ന്യൂസ് ഡെസ്ക്, മലയാളം യുകെ

ബ്രെക്സിറ്റിനുശേഷം ബ്രിട്ടനിലെയും യൂറോപ്യൻ യൂണിയനിലെയും യുവാക്കൾക്ക് പരസ്പരം യാത്ര ചെയ്യാനും പഠിക്കാനും ജോലി ചെയ്യാനും അവസരമൊരുക്കുന്ന യൂത്ത് മൊബിലിറ്റി സ്കീം നടപ്പാക്കുന്നത് വൈകും. അടുത്ത വർഷം മുതൽ പദ്ധതി പ്രാബല്യത്തിൽ വരുമെന്ന പ്രതീക്ഷയിലായിരുന്ന 30 വയസ്സിൽ താഴെയുള്ള യുവാക്കൾക്ക് പുതിയ തീരുമാനം നിരാശയുണ്ടാക്കുന്നതാണ്. 2028ൽ കരാർ നടപ്പാക്കാനാണ് ഇരുപക്ഷവും ലക്ഷ്യമിടുന്നതെങ്കിലും പദ്ധതിയുടെ ആനുകൂല്യങ്ങൾ 2030 ജനുവരിയോടെ മാത്രമേ ലഭ്യമാകൂ എന്നാണ് ഇപ്പോഴത്തെ ധാരണ.

WhatsApp Image 2024-12-09 at 10.15.48 PM
Migration 2
AHPRA Registration
STEP into AHPRA NCNZ

പുതിയ പദ്ധതി പ്രകാരം പ്രതിവർഷം ബ്രിട്ടനിൽ നിന്നും യൂറോപ്യൻ യൂണിയനിൽ നിന്നുമായി ഏകദേശം ഒരു ലക്ഷം യുവാക്കൾക്ക് പരസ്പരം ജോലി ചെയ്യാനും പഠിക്കാനും യാത്ര ചെയ്യാനും അവസരം ലഭിച്ചേക്കും. ബ്രിട്ടനിലേക്ക് പ്രവേശിക്കുന്ന യൂറോപ്യൻ യുവാക്കളുടെ എണ്ണത്തിന് പരിധി വേണമെന്നാണ് ബ്രിട്ടന്റെ നിലപാട്. എന്നാൽ ജർമനി ഉൾപ്പെടെയുള്ള ചില യൂറോപ്യൻ രാജ്യങ്ങൾ ബ്രിട്ടീഷ് യുവാക്കൾക്ക് പ്രവേശനത്തിന് പ്രത്യേക പരിധി ഏർപ്പെടുത്തേണ്ടതില്ലെന്ന നിലപാടിലാണ്. ഓരോ രാജ്യത്തിനും അനുവദിക്കുന്ന അവസരങ്ങളുടെ എണ്ണം സംബന്ധിച്ച ചർച്ചകളും പുരോഗമിക്കുകയാണ്.

അതേസമയം, യൂറോപ്യൻ യൂണിയനുമായുള്ള ബന്ധം കൂടുതൽ ശക്തമാക്കുന്നതിൽ തിടുക്കപ്പെട്ട് തീരുമാനമെടുക്കില്ലെന്ന് പ്രധാനമന്ത്രി ആൻഡി ബേൺഹാം വ്യക്തമാക്കി. ബ്രസൽസിൽ നടക്കുന്ന ഉച്ചകോടിക്കുശേഷം ബ്രിട്ടന്റെ ഭാവി ബന്ധം സംബന്ധിച്ച് വിശദമായി വിലയിരുത്തുമെന്നും ഡിസംബറിൽ കൂടുതൽ വ്യക്തമായ നിലപാട് പ്രഖ്യാപിക്കുമെന്നും അദ്ദേഹം അറിയിച്ചു. ഭക്ഷ്യ–കാർഷിക മേഖലകളിലെ സഹകരണം, പരിസ്ഥിതി സംരക്ഷണം, യൂറോപ്യൻ രാജ്യങ്ങളിൽ പരിപാടികൾ അവതരിപ്പിക്കുന്ന ബ്രിട്ടീഷ് കലാകാരന്മാർ നേരിടുന്ന യാത്രാ തടസ്സങ്ങൾ നീക്കൽ തുടങ്ങിയ വിഷയങ്ങളും ചർച്ചയിലുണ്ട്. യൂറോപ്യൻ യൂണിയനുമായുള്ള ബന്ധം മെച്ചപ്പെടുത്താനുള്ള മുൻ നിലപാടിൽനിന്ന് പിന്നോട്ടുപോകുന്നില്ലെന്നും ബേൺഹാം വ്യക്തമാക്കി.