ന്യൂസ് ഡെസ്ക്, മലയാളം യുകെ
ഗ്രേറ്റ് ബ്രിട്ടണിലെ മുതിർന്നവർ മൊബൈൽ ഫോണുകൾ ഉപയോഗിക്കാൻ ചെലവഴിക്കുന്ന സമയം ഒടുവിൽ ടിവി കാണുന്നതിനേക്കാൾ കൂടുതലാണെന്ന റിപ്പോർട്ടുകൾ പുറത്തുവന്നു. ശരാശരി ഒരു വ്യക്തി ഏകദേശം 7.5 മണിക്കൂറാണ് എല്ലാത്തരം സ്‌ക്രീനുകളും കാണുന്നതിനായി ചിലവഴിക്കുന്നത്. പുതിയ കണ്ടെത്തലുകൾ ശാരിരിക മാനസിക ആരോഗ്യത്തെ എത്രമാത്രം ബാധിക്കും എന്ന ആശങ്കയിലാണ് ആരോഗ്യവിദഗ്തർ. വാർഷിക ടച്ച്‌ പോയന്റ്‌സ് നടത്തിയ സർവേയിലൂടെയാണ് ഈ വിവരങ്ങൾ പുറത്തുവന്നത്.
15 വയസോ അതിൽ കൂടുതലോ പ്രായമുള്ള ഒരു സാധാരണ വ്യക്തി പരമ്പര ടിവി (മൂന്ന് മണിക്കൂറും 16 മിനിറ്റും) കാണുന്നതിനേക്കാൾ കൂടുതൽ സമയം (മൂന്ന് മണിക്കൂറും 21 മിനിറ്റും) മൊബൈലിൽ ചെലവഴിക്കുന്നത് ഇതാദ്യമാണെന്നാണ് കണ്ടെത്തിയിരിക്കുന്നത്. കഴിഞ്ഞ ദശകത്തിൽ മൊബൈൽ ഫോൺ ഉപയോഗത്തിൽ സ്ഥിരമായ വർധനവാണ് ഈ നിർണായക ഘട്ടത്തിലേക്ക് നയിച്ചത്. ഇത് ഒരു ദിവസം ഒരു മണിക്കൂർ 17 മിനിറ്റിൽ നിന്ന് ഏകദേശം മൂന്നിരട്ടിയായി. ടിവി കാണൽ താരതമ്യേന സ്ഥിരതയുള്ളതായി തുടരുന്നു. 2015 ൽ ശരാശരി ദൈനംദിന കാഴ്ചയുടെ അളവ് മൂന്ന് മണിക്കൂറും 23 മിനിറ്റും മാത്രമായിരുന്നു.
ഇൻസ്റ്റിറ്റ്യൂട്ട് ഓഫ് പ്രാക്ടീഷണേഴ്‌സ് ഇൻ അഡ്വർടൈസിംഗ് (ഐപിഎ) പ്രസിദ്ധീകരിച്ച ഗവേഷണം പ്രകാരം 15 വയസ്സിനു മുകളിലുള്ളവർ ഒരു ദിവസം ശരാശരി 7.5 മണിക്കൂർ സ്‌ക്രീൻ അധിഷ്ഠിത പ്രവർത്തനങ്ങളിൽ ഏർപ്പെടുന്നുണ്ട്. മൊബൈൽ, ലാപ്‌ടോപ്പ്, ടാബ്‌ലെറ്റ്, ഗെയിം കൺസോളുകൾ, ടിവി കാണൽ എന്നിവയുൾപ്പെടെ ഒരു ദശാബ്ദം മുമ്പ് 6.5 മണിക്കൂറിൽ നിന്ന് ഉയർന്നാണ് ഈ നിലയിൽ എത്തിയത്. മീഡിയ ഉപഭോഗത്തിന്റെ പരിണാമത്തിൽ ഈ ഡേറ്റ ഒരു നാഴികക്കല്ലാണ് എന്ന് 2005 മുതൽ ടച്ച്‌പോയിന്റ്‌സ് സർവേ നടത്തുന്ന ഐപിഎയിലെ ഡെപ്യൂട്ടി റിസർച്ച് ഡയറക്ടർ ഡാൻ ഫ്ലിൻ പറഞ്ഞു. പരമ്പരാഗത ടിവിയുടെ മുന്നിൽ ഇരിക്കുന്നതിനുപകരം, യൂട്യൂബ്, ടിക് ടോക്ക്, നെറ്റ്ഫ്ലിക്സ് തുടങ്ങിയ സ്ട്രീമിംഗ് പ്ലാറ്റ്‌ഫോമുകൾ മൊബൈലിൽ കാണുന്നതിനും ഇൻസ്റ്റാഗ്രാം, ഫേസ്ബുക്ക് എന്നിവയുൾപ്പെടെയുള്ള സോഷ്യൽ മീഡിയ പ്ലാറ്റ്‌ഫോമുകൾ സ്ക്രോൾ ചെയ്യുന്നതിനും യുവതലമുറ കൂടുതൽ ഇഷ്ടപ്പെടുന്നതായും വിലയിരുത്തപ്പെടുന്നുണ്ട്.
Leave a Reply