സമീക്ഷ യുകെയുടെ നാലാമത് ഓൾ യുകെ വടംവലി മത്സരം ഈ വർഷം ബർമിംഗ്ഹാമിലെ
ടിപ്ട്ടൊൺ സ്പോർട്സ് അക്കാദമിയിൽ വെച്ച് ഒക്ടോബർ 18 നു നടക്കും. യുകെയിലെ വടംവലി ടൂർണമെന്റുകളിൽ പ്രഥമ സ്ഥാനത്തുള്ള ഈ ടൂർണമെന്റിൽ യുകെയിലെ പ്രമുഖ ടീമുകളെല്ലാം തന്നെ അണിനിരക്കും. വനിതകളുടെ മത്സരത്തിനും സമീക്ഷ തുടക്കം കുറിക്കുന്നു എന്നൊരു പ്രത്യേകത കൂടി ഈ വർഷത്തെ ടൂർണ്ണമെന്റിനുണ്ട്.

ഈ കായിക മാമാങ്കത്തിന്റെ മാറ്റുകൂട്ടാൻ വിവിധ കലാ പരിപാടികളും വേദിയിൽ അരങ്ങേറും. ഇതിന്റെ പ്രവർത്തനങ്ങൾ അണിയറയിൽ പുരോഗമിക്കുന്നതായി സംഘാടകർ അറിയിച്ചു. പരിപാടി ആസ്വദിക്കാൻ എത്തുന്നവർക്ക് കേരം റെസ്റ്റോറന്റ് ഒരുക്കുന്ന സ്വാദിഷ്ടമായ കേരളീയ ഭക്ഷണങ്ങൾ ആസ്വദിക്കുന്നതിനുള്ള സൗകര്യവും ഉണ്ടാകും. കായിക പ്രേമികളെ ഹരം കൊള്ളിക്കുന്ന വാശിയേറിയ വടം വലി മത്സരവും,
മനസ്സിനു ആനന്ദം നൽകുന്ന കലാ പ്രകടനവും, നാടൻ ഭക്ഷണ ശാലയും ഒക്കെ ചേർന്ന്
ഗൃഹാതുരത്വം നിറയുന്ന ഒരു വേദിയാകും ബർമിംഗ്ഹാമിൽ നിങ്ങൾക്കായി ഒരുങ്ങുക. യുകെ മലയാളികളെ കുടുംബസമേതം ഈ വേദിയിലേക്ക് സമീക്ഷ സ്വാഗതം ചെയ്യുന്നതായി ഭാരവാഹികൾ അറിയിച്ചു.

വടം വലി ഒരു മത്സരം മാത്രമല്ല, ഒരുമയുടെയും കരുത്തിന്റെയും ആത്മവിശ്വാസത്തിന്റെയും പ്രതീകം കൂടി ആണ്. വനിതകളുടെ പങ്കാളിത്തത്തോടെ ഈ വേദിയിൽ കരുത്തിന്റെ, ആത്മവിശ്വാസത്തിന്റെ, ഒരുമയുടെയും ഈ കായിക മാമാങ്കം അവരിലൂടെ ആഘോഷിക്കപ്പെടും. യുകെയുടെ വിവിധ ഭാഗങ്ങളിൽ നിന്നുള്ള വനിതാ ടീമുകൾ മത്സരത്തിന്റെ ഭാഗമാകും. ആവേശകരമായ മത്സരങ്ങൾക്കും മനോഹരമായ
ഓർമകൾക്കും ഈ വേദി ഒക്ടോബർ 18 നു സാക്ഷിയാകും.

ഒന്നാമതെത്തുന്നവർക്ക് സമീക്ഷയുടെ എവർറോളിങ് ട്രോഫിയും സ്ഥിരം ട്രോഫിയും 1504 പൗണ്ടും അടങ്ങുന്ന സമ്മാനം ലഭിക്കും. 704 പൗണ്ടാണ് രണ്ടാം സ്ഥാനക്കാരെ കാത്തിരിക്കുന്നത്. മൂന്നും നാലും സ്ഥാനക്കാർക്ക് 304 പൗണ്ടും 204 പൗണ്ടും ലഭിക്കും. അഞ്ച് മുതല്‍ എട്ട് സ്ഥാനം വരെയുള്ളവർക്ക് പ്രോത്സാഹന സമ്മാനമായി
104 പൗണ്ടാണ് ലഭിക്കുക. ജേതാക്കള്‍ക്ക് സമ്മാനത്തുകയ്ക്ക് പുറമെ ട്രോഫികളും കൈമാറും.

ഈ സമ്മാനങ്ങൾക്കു പുറമെ Fair play അവാർഡ് 104 പൗണ്ട്, Upcoming Team അവാർഡ് 104 പൗണ്ട്, വ്യക്തിഗത മികവിനുള്ള അംഗീകാരമായി Best puller, Best Front, Best Back എന്നീ മേഖലയിൽ മികവ് തെളിയിക്കുന്നവർക്കും സമ്മാനങ്ങൾ ലഭിക്കും.

വനിതകളുടെ മത്സരം സമീക്ഷ യുകെ ആദ്യമായി നടത്തുന്നതിനാൽ രജിസ്ട്രേഷൻ പൂർണ്ണമായും സൗജന്യമാണ്. വിജയികൾക്കായി £501, £201, £101, £101 എന്നിങ്ങനെ ആകർഷകമായ ക്യാഷ് പ്രൈസുകളും ട്രോഫികളും ഒരുക്കിയിട്ടുണ്ട്.

ടീമുകളുടെ രജിസ്ട്രേഷൻ പുരോഗമിക്കുന്നു. ഇനിയും രജിസ്റ്റർ ചെയ്യാൻ ആഗ്രഹിക്കുന്നവർ എത്രയും വേഗം രജിസ്റ്റർ ചെയ്യണം എന്ന് ഭാരവാഹികൾ അറിയിച്ചു. കഴിഞ്ഞ മൂന്നു വർഷങ്ങളിലും സംഘാടന മികവുകൊണ്ടും പങ്കാളിത്തം കൊണ്ടും മികച്ചു നിന്ന ടൂർണമെന്റ് ഈ വർഷവും മികച്ച അനുഭവമാക്കാനുള്ള
ഒരുക്കങ്ങൾ നടക്കുന്നതായി സംഘാടകർ അറിയിച്ചു.

രജിസ്ട്രേഷനും കൂടുതല്‍ വിവരങ്ങൾക്കും സമീക്ഷ യുകെ പ്രോഗ്രാം കോർഡിനേറ്റർമാരായ ഷാജു സി ബേബി (07856493330), ദീപ്‌തി ലൈജു (07810229426), അൽ യാസിർ സാദിഖ് (07774476565) എന്നിവരുമായി ബന്ധപ്പെടുക.

യുകെ ഭരിക്കുന്ന ലേബർ പാർട്ടിയുടെ പൊന്നാപുരം കോട്ടയായ ലിവർപൂളിൽ യുകെയിലെ ലേബർ പാർട്ടിയുടെ മലയാളി നേതാക്കളെ ആദരിച്ചു. ലിവർപൂളിൽ വച്ചു നടക്കുന്ന ലേബർ പാർട്ടിയുടെ വാർഷിക യോഗത്തിൽ പങ്കെടുക്കാനായിട്ടാണ് ലേബർ പാർട്ടി നേതാക്കൾ ലിവർപൂളിൽ എത്തിയത്. യുകെ പാർലമെന്റ് എം.പി ശ്രീമാൻ സോജൻ ജോസഫ്, ബേസിങ് സ്റ്റോക്ക് ഡെപ്യൂട്ടി മേയർ ശ്രീ സജീഷ് ടോം, ക്രോയ്ഡൻ മുൻ മേയർ ശ്രീമതി മഞ്ജു ഷാഹുൽ ഹമിദ്,ന്യൂ ഹാം മുൻ കൗൺസിലർ ശ്രീ സുഗതൻ തെക്കേപുര,വിഗൻ സി.ൽ.പി അഡ്വക്കേറ്റ് നവാസ് ബിരാവു,ലിവർപൂളിലെ യുവ നേതാവ് പ്രിയ ലാൽ, മെൽബിൻ ജോസ്, ആർ സി എൻ നഴ്സിംഗ് യൂണിയൻ നേതാവ് ശ്രീ ബിജോയ് സെബാസ്റ്റ്യൻ എന്നിവർക്കാണ് ലിവർപൂൾ മലയാളികൾ സ്വീകരണം നൽകിയത്.

ചടങ്ങിൽ പങ്കെടുത്തവരുടെ നിരവധി ചോദ്യങ്ങൾക്കും, യുകെ മലയാളികളുടെ പൊതുവായ ആശങ്കകൾക്കും എംപി ശ്രീ സോജൻ തോമസ് തൻമയത്തോടെ ഉത്തരങ്ങൾ നൽകി. കൂടാതെ കുടിയേറ്റം,പി.ആർ. തൊഴിൽ നിയമവശങ്ങൾ, എൻഎച്ച്എസ് ആരോഗ്യ മേഖല, സാമ്പത്തിക, വ്യവസായ, ബാങ്കിംഗ്, പാർപ്പിട മേഖലകളെ കുറിച്ചുള്ള ലേബർ പാർട്ടിയുടെ നയങ്ങളെ കുറിച്ചും വിശദീകരണം നടത്തി. യുകെയിൽ കുടിയേറ്റക്കാർക്കെതിരെ വർധിച്ചു വരുന്ന അക്രമ സംഭവവങ്ങളെ കുറിച്ചും , തീവ്ര വലതുപക്ഷ പാർട്ടികൾ ഉയർത്തുന്ന വെല്ലുവിളികളെ കുറിച്ചുമുള്ള ആശങ്കകൾ പങ്കെടുത്തവർ ഉന്നയിച്ചു. ചടങ്ങിൽ നോർത്ത് വെസ്റ്റ് മേഖലയിലെ പ്രബുദ്ധരായ മലയാളികൾ പങ്കെടുത്തു.

ലീഡ്സ് :- ഇംഗ്ലണ്ടിലെ ആദ്യകാല മലയാളി അസോസിയേഷനുകളിൽ ഒന്നായ വെസ്റ്റ് യോർക്ക്ഷെയർ മലയാളി അസോസിയേഷൻ സെപ്റ്റംബർ 26-ാം തീയതി ശനിയാഴ്ച ഓണം ആഘോഷിച്ചു. കേരള തനിമയാർന്ന തനതു കലാരൂപങ്ങൾ ഓണാഘോഷ പരിപാടിക്ക് മിഴിവേറ്റി. വെസ്റ്റ് യോർക്ക്ഷെയറിന്റെ വിവിധ ഭാഗങ്ങളിൽ നിന്നെത്തിയ മലയാളികൾക്ക് നാടിന്റെ നല്ല ഓർമ്മകളിലൂടെ കൊണ്ടുപോകുന്നതായിരുന്നു ഓണസദ്യയും വിവിധ കലാരൂപങ്ങളും.

കുട്ടികൾക്കും മുതിർന്നവർക്കും ഒരുപോലെ ആസ്വദിക്കാൻ പറ്റിയ കലാരൂപങ്ങളാണ് വേദിയിൽ അരങ്ങേറിയത്. മെഗാ തിരുവാതിര, നാടൻ കലാപരിപാടികൾ, സംഗീത-നൃത്താവിഷ്കാരങ്ങൾ എന്നിവ കാണികൾക്ക് വേറിട്ട അനുഭവമായി. പ്രത്യേക ആകർഷണമായ മനോഹരമായ ചെണ്ടമേളം ആഘോഷങ്ങൾക്ക് ആവേശവും പാരമ്പര്യത്തിന്റെ സ്പന്ദനവും പകർന്നു. ചെണ്ടമേളത്തിന്റെ താളമേളങ്ങൾ സദസിനെ ആവേശഭരിതരാക്കി. തുടർന്ന് നടന്ന ഡിജെയും ഓണാഘോഷ പരിപാടികളെ ആവേശത്തിന്റെ പാരമ്യത്തിലെത്തിച്ചു.

കേരളത്തിന്റെ സാംസ്കാരിക പൈതൃകം വിളിച്ചോതുന്ന വിവിധ കലാപരിപാടികളിൽ കുട്ടികളും യുവജനങ്ങളും മുതിർന്നവരും സജീവമായി പങ്കെടുത്തു. വർണാഭമായ വേഷവിധാനങ്ങളും കലാപ്രകടനങ്ങളും ആഘോഷങ്ങൾക്ക് കൂടുതൽ ഭംഗി പകർന്നു. കുടുംബസമേതം എത്തിയ നൂറുകണക്കിന് മലയാളികൾക്ക് സൗഹൃദത്തിന്റെയും കൂട്ടായ്മയുടെയും പുതുവേദിയായി ഓണാഘോഷം മാറി.

ഓണാഘോഷ പരിപാടികൾക്ക് എത്തിയവർക്ക് പ്രസിഡൻറ് ജോജി തോമസ് സ്വാഗതം ആശംസിച്ചു. മലയാളികളുടെ തനതായ പൈതൃകവും പാരമ്പര്യവും കാത്തുസൂക്ഷിക്കുന്നതിനും മലയാളി സമൂഹം നേരിടുന്ന വെല്ലുവിളികളെ നേരിടുന്നതിനും മലയാളി അസോസിയേഷനുകൾക്കുള്ള പ്രസക്തി പ്രസിഡൻറ് ജോജി തോമസ് സ്വാഗത പ്രസംഗത്തിൽ ചൂണ്ടിക്കാട്ടി.

സെക്രട്ടറി മാൻസൺ വർഗീസ് പരിപാടിയിൽ പങ്കെടുത്തവർക്ക് നന്ദി അറിയിച്ചു. അസോസിയേഷൻ ഭാരവാഹികളുടെയും പ്രവർത്തകരുടെയും നേതൃത്വത്തിൽ ഒരുക്കിയ ആഘോഷ പരിപാടികൾ വൻ വിജയമായി മാറിയതായും പങ്കെടുത്തവർ അഭിപ്രായപ്പെട്ടു. നാടിനെയും സംസ്കാരത്തെയും ഒരുമിച്ച് ഓർമ്മിപ്പിച്ച ഈ ഓണാഘോഷം വെസ്റ്റ് യോർക്ക്ഷെയറിലെ മലയാളി സമൂഹത്തിന് അവിസ്മരണീയ അനുഭവമായി.

രാജേഷ് നടപ്പിള്ളി, മീഡിയ കോർഡിനേറ്റർ, WMA

സ്വിൻഡൻ : വിൽഷെയർ മലയാളി അസോസിയേഷന്റെ ഓണാഘോഷം “ആവണി 2026” സ്വിൻഡനിലെ സൂപ്പർ മറൈൻ സ്പോർട്സ് സെന്റർ ഓഡിറ്റോറിയത്തിൽ വച്ച്, ഞായറാഴ്ച സെപ്റ്റംബർ 20ന് അതിഗംഭീരമായി ആഘോഷിച്ചു .വിൽഷെയർ മലയാളി അസോസിയേഷൻ പ്രസിഡന്റ് ശ്രീമതി ജിജി സജി അധ്യക്ഷയായും ബ്രിസ്റ്റോൾ മുൻ മേയറും ഇപ്പോൾ കൗൺസിലറും ആയ ശ്രീ ടോം ആദിത്യ ഉദ്ഘാടനം നിർവഹിച്ച ഓണാഘോഷ പരിപാടിയുടെ മുഖ്യ പ്രഭാഷകൻ യുക്മ ദേശീയ അധ്യക്ഷൻ അഡ്വ എബി സെബാസ്റ്റ്യൻ ആയിരുന്നു.

ഞായറാഴ്ച രാവിലെ 9 മണിക്ക് ഓണപ്പൂക്കളവും തുടർന്ന് കൊച്ചുകുട്ടികൾ മുതൽ മുതിർന്നവർ വരെ പങ്കെടുത്ത നിരവധി ഓണക്കളികളും ആഘോഷങ്ങൾക്ക് മിഴിവേകി. തുടർന്ന് ബ്രിസ്റ്റോൾ സൽക്കാര കാറ്ററേഴ്സ്റ്റിന്റെ സ്വാദിഷ്ടമായ ഓണസദ്യ നൽകുകയുണ്ടായി.

പൊതുസമ്മേളത്തിനതിനുമുന്നോടിയായി കേരളത്തിന്റെ പുരാതന തനതു സംസ്കാരത്തെ ഓർമപ്പെടുത്തുന്ന സ്വിൻഡൻ സ്റ്റാർസിന്റെ ചെണ്ടമേളത്തിന്റെയും ആരവങ്ങളുടെയും ആർപ്പുവിളികളുടെയും അകമ്പടിയോടെ മാവേലിത്തമ്പുരാനെയും വിശിഷ്ടാതിഥികളെയും അസോസിയേഷൻ ഭാരവാഹികളെയും വേദിയിലേക്കാനയിച്ചു. തുടർന്ന് പൊതുസമ്മേളനവും ഔപചാരിക ഉത്‌ഘാടനവും അതിനെത്തുടർന്ന് കേരളത്തിന്റെ തനത് സംസ്കാരത്തെ വിളിച്ചോതുന്ന വർണ്ണ ശബളിമയാർന്ന കലാമേളയും അരങ്ങേറുകയുണ്ടായി.

അസ്സോസിയേഷൻ സെക്രട്ടറി കൃതീഷ് കൃഷ്ണൻ ഏവരെയും സ്വാഗതം ആശംസിച്ചുകൊണ്ട് സംസാരിച്ചു. അസോസിയേഷന്റെ മുന്നോട്ടുള്ള പ്രവർത്തനങ്ങളിൽ ഏവരുടെയും നിർലോഭമായ സഹകരണം ഉണ്ടാകണമെന്നും ഒത്തുരുമിച്ചു നിൽക്കണമെന്നും ഏവർക്കും ഓണത്തിന്റെ ആശംസകൾ നേർന്നുകൊണ്ട് ശ്രീ കൃതീഷ് കൃഷ്ണൻ ഏവരെയും ഓണാഘോഷ പരിപാടികളിലേക്ക് സ്വാഗതം ചെയ്തുകൊണ്ട് സംസാരിച്ചു.

സ്നേഹത്തിന്റെയും സാഹോദര്യത്തിന്റെയും സൗഹൃദത്തിന്റെയും കൂട്ടായ്മയുടെയും സന്ദേശം പകരുന്ന ലോകമെമ്പാടുമുള്ള മലയാളികളുടെ ആഘോഷമാണ് ഓണമെന്നും. വിൽഷെയറിലെ മലയാളികളെ സംബന്ധിച്ചിടത്തോളം ഹൃദയബന്ധങ്ങൾ പുതുക്കാനും സൗഹൃദങ്ങൾ ദൃഢമാക്കാനും ഉതകുന്നതരത്തിലാണ് അസോസിയേഷൻ പ്രവർത്തിക്കുന്നതെന്നും അതാണ് ഓണം നൽകുന്ന യഥാർത്ഥ സന്ദേശമെന്നും ഏവർക്കും ഓണം ആശംസകൾ നേർന്നുകൊണ്ട് യോഗാധ്യക്ഷയും വിൽഷെയർ മലയാളി അസോസിയേഷൻ പ്രസിഡന്റുമായ ശ്രീമതി ജിജി സജി സംസാരിക്കുകയുണ്ടായി.

വിൽഷെയർ മലയാളീ അസോസിയേഷനുമായും അതിലെ അംഗങ്ങളുമായും ദീർഘകാല സുദൃഢബന്ധം കാത്തുസൂക്ഷിക്കുന്ന മുൻ ബ്രിസ്റ്റോൾ മേയറും നിലവിലെ ബ്രിസ്റ്റോൾ കൗൺസിലറും ആയ ശ്രീ ടോം ആദിത്യ ഭദ്രദീപം തെളിയിച്ചു ഉത്ഘാടനം നിർവഹിച്ചു. പ്രവാസത്തിൽ വളരുന്ന നവതലമുറയിലെ കുട്ടികൾക്ക് ഓണത്തിന്റെ നന്മയും മലയാള സംസ്കാരവും പാരമ്പര്യവും തൊട്ടറിഞ്ഞ് മനസ്സിലാക്കാനുള്ള വേദികൂടിയാണ് ഇത്തരം ആഘോഷങ്ങളെന്നും, ആഘോഷങ്ങളുടെ ആഘോഷമായ ഓണം നൽകുന്ന പ്രധാന സന്ദേശം മാനവസ്നേഹവും ഒരുമയുമാണെന്നും അതാണ് നാം മാതൃകയാക്കേണ്ടതെന്നും അസോസിയേഷൻ രൂപീകരണത്തിന്റെ രജത ജൂബിലിയോടടുക്കുന്ന വിൽഷെയർ മലയാളീ അസോസിയേഷന് എല്ലാവിധ ഭാവുകങ്ങളും നേർന്നുകൊണ്ട് കൗൺസിലർ ശ്രീ ടോം ആദിത്യ ഉത്ഘാടനം നിർവഹിച്ചു.

നാളികേരത്തിന്‍റെ നാട്ടിലല്ലെങ്കിലും പൂക്കളും പൂവിളിയുമായി ഒരുമിച്ചു ചേര്‍ന്ന് മലയാളികളുടെ ഹൃദയങ്ങളില്‍ നിറഞ്ഞ സന്തോഷം പരസ്പരം പകര്‍ന്നു നല്‍കുന്നതാണ് ഓരോ പ്രവാസികളുടെ ഓണാഘോഷമെന്നും മതേതരത്വത്തിന്റെയും സമത്വത്തിന്റെയും പ്രതീകമാകണം ഓരോമലയാളിയുടെയും ഓണാഘോഷമെന്നും സമൂഹത്തിൽ പാർശ്വവൽക്കരിക്കപ്പെട്ട ആളുകളെ ചേർത്തിനിർത്തി അവരുടെ ജീവിതത്തിൽ പുഞ്ചിരിചൊരിയുമ്പോൾ മാത്രമാണ് ഓരോ മലയാളിയുടെയും ജീവിതം അന്വർത്ഥമാകൂഎന്നും അതാണ് ഓണസദ്യയിലെ വൈവിധ്യങ്ങളായ വിഭവങ്ങൾ ഒന്നുചേർന്ന് കൂട്ടിയോജിപ്പിക്കുന്നതുപോലെ സമൂഹത്തിലെ എല്ലാ ആളുകളെയും അംഗീകരിക്കുകയും ചേർത്തുനിർത്തുകയും ചെയ്യുകയെന്ന വലിയ സന്ദേശമാണ് ഓണം നൽകുകയെന്നും യുക്മ ദേശീയ അധ്യക്ഷനും മുഖ്യ പ്രഭാഷകനുമായ അഡ്വ. എബി സെബാസ്റ്റ്യൻ സംസാരിക്കുകയുണ്ടായി. വിൽഷെയർ മലയാളീ അസോസിയേഷനും യുക്മയും തമ്മിലുള്ള പതിറ്റാണ്ടുകളുടെ ഉഷ്മളബദ്ധത്തെക്കുറിച് അഡ്വ എബി സെബാസ്റ്റ്യൻ പരാമര്ശിക്കുകയുണ്ടായി. യുകെയിലെ തന്നെ ഏറ്റവും വലിയ അസ്സോസിയേഷനുകളിൽ ഒന്നായ WMA യിൽ നിന്നും യുക്മ യിലേക്കുള്ള പ്രതിനിധ്യം റെയ്‌മോൾ നിധീരിയിലൂടെ നൽകപ്പെട്ടതുവഴി യുക്മയും വിൽഷെയർ മലയാളീ അസോസിയേഷനും തമ്മിലുള്ള ദീർഘകാലത്തെ ബന്ധം ഊട്ടിഉറപ്പിക്കുകകൂടിയാണ് നാം ചെയ്തത്. മാത്രമല്ല യുക്മ നഴ്സസ് ഫോറം മെയ്മാസത്തിൽ അന്താരാഷ്ര നഴ്സസ് ദിനാഘോഷത്തോടനുബന്ധിച്ചു നടത്തപ്പെട്ട സമ്മേളനം വൻവിജയമായിരുന്നുഎന്നും അതിനായി നമ്മുടെ വിൽഷെയർ മലയാളീ അസോസിയേഷൻ നിന്നുള്ള യുക്മ പ്രതിനിധിയും നഴ്സസ് ഫോറം റീജിയണൽ ചെയർപേഴ്സൺകൂടിയായ രാജേഷ് നടേപ്പിള്ളി നിർവഹിച്ച പങ്ക് വളരെ വലുതാണെന്നും നഴ്സുമാരുടെ ഉന്നമനത്തിനായി യുക്മയുടെ ഭാഗത്തുനിന്നുള്ള ഇടപെടലുകൾ തുടർന്നും ഉണ്ടാകുമെന്നും മുഖ്യ പ്രഭാഷണം നിർവഹിച്ചുകൊണ്ട് അഡ്വ എബി സെബാസ്റ്റ്യൻ ഏവർക്കും ഓണാശംസകൾ നേർന്നുകൊണ്ട് സംസാരിച്ചു.

അതിനെ തുടർന്ന് ഓണാഘോഷം ആവണി 2026 ന്റെ സന്ദേശം മഹാബലി നൽകുകയുണ്ടായി.

പൊതുസമ്മേളനത്തിൽ GCSC പരീക്ഷയിലും A Level പരീക്ഷയിലും മികച്ച വിജയം നേടിയ വിദ്യാർത്ഥികളെയും വിൽഷെയർ മലയാളീ അസോസിയേഷൻ സ്പോർട്സ് ഡേയോട് അനുബന്ധിച്ചു നടത്തപ്പെട്ട കായികമത്സരത്തിൽ ചാമ്പ്യൻമാരായ ഈസ്റ്റ് സ്വിൻഡനും സമ്മാനദാനം നൽകുകയുണ്ടായി.

പൊതുസമ്മേളനത്തെത്തുടർന്ന് മലയാളത്തിന്റെ പാരമ്പര്യവും തനതു സംസ്കാരവും കോർത്തിണക്കിയ ദൃശ്യവിരുന്ന് വേദിയിൽ അരങ്ങേറുകയുണ്ടായി. ക്ലാസിക്കൽ നൃത്ത ശില്പങ്ങളായ മോഹിനിയാട്ടം തിരുവാതിര തുടങ്ങി വിവിധങ്ങളായ പരിപാടികൾക്കൊപ്പം കൊച്ചു കുട്ടികൾ മുതൽ മുതിർന്നവർ വരെ പങ്കെടുത്ത സിനിമാറ്റിക് ഡാൻസും ഒപ്പം നിരവധി സംഗീതജ്ഞരുടെ സംഗീത പരിപാടികളും ഉന്നത നിലവാരം പുലർത്തിയതോടൊപ്പം യുകെയിലെ പ്രശസ്ത ഡിജെ യും ഗിറ്റാറിസ്റ്റുമായ അഭിജിത് യോഗി യുടെ പ്രകടനം പങ്കെടുത്ത എല്ലാ മലയാളികളെയും അക്ഷരാർത്ഥത്തിൽ ആഘോഷങ്ങളെ അതിന്റെ ഉത്തുംഗശൃഗത്തിലെത്തിക്കുന്നതാക്കിമാറ്റി

WMA യുടെ മുഖ്യ സ്പോൺസർ ആയ INFINITY FINANCIALS LTD ഉം INFI TOURS AND TRAVELS ഭാഗ്യ നറുക്കെടുപ്പിലൂടെ സമ്മാനം നൽകുകയുണ്ടായി.

WMA ഒരുക്കിയ റാഫിൾ ടിക്കറ്റ് നറുക്കെടുപ്പിലൂടെ നിരവധി പേർ സമ്മാനാർഹരായി.

ഓണാഘോഷങ്ങളുടെ സുന്ദര നിമിഷങ്ങൾ ഒപ്പിയെടുത്ത് ബെറ്റെർഫ്രെയിംസ് രാജേഷ് നടേപ്പിള്ളിയും വീഡിയോഗ്രാഫി സോജി തോമസും ആയിരുന്നു.

ദൃശ്യശ്രാവണ രംഗത്തെ പ്രഗത്ഭരായ PIXELGLOW MEDIA SOLUTIONS ഒരുക്കിയ ശബ്ദവും വെളിച്ചവും പരിപടികൾക്ക് മിഴിവേകി.

ഓണാഘോഷപരിപാടികൾ മികവുറ്റതാക്കാൻ പ്രവർത്തിച്ച കമ്മിറ്റി അംഗങ്ങൾ: ജിജി സജി, കൃതേഷ് കൃഷ്ണൻ, ബൈജു വാസുദേവൻ, ഡോണി പീറ്റർ, മാത്യു കുര്യാക്കോസ്, ജൈസ് കെ ജോയി, മഞ്ജു ടോം, എബി തോമസ്, ബൈജു ജേക്കബ്, ഡെന്നി വാഴപ്പിള്ളി, റജബിൽ ഹഖ്, അമൽ ജോഷി, വർക്കി കുരുവിള, ഡോ. ഫെബിൻ ബഷീർ, റെയ്‌മോൾ നിധിരി, ജെയ്‌മി നായർ, രാജേഷ് നടേപ്പിള്ളി എന്നിവരാണ്.

പരിപാടികൾക്ക് സമാപനം കുറിച്ചുകൊണ്ട് സെക്രട്ടറി ശ്രീ കൃതേഷ് കൃഷ്ണൻ ഏവർക്കും നന്ദി രേഖപ്പെടുത്തി.

കെന്റ് ഹിന്ദു സമാജത്തിന്റെ (Kent Hindu Samajam UK) ഈ വർഷത്തെ ഓണാഘോഷം 2026 സെപ്റ്റംബർ 26 ശനിയാഴ്ച ആഘോഷിക്കും.

രാവിലെ 10 മണി മുതൽ വൈകീട്ട് 6 മണി വരെ ചാത്തം മാഗ്പൈ ഹാൾ റോഡിലുള്ള ഓൾ സെയിന്റ്സ് ചർച്ച് ഹാളിൽ (All Saints Church Hall, Magpie Hall Road, Chatham, Kent, ME4 5NE) വെച്ചാണ് ആഘോഷ പരിപാടികൾ സംഘടിപ്പിക്കുന്നത്. ശ്രീമതി വാണി സിബി, ശ്രീമതി നിഖിത നായർ, ശ്രീമതി അനീഷ മനോജ്‌, ഹരികൃഷ്ണൻ എന്നിവർ നേതൃത്വം നൽകും.സൂര്യകാലടി മന ശ്രീ ജയസൂര്യൻ ഭട്ടത്തിരിപ്പാട് വിശ്ഷ്ട അഥിതി ആയിരിക്കും

കേരളീയ തനിമയോടെയുള്ള ഓണസദ്യ, കലാപരിപാടികൾ, വിപുലമായ പരിപാടികളാണ് സംഘാടകർ ഒരുക്കുന്നത്. മാവേലിയുടെ വരവോടെ ആഘോഷങ്ങൾക്ക് കൊഴുപ്പേകും.

കൂടുതൽ വിവരങ്ങൾക്ക്:
Tel: 07838170203 / 07973151975 / 07985245890
www.kenthindusamajam.org

മനോജ് ജോസഫ്

ലിവർപൂൾ: ലിവർപൂൾ മലയാളി അസോസിയേഷൻ (LIMA) സെപ്റ്റംബർ 20 ഞായറാഴ്ച ന്യൂഷാം പാർക്കിൽ സംഘടിപ്പിച്ച “ലിമ പ്രീമിയർ കപ്പ് 2026” ക്രിക്കറ്റ് ടൂർണമെന്റ് വൻ ജനപങ്കാളിത്തത്തോടെ സമാപിച്ചു. രണ്ട് മൈതാനങ്ങളിലായി യുകെയിലെ ഏറ്റവും പ്രഗത്ഭരായ 11 കരുത്തുറ്റ ക്രിക്കറ്റ് ടീമുകൾ തമ്മിൽ നടന്ന വാശിയേറിയ ടൂർണമെന്റിൽ വൈറ്റ് വാക്കേഴ്സ് പ്രെസ്റ്റൺ ജേതാക്കളായി. കലാശപ്പോരാട്ടത്തിനൊടുവിൽ റേഞ്ചേഴ്സ് ലിവർപൂൾ റണ്ണറപ്പ് ട്രോഫി സ്വന്തമാക്കി. മൂന്നാം സ്ഥാനം ഹോം 11-നും നാലാം സ്ഥാനം വിസ്റ്റൺ യൂണൈറ്റഡും കരസ്ഥമാക്കി.

രാവിലെ 8.30-ന് ആരംഭിച്ച മത്സരങ്ങൾ കാണാൻ മേഴ്‌സിസൈഡിലെ നിരവധി കായികപ്രേമികളാണ് കുടുംബസമേതം ന്യൂഷാം പാർക്കിൽ എത്തിചേർന്നത്. വാശിയേറിയ മത്സരങ്ങൾക്കൊടുവിൽ വിജയികൾക്കുള്ള ആകർഷകമായ ക്യാഷ് പ്രൈസുകളും ട്രോഫികളും ലിമ ഭാരവാഹികൾ വിതരണം ചെയ്തു. മികച്ച പ്രകടനം കാഴ്ചവച്ച വ്യക്തിഗത താരങ്ങൾക്കുള്ള പുരസ്‌കാരങ്ങളും ചടങ്ങിൽ സമ്മാനിച്ചു. വിസ്റ്റൺ യൂണൈറ്റഡിന്റെ സുനീത് ‘ബെസ്റ്റ് ബാറ്റ്‌സ്മാൻ’, ‘മോസ്റ്റ് വാല്യൂബിൾ പ്ലേയർ’ എന്നീ ഇരട്ട പുരസ്‌കാരങ്ങൾ കരസ്ഥമാക്കി. വൈറ്റ് വാക്കേഴ്‌സ് പ്രെസ്റ്റണിന്റെ ശരത് സതീഷാണ് ടൂർണമെന്റിലെ ‘ബെസ്റ്റ് ബൗളർ’.

കളിക്കളത്തിലെ ആവേശത്തോടൊപ്പം Green Chilli Restaurant ഒരുക്കിയ സ്വാദിഷ്ടമായ ഭക്ഷണവിഭവങ്ങളും അന്നേ ദിവസം ലഭ്യമായിരുന്നു. ടൂർണമെന്റ് കൺവീനർമാരായ ബിനു വർക്കി, ബ്ലെസൺ രാജൻ എന്നിവർക്കൊപ്പം ലിമ എക്സിക്യൂട്ടീവ് കമ്മിറ്റി അംഗങ്ങളുടെ ഒത്തൊരുമിച്ചുള്ള പ്രവർത്തനവുമാണ് ഈ കായികമേളയുടെ വിജയത്തിനു പിന്നിൽ.

കായികമേള വിജയകരമാക്കാൻ സഹകരിച്ച എല്ലാ ടീമുകൾക്കും, കളിക്കാർക്കും, കാണികൾക്കും, സ്പോൺസർമാർക്കും ലിമ കമ്മിറ്റി ഭാരവാഹികൾ നന്ദി അറിയിച്ചു. മേഴ്‌സിസൈഡ് മലയാളി സമൂഹത്തിന്റെ ഐക്യവും സൗഹൃദവും വാനോളമുയർത്തിയ മികച്ചൊരു കായിക ദിനത്തിനാണ് ന്യൂഷാം പാർക്ക് സാക്ഷ്യം വഹിച്ചത്.

അപ്പച്ചൻ കണ്ണഞ്ചിറ

സ്റ്റീവനേജ് : ഹർട്‌ഫോർഡ്ഷെയർ കൗണ്ടിയിൽ കുട്ടികൾക്കും, മുതിർന്നവർക്കും ഷട്ടിൽ ബാഡ്മിന്റണിൽ പരിശീലനവും , മത്സരങ്ങളും, വേദികളും ഒരുക്കുന്നതിൽ പ്രശസ്തരായ ‘റോയൽസ് സ്റ്റീവനേജ്’ ബാഡ്മിന്റൺ ക്ലബ്ബ് , അഖില യു കെ തലത്തിൽ സീനിയേഴ്സിനായി ഓപ്പൺ ഷട്ടിൽ ടൂർണമെന്റ് സംഘടിപ്പിക്കുന്നു. ഒക്ടോബർ 24ന് സ്റ്റീവനേജിലെ സെന്റ് ജോൺ ഹെൻറി ന്യൂമാൻ സ്കൂളിന്റെ ഇൻഡോർ സ്റ്റേഡിയത്തിലാണ് ടൂർണമെന്റ് നടക്കുക. യു.കെ.യുടെ വിവിധ ഭാഗങ്ങളിൽ നിന്നുള്ള സീനിയർ താരങ്ങൾക്ക് കളിക്കളത്തിൽ മാറ്റുരക്കുവാനും, തങ്ങളുടെ കഴിവുകൾ പ്രദർശിപ്പിക്കുവാനും അവസരമൊരുക്കുകയാണ് ടൂർണമെന്റിന്റെ ലക്ഷ്യം.

50 വയസ്സോ അതിൽ കൂടുതലോ പ്രായമുള്ള വനിതാ-പുരുഷ താരങ്ങൾക്കായാണ് മത്സരം ഒരുക്കിയിരിക്കുന്നത്. സിംഗിൾസ് വിഭാഗത്തിൽ 50 പ്ലസ് പ്രായമുള്ള താരങ്ങൾക്ക് പങ്കെടുക്കാം. ഡബിൾസ് വിഭാഗത്തിൽ മത്സരിക്കുന്ന താരങ്ങളുടെ ആകെ പ്രായം കുറഞ്ഞത് 100 വയസ്സായി നിജപ്പെടുത്തിയിരിക്കുകയാണ്. ആകർഷകമായ പ്രൈസ് മണി സമ്മാനമായി നൽകുന്ന ടൂർണ്ണമെന്റിൽ ആദ്യം പേരുകൾ രെജിസ്റ്റർ ചെയ്യുന്ന കുറച്ചു കളിക്കാർക്കുകൂടി അവസരമുണ്ടെന്നു സംഘാടകർ അറിയിച്ചു. https://forms.gle/4FnAj8PLsBoCPGry8

ബാഡ്മിന്റൺ ഗോദയിലെ പ്രഗത്ഭരായ മുൻകാല പോരാളികൾ തങ്ങളുടെ താര ശോഭ തെല്ലും മങ്ങാതെ, അനുഭവജ്ഞാനവും തന്ത്രങ്ങളും ആവനാഴിയിൽ നിന്നും പുറത്തെടുത്ത് വീറോടെ പോർക്കളത്തിൽ മാറ്റുരക്കുമ്പോൾ, കാണികൾക്കിതു ആവേശത്തിന്റെ നേർക്കാഴ്ച്ചയാവും സമ്മാനിക്കുക.

ഏറെ ആവേശകരമായ മത്സരങ്ങൾക്ക് സാക്ഷ്യം വഹിക്കുവാനും, കായിക താരങ്ങൾക്ക് പ്രോത്സാഹനം നൽകുവാനും എല്ലാ കായിക പ്രേമികളെയും സസ്നേഹം സ്വാഗതം ചെയ്യുന്നതായി സംഘാടകർ അറിയിച്ചു.

കൂടുതൽ വിവരങ്ങൾക്കും രജിസ്ട്രേഷനും:
Lawrance – 07925 916223
Mathew – 07475 686408
Registration: https://forms.gle/4FnAj8PLsBoCPGry8

Venue: St John Henry Newman Catholic School, Hitchin Road, Stevenage, SG1 4AE

ബാസിൽഡൺ: യുകെയിലെ മലയാളി സമൂഹത്തിന് ദൈനംദിന ജീവിതത്തിൽ ആവശ്യമായ വിവിധ സേവനങ്ങളെയും പിന്തുണാ സംവിധാനങ്ങളെയും കുറിച്ച് പ്രായോഗിക അറിവും മാർഗനിർദേശവും നൽകുക എന്ന ലക്ഷ്യത്തോടെ ജീവൻ ട്രസ്റ്റ് യുകെ (Jeevan Trust UK) സംഘടിപ്പിക്കുന്ന ആദ്യ ‘Synergy – Community Information Programme’ നാളെ, സെപ്റ്റംബർ 19 ശനിയാഴ്ച ഉച്ചയ്ക്ക് 2 മണി മുതൽ വൈകുന്നേരം 5 മണി വരെ ബാസിൽഡണിൽ നടക്കും.

ബാസിൽഡൺ മലയാളി അസോസിയേഷന്റെ (BMA) സഹകരണത്തോടെയാണ് പരിപാടി സംഘടിപ്പിക്കുന്നത്. യുകെയിൽ വളർന്നുവരുന്ന കുട്ടികൾ നേരിടുന്ന വെല്ലുവിളികൾ, കുട്ടികൾക്ക് പ്രചോദനവും ശരിയായ മാർഗനിർദേശവും നൽകേണ്ടതിന്റെ പ്രാധാന്യം, Child Abuse, Safeguarding, Effective Parenting, മുതിർന്നവർക്കുള്ള പരിചരണവും സാമൂഹിക പിന്തുണയും, ഗാർഹിക പീഡനവുമായി ബന്ധപ്പെട്ട സഹായം, GP രജിസ്ട്രേഷൻ, ആരോഗ്യ സേവനങ്ങളിലേക്കുള്ള പ്രവേശനം തുടങ്ങിയ പ്രവാസി കുടുംബങ്ങൾക്ക് ഏറെ പ്രാധാന്യമുള്ള വിഷയങ്ങൾ പരിപാടിയിൽ ചർച്ച ചെയ്യും.

വിദഗ്ധരും വിഷയങ്ങളും

സിബി തോമസ് – (Sunderland) Chairman, Jeevan Trust UK
Adult Care & Social Support Services

ടോമി സെബാസ്റ്റ്യൻ – (Chelmsford) Training Coordinator, Jeevan Trust UK
Safeguarding Children & Effective Parenting
യുകെയിൽ വളർന്നുവരുന്ന കുട്ടികൾക്ക് പ്രചോദനവും മാർഗനിർദേശവും നൽകൽ, Child Abuse, കുട്ടികളുടെ സുരക്ഷയും Safeguarding-ഉം, ഫലപ്രദമായ Parenting എന്നിവ ഉൾപ്പെടെയുള്ള വിഷയങ്ങൾ അവതരിപ്പിക്കും.

ഡോ. സൂസൻ ജാക്സൺ – (Northampton) Faculty Member, Jeevan Trust UK
Domestic Abuse Support & Guidance

ഡോ. സോജി അലക്സ് – (Leeds) PRO, Jeevan Trust UK
GP Registration & Healthcare Access

ജീവൻ ട്രസ്റ്റ് യുകെ സെക്രട്ടറി അബ്രഹാം ലൂക്കോസ്, ട്രഷറർ ആന്റണി അബ്രഹാം, ഫാക്കൽറ്റി അംഗം ഡോ. വിമല സെബാസ്റ്റ്യൻ എന്നിവരും പരിപാടിയിൽ പങ്കെടുക്കും.

ജീവൻ ട്രസ്റ്റ് യുകെയുടെ സ്ഥാപക അംഗം അഡ്വ. ഫ്രാൻസിസ് കാവാലക്കാട്ടിൽ, ബാസിൽഡൺ മലയാളി അസോസിയേഷൻ പ്രസിഡന്റ് ജിജോ ജോസഫ്, അസോസിയേഷന്റെ മറ്റ് ഭാരവാഹികൾ എന്നിവരും പരിപാടിയിൽ സന്നിഹിതരാകും.

വിഷയാവതരണങ്ങൾക്ക് ശേഷം Interactive Q&A Session ഉണ്ടായിരിക്കും. പങ്കെടുക്കുന്നവർക്ക് തങ്ങളുടെ സംശയങ്ങളും ആശങ്കകളും വിദഗ്ധരുമായി നേരിട്ട് പങ്കുവയ്ക്കാനും ആവശ്യമായ വിവരങ്ങളും മാർഗനിർദേശങ്ങളും തേടാനും അവസരമുണ്ടാകും.

“Empowering Individuals • Strengthening Families • Building Communities” എന്ന സന്ദേശം മുൻനിർത്തിയാണ് സിനർജി കമ്മ്യൂണിറ്റി ഇൻഫർമേഷൻ പ്രോഗ്രാം സംഘടിപ്പിക്കുന്നത്.

പ്രവേശനം സൗജന്യം

പരിപാടിയിൽ പങ്കെടുക്കുന്നതിന് പ്രവേശന ഫീസ് ഇല്ല. ബാസിൽഡൺ മലയാളി അസോസിയേഷൻ അംഗങ്ങൾക്ക് പുറമെ, പുറത്തുനിന്നും പരിപാടിയിൽ പങ്കെടുക്കാൻ താൽപര്യമുള്ളവർ ജീവൻ ട്രസ്റ്റ് യുകെ സെക്രട്ടറിയുമായി മുൻകൂട്ടി ബന്ധപ്പെടണമെന്ന് സംഘാടകർ അറിയിച്ചു.

📞 ബന്ധപ്പെടുക: 07886 262747

📅 ശനിയാഴ്ച, 19 സെപ്റ്റംബർ 2026
⏰ ഉച്ചയ്ക്ക് 2:00 മുതൽ വൈകുന്നേരം 5:00 വരെ
📍 Holy Trinity Parish Hall, 57 Wickhay, Basildon, SS15 5AD

ജീവൻ ട്രസ്റ്റ് യുകെയുടെ ആദ്യ സിനർജി പരിപാടി വിജയകരമാക്കുന്നതിന് സഹകരണവും പിന്തുണയും നൽകുന്ന ബാസിൽഡൺ മലയാളി അസോസിയേഷനോട് ജീവൻ ട്രസ്റ്റ് യുകെ ഭാരവാഹികൾ നന്ദി അറിയിച്ചു. സമൂഹത്തിന് ആവശ്യമായ അറിവും പിന്തുണയും വിദഗ്ധരിൽ നിന്ന് നേരിട്ട് ലഭ്യമാക്കുന്ന ഈ അവസരം പരമാവധി പ്രയോജനപ്പെടുത്തണമെന്നും സംഘാടകർ അഭ്യർഥിച്ചു.

പി.ആർ.ഒ.: മെർളിൻ മേരി അഗസ്റ്റിൻ

₹10 ലക്ഷം കാഷ് പ്രൈസുകൾ; ₹1 ലക്ഷം ഗ്രാൻഡ് പ്രൈസ്; സൗജന്യ പ്രസംഗപരിശീലനവും മെൻറ്റെറിംഗും; വേൾഡ് മലയാളി ഫെഡറേഷൻറ്റെ സജീവ സഹകരണത്തോടെ ആഗോള മത്സരം; ഇത്തവണ മുതൽ സബ് ജൂനിയർ വിഭാഗവും

ഫിലാഡൽഫിയ: ലോകമെമ്പാടുമുള്ള മലയാളി സ്കൂൾ–കോളേജ് വിദ്യാർത്ഥികളുടെ പ്രസംഗശേഷി, ഭാഷാപാടവം, ആശയവിനിമയ മികവ്, ആത്മവിശ്വാസം, നേതൃത്വഗുണങ്ങൾ എന്നിവ വളർത്തുക എന്ന ലക്ഷ്യത്തോടെ ഓർമ്മ ഇന്റർനാഷണൽ സംഘടിപ്പിക്കുന്ന അന്താരാഷ്ട്ര പ്രസംഗമത്സരം സീസൺ 4 (2026–27)- ൻറ്റെ രജിസ്ട്രേഷൻ സെപ്റ്റംബർ 15-ന് ആരംഭിച്ചു. ഡിസംബർ 15 വരെ നീളുന്ന ആദ്യ റൗണ്ടിൽ പങ്കെടുക്കുന്നവർ രജിസ്ട്രേഷനോടൊപ്പം മൂന്നു മിനിറ്റിൽ കവിയാത്ത പ്രസംഗവീഡിയോ സമർപ്പിക്കണം. സബ് ജൂനിയർ, ജൂനിയർ, സീനിയർ വിഭാഗങ്ങളിലായി മലയാളത്തിലും ഇംഗ്ലീഷിലുമാണ് മത്സരം.

മൂന്ന് ഘട്ടങ്ങളിലൂടെ മികച്ച പ്രകടനം കാഴ്ചവയ്ക്കുന്ന മത്സരാർത്ഥികളെ കണ്ടെത്തി, ഓരോ ഘട്ടത്തിലും സൗജന്യ പ്രസംഗപരിശീലനവും മെൻറ്റെറിംഗും നൽകി അവരുടെ കഴിവുകൾ കൂടുതൽ മികവുറ്റതാക്കിയ ശേഷമാണ് ജൂനിയർ, സീനിയർ വിഭാഗങ്ങളിലെ മികച്ച പ്രതിഭകൾ 2027 ഓഗസ്റ്റ് 7-ന് പാലായിൽ നടക്കുന്ന ഓൺ-സ്റ്റേജ് ഗ്രാൻഡ് ഫിനാലെയിൽ മാറ്റുരയ്ക്കുക. സബ് ജൂനിയർ വിഭാഗത്തിൻറ്റെ ഫൈനൽ ഉൾപ്പെടെയുള്ള മത്സരങ്ങൾ പൂർണമായും ഓൺലൈനായിരിക്കും. ഒരു വർഷത്തോളം നീളുന്ന പരിശീലന–മത്സര പരമ്പരയായാണ് സീസൺ 4 വിഭാവനം ചെയ്തിരിക്കുന്നത്.

സീസൺ 4-ൻറ്റെ പ്രധാന പ്രത്യേകതകളിലൊന്ന് ഓർമ്മ ഇന്റർനാഷണലും വേൾഡ് മലയാളി ഫെഡറേഷനും (WMF) കൈകോർക്കുന്ന വിപുലമായ ആഗോള സഹകരണമാണ്. ലോകത്തിൻറ്റെ വിവിധ ഭാഗങ്ങളിലുള്ള കൂടുതൽ മലയാളി വിദ്യാർത്ഥികളിലേക്കും കുടുംബങ്ങളിലേക്കും മത്സരത്തിൻറ്റെ അവസരങ്ങളും സൗജന്യ പരിശീലനവും ഈ വർഷത്തെ സാമൂഹിക സന്ദേശവും എത്തിക്കുകയാണ് ഈ സഹകരണത്തിൻറ്റെ പ്രധാന ലക്ഷ്യം. ഭൂമിശാസ്ത്രപരമായ അതിരുകൾക്കപ്പുറം മലയാളി യുവതലമുറയെ ഒരേ പരിശീലന–മത്സര വേദിയിൽ ബന്ധിപ്പിക്കുന്ന ആഗോള സംരംഭമായി സീസൺ 4-നെ കൂടുതൽ വിപുലപ്പെടുത്താനും ഈ കൂട്ടായ്മ ലക്ഷ്യമിടുന്നു.

‘ഓപ്പറേഷൻ തൂഫാൻ’-ന് പിന്തുണ; ഇത്തവണ പ്രസംഗവേദി ലഹരിക്കെതിരെ: യുവതലമുറയെ ബാധിക്കുന്ന ലഹരിവിപത്തിനെതിരെ ശക്തമായ സാമൂഹിക സന്ദേശം ഉയർത്തിക്കൊണ്ടാണ് ഓർമ്മ സീസൺ 4 സംഘടിപ്പിക്കുന്നത്. കേരള സർക്കാരിൻറ്റെ ‘ഓപ്പറേഷൻ തൂഫാൻ’ ലഹരിവിരുദ്ധ പ്രചാരണത്തിന് പിന്തുണ നൽകിക്കൊണ്ട് ലഹരിവിരുദ്ധ ബോധവത്കരണമാണ് ഈ വർഷത്തെ മത്സരത്തിൻറ്റെ മുഖ്യ സാമൂഹിക ദൗത്യം. ലഹരിക്കെതിരെയുള്ള സന്ദേശം ഒരു മത്സരവിഷയത്തിൽ മാത്രം ഒതുക്കാതെ, വിദ്യാർത്ഥികളുടെ ശബ്ദത്തിലൂടെ കുടുംബങ്ങളിലേക്കും വിദ്യാഭ്യാസ സ്ഥാപനങ്ങളിലേക്കും പൊതുസമൂഹത്തിലേക്കും എത്തിക്കുകയാണ് ലക്ഷ്യം.

സീസൺ 4-ൻറ്റെ ലഹരിവിരുദ്ധ ദൗത്യത്തിനും യുവജന ശാക്തീകരണ ലക്ഷ്യത്തിനും ദേശീയ–സംസ്ഥാന തലങ്ങളിലെ പ്രമുഖരിൽനിന്ന് ശക്തമായ പിന്തുണയും ആശംസയും ലഭിച്ചിട്ടുണ്ട്. കേരളത്തിൽ ‘വാഗ്മിത്വത്തിലേക്ക് ഒരു ചുവട്’ എന്ന പേരിൽ ആരംഭിച്ച സീസൺ 4 പ്രചാരണത്തിന് മുഖ്യമന്ത്രി ശ്രീ. വി. ഡി. സതീശൻ തുടക്കം കുറിച്ചു. ആഭ്യന്തരമന്ത്രി ശ്രീ. രമേശ് ചെന്നിത്തല, വിദ്യാഭ്യാസമന്ത്രി ശ്രീ. റോജി എം. ജോൺ, ജലവിഭവവകുപ്പു മന്ത്രി അഡ്വ. മോൻസ് ജോസഫ് എന്നിവരും വിവിധ ഘട്ടങ്ങളിലായി പോസ്റ്റർ പ്രകാശനം നിർവഹിച്ചും സന്ദേശങ്ങൾ നൽകിയും സംരംഭത്തിന് പിന്തുണയും ആശംസയും അറിയിച്ചു.

ലോകപ്രശസ്ത പ്രഭാഷകനും പാർലമെന്റേറിയനും എഴുത്തുകാരനുമായ ഡോ. ശശി തരൂർ ഒന്നാം സീസൺ മുതൽ ഓർമ്മയുടെ ഈ സംരംഭത്തെ പ്രത്യേക സന്ദേശങ്ങളിലൂടെ പ്രോത്സാഹിപ്പിച്ചുവരികയാണ്. സീസൺ 4-ലും പ്രത്യേക സന്ദേശത്തിലൂടെ തൻറ്റെ ശക്തമായ പിന്തുണയും ആശംസയും അറിയിച്ച അദ്ദേഹം, യുവജനങ്ങളുടെ പ്രസംഗ–ആശയവിനിമയ കഴിവുകൾ വളർത്താനുള്ള ഓർമ്മയുടെ ശ്രമത്തോടുള്ള തുടർച്ചയായ പിന്തുണ വീണ്ടും ഉറപ്പിച്ചു.

ഈ ലഹരിവിരുദ്ധ ദൗത്യത്തെ കേന്ദ്രീകരിച്ചാണ് ആദ്യ റൗണ്ടിലെ വിഷയങ്ങളും നിശ്ചയിച്ചിരിക്കുന്നത്. ഇംഗ്ലീഷ് വിഭാഗത്തിലെ വിഷയം “Choose Dreams, Choose Life, Say No to Drugs” എന്നതും മലയാളം വിഭാഗത്തിലെ വിഷയം “സ്വപ്നങ്ങൾ തിരഞ്ഞെടുക്കാം, ജീവിതം തിരഞ്ഞെടുക്കാം, നാശത്തിൻറ്റെ ലഹരി ഉപേക്ഷിക്കാം” എന്നതുമാണ്. മത്സരാർത്ഥികൾ തിരഞ്ഞെടുക്കുന്ന ഭാഷയിലെ വിഷയത്തെ ആസ്പദമാക്കിയുള്ള മൂന്നു മിനിറ്റിൽ കവിയാത്ത പ്രസംഗവീഡിയോയാണ് ഗൂഗിൾ ഫോമിലൂടെ ആദ്യ റൗണ്ടിലേക്ക് സമർപ്പിക്കേണ്ടത്.

സീസൺ 4-ൽ ആദ്യമായി സബ് ജൂനിയർ വിഭാഗം ഉൾപ്പെടുത്തിയതാണ് മറ്റൊരു പ്രധാന പുതുമ. നിലവിൽ പഠിക്കുന്ന ഗ്രേഡ് അടിസ്ഥാനമാക്കി 4 മുതൽ 6 വരെ ഗ്രേഡുകളിലുള്ളവർ സബ് ജൂനിയർ വിഭാഗത്തിലും, 7 മുതൽ 10 വരെ ഗ്രേഡുകളിലുള്ളവർ ജൂനിയർ വിഭാഗത്തിലും, 11-ാം ഗ്രേഡ് മുതൽ ഡിഗ്രി അവസാനവർഷം വരെയുള്ള വർക്ക് സീനിയർ വിഭാഗത്തിലും പങ്കെടുക്കാം. മൂന്നു വിഭാഗങ്ങളിലും മലയാളത്തിലും ഇംഗ്ലീഷിലും മത്സരിക്കാം.

സബ് ജൂനിയർ വിഭാഗത്തിൻറ്റെ ഫൈനൽ ഉൾപ്പെടെയുള്ള മുഴുവൻ മത്സരങ്ങളും ഓൺലൈനായിരിക്കും. ജൂനിയർ, സീനിയർ വിഭാഗങ്ങളിലെ വിവിധ റൗണ്ടുകളിൽ മികച്ച പ്രകടനം കാഴ്ചവയ്ക്കുന്നവരിൽനിന്ന് ഫൈനലിസ്റ്റുകളെ കണ്ടെത്തി പാലായിലെ ഗ്രാൻഡ് ഫിനാലെയിലേക്ക് തിരഞ്ഞെടുക്കും.

വിജയികളെ മാത്രം കണ്ടെത്തുന്ന ഒരു സാധാരണ പ്രസംഗമത്സരം എന്നതിലുപരി, മത്സരാർത്ഥികളുടെ കഴിവുകൾ കണ്ടെത്തി മികച്ച ആശയവിനിമയശേഷിയുള്ള യുവതലമുറയെ വളർത്തുക എന്നതാണ് ഓർമ്മ അന്താരാഷ്ട്ര പ്രസംഗമത്സരത്തിൻറ്റെ തുടക്കം മുതലുള്ള പ്രധാന സവിശേഷത. ഓർമ്മ ടാലന്റ് പ്രമോഷൻ ഫോറം ചെയർമാൻ ജോസ് തോമസിൻറ്റെ നേതൃത്വത്തിലാണ് സീസൺ 4-ന്റെ മത്സര–പരിശീലന പദ്ധതികൾ ഏകോപിപ്പിക്കുന്നത്.

ഒരു വേദിയിൽ കയറി മികച്ച പ്രസംഗം നടത്താൻ കുട്ടികളെ പരിശീലിപ്പിക്കുക എന്നതിൽ മാത്രം ഒതുങ്ങുന്നതല്ല ഇതിൻറ്റെ ലക്ഷ്യം. അവർ എവിടെ ജീവിച്ചാലും, ഏതു തൊഴിൽമേഖല തിരഞ്ഞെടുത്താലും, സ്വന്തം അറിവും ആശയങ്ങളും വ്യക്തതയോടെയും ആത്മവിശ്വാസത്തോടെയും മറ്റുള്ളവരുമായി പങ്കുവയ്ക്കാൻ കഴിയുന്ന മികച്ച ആശയവിനിമയക്കാരായി അവരെ വളർത്തുക എന്ന വിശാലമായ കാഴ്ചപ്പാടാണ് പരിശീലനത്തിനു പിന്നിലുള്ളത്.

മത്സരത്തോടൊപ്പം ഓരോ ഘട്ടത്തിലും സൗജന്യ പ്രസംഗപരിശീലനവും മെന്ററിംഗും നൽകുന്ന പരിശീലനാധിഷ്ഠിത മാതൃകയാണ് ഓർമ്മയുടെ ഈ സംരംഭത്തെ വ്യത്യസ്തമാക്കുന്നത്. രജിസ്ട്രേഷൻ ഫീസില്ല; പരിശീലനവും മെന്ററിംഗും സൗജന്യമാണ്. പ്രസംഗത്തിൻറ്റെ ഉള്ളടക്കവും ഘടനയും, ഭാഷാപാടവം, ആശയവിനിമയശേഷി, ശബ്ദനിയന്ത്രണം, അവതരണ മികവ്, ശരീരഭാഷ, ആത്മവിശ്വാസം, സ്റ്റേജ് പ്രസൻസ്, ചിന്താശേഷി, നേതൃത്വഗുണങ്ങൾ തുടങ്ങിയ മേഖലകളിലാണ് പരിശീലനം കേന്ദ്രീകരിക്കുന്നത്. സിനർജി കൺസൾട്ടൻസിയിലെ ഡോ.ബെന്നി കുര്യൻ, സോയി തോമസ് എന്നിവർ പ്രസംഗപരിശീലനങ്ങൾക്ക് നേതൃത്വം നൽകുന്നു. ജോർജ് കരുണയ്ക്കൽ, പ്രൊഫ. ടോമി ചെറിയാൻ എന്നിവർ മെന്റർമാരായി മത്സരാർത്ഥികളുടെ തുടർവളർച്ചയ്ക്കും പരിശീലന പരിപാടികൾക്കും നേതൃത്വം നൽകുന്നു.

മലയാളികൾ ഇന്ന് ലോകത്തിൻറ്റെ എല്ലാ ഭാഗങ്ങളിലുമുണ്ട്. കേരളത്തിലെ പുതിയ തലമുറയും പഠനത്തിനും തൊഴിലിനും ജീവിതത്തിനുമായി കൂടുതൽ ആഗോള അവസരങ്ങളിലേക്കാണ് മുന്നേറുന്നത്. അറിവും വിദ്യാഭ്യാസവും സാങ്കേതിക–തൊഴിൽ വൈദഗ്ധ്യവും അവർക്കുള്ള വലിയ ശക്തികളാണ്. അതോടൊപ്പം, തങ്ങൾക്കുള്ള അറിവും ആശയങ്ങളും മറ്റുള്ളവരിലേക്ക് ഫലപ്രദമായി എത്തിക്കാനുള്ള സംസാര–ആശയവിനിമയ ശേഷി കൂടി പരിശീലനത്തിലൂടെ മൂർച്ചപ്പെടുത്താനായാൽ, ഏതു രാജ്യത്തും ഏതു തൊഴിൽമേഖലയിലും അവരുടെ ഭാവിക്ക് അത് വലിയൊരു മുതൽക്കൂട്ടാകും. അതുകൊണ്ടുതന്നെ പ്രസംഗപരിശീലനത്തെ ഒരു മത്സരത്തിനുള്ള തയ്യാറെടുപ്പായി മാത്രമല്ല, ജീവിതത്തിനും കരിയറിനും നേതൃത്വത്തിനുമുള്ള പരിശീലനമായാണ് ഓർമ്മ കാണുന്നത്. യുവതലമുറയുടെ ഭാവിയെ ഗൗരവത്തോടെ കാണുന്ന മാതാപിതാക്കളും അധ്യാപകരും വിദ്യാഭ്യാസ സ്ഥാപനങ്ങളും പൊതുസമൂഹവും പ്രത്യേകം ശ്രദ്ധിക്കേണ്ട യുവജന ശാക്തീകരണ സംരംഭം കൂടിയാണിത്.

സീസൺ 4-ൽ വിവിധ വിഭാഗങ്ങളിലെ വിജയികളെ കാത്തിരിക്കുന്നത് ആകെ ₹10 ലക്ഷം രൂപയുടെ കാഷ് പ്രൈസുകളും ട്രോഫികളും സർട്ടിഫിക്കറ്റുകളുമാണ്. സീനിയർ വിഭാഗത്തിലെ ഏറ്റവും മികച്ച പ്രതിഭയ്ക്ക് നൽകുന്ന ‘ORMA Orator of the Year 2026’ ഗ്രാൻഡ് പ്രൈസായി അറ്റോർണി ജോസഫ് കുന്നേൽ സ്പോൺസർ ചെയ്യുന്ന ₹1,00,000 കാഷ് അവാർഡ്, ട്രോഫി, സർട്ടിഫിക്കറ്റ് എന്നിവ ലഭിക്കും.

സീനിയർ വിഭാഗത്തിൽ മലയാളം, ഇംഗ്ലീഷ് ഭാഷകളിൽ ഓരോന്നിലും ഒന്നാം സമ്മാനം ₹50,000 വീതമാണ്. ഓരോ ഭാഷയിലും ₹30,000 വീതം രണ്ട് രണ്ടാം സമ്മാനങ്ങൾ, ₹20,000 വീതം മൂന്ന് മൂന്നാം സമ്മാനങ്ങൾ, ₹10,000 വീതം നാല് നാലാം സമ്മാനങ്ങൾ, ₹5,000 വീതം അഞ്ച് അഞ്ചാം സമ്മാനങ്ങൾ നൽകും.

ജൂനിയർ വിഭാഗത്തിൽ മലയാളം, ഇംഗ്ലീഷ് ഭാഷകളിൽ ഓരോന്നിലും ഒന്നാം സമ്മാനം ₹25,000 വീതമാണ്. ഓരോ ഭാഷയിലും ₹15,000 വീതം രണ്ട് രണ്ടാം സമ്മാനങ്ങൾ, ₹10,000 വീതം മൂന്ന് മൂന്നാം സമ്മാനങ്ങൾ, ₹5,000 വീതം നാല് നാലാം സമ്മാനങ്ങൾ, ₹3,000 വീതം അഞ്ച് അഞ്ചാം സമ്മാനങ്ങൾ നൽകും.

പുതുതായി ആരംഭിക്കുന്ന സബ് ജൂനിയർ വിഭാഗത്തിൽ മലയാളം, ഇംഗ്ലീഷ് ഭാഷകളിൽ ഓരോന്നിലും, ഒന്നാം സമ്മാനം ₹15,000, രണ്ടാം സമ്മാനം ₹10,000, മൂന്നാം സമ്മാനം ₹5,000 എന്നിങ്ങനെയാണ് സമ്മാനത്തുക. കൂടാതെ ₹2,000 വീതമുള്ള അഞ്ച് പ്രോത്സാഹന സമ്മാനങ്ങളും നൽകും. വിജയികൾക്ക് ട്രോഫികളും സർട്ടിഫിക്കറ്റുകളും ലഭിക്കും.

ഒന്നാം സീസണിൽ 428 പേരും, രണ്ടാം സീസണിൽ 1,160 പേരും പങ്കെടുത്ത ഓർമ്മ അന്താരാഷ്ട്ര പ്രസംഗമത്സരം മൂന്നാം സീസണോടെ 1,680 പേരോടെ കൂടുതൽ വിപുലമായ ആഗോള വിദ്യാർത്ഥി പങ്കാളിത്തത്തിലേക്ക് വളർന്നു. ആദ്യ മൂന്ന് സീസണുകളിലായി 3,500-ത്തിലധികം വിദ്യാർത്ഥികൾ ഓർമ്മയുടെ അന്താരാഷ്ട്ര പ്രസംഗവേദിയുടെ ഭാഗമായി.

ഓൺലൈൻ മത്സരങ്ങൾ, പരിശീലന സെഷനുകൾ, അസൈൻമെൻറ്റെകൾ, വ്യക്തിഗത ഫീഡ്ബാക്ക്, വിവിധ റൗണ്ടുകൾ എന്നിവയിലൂടെ വിദ്യാർത്ഥികളുടെ കഴിവുകൾ പടിപടിയായി വളർത്തുന്ന രീതിയാണ് മുൻ സീസണുകളിലും പിന്തുടർന്നത്. അതിൻറ്റെ തുടർച്ചയായി കൂടുതൽ വിപുലമായ പരിശീലനവും ആഗോള പങ്കാളിത്തവും സാമൂഹിക ദൗത്യവും ഉൾപ്പെടുത്തിയാണ് നാലാം സീസൺ മുന്നോട്ടുപോകുന്നത്.

ഓർമ്മ അന്താരാഷ്ട്ര പ്രസംഗമത്സരത്തിന്റെ അഡ്വൈസറി ബോർഡിൽ നീതിന്യായം, ശാസ്ത്രം, വിദ്യാഭ്യാസം, കല, പരിശീലനം തുടങ്ങിയ മേഖലകളിലെ പ്രമുഖർ അംഗങ്ങളാണ്. കേരള ഹൈക്കോടതി മുൻ ജസ്റ്റിസ് ഡോ. നാരായണ കുറുപ്പ്, DRDO Aero Systems മുൻ ഡയറക്ടർ ജനറൽ ഡോ. ടെസ്സി തോമസ്, Arcadia University USA പ്രസിഡന്റ് ഡോ. അജയ് നായർ, കേരള സെൻട്രൽ യൂണിവേഴ്സിറ്റി മുൻ വൈസ് ചാൻസലർ ഡോ. ജാൻസി ജെയിംസ്, എം.ജി. യൂണിവേഴ്സിറ്റി മുൻ വൈസ് ചാൻസലർ ഡോ. ബാബു സെബാസ്റ്റ്യൻ, Holy Family University അക്കാദമിക് അഫയേഴ്സ് വൈസ് പ്രസിഡന്റ് ഡോ. ബിന്ദു ആലപ്പാട്ട്, ഡോ. വിപിൻ വി. റോൾഡന്റ്, സീനിയർ കൺസൾട്ടന്റ് സൈക്കോളജിസ്റ്റ് ആൻഡ് പെർഫോമൻസ് കോച്ച്, മെന്റലിസ്റ്റ് നിപിൻ നിരവത്ത്, ചലച്ചിത്ര സംവിധായകൻ ലാൽ ജോസ് എന്നിവരാണ് അഡ്വൈസറി ബോർഡിലുള്ളത്.

സീസൺ 4-ന്റെ രാജ്യാന്തര സംഘാടന പ്രവർത്തനങ്ങളിൽ നാഷണൽ പ്രസിഡന്റ് സജി സെബാസ്റ്റ്യൻ, ഓർമ്മ ട്രസ്റ്റി ബോർഡ് ചെയർമാൻ ജോസ് ആറ്റുപുറം, ജനറൽ സെക്രട്ടറി ക്രിസ്റ്റി എബ്രഹാം, ട്രഷറർ റോഷിൻ പ്ലാമൂട്ടിൽ, ഓർമ്മ ടാലന്റ് പ്രമോഷൻ ഫോറം ചെയർമാൻ ജോസ് തോമസ്, പബ്ലിക് ആൻഡ് പൊളിറ്റിക്കൽ അഫയേഴ്സ് ചെയർ വിൻസെന്റ് ഇമ്മാനുവൽ, മീഡിയ ചെയർ അരുൺ കോവാട്ട്, പി.ആർ.ഒ. മെർളിൻ മേരി അഗസ്റ്റിൻ എന്നിവരും വിവിധ ഉത്തരവാദിത്വങ്ങൾ നിർവഹിക്കുന്നു. കേരളത്തിലെ പ്രവർത്തനങ്ങൾക്ക് ഓർമ്മ കേരള ചാപ്റ്റർ പ്രസിഡൻറ്റെ കുര്യാക്കോസ് മണിവയലിൽ, എബി ജെ. ജോസ്, ഷാജി അഗസ്റ്റിൻ ആറ്റുപുറം എന്നിവർ നേതൃത്വം നൽകുന്ന ടീമും സജീവമായി രംഗത്തുണ്ട്. WMF സ്ഥാപക ചെയർമാൻ ഡോ. പ്രിൻസ് പള്ളിക്കുന്നേലിൻറ്റെയും ഗ്ലോബൽ പ്രസിഡന്റ് ഡോ. ആനി ലിബുവിൻറ്റെയും നേതൃത്വത്തിലുള്ള വേൾഡ് മലയാളി ഫെഡറേഷൻറ്റെ ലോകവ്യാപക ശൃംഖലയും സീസൺ 4-ൽ ശക്തമായി പങ്കുചേരുന്നു.

സെപ്റ്റംബർ 15 മുതൽ ഡിസംബർ 15, 2026 വരെയാണ് ആദ്യ റൗണ്ട്. തുടർന്ന് മത്സരാർത്ഥികൾ വിവിധ ഘട്ടങ്ങളിലെ മത്സര–പരിശീലന പ്രക്രിയയിലൂടെ മുന്നേറും. ഈ ഒരു വർഷത്തെ യാത്രയുടെ പരിസമാപ്തിയായി ജൂനിയർ, സീനിയർ വിഭാഗങ്ങളിലെ മികച്ച പ്രതിഭകൾ 2027 ഓഗസ്റ്റ് 7-ന് പാലാ, കേരളത്തിൽ നടക്കുന്ന ഗ്രാൻഡ് ഫിനാലെയിൽ മാറ്റുരയ്ക്കും.

ഒരു മൂന്നു മിനിറ്റ് പ്രസംഗവീഡിയോയിൽ തുടങ്ങി, മത്സരത്തിൻറ്റെയും പരിശീലനത്തിൻറ്റെയും മെന്ററിംഗിൻറ്റെയും വിവിധ ഘട്ടങ്ങൾ കടന്ന് പാലായിലെ സ്വപ്നവേദിയിലേക്കെത്താവുന്ന ഒരു യാത്രയാണ് ഓർമ്മ WMF-നോടു ചേർന്ന് സീസൺ 4-ൽ ലോകമെമ്പാടുമുള്ള മലയാളി വിദ്യാർത്ഥികൾക്കായി ഒരുക്കുന്നത്. ലഹരിക്കെതിരെ യുവശബ്ദങ്ങൾ ഉയർത്തുന്നതിനൊപ്പം, അവർ നാളെ ലോകത്തിൻറ്റെ ഏതു ഭാഗത്തും ഏതു തൊഴിൽമേഖലയിലും എത്തിയാലും സ്വന്തം അറിവും ആശയങ്ങളും ആത്മവിശ്വാസത്തോടെ പങ്കുവയ്ക്കാൻ കഴിയുന്ന മികച്ച ആശയവിനിമയക്കാരും നേതാക്കളുമായി വളരാൻ സഹായിക്കുക എന്ന ദീർഘകാല ലക്ഷ്യവും ഈ സംരംഭത്തിനുണ്ട്.

രജിസ്ട്രേഷൻ: സെപ്റ്റംബർ 15 – ഡിസംബർ 15, 2026 | ആദ്യ റൗണ്ട്: 3 മിനിറ്റ് പ്രസംഗവീഡിയോ | ഭാഷകൾ: മലയാളം, ഇംഗ്ലീഷ് | രജിസ്ട്രേഷൻ ഫീസ്: ഇല്ല | പരിശീലനവും മെൻറ്റെറിംഗും: സൗജന്യം | ഗ്രാൻഡ് ഫിനാലെ: ഓഗസ്റ്റ് 7, 2027 — പാലാ, കേരളം.

കൂടുതൽ വിവരങ്ങൾക്കും രജിസ്ട്രേഷനും ഓർമ്മ അന്താരാഷ്ട്ര പ്രസംഗമത്സരത്തിൻറ്റെ ഔദ്യോഗിക വെബ്സൈറ്റ് www.ormaspeech.org സന്ദർശിക്കാം. വാട്സ്ആപ്പ്: +1 412 656 4853 | +91 7907810571.