ബിജു കുളങ്ങര 

ലണ്ടൻ ∙ ഇന്ത്യയിലെ ജനാധിപത്യവും ഭരണഘടനാ മൂല്യങ്ങളും സംരക്ഷിക്കണമെന്നാവശ്യപ്പെട്ടും തിരഞ്ഞെടുപ്പ് സംവിധാനത്തിലെ സുതാര്യത ഉറപ്പാക്കണമെന്നും ആവശ്യപ്പെട്ട് ഇന്ത്യൻ ഓവർസീസ് കോൺഗ്രസ് (ഐഒസി) യുകെ കേരള ചാപ്റ്ററിന്റെ നേതൃത്വത്തിൽ ലണ്ടനിൽ പ്രതിഷേധ സംഗമം സംഘടിപ്പിച്ചു. പാർലമെന്റ് സ്ക്വയറിലെ മഹാത്മാഗാന്ധി പ്രതിമയ്ക്ക് മുന്നിൽ നടന്ന പ്രതിഷേധത്തിൽ യുകെയുടെ വിവിധ ഭാഗങ്ങളിൽ നിന്നുള്ള ഐഒസി പ്രവർത്തകർ പങ്കെടുത്തു.

ഐഒസി യുകെ കേരള ചാപ്റ്റർ (ലണ്ടൻ) പ്രസിഡന്റ് സുജു കെ. ഡാനിയൽ  പ്രതിഷേധ സംഗമം ഉദ്ഘാടനം ചെയ്തു. ഇന്ത്യയുടെ ജനാധിപത്യ സംവിധാനവും ഭരണഘടനാ സ്ഥാപനങ്ങളും വലിയ വെല്ലുവിളികൾ നേരിടുന്ന സാഹചര്യത്തിലാണ് പ്രതിഷേധം സംഘടിപ്പിക്കുന്നതെന്ന് അദ്ദേഹം പറഞ്ഞു. ജനങ്ങളുടെ ഏറ്റവും അടിസ്ഥാനപരമായ ജനാധിപത്യ അവകാശമാണ് വോട്ട്. അതുകൊണ്ടുതന്നെ ഒരു അർഹനായ വോട്ടർക്കും വോട്ടവകാശം നഷ്ടപ്പെടുന്ന സാഹചര്യം ഉണ്ടാകരുതെന്നും തിരഞ്ഞെടുപ്പ് പ്രക്രിയയിൽ പൂർണ സുതാര്യത ഉറപ്പാക്കണമെന്നും അദ്ദേഹം ആവശ്യപ്പെട്ടു. പ്രധാനമന്ത്രി നരേന്ദ്ര മോദിയുടെ നേതൃത്വത്തിലുള്ള കേന്ദ്ര സർക്കാർ ജനാധിപത്യ സ്ഥാപനങ്ങളെ ദുർബലപ്പെടുത്തുന്ന രീതിയിലാണ് മുന്നോട്ടു പോകുന്നതെന്ന വിമർശനവും സുജു കെ ഡാനിയേൽ നടത്തി.

ചടങ്ങിൽ ഐഒസി കേരള ചാപ്റ്റർ (മിഡ്‌ലാൻഡ്സ്) പ്രസിഡന്റ് ഷൈനു ക്ലെയർ മാത്യു മുഖ്യാതിഥിയായി. ഇന്ത്യയിലെ ജനാധിപത്യവും ഭരണഘടനയും സംരക്ഷിക്കേണ്ടത് ഇന്ത്യയിൽ കഴിയുന്നവരുടെ മാത്രം ഉത്തരവാദിത്തം അല്ലെന്നും ലോകത്തിന്റെ വിവിധ ഭാഗങ്ങളിൽ കഴിയുന്ന പ്രവാസി സമൂഹത്തിനും അതിൽ നിർണായക പങ്കുണ്ടെന്നും അവർ പറഞ്ഞു. ജനാധിപത്യ സ്ഥാപനങ്ങളുടെ വിശ്വാസ്യത നിലനിർത്താൻ സുതാര്യമായ തിരഞ്ഞെടുപ്പ് പ്രക്രിയ അനിവാര്യം ആണെന്നും അവർ കൂട്ടിച്ചേർത്തു. ഐഒസി യുകെ കേരള ചാപ്റ്റർ വൈസ് പ്രസിഡന്റ് അപ്പാ ഗഫൂർ സ്വാഗതം പറഞ്ഞു.

ജനാധിപത്യ സംരക്ഷണത്തിനായുള്ള പോരാട്ടത്തിൽ പ്രവാസി സമൂഹം ഒറ്റക്കെട്ടായി നിലകൊള്ളേണ്ടതിന്റെ ആവശ്യകത അദ്ദേഹം ചൂണ്ടിക്കാട്ടി. ജനറൽ സെക്രട്ടറി അഷ്റഫ് അബ്ദുള്ള, വൈസ് പ്രസിഡന്റുമാരായ ബേബി കുട്ടി ജോർജ്, അശ്വതി നായർ, ഐഒസി യുകെ നാഷണൽ കമ്മിറ്റി വക്താവ് അജിത് മുതയിൽ, ജനറൽ സെക്രട്ടറിമാരായ അജിത് വെൺമണി, റോമി കുര്യാക്കോസ്, സെക്രട്ടറി റോണി ജേക്കബ്, ജോസഫ് കൊച്ചുപുരയ്ക്കൽ, സാജു മണക്കുഴി എന്നിവർ ആശംസകൾ അറിയിച്ചു. ട്രഷറർ ബിജു വർഗീസ് നന്ദി പറഞ്ഞു. ഇന്ത്യയിലെ ജനാധിപത്യ സംവിധാനത്തിന്റെ സംരക്ഷണം സംബന്ധിച്ച ആശങ്കകൾ അവർ പങ്കുവച്ചു. തിരഞ്ഞെടുപ്പ് കമ്മിഷന്റെ സ്വതന്ത്ര പ്രവർത്തനത്തെ കുറിച്ച് ജനങ്ങൾക്കിടയിൽ ഉയരുന്ന സംശയങ്ങൾക്ക് വ്യക്തമായ മറുപടി നൽകേണ്ടത് ഭരണകൂടത്തിന്റെ ഉത്തരവാദിത്തമാണെന്ന് നേതാക്കൾ പറഞ്ഞു. ഡൽഹിയിൽ വോട്ടർപട്ടിക പരിഷ്കരണവുമായി ബന്ധപ്പെട്ട് പ്രതിപക്ഷം ഉയർത്തുന്ന ആരോപണങ്ങളും പ്രതിഷേധങ്ങളും രാജ്യത്തെ ജനാധിപത്യ സംവിധാനത്തെക്കുറിച്ചുള്ള ഗൗരവമായ ചർച്ചയ്ക്ക് വഴിവെച്ചിരിക്കുകയാണ്. ഈ സാഹചര്യത്തിൽ പ്രവാസി ഇന്ത്യക്കാരും ജനാധിപത്യ സംരക്ഷണത്തിനായി ശബ്ദമുയർത്തേണ്ടതുണ്ടെന്ന് പ്രതിഷേധത്തിൽ പങ്കെടുത്തവർ അഭിപ്രായപ്പെട്ടു. തിരഞ്ഞെടുപ്പ് പ്രക്രിയയിൽ ജനങ്ങളുടെ വിശ്വാസം ഉറപ്പാക്കുന്നതിനും അർഹരായ എല്ലാ പൗരന്മാരുടെയും വോട്ടവകാശം സംരക്ഷിക്കുന്നതിനും ആവശ്യമായ നടപടികൾ സ്വീകരിക്കണമെന്ന ആവശ്യവും പ്രതിഷേധത്തിൽ ഉയർന്നു.

ജനാധിപത്യ സ്ഥാപനങ്ങളുടെ സ്വാതന്ത്ര്യവും ഭരണഘടന ഉറപ്പുനൽകുന്ന അവകാശങ്ങളും സംരക്ഷിക്കപ്പെടുന്നതുവരെ ഇത്തരം ജനകീയ പ്രതിഷേധങ്ങൾ തുടരുമെന്നും നേതാക്കൾ വ്യക്തമാക്കി. കേരള ചാപ്റ്റർ പിആർഒ അജി ജോർജ്, യൂത്ത് വിങ് പ്രസിഡന്റ് എഫ്രേം സാം, ഷിജൻ ജോസ് ജോസഫ്, രാജൻ പടിയിൽ, അഷറഫ് മൊയ്തീൻ എന്നിവർ സംഗമത്തിന് നേതൃത്വം നൽകി. ലണ്ടനിലെ പ്രതിഷേധം ഇന്ത്യയിലെ ജനാധിപത്യ സംരക്ഷണത്തിന് വേണ്ടിയുള്ള പ്രവാസി സമൂഹത്തിന്റെ ഐക്യദാർഢ്യം പ്രഖ്യാപിക്കുന്ന വേദിയായി മാറിയെന്നും അതിന് തെളിവാണ് നൂറുകണക്കിന് ആളുകളുടെ പങ്കാളിത്തമെന്നും ജനാധിപത്യത്തിന്റെ അടിസ്ഥാന മൂല്യങ്ങൾ സംരക്ഷിക്കുന്നതിനും ജനങ്ങളുടെ ശബ്ദത്തിന് അർഹമായ പ്രാധാന്യം ഉറപ്പാക്കുന്നതിനും തുടർന്നും ശക്തമായി ഇടപെടുമെന്ന് ഐഒസി യുകെ കേരള ചാപ്റ്റർ നേതാക്കൾ വ്യക്തമാക്കി.

ബെന്നി പെരിയപ്പുറം

വയനാട് ജില്ലയിൽനിന്നും ഇംഗ്ലണ്ടിലേക്കു കുടിയേറിയവരുടെ കൂട്ടായ്മയായ വോയിസ് ഓഫ് വയനാട് ഇൻ യുകെയുടെ പതിനാറാമത് കുടുംബസംഗമം വിവിധ പരിപാടികളോടെ സമാപിച്ചു ബ്രിസ്റ്റോളിന് സമീപം ചാർട്ടേറ്ഹൗസ് ഔട്ട്ഡോർ സെന്ററിൽവെച്ചാണ് മൂന്നുദിവസം നീണ്ടുനിന്ന ക്യാമ്പ് നടന്നത് ക്യാമ്പ് സംഗമം ചെയർമാൻ രാജപ്പൻ വർഗീസ് ഉത്ഘാടനം ചെയ്തു.

കുട്ടികളുടെയും മുതിർന്നവരുടെയും വിവിധ കലാപരിപാടികൾ വിവിധ പ്രായത്തിലുള്ളവരുടെ മത്സരങ്ങൾ തുടങ്ങിയവ ക്യാമ്പിൽ പങ്കെടുത്തവർക്ക് വലിയ അനുഭവമായി മാറി. കൂടാതെ കഴിഞ്ഞ വർഷങ്ങളിൽ നടത്തിയ ചാരിറ്റി പ്രവർത്തനങ്ങൾ വിലയിരുത്തുകയും വരും വർഷങ്ങളിൽ ചെയ്യണ്ട പ്രവർത്തനങ്ങൾക്കു രൂപം കൊടുക്കുകയും ചെയ്തു . സംഗമത്തിന് കൺവീനർമാരായ മുജീബ് അനൂപ് തോമസ് രാജപ്പൻ വർഗീസ് സജിമോൻ രാമച്ചനാട്ടു തുടങ്ങിയവർ നേതൃത്യം നൽകി . അടുത്ത വർഷത്തെ സംഗമം കോവെന്ററിയിൽ നടത്താൻ യോഗം തീരുമാനിച്ചു.

മനോജ് ജോസഫ്

ലിവർപൂൾ: ലിവർപൂൾ മലയാളി അസോസിയേഷൻ (LIMA), ജോ & മി ഓൺലൈൻ ട്യൂഷനുമായി സഹകരിച്ച് സംഘടിപ്പിച്ച ‘ലിമ ചിൽഡ്രൻസ് ഫെസ്റ്റ് 2026’ വൈവിധ്യമാർന്ന കലാമത്സരങ്ങളോടെയും കുട്ടികളുടെയും മാതാപിതാക്കളുടെയും സജീവ സാന്നിധ്യത്തോടെയും വൻ വിജയമായി മാറി. യുകെയിൽ വളരുന്ന മലയാളി കുട്ടികളുടെ സർഗ്ഗാത്മകതയും ഭാഷാസ്നേഹവും പ്രകടമാക്കുന്ന വേദിയായി ഈ കലാമാമാങ്കം മാറി.

2026, ഒക്ടോബർ പത്തിന് രാവിലെ ആരംഭിച്ച മത്സരങ്ങൾ വൈകുന്നേരം വരെ നീണ്ടു നിന്നു. പ്രാർത്ഥനാ ഗാനത്തിനു ശേഷം മൂന്ന് കുട്ടികൾ ഭഗവദ്ഗീത, വിശുദ്ധ ബൈബിൾ, വിശുദ്ധ ഖുർആൻ എന്നീ ഗ്രന്ഥങ്ങളിൽ നിന്നുള്ള വചനങ്ങൾ പാരായണം ചെയ്തുകൊണ്ട് പരിപാടിയുടെ ഔദ്യോഗിക തുടക്കം കുറിച്ചു. തുടർന്ന് നടന്ന ഉദ്ഘാടന സമ്മേളനത്തിൽ ലിവർപൂൾ മാർത്തോമാ ചർച്ച് വികാരി റവറന്റ് വിപിൻ കുരുവിള മുഖ്യാതിഥിയായി പങ്കെടുത്തു. കുട്ടികളെയും മാതാപിതാക്കളെയും അഭിസംബോധന ചെയ്തുകൊണ്ട് അദ്ദേഹം നടത്തിയ പ്രചോദനാത്മകമായ പ്രസംഗം ഏവർക്കും പുതിയൊരു ഊർജ്ജവും ചിന്തയും പകരുന്നതായിരുന്നു. വിസ്റ്റൺ ടൗൺ ഹാളിൽ പ്രത്യേകം സജ്ജീകരിച്ച രണ്ട് വ്യത്യസ്ത വേദികളിൽ നാല് വിഭാഗങ്ങളിലായാണ് (3 മുതൽ 17 വയസ്സ് വരെ) മത്സരങ്ങൾ ക്രമീകരിച്ചിരുന്നത്. പ്രമുഖ വിദ്യാഭ്യാസ സ്ഥാപനമായ ജോ & മി ഓൺലൈൻ ട്യൂഷൻ ആയിരുന്നു ഈ കലാമാമാങ്കത്തിന്റെ മുഖ്യ സ്പോൺസർ.

ചെറിയ കുട്ടികൾ പങ്കെടുത്ത ഫാൻസി ഡ്രസ്സ് മത്സരങ്ങൾ ഏറെ വേറിട്ട അനുഭവമായി. വൈവിധ്യമാർന്ന വേഷവിധാനങ്ങളിൽ സദസ്സിനു മുന്നിലെത്തിയ കുട്ടികളുടെ നിഷ്കളങ്കമായ ഭാവങ്ങളും പ്രകടനങ്ങളും കാണികളിൽ വലിയ ചിരിയും കൈയടിയും ഉണർത്തി. ഇംഗ്ലീഷ് റെസിറ്റേഷൻ, മോണോആക്ട് എന്നീ ഇനങ്ങളിൽ കുട്ടികൾ കാഴ്ചവെച്ച പ്രകടനം അവരുടെ ഭാവനാശേഷിയുടെ മികവ് വ്യക്തമാക്കുന്നതായിരുന്നു. ഇംഗ്ലണ്ടിൽ ജനിച്ച് വളരുന്ന ഈ തലമുറ തെറ്റുകൂടാതെ മലയാളം കവിതകൾ ചൊല്ലിയതും കഥ പറഞ്ഞതും പ്രസംഗിച്ചതും സദസ്സിനെ അത്ഭുതപ്പെടുത്തി. മലയാള ഭാഷ പുതിയ തലമുറയോടെ വേരറ്റു പോകുമോ എന്ന ആശങ്കകൾക്കുള്ള മറുപടി കൂടിയായി ഈ വേദികൾ. ഡ്രോയിംഗ്, കളറിംഗ്, പെയിന്റിംഗ് വേദികളിൽ കുട്ടികൾ നിറങ്ങൾ കൊണ്ട് തീർത്ത ലോകം അവരുടെ ഭാവനയുടെ ആഴം വ്യക്തമാക്കുന്നതായിരുന്നു. മലയാളത്തിലും ഇംഗ്ലീഷിലുമുള്ള സോളോ സോങ് മത്സരങ്ങളിൽ കുട്ടികൾ ശ്രുതിമധുരമായി ഗാനങ്ങൾ ആലപിച്ചതും സദസ്സിനെ ഏറെ വിസ്മയിപ്പിച്ചു.

ക്ലാസിക്കൽ ഡാൻസ്, സിനിമാറ്റിക് ഡാൻസ്, ഫോക്ക് ഡാൻസിലെ കുട്ടികളുടെ ഒത്തിണക്കവും വസ്ത്രാലങ്കാരവും വേദിയെ കൂടുതൽ വർണ്ണാഭമാക്കി. ഓരോ മത്സരാർത്ഥിക്കും പിന്നിൽ മാതാപിതാക്കൾ എടുത്ത പരിശീലനവും പ്രയത്നവും വേദികളിൽ വ്യക്തമായിരുന്നു. മത്സരത്തേക്കാൾ ഉപരി കുട്ടികൾ വേദിയെ നേരിടാൻ കാണിച്ച ധൈര്യവും അവരുടെ കളിചിരികളുമായിരുന്നു ഈ ദിവസത്തിന്റെ ഏറ്റവും വലിയ പ്രത്യേകത.

പ്രവാസമണ്ണിൽ ജനിച്ചുവളരുന്ന നമ്മുടെ കുട്ടികൾക്ക് മലയാള ഭാഷയും സംസ്‌കാരവും പകർന്നുനൽകുക എന്ന വലിയ ലക്ഷ്യത്തോടെയാണ് ലിമ ഈ വേദി ഒരുങ്ങിയത്. ജിജോ വർഗ്ഗീസ്‌, ആതിര ശ്രീജിത്ത്, കല രാജീവ് എന്നിവരുടെ നേതൃത്വത്തിൽ ലിമയുടെ എക്സിക്യൂട്ടീവ് അംഗങ്ങളും വോളന്റിയർമാരും മികച്ച ക്രമീകരണങ്ങളാണ് വിസ്റ്റൺ ടൗൺ ഹാളിൽ ഒരുക്കിയിരുന്നത്. വിധിനിർണയങ്ങൾ കുറ്റമറ്റ രീതിയിൽ പൂർത്തിയാക്കി വിജയികൾക്ക് ട്രോഫികളും സർട്ടിഫിക്കറ്റുകളും വിതരണം ചെയ്തു. മത്സരങ്ങളിൽ പങ്കെടുത്ത മുഴുവൻ കുട്ടികൾക്കും ലിമയുടെ വകയായി പ്രോത്സാഹന മെഡലുകളും സർട്ടിഫിക്കറ്റുകളും സമ്മാനിച്ചു. ലിമ കുടുംബത്തിലെ വിശിഷ്ടാതിഥികളാണ് വിജയികൾക്ക് സമ്മാനങ്ങൾ വിതരണം ചെയ്തത്. യുകെയിലെ മലയാളി സമൂഹത്തിന്റെ അടുത്ത തലമുറയെ ലിമ എത്രത്തോളം ചേർത്തുപിടിക്കുന്നു എന്നതിന്റെ സാക്ഷ്യപ്പെടുത്തലായിരുന്നു ഈ കലാമാമാങ്കം. പങ്കെടുത്ത എല്ലാ കുട്ടികൾക്കും അവരെ പ്രോത്സാഹിപ്പിച്ച മാതാപിതാക്കൾക്കും ലിമ ഭാരവാഹികൾ നന്ദി അറിയിച്ചു.

സ്സ്റ്റെഫിൻ സ്റ്റീഫൻ

സ്റ്റോമാർക്കറ്റ്: യുകെയിലെ  സ്റ്റോമാർക്കറ്റ് മലയാളി അസോസിയേഷന്റെ 2026–2027 വർഷത്തേക്കുള്ള പുതിയ ഭാരവാഹികളെയും എക്സിക്യൂട്ടീവ് കമ്മിറ്റി അംഗങ്ങളെയും തിരഞ്ഞെടുത്തു. സാബു ജോസഫ് പ്രസിഡന്റായും മോളി ടോം വൈസ് പ്രസിഡന്റായും സ്സ്റ്റെഫിൻ സ്റ്റീഫൻ സെക്രട്ടറിയായും ആന്റണി തോമസ് ജോയിന്റ് സെക്രട്ടറിയായും ചുമതലയേറ്റു.

പോൾസൺ വിതയത്തിൽ ട്രഷററായും ജോസ്മി തോമസ്, അശ്വതി രോഹിത് എന്നിവർ പ്രോഗ്രാം കോർഡിനേറ്റർമാരായും പ്രവർത്തിക്കും.

ടോമി ജോസഫ്, ഉണ്ണി കൊച്ചുമാടത്തിൽ, ജിത്തു ആന്റണി, അരുൺ കെ. രാജ്, സിന്ജിത്ത് ഫ്രാൻസിസ്, അളക രശ്മി തമ്പി, രോഹിത് രാജഗോപാലൻ എന്നിവർ എക്സിക്യൂട്ടീവ് കമ്മിറ്റി അംഗങ്ങളാണ്.

സ്റ്റോമാർക്കറ്റിലെ മലയാളി കുടുംബങ്ങളെ കൂടുതൽ ഏകോപിപ്പിക്കുകയും സാംസ്കാരിക, സാമൂഹിക, കുടുംബസൗഹൃദ പരിപാടികൾക്കും ആഘോഷങ്ങൾക്കും ചാരിറ്റി പ്രവർത്തനങ്ങൾക്കും നേതൃത്വം നൽകുകയും ചെയ്യുക എന്നതാണ് പുതിയ കമ്മിറ്റിയുടെ പ്രധാന ലക്ഷ്യം.

കേരളത്തിന്റെ സംസ്കാരവും പാരമ്പര്യവും പുതുതലമുറയിലേക്ക് പകർന്നുനൽകുന്നതിനൊപ്പം, എല്ലാ കുടുംബങ്ങളെയും ഉൾക്കൊള്ളുന്ന സൗഹൃദത്തിന്റെയും കൂട്ടായ്മയുടെയും വേദിയായി അസോസിയേഷനെ കൂടുതൽ ശക്തിപ്പെടുത്തുന്നതിനുള്ള പ്രവർത്തനങ്ങൾക്കായിരിക്കും പുതിയ നേതൃത്വം മുൻഗണന നൽകുക.

ജാഗി ജോസഫ്

ഗ്ലോസ്റ്റര്‍ കിംഗ്സ് ഓള്‍ യുകെ ടഗ് ഓഫ് വാര്‍ ടൂര്‍ണമെന്റില്‍ സ്റ്റോക്ക് ലയേണ്‍സ് ചാമ്പ്യന്മാരായി ; രണ്ടാം സ്ഥാനത്ത് സ്റ്റോക്ക് ലയണ്‍ വാരിയേഴ്സും മൂന്നാം സ്ഥാനത്ത് വൂസ്റ്റര്‍ തെമ്മാഡീസും നാലാം സ്ഥാനത്ത് കൊമ്പന്‍സ് ബ്ലൂവും വിജയം സ്വന്തമാക്കി. 17 ടീമുകളാണ് മത്സരത്തില്‍ മാറ്റുരച്ചത്.

ക്ലബ് പ്രസിഡന്റ് ജോജി തോമസിന്റെ സ്വാഗതപ്രസംഗത്തോടെ ഉത്ഘാടന പരിപാടികള്‍ക്ക് തുടക്കമായി. ഉദ്ഘാടനത്തിന് മേയറുടെ സാന്നിധ്യം ശ്രദ്ധേയമായി. ഗ്ലോസ്റ്ററിലെ മലയാളി കൂട്ടായ്മയുടെ നേതൃത്വത്തില്‍ സംഘടിപ്പിച്ച വടംവലി മത്സരം വന്‍ ആവേശത്തോടെയാണ് ഏവരും ഏറ്റെടുത്തത്.

ക്ലബിന്റെ രൂപീകരണത്തിനും പ്രവര്‍ത്തനങ്ങള്‍ക്കും പിന്നില്‍ നിര്‍ണായക പങ്കുവഹിച്ച അജിത് അഗസ്റ്റിനും അജയ്യും ജോജി തോമസും ഉള്‍പ്പെടെയുള്ള ഒരു പറ്റം ചെറുപ്പക്കാരുടെ കൂട്ടായ പരിശ്രമത്തിന്റെ ഫലമാണ് ഇന്നത്തെ ഈ മികവുറ്റ ക്ലബ് . ക്ലബിന്റെ ആദ്യകാല പ്രവര്‍ത്തനം മുതലിങ്ങോട്ടുള്ള കാര്യങ്ങള്‍ ചടങ്ങില്‍ പങ്കുവച്ചു, വടംവലിയ്ക്ക് കായികമേഖലയിലെ പ്രാധാന്യത്തെ കുറിച്ച് മനോജ് സെബാസ്റ്റിയന്‍ മേയര്‍ക്ക് മനസിലാക്കി നല്‍കുകയും ചെയ്തു.

കായികമത്സരങ്ങളോട് ഏറെ താല്‍പര്യമുള്ള മേയര്‍ പരിപാടിയില്‍ പങ്കെടുക്കുകയും വൈകീട്ട് വരെ പരിപാടിയുടെ ഭാഗമാകുകയും ചെയ്തു. റിബണ്‍ മുറിച്ച് മേയര്‍ മത്സരം ഔദ്യോഗികമായി ഉദ്ഘാടനം ചെയ്തു. യുകെയിലെ പ്രമുഖ വടംവലി റഫറിയായ ബിജോ പാറശ്ശേരില്‍ മത്സരത്തിന്റെ റഫറിയായി പ്രവര്‍ത്തിച്ചു. 17 ടീമുകള്‍ 64 പൂള്‍ വലിയില്‍ മാറ്റുരച്ച മത്സരത്തില്‍ നിന്ന് എട്ട് ടീമുകള്‍ ക്വാര്‍ട്ടര്‍ ഫൈനലിലേക്ക് യോഗ്യത നേടി. തുടര്‍ന്ന് സെമിഫൈനല്‍, ഫൈനല്‍ മത്സരങ്ങളിലൂടെ വിജയികളെ കണ്ടെത്തി. യുകെയിലെ പ്രമുഖ മോര്‍ട്ട്ഗേജ് അഡൈ്വസിങ് സ്ഥാപനമായ ഇന്‍ഫിനിറ്റി മോര്‍ട്ട്ഗേജ് ഡയറക്ടര്‍ ജെഗി ജോസഫ് വിജയികള്‍ക്ക് 1101 പൗണ്ടും ട്രോഫിയും സമ്മാനിച്ചു.

രണ്ടാം സമ്മാനമായ 701പൗണ്ട് ലോ ആന്‍ഡ് ലോയേഴ്‌സും മൂന്നാം സമ്മാനം 501പൗണ്ട് ഫ്രണ്ട്‌സ് മലയാളിയുമാണ് സ്‌പോണ്‍സര്‍ ചെയ്തിരുന്നത്. നാലാം സ്ഥാനത്തെത്തിയവര്‍ക്ക് ടാലി അക്കൗണ്ടിങ്ങും സമ്മാനം നല്‍കി. പരിപാടിയുടെ ഭാഗമായി റാഫിള്‍ നറുക്കെടുപ്പും സംഘടിപ്പിച്ചു. റാഫിള്‍ നറുക്കെടുപ്പ് തത്സമയം നടത്തി വിജയികള്‍ക്ക് സമ്മാനങ്ങള്‍ കൈമാറി. ഒന്നാം സമ്മാനമായി ഇരുനൂറ് പൗണ്ടിന്റെ സൈക്കിളാണ് നല്‍കിയത്.ഇരുപതോളം സമ്മാനങ്ങള്‍ ഉണ്ടായിരുന്നു. ഗ്ലോസ്റ്ററിലെ കായിക പ്രേമികള്‍ ഒന്നടങ്കം പരിപാടിയുടെ ഭാഗമായതോടെ ഗ്ലോസ്റ്റര്‍ കിംഗ്സ് ടഗ് ഓഫ് വാര്‍ ടൂര്‍ണമെന്റ് ഏവര്‍ക്കും മറക്കാനാകാത്ത മത്സരമായി മാറി.

റോച്ചസ്റ്റർ: യുകെയിലെ മലയാളി സമൂഹത്തിന്റെ പ്രധാന ആരാധനാലയമായ കെന്റ് അയ്യപ്പ ക്ഷേത്രത്തിൽ (1 Northgate, Rochester, ME1 1LS) ഈ വർഷത്തെ നവരാത്രി ആഘോഷങ്ങൾ വിപുലമായ പരിപാടികളോടെ നടക്കും.

നവരാത്രി ആഘോഷത്തിന്റെ ഭാഗമായി ഒക്ടോബർ 18, ഞായറാഴ്ച വൈകിട്ട് 6 മണി മുതൽ 8.30 വരെ ക്ഷേത്രാങ്കണത്തിൽ കലാസന്ധ്യ അരങ്ങേറും. പ്രശസ്ത നർത്തകർ അണിനിരക്കുന്ന നൃത്ത പരിപാടികളാണ് ഒരുക്കിയിരിക്കുന്നത്.

പങ്കെടുക്കുന്ന നർത്തകർ :
1 . സുചിത്ര കൊച്ചുവീട്ടിൽ – BFA Bharatanatyam, RLV കുമാരിയുടെയും ഡോ. പത്മിനി കൃഷ്ണന്റെയും ശിഷ്യ.

2 . ⁠അരുണിമ ജയൻ – സുന്ദരേശൻ മാസ്റ്ററുടെ (സുന്ധരോധയ കലാക്ഷേത്രം) ശിഷ്യ.
3 . വിനീത് വിജയകുമാർ പിള്ള – കഥകളി, കലാമണ്ഡലം വിജയകൃഷ്ണൻ ഉണ്ണിത്താന്റെ ശിഷ്യൻ

4 . രമ്യ അരുണ്‍കൃഷ്ണൻ (ദൂരദർശൻ ഗ്രേഡഡ് ആർട്ടിസ്റ്റ്) – ‘ഹര സ്പേസ് ഫോർ ഡാൻസിന്റെ’ സ്ഥാപക, ഗുരു ശ്രീ ഹരിപദ്മന്റെ ശിഷ്യ.

5 . കീർത്തന ജിതേഷ് – ഭരതനാട്യം നർത്തകി

അന്നേ ദിവസം പൂജ വെയ്പ്പ് വൈകിട്ട് 5.30 മുതൽ 8.30 വരെ ഉണ്ടായിരിക്കും.

വിജയദശമി ആഘോഷം – വിദ്യാരംഭം:
വിജയദശമി ദിനമായ 2026 ഒക്ടോബർ 21, ബുധനാഴ്ച രാവിലെ 10 മണി മുതൽ 12 മണി വരെ വിദ്യാരംഭ ചടങ്ങുകൾ നടക്കും.

രാവിലെ: ഗണപതി ഹോമം, വിദ്യാരംഭം
വൈകിട്ട്: ദീപാരാധന

കുട്ടികളെ ആദ്യാക്ഷരം കുറിക്കുന്ന ചടങ്ങിൽ പങ്കെടുപ്പിക്കാൻ ആഗ്രഹിക്കുന്നവർക്ക് മുൻകൂട്ടി രജിസ്റ്റർ ചെയ്യാവുന്നതാണ്. വിശേഷാൽ ഒറ്റയപ്പം നിവേദ്യം (ഗണപതിക്ക്) , അയ്യപ്പനും മറ്റു ദേവീദേവന്മാർക്കും വഴിപാടുകളും ചെയ്യാവുന്നതാണ്.

എല്ലാ ഭക്തജനങ്ങളെയും കുടുംബ സമേതം ക്ഷേത്രത്തിലേക്ക് സ്വാഗതം ചെയ്യുന്നതായി ക്ഷേത്ര കമ്മിറ്റി അറിയിച്ചു.

കൂടുതൽ വിവരങ്ങൾക്ക്:
ഫോൺ: 07838170203, 07985245890
വെബ്സൈറ്റ്: www.kentayyappatemple.org

അപ്പച്ചൻ കണ്ണഞ്ചിറ

ബാസിൽഡൺ: ജനപ്രിയ നേതാവും, വികസനോന്മുഖനും, മുന്‍ മുഖ്യമന്ത്രിയുമായ അന്തരിച്ച ഉമ്മന്‍ചാണ്ടിയുടെ മണ്ഡലമെന്ന നിലയിലും, ജോര്‍ജിയന്‍ തിര്‍ത്ഥാടന കേന്ദമായ പുതുപ്പള്ളി, മരിയന്‍ തിര്‍ത്ഥാടന കേന്ദമായ മണര്‍കാട് പള്ളി, പനച്ചികാട് മൂകാംബിക ദേവി ക്ഷേത്രം തുടങ്ങിയ പുണ്യ കേന്ദ്രങ്ങളാലും ശ്രദ്ധേയമായ പുതുപ്പള്ളിക്കാർ ബാസിൽഡണിൽ ഒത്തു കൂടുന്നു. കാര്‍ഷിക-നാണൃ വിളകളുടെ ഈറ്റില്ലവും, ലോക പ്രശസ്ത ‘വാകത്താനം വരിക്ക ചക്ക’യുടെ പ്രഭവകേന്ദ്രം അടക്കം നിരവധിയായ വിശേഷണങ്ങള്‍ക്കൊണ്ട് ശ്രദ്ധേയമായ പുതുപ്പള്ളി മണ്ഡലത്തിലെ പ്രവാസികള്‍ തങ്ങളുടെ സൗഹൃദ മേള ഏറെ പ്രൗഢിയോടെ നടത്തുവാനുള്ള ഒരുക്കങ്ങൾ പൂർത്തിയായതായി സംഘാടകർ അറിയിച്ചു.

പുതുപ്പള്ളിയുടെ സ്നേഹാദരമായ സ്മൃതികളും, സൗഹൃദങ്ങളും പങ്കു വെക്കുവാനും, ബന്ധങ്ങൾ പുതുക്കുവാനും, നാടിനോടുള്ള പ്രതിബദ്ധതയും സ്നേഹവും ചേർത്തു പിടിക്കുവാനും യുകെയുടെ നാനാ ഭാഗത്തു നിന്നും കുഞ്ഞൂഞ്ഞിന്റെ നാട്ടുകാരെത്തും. പതിനാലാമത് പുതുപ്പള്ളി മണ്ഡലം സംഗമത്തിന്റെ പ്രാഥമിക ഘട്ടം പൂര്‍ത്തിയായപ്പോള്‍ തന്നെ നിരവധി കുടുംബങ്ങള്‍ പേരുകള്‍ രജിസ്റ്റര്‍ ചെയ്തു കഴിഞ്ഞു.

ഒക്ടോബര്‍ 10 ശനിയാഴ്ച ബാസിൽഡണ്ണിലെ ഗാബിൽ ഹാളില്‍ രാവിലെ 9 മണി മുതല്‍ വൈകിട്ട് 8 മണിവരെയാണ് കുടുംബ സംഗമം ക്രമീകരിച്ചിരിക്കുന്നത്. പുതുപ്പള്ളി സംഗമം ഗംഭീര ആഘോഷമാക്കുവാൻ വാകത്താനം, മണര്‍കാട്, പുതുപ്പളളി, മീനടം, പാമ്പാടി, തിരുവഞ്ചുര്‍, പനച്ചികാട്, കുറിച്ചി, കങ്ങഴ അകലക്കുന്നം എന്നിവിടങ്ങളില്‍ നിന്നുള്ളവര്‍ ചെറു ഗ്രൂപ്പുകളായി പ്രത്യേക ഒരുക്കങ്ങളും ഇതോടൊപ്പം നടത്തുന്നുണ്ട്.

നാടിന്റെ സ്മൃതി ഉണര്‍ത്തുന്ന പങ്കുവെക്കലുകളും, വാശിയേറിയ പകിടകളി, നാടന്‍ പന്തുകളി, വടംവലി എന്നീ മത്സരങ്ങളോടൊപ്പം ഗാനമേളയും സംഗമ മേളത്തിന് കൊഴുപ്പേകും. സംഗമത്തില്‍ പങ്കുചേരുന്നവര്‍ക്കായി പ്രഭാത ഭക്ഷണവും, ഉച്ച ഊണും ഒരുക്കുന്നതാണ്. വൈകുന്നേരം ലൈവ് നാടന്‍ തട്ടുകട കൂടി ഒരുങ്ങുമ്പോൾ വൃതൃസ്ത രൂചിക്കുട്ടുകളിലുള്ള ഭക്ഷണ വിഭവങ്ങള്‍ ആസ്വദിക്കുവാനുള്ള അവസരമാവും പുതുപ്പള്ളിക്കാര്‍ക്ക് ലഭിക്കുക.

യുകെയിലെ മുഴുവന്‍ പുതുപ്പള്ളി മണ്ഡലക്കാരും തങ്ങളുടെ കുടുംബ സംഗമ വേദിയില്‍ എത്തിച്ചേരണമെന്ന് സംഘാടക സമിതി സ്‌നേഹപൂര്‍വ്വം അഭ്യര്‍ത്ഥിക്കുന്നു.

കുടുതല്‍ വിവരങ്ങള്‍ക്ക്:
ബ്ലസ്സൺ : 7514399699
റോണി: 07886997251
Venue: Mossbourne Fabbing Academy & Gable Hall School, Stanford le Hope Southend Road,
Basildon SS1 7 8JT

അപ്പച്ചൻ കണ്ണഞ്ചിറ

നോർത്താംപ്ടൻ: കുന്നുംകുളത്തു നിന്ന് യു കെ യിലേക്ക് കുടിയേറിയ പ്രവാസികളുടെ കുടുംബ സംഗമവും, കുന്നുംകുളം മിനി പെരുന്നാളും നോർത്തംപ്ട്ടനിൽ ഒക്ടോബർ 18 ന് ഞായറാഴ്ച്ച നടത്തപ്പെടും. കുന്നുകളും, കുളങ്ങളും നിറഞ്ഞ കുന്നംകുളത്തിന്റെ ആഘോഷപ്പെരുമയുടെയും, ഒറിജിനലിനെ വെല്ലുന്ന വ്യാവസായിക പ്രൗഢിയും, ബഹുസാംസ്കാരികതയും സംഗമിക്കുന്ന വേദിയാകും നോർത്താംപ്ടണിലെ മന്നാ ബോൾറൂം. തനതു ഭാഷാ ശൈലിയും, നർമ്മ സംഭാഷണവും, പുസ്തക നഗരിയുടെ അഭിമാനവും, മതമൈത്രിയുടെ ചാരുതയും ചേർത്തു പിടിച്ച് കൂടുവാൻ കുന്നംകുളവുമായി ബന്ധമുള്ളവരേവരുടെയും പങ്കാളിത്തം പ്രതീക്ഷിക്കുന്നതായി സംഘാടകർ അഭ്യർത്ഥിച്ചു.

കുന്നംകുളത്തിന്റെ ആഘോഷപാരമ്പര്യവും നാട്ടുഭാവവും യുകെയിൽ നിലനിർത്തുന്നതിനായി രൂപംകൊണ്ട “കുന്നംകുളത്തുകാർ യുകെ’ കൂട്ടായ്മയുടെ പ്രഥമ സംഗമമാവും ഒക്ടോബർ 18 ന് നോര്ത്താംപ്ടനിൽ നടക്കുക. മിനി പെരുന്നാളിൽ വിവിധ കലാ-സാംസ്കാരിക പരിപാടികളും ഉൾപ്പെടുത്തിയിട്ടുണ്ട്. ചെണ്ടമേളവും ആധുനിക സംഗീതവും സമന്വയിപ്പിച്ച് ഒരുക്കുന്ന ‘ഡിജെ ഫ്യൂഷൻ വിത്ത് ഡ്രം’ മിനി പെരുന്നാളിലെ ഹൈലൈറ്റാവും.

യുകെയിലെ കുന്നംകുളം സ്വദേശികളെ ഒരുമിച്ച് കൂട്ടുകയും, പരസ്പര സൗഹൃദവും, സഹകരണവും ശക്തിപ്പെടുത്തുകയും, നാട്ടിന്റെ ഓർമ്മകളും ഗാഢ ബന്ധവും ഊഷ്മളമാക്കുന്നതിനും കൂട്ടായ്മ ലക്ഷ്യമിടുന്നു. കുന്നംകുളത്തിന്റെ ഉത്സവ പാരമ്പര്യവും, പുതിയ തലമുറയുടെ കലാ-സംഗീത അഭിരുചികളും ഒരുമിപ്പിക്കുന്ന വേദികൂടിയായിരിക്കും “മിനി പെരുന്നാൾ”.

ഭാവിയിൽ പൂരം, പെരുന്നാൾ തുടങ്ങിയ ആഘോഷങ്ങളുമായി കൂടുതൽ വിപുലമായ സാംസ്കാരിക- ആഘോഷ പരിപാടികൾ സംഘടിപ്പിക്കുവാനും കൂട്ടായ്മ്മക്ക് പദ്ധതിയുണ്ടെന്ന് സംഘാടകർ അറിയിച്ചു.

യുകെയിലെ കുന്നംകുളം സ്വദേശികളെയും കുന്നംകുളവുമായി ബന്ധമുള്ള എല്ലാവരെയും മിനി പെരുന്നാളിന്റെ സ്നേഹസംഗമത്തിലേക്ക് സസ്നേഹം സ്വാഗതം ചെയ്യുന്നതായി സംഘാടകർ അറിയിച്ചു.

Coordinators
Nithun j panakkal : +44 7395 134567
Emmanuvel c grigary : +44 7405 351792

Venue: Manna Food Corner, Unit 2B, Sol Central,
Northampton, NN1 1SR

​ഗ്ലാസ്ഗോ: ഗിരിശൃംഗങ്ങളുടെ മനോഹാരിത ചിപ്പിക്കുള്ളിലെ മുത്തുപോലെ നെഞ്ചിലേറ്റുന്ന സ്കോട്ട്ലാൻഡിന്റെ മണ്ണിൽ, പ്രവാസി മലയാളി സമൂഹത്തിന്റെ ഐക്യവും പുരോഗതിയും ലക്ഷ്യമിട്ട് 2018-ൽ തിരിതെളിയിച്ച യുണൈറ്റഡ് സ്കോട്ട്ലാൻഡ് മലയാളി അസോസിയേഷൻ (USMA) പ്രതീക്ഷകളുടെ പുതിയ ഉന്നതികളിലേക്ക് ചിറകടിച്ചുയരുന്നു. സ്കോട്ട്ലാൻഡിലുടനീളം പടർന്നുപന്തലിച്ച 20 അംഗ അസോസിയേഷനുകളുടെ അടിയുറച്ച പ്രാതിനിധ്യത്തോടെ, ഇവിടുത്തെ മലയാളി മനസ്സുകളുടെ അവിഭാജ്യ ഘടകമായി “ഉസ്‌മ”.എന്ന സംഘടന വളർന്നിരിക്കുന്നു.

​മികച്ച സംഘാടന മികവിലൂടെയും മാതൃകാപരമായ പ്രവർത്തനങ്ങളിലൂടെയും സ്കോട്ട്ലാൻഡിലെ മലയാളി സമൂഹത്തിന്റെ സമഗ്രമായ ഉന്നമനം ലക്ഷ്യമാക്കി മുന്നേറുന്ന USMAയുടെ 2026–28 വർഷത്തേക്കുള്ള പുതിയ ഭരണസമിതി നിലവിൽ വന്നു. അംഗ അസോസിയേഷനുകളുടെ പൂർണ്ണ പങ്കാളിത്തത്തോടെ നടന്ന പൊതുതിരഞ്ഞെടുപ്പിൽ, സ്കോട്ട്ലാൻഡിലെ പൊതുവേദികളിൽ തങ്ങളുടെ നേതൃത്വപാടവവും കർമ്മശേഷിയും തെളിയിച്ച പ്രഗല്ഭരായ വ്യക്തിത്വങ്ങളാണ് തെരഞ്ഞെടുക്കപ്പെട്ടിട്ടുള്ളത്.

​സംഘടനയുടെ നവസാരഥികളായി പ്രസിഡന്റായി ജെയിംസ് മാത്യു (Glasgow), സെക്രട്ടറിയായി അബീസൺ ജോസ് (Livingston), ട്രഷററായി ഷിബു സേവ്യർ (Falkirk) എന്നിവരും മറ്റു കമ്മിറ്റി അംഗങ്ങളും അധികാരമേറ്റു.
​സ്കോട്ട്ലാൻഡ് മലയാളി സമൂഹത്തിന് ഏറെ അഭിമാനവും ആവേശവും പകരുന്നതാണ് ഈ നേതൃമാറ്റം. സംഘടനയെ കൂടുതൽ കർമ്മനിരതമാക്കാനും പ്രവാസി ജീവിതത്തിന് സാന്ത്വനവും തണലുമാകാനും പുതിയ ഭരണസമിതിക്ക് സാധിക്കട്ടെ എന്ന് ആശംസിക്കുന്നു.

​യുണൈറ്റഡ് സ്കോട്ട്ലാൻഡ് മലയാളി അസോസിയേഷന്റെ നവസാരഥികൾക്ക് ഹൃദയപൂർവ്വമായ അഭിനന്ദനങ്ങളും മംഗളാശംസകളും നേരുന്നു. മലയാളി സമൂഹത്തിന് പുത്തനുണർവും പ്രതീക്ഷകളും സമ്മാനിച്ച് USMA വിജയപാതയിൽ കൂടുതൽ ഉയരങ്ങളിലേക്ക് പ്രജ്വലമായി മുന്നേറട്ടെ!
​പുതിയ ഭരണസമിതിക്ക് ഒരിക്കൽ കൂടി ഹൃദയം നിറഞ്ഞ ആശംസകൾ

ബെന്നി അഗസ്റ്റിൻ

വോർസെസ്റ്റർ: ചിറ്റാരിക്കാൽ സ്വദേശികളുടെയും കുടുംബങ്ങളുടെയും സൗഹൃദ കൂട്ടായ്മയായ ചിറ്റാരിക്കാൽ സംഗമം യുകെ 2026 സെപ്റ്റംബർ 26-ന് വോർസെസ്റ്ററിൽ ആവേശപൂർവ്വം നടന്നു. വോർസെസ്റ്ററിലെ 136, റോങ്ക്സ്‌വുഡ് ഹബ്, കാൻറർബറി റോഡ്, WR5 1PJ എന്ന വേദിയിൽ രാവിലെ 9.30 മുതൽ വൈകുന്നേരം 4 മണിവരെ നടന്ന സംഗമത്തിൽ യുകെയുടെ വിവിധ ഭാഗങ്ങളിൽ നിന്നുള്ള ചിറ്റാരിക്കാൽ സ്വദേശികളും കുടുംബാംഗങ്ങളും പങ്കെടുത്തു.

ബിനോയ് പുതിയമംഗലം സംഗമത്തിലെ ചീഫ് ഗസ്റ്റായി പങ്കെടുത്തു. അദ്ദേഹത്തിന്റെ സാന്നിധ്യം പരിപാടിക്ക് പ്രത്യേക ശ്രദ്ധയും ആവേശവും നൽകി. യുകെയിൽ സ്ഥിരതസമാസമാക്കിയ റോസമ്മ മടത്തിമ്യാലിയും സംഗമത്തിലേ അതിഥിയായി സന്നിഹിത ആയിരുന്നു. മുഖ്യ അതിഥികളും സംഘാടക കമ്മിറ്റിയെ പ്രതിനിധീകരിച്ചു ജിബു ജേക്കബ് നടുവിലേക്കൂറ്റ്, ജോസഫ് മാത്യു ഇലഞ്ഞിമറ്റം, ഷിന്ടോ ജോസ് തെക്കേപറമ്പിൽ എന്നിവർ ഒരുമിച്ചു നിലവിളക്കിന് ദീപം തെളിച്ചുകൊണ്ട് സമ്മേളനത്തിന് തിരശീല ഉയർന്നു.

നാടിന്റെ ഓർമ്മകളും സൗഹൃദങ്ങളും കുടുംബബന്ധങ്ങളും പുതുക്കിയെടുക്കുന്നതിനുള്ള മനോഹരമായ അവസരമായി സംഗമം മാറി. വർഷങ്ങളായി യുകെയിൽ താമസിക്കുന്ന ചിറ്റാരിക്കാൽ സ്വദേശികൾക്ക് പഴയ സൗഹൃദങ്ങൾ പുതുക്കാനും പുതിയ തലമുറയ്ക്ക് സ്വന്തം നാടിന്റെയും പാരമ്പര്യത്തിന്റെയും ബന്ധം പരിചയപ്പെടുത്താനും സംഗമം വേദിയായി.

വിവിധ കലാപരിപാടികളും വിനോദ പരിപാടികളും സംഗമത്തിന് മാറ്റുകൂട്ടി. കുട്ടികളും മുതിർന്നവരും ഒരുപോലെ സജീവമായി പങ്കെടുത്തത് പരിപാടിയുടെ പ്രത്യേകതയായി. കാര്യപരിപാടിയുടെ എംസി ആയി ജിനു അനൂപ് ഏറ്റെടുത്തപ്പോൾ ജോർജ്കുട്ടി തെക്കേകാരോട്ട് കലാപരിപരിപാടികൾക്കും നേതൃത്വം നൽകി.

ചിറ്റാരിക്കാലിന്റെ സാമൂഹികവും സാംസ്കാരികവുമായ പൈതൃകം യുകെയിലും നിലനിർത്തുന്നതിനും വിവിധ കുടുംബങ്ങളെ ഒരുമിപ്പിക്കുന്നതിനും ഇത്തരം കൂട്ടായ്മകൾക്ക് വലിയ പ്രാധാന്യമുണ്ടെന്ന് സംഘാടകർ
അഭിപ്രായപ്പെട്ടു.

പങ്കെടുത്ത എല്ലാവർക്കും നന്ദി അറിയിച്ചുകൊണ്ട് അടുത്ത വർഷങ്ങളിലും കൂടുതൽ വിപുലമായ രീതിയിൽ ചിറ്റാരിക്കാൽ സംഗമം യുകെ സംഘടിപ്പിക്കാനുള്ള പ്രതീക്ഷയിലാണ് സംഘാടകർ.

ഈ വർഷത്തെ സംഘാടകർ വോർസെസ്റ്റർ കൗണ്ടിയിൽ താമസിക്കുന്ന ശ്രീ ജോസഫ് മാത്യു ഇലഞ്ഞിമറ്റത്തിന്റെ നേതൃത്വത്തിൽ സ്വാഗതസംഘം രൂപീകരിക്കുകയും, ചിറ്റാരിക്കാൽ സംഗമം യുകെയുടെ സെൻട്രൽ കമ്മറ്റിയുടെ നേതൃത്വത്തിൽ സമ്മേളനത്തിന് ഒരുക്കങ്ങൾ നടത്തി ഈ വർഷത്തെ ചിറ്റാരിക്കാൽ സംഗമം അവിസ്മരണീയമാക്കി. അടുത്ത സംഗമം ലൂട്ടനിൽ ജോസഫ് ഇളയനിതോട്ടത്തിലിന്റെ നേതൃത്വത്തിൽ നടത്തിവാൻ സംഗമം തീരുമാനിച്ചു. ചിറ്റാരിക്കാൽ സംഗമം യുകെ കമ്മിറ്റി അംഗങ്ങളായ ബെന്നി അഗസ്റ്റിൻ കിഴക്കേൽ, ജിബു ജേക്കബ്, ഷിന്ടോ ജോസ്, ജോർജ് തെക്കേകാരോട്ട്, ഷിജു മടത്തിമ്യാലി, ജോസഫ് ഇളയയാനിത്തോട്ടം എന്നിവർ കഴിഞ്ഞ കാലങ്ങളിൽ സംഗമത്തിന്റെ ചാരിറ്റി പ്രവർത്തനങ്ങളിൽ സഹകരിച്ച എല്ലാ അംഗങ്ങളെയും അഭിനന്ദിക്കുകയും നന്ദി പറയുകയും ചെയ്തുകൊണ്ടും വരും കാലങ്ങളിൽ അംഗങ്ങളിൽ നിന്നും കൂടുതൽ സഹകാരണം പ്രതീക്ഷിക്കുന്നു എന്നും അറിയിച്ചുകൊണ്ട് ഈ വർഷത്തെ സംഗമത്തിന് തിരശ്ശീല വീണു.