ന്യൂസ് ഡെസ്ക്, മലയാളം യുകെ
സ്കോട്ട് ലൻഡിലെ നോർത്ത് അയർഷയറിലുള്ള കിൽവിന്നിംഗിൽ ഡബിൾ ഡക്കർ ബസിടിച്ച് 12 വയസ്സുകാരിയായ സ്കൂൾ വിദ്യാർഥിനി മരിച്ചു. നവംബർ 3 ചൊവ്വാഴ്ച ലൗച്ലൻ വേയിലാണ് അപകടമുണ്ടായത്. ഗുരുതരമായി പരിക്കേറ്റ കുട്ടി സംഭവസ്ഥലത്തുവെച്ചുതന്നെ മരിച്ചതായാണ് റിപ്പോർട്ട്. സംഭവത്തെ തുടർന്ന് പ്രദേശത്ത് പോലീസും അടിയന്തര രക്ഷാപ്രവർത്തക സംഘങ്ങളും എത്തി.
അപകടത്തെക്കുറിച്ച് പോലീസ് അന്വേഷണം ആരംഭിച്ചിട്ടുണ്ട്. കുട്ടി റോഡ് മുറിച്ചുകടക്കുന്നതിനിടെയാണോ അതോ മറ്റേതെങ്കിലും സാഹചര്യത്തിലാണോ ബസിടിച്ചതെന്നതുൾപ്പെടെയുള്ള കാര്യങ്ങൾ പരിശോധിച്ചുവരികയാണ്. അപകടത്തിന്റെ കൃത്യമായ കാരണം സംബന്ധിച്ച് കൂടുതൽ വിവരങ്ങൾ പുറത്തുവന്നിട്ടില്ല. സംഭവത്തിൽ ഉൾപ്പെട്ട ബസിനെക്കുറിച്ചും ഡ്രൈവറുടെ മൊഴിയെക്കുറിച്ചും അന്വേഷണം നടത്തുന്നുണ്ട്.
അപകടത്തെക്കുറിച്ച് നേരിട്ട് കണ്ടവരോ കൂടുതൽ വിവരങ്ങൾ അറിയുന്നവരോ മുന്നോട്ടു വരണമെന്ന് സ്കോട്ട് ലൻഡ് പോലീസ് അഭ്യർഥിച്ചു. വിവരങ്ങൾ നൽകാൻ 101 എന്ന നമ്പറിൽ ബന്ധപ്പെടാം. കുട്ടിയുടെ മരണം പ്രദേശത്തെ സ്കൂൾ സമൂഹത്തിലും നാട്ടുകാർക്കിടയിലും വലിയ ദുഃഖമുണ്ടാക്കിയിട്ടുണ്ട്.
Leave a Reply