് തീരുമാനം ബാധിക്കുക. ഇതിൽ ഭൂരിഭാഗവും പ്രവർത്തന വിഭാഗങ്ങളിലെയും പിന്തുണാ മേഖലകളിലെയും ജോലികളായിരിക്കും.
ബിസിനസ് പ്രവർത്തനങ്ങൾ ആധുനികവത്കരിക്കുന്നതിനും ചെലവ് കുറയ്ക്കുന്നതിനുമായി നടപ്പാക്കിവരുന്ന പദ്ധതിയുടെ ഭാഗമാണ് നടപടിയെന്ന് ബാർക്ലേസ് അറിയിച്ചു. പ്രധാനമായും ബ്രിട്ടനിലെ റീട്ടെയിൽ ബാങ്കിങ് വിഭാഗത്തെ കേന്ദ്രീകരിച്ചുള്ള മൂന്ന് വർഷത്തെ ചെലവുചുരുക്കൽ പദ്ധതിയും അവസാനഘട്ടത്തിലാണ്. ഇൻവെസ്റ്റ്മെന്റ് ബാങ്കിങ് വിഭാഗത്തെയും ജീവനക്കാരുടെ കുറവ് ബാധിക്കും. ആകെ തൊഴിൽ വെട്ടിക്കുറയ്ക്കലിന്റെ ഏകദേശം 60 ശതമാനവും പിന്തുണാ വിഭാഗങ്ങളിലായിരിക്കും. സോഫ്റ്റ്‌വെയർ ഡെവലപ്പർമാർ ഉൾപ്പെടെയുള്ളവർക്കും ജോലി നഷ്ടപ്പെടാൻ സാധ്യതയുണ്ട്.
സാങ്കേതികവിദ്യയിലെ വൻ നിക്ഷേപമാണ് പ്രവർത്തനക്ഷമത വർധിപ്പിക്കുന്നതിൽ പ്രധാന പങ്കുവഹിക്കുന്നതെന്ന് ബാർക്ലേസ് ഗ്രൂപ്പ് ചീഫ് എക്സിക്യൂട്ടീവ് സി.എസ്. വെങ്കടകൃഷ്ണൻ പറഞ്ഞു. ഭാവിയിൽ എഐയ്ക്ക് കൂടുതൽ പ്രാധാന്യമുണ്ടാകുമെന്നും എന്നാൽ അതിന്റെ പൂർണമായ നേട്ടം ലഭിക്കാൻ ആവശ്യമായ സാങ്കേതിക അടിസ്ഥാനസൗകര്യങ്ങൾ ആദ്യം വികസിപ്പിക്കേണ്ടതുണ്ടെന്നും അദ്ദേഹം വ്യക്തമാക്കി. അതേസമയം, ഈ വർഷം ജൂലൈ മുതൽ സെപ്റ്റംബർ വരെയുള്ള മൂന്ന് മാസങ്ങളിൽ ബാങ്ക് 2.3 ബില്യൺ പൗണ്ട് ലാഭം രേഖപ്പെടുത്തി. കഴിഞ്ഞ വർഷം ഇതേ കാലയളവിനേക്കാൾ ലാഭം കൂടുതലാണെങ്കിലും സാമ്പത്തിക വിദഗ്ധർ പ്രതീക്ഷിച്ചതിലും നേരിയ കുറവാണ് രേഖപ്പെടുത്തിയത്. എഐ ഉൾപ്പെടെയുള്ള പുതിയ സാങ്കേതികവിദ്യകളിലെ നിക്ഷേപം കമ്പനികളുടെ പ്രവർത്തനക്ഷമത വർധിപ്പിക്കുന്നതിനും തൊഴിൽ അവസരങ്ങൾ കുറയ്ക്കുന്നതിനും കാരണമാകുന്നുണ്ടോയെന്ന് നിരീക്ഷിച്ചുവരികയാണ് സാമ്പത്തിക വിദഗ്ധർ.
Leave a Reply