പഞ്ചാബില്‍ 85 സീറ്റ് നേടി ആം ആദ്മി പാര്‍ട്ടി അധികാരത്തില്‍ എത്തുമെന്നാണ് ടിവി24 നൂസിന്റെ പ്രവചനങ്ങള്‍ സൂചിപ്പിക്കുന്നത്. ആം ആദ്മി പാര്‍ട്ടിക്ക് 59 മുതല്‍ 67 വരെ സീറ്റുകള്‍ ലഭിക്കുമെന്നാണ് സീ വോട്ടര്‍ പ്രവചിക്കുന്നത്. 59 സീറ്റാണ് സര്‍ക്കാര്‍ രൂപീകരണത്തിന് വേണ്ടത്. പഞ്ചാബില്‍ ആം ആദ്മി പാര്‍ട്ടി 42 മുതല്‍ 51 വരെ സീറ്റുകള്‍ നേടുമെന്ന് ഇന്ത്യ ടുഡെ- ആക്‌സിസ് എക്‌സിറ്റ് പോള്‍ പറയുന്നു. അകാലിദള്‍-ബിജെപി സഖ്യത്തിന് പരമാവധി ഏഴു സീറ്റുകള്‍ വരെ മാത്രമേ ലഭിക്കൂ. പഞ്ചാബില്‍ കോണ്‍ഗ്രസും ആം ആദ്മി പാര്‍ട്ടിയും ഒപ്പത്തിനൊപ്പമെന്നാണ് എക്സിറ്റ് പോള്‍ ഫലങ്ങളെല്ലാം തന്നെ വ്യക്തമാക്കിയത്. ഇവിടെ, അകാലിദള്‍- ബിജെപി സഖ്യം ഏറെക്കുറെ തകര്‍ന്നടിയുമെന്നാണ് പ്രവചനങ്ങള്‍ വ്യക്തമാക്കുന്നത്.

ഗോവയില്‍ പുറത്തു വന്ന നാലില്‍ രണ്ട് സര്‍വേകളിലും തൂക്കു മന്ത്രിസഭയാണ് പ്രവചിക്കുന്നത്. നൂസ് എക്സ് – എം സി ആര്‍ എക്സിറ്റ് പോള്‍ പ്രകാരം ഒരു പാര്‍ട്ടിക്കും ഭൂരിപക്ഷമില്ല. ഇന്ത്യ ടുഡെ – ആക്‌സിസ് ബി.ജെ.പി ജയിക്കുമെന്ന് പ്രവചിക്കുന്നു. എല്ലാ സര്‍വേകളും, ഏജന്‍സികളും ആം ആദ്മി പാര്‍ട്ടി ഗോവയില്‍ ഏഴ് സീറ്റുവരെ നേടുമെന്നാണ് പ്രവചിക്കുന്നത്. തിരെഞ്ഞെടുപ്പ് ഫലം പുറത്ത് വന്നിട്ടില്ലെങ്കില്‍ കൂടി ഈ എക്സിറ്റ് പോള്‍ പ്രവചനങ്ങള്‍ എല്ലാം തന്നെ ആം ആദ്മി പാര്‍ട്ടിക്കും ലോകം മുഴുവനിലുമുള്ള ആം ആദ്മി പ്രവര്‍ത്തകര്‍ക്കും വളരെയധികം പ്രതീക്ഷയാണ് നല്‍കുന്നത്. മാധ്യമങ്ങളുടെ സഹായം ഇല്ലാതെ തന്നെ വെറും സാധാരണക്കാരുടെ പ്രവര്‍ത്തനങ്ങള്‍ കൊണ്ട് മാത്രം ഇലക്ഷനെ നേരിട്ട ആം ആദ്മി പാര്‍ട്ടി നേടുന്ന ഓരോ സീറ്റും ഒരു ദേശീയ പാര്‍ട്ടി എന്നൊരു പദവി കൂടിയാണ് നേടിയെടുക്കുന്നത്. മലയാളികള്‍ അടക്കം സൈബര്‍ ലോകത്തുള്ള ലക്ഷകണക്കിന് ആം ആദ്മി അനുഭാവികള്‍ പഞ്ചാബ് – ഗോവ വിജയങ്ങള്‍ ആഘോഷമാക്കാനുള്ള തയ്യാറെടുപ്പിലാണ്.