ദുബൈ എയർഷോയ്ക്കിടെ നടന്ന തേജസ് യുദ്ധവിമാന അപകടത്തിൽ ഇന്ത്യൻ വ്യോമസേന വിംഗ് കമാൻഡർ നമൻഷ് സ്യാൽ വീരമൃത്യു വരിച്ചു. ഹിമാചൽ പ്രദേശിലെ കംഗ്ര സ്വദേശിയായ അദ്ദേഹത്തിന് വ്യോമാഭ്യാസത്തിനിടെ വിമാനത്തിന്റെ നിയന്ത്രണം നഷ്ടപ്പെട്ടതാണ് ദുരന്തത്തിന് കാരണമായത്.

അപകടം ദുബൈ അൽ മക്തൂം അന്താരാഷ്ട്ര വിമാനത്താവളത്തിന് സമീപമാണ് സംഭവിച്ചത്. സംഭവത്തെ തുടർന്ന് എയർഷോയിലെ ഉച്ചതിരിഞ്ഞുള്ള സന്ദർശനങ്ങൾ താൽക്കാലികമായി നിർത്തിവെച്ച് പ്രേക്ഷകരെ പ്രധാന എക്സിബിഷൻ ഏരിയയിലേക്ക് മാറ്റുകയായിരുന്നു.

ദാരുണ സംഭവത്തിൽ പ്രതിരോധമന്ത്രി രാജ്നാഥ് സിംഗും സംയുക്ത സൈനിക മേധാവി അനിൽ ചൗഹാനും അനുശോചനം രേഖപ്പെടുത്തി. 2016ൽ ഇന്ത്യൻ വ്യോമസേനയിൽ ചേർത്ത തദ്ദേശീയമായി വികസിപ്പിച്ച തേജസ് യുദ്ധവിമാനത്തിന്റെ അപകടകാരണം ഇപ്പോഴും വ്യക്തമല്ല.

അമേരിക്കൻ ഡോളറിനെതിരെ ഇന്ത്യൻ രൂപ ചരിത്രത്തിലെ ഏറ്റവും താഴ്ന്ന നിലയായ 89.48 എന്ന നിരക്കിൽ എത്തി. ഫെഡറൽ റിസർവ് പലിശനിരക്ക് കുറയ്ക്കാത്തതും ഇന്ത്യ–യുഎസ് വ്യാപാരകരാറിനെ ചുറ്റിപ്പറ്റിയ അനിശ്ചിതത്വവുമാണ് വെള്ളിയാഴ്ച രൂപ വലിയ തോതിൽ ഇടിയാൻ കാരണമായത്. സെപ്റ്റംബർ അവസാനം രേഖപ്പെടുത്തിയ 88.80 എന്ന മുൻ റെക്കോർഡും ഈ ഇടിവ് മറികടന്നു.

ഒറ്റദിവസം 80 പൈസ വരെ താഴ്ന്ന രൂപയിലൂടെ അന്താരാഷ്ട്ര വിപണിയിലെ സമ്മർദ്ദം കൂടുതൽ വ്യക്തമായി. യൂറോ, യെൻ, പൗണ്ട് തുടങ്ങിയ പ്രധാന കറൻസികളോടും ഡോളർ ശക്തിപ്രാപിച്ചതോടെ വിപണി ദിശമാറി. ക്രിപ്‌റ്റോയും എഐ–ടെക് സ്റ്റോക്കുകളുമുള്‍പ്പെടെ നിരവധി മേഖലകളിലെ വൻ വിൽപ്പനയും കറൻസി വിപണിയെ അലോസരപ്പെടുത്തി.

വിപണി ഇടിവ് കണക്കിലെടുത്തിട്ടും റിസർവ് ബാങ്ക് സജീവമായി ഇടപെട്ടില്ലെന്നതാണ് വിദഗ്ധരുടെ നിരീക്ഷണം. ഡോളറിന്റെ ആവശ്യം ഉയരുന്ന സാഹചര്യത്തിൽ കരുതൽ ശേഖരം അതിരുകടന്ന് ഉപയോഗിക്കാനില്ലെന്ന് ആർബിഐ മോശമാകാത്ത രീതിയിൽ പിൻവാങ്ങുന്നതായി ഓസ്‌ട്രേലിയ–ന്യൂസിലാൻഡ് ബാങ്ക് സ്ട്രാറ്റജിസ്റ്റ് ധീരജ് നിം വിലയിരുത്തി.

ന്യൂസ് ഡെസ്ക്, മലയാളം യുകെ

എസ്.എം.എയുടെ ആദ്യകാല അംഗവും സജീവ പ്രവർത്തകനുമായ ടോജി ജോർജിന്റെ ഭാര്യ അനുവിന്റെ പിതാവ് കോട്ടയം തെള്ളകം കുന്നക്കാട്ട് ശ്രീ കെ. ടി. തോമസ് നിര്യാതനായി. പരേതൻ കെ.എസ്.ഇ.ബിയിൽ റിട്ട. എഞ്ചിനീയർ ആയിരുന്നു.

ടോജിയുടെ ഭാര്യാ പിതാവിൻറെ നിര്യാണത്തിൽ മലയാളം യുകെ ന്യൂസിന്റെ അനുശോചനം ബന്ധുക്കളെയും സുഹൃത്തുക്കളെയും അറിയിക്കുന്നു

പതിനെട്ടു മലകൾക്കും അധിപനായ ശബരിമല ശ്രീ ധർമ്മശാസ്താവിന്റെ നാമ സങ്കീർത്തനങ്ങൾ ഉരുവിട്ട് കൊണ്ട് സംഗീത സാന്ദ്രമായ ഒരു വേദി ബർമിംഗാം ശ്രീ ബാലാജി ക്ഷേത്രാങ്കണത്തിലെ അയ്യപ്പ സന്നിധിയിൽ ഡിസംബർ 6-ാം തീയതി അരങ്ങേറുകയാണ് .

മലയാളം തമിഴ് ഹിന്ദി ഭക്തി ഗാനങ്ങൾ കോർത്തിണക്കി കൊണ്ട് വൈകിട്ട് 4 മണി മുതൽ 8 മണിവരെ നീണ്ടു നിൽക്കുന്ന ഈ സംഗീതാർച്ചനയിൽ യുകെയിലെ പ്രശസ്തരായ ഗായകർക്കൊപ്പം കീബോർഡിസ്റ്റ് ശ്രീ. മുകേഷ് കണ്ണൻ, തബലിസ്റ്റ് ശ്രീ.സന്ദീപ്, വയലിനിസ്റ്റ് ശ്രീ അക്ഷ കുമാർ എന്നിവർ നയിക്കുന്ന ഓർക്കസ്ട്രയും ചേരുന്നു..ഈ ഭക്തിഗാന സുധ ആസ്വദിക്കുന്നതിനായി യുകെയിലെ എല്ലാ അയ്യപ്പ ഭക്തരെയും ബാലാജി ക്ഷേത്രാങ്കണത്തിലേക്ക് ക്ഷണിക്കുന്നതായി സംഘാടകർ അറിയിച്ചു.

വിദ്യാഭ്യാസ വകുപ്പിലെ വിവിധ ഓഫീസുകളില്‍ വിജിലന്‍സ് നടത്തിയ പരിശോധനയില്‍ വൻ ക്രമക്കേടുകൾ പുറത്തുവന്നു . അധ്യാപകര്‍ക്ക് സേവന ആനുകൂല്യം നല്‍കുന്നതിനായി ചില ജീവനക്കാര്‍ ഗൂഗിള്‍ പേ വഴി വരെ പണം വാങ്ങിയതായി കണ്ടെത്തി. കുട്ടനാട്, ആലപ്പുഴ, മലപ്പുറം എന്നിവിടങ്ങളിലെ ജീവനക്കാരുടെ അക്കൗണ്ടുകളില്‍ എത്തിയ വലിയ തുകകളുടെ രേഖകളും ലഭിച്ചു. ഇല്ലാത്ത കുട്ടികളെ ഹാജര്‍ പട്ടികയില്‍ ചേര്‍ത്ത് അധ്യാപക തസ്തിക നിലനിര്‍ത്തിയ സംഭവങ്ങളും പിടികൂടി.

വിജിലന്‍സ് റിപ്പോര്‍ട്ടില്‍ പേര് വരുന്ന എല്ലാവർക്കെതിരെയും കര്‍ശന നടപടി ഉണ്ടാകുമെന്ന് വിദ്യാഭ്യാസ മന്ത്രി വി. ശിവന്‍കുട്ടി വ്യക്തമാക്കി. സംഭവത്തെ വകുപ്പ് അതീവ ഗൗരവത്തിലാണ് കാണുന്നതെന്നും ഉടന്‍ തന്നെ ആഭ്യന്തര അന്വേഷണ സമിതി പ്രവര്‍ത്തനം ആരംഭിക്കുമെന്നും അദ്ദേഹം പറഞ്ഞു. പരിശോധന കൂടുതല്‍ സ്ഥലങ്ങളിലേക്ക് വ്യാപിപ്പിക്കുമെന്നും, ആരായാലും നിയമലംഘനം ചെയ്താല്‍ ക്ഷമിക്കില്ലെന്നും മന്ത്രി കൂട്ടിച്ചേര്‍ത്തു. ജനങ്ങളുടെയും അധ്യാപക സമൂഹത്തിന്റെയും വിശ്വാസം വീണ്ടെടുക്കുന്നതിനായി നടപടി വേഗത്തിലാക്കുമെന്നും ഉറപ്പുനല്‍കി.

ബ്രസീലിലെ ബെലേമിൽ നടക്കുന്ന അന്താരാഷ്ട്ര കാലാവസ്ഥാ ഉച്ചകോടിയുടെ വേദിയിൽ തീപിടുത്തമുണ്ടായി. തീ ഉയർന്നതോടെ പ്രതിനിധികളെയും മറ്റും ഉടന്‍ പുറത്തേക്ക് മാറ്റി. ചര്‍ച്ചകള്‍ താല്‍ക്കാലികമായി നിലച്ചതോടെ സ്ഥലത്ത് ആശങ്കയും അലച്ചിലും നിലനിന്നു.

തീപിടുത്തം മിനിറ്റുകൾക്കകം നിയന്ത്രണവിധേയമാക്കിയതായി അധികൃതര്‍ അറിയിച്ചു. പുക ശ്വസിച്ചതിനെ തുടര്‍ന്ന് പതിമൂന്ന് പേര്‍ക്ക് ചികിത്സ തേടേണ്ടി വന്നു. എന്നാല്‍ ആരുടെയും നില ഗുരുതരമല്ലെന്ന് വ്യക്തമാക്കിയിട്ടുണ്ട്.

തീപിടുത്തത്തിന്റെ കാരണം അന്വേഷിച്ചുവരികയാണ്. ഒരു ഇലക്ട്രിക്കല്‍ ഉപകരണമോ മൈക്രോവേവോ തകരാറിലായത് കാരണം ആയിരിക്കാമെന്നാണ് പ്രാഥമിക വിവരം. ഇന്ത്യയില്‍ നിന്നുള്ളവര്‍ ഉള്‍പ്പെടെ എല്ലാ പ്രതിനിധികളും സുരക്ഷിതരാണെന്ന് അധികൃതര്‍ ഉറപ്പുനല്‍കി.

ശബരിമല സ്വർണക്കൊള്ള കേസിൽ തിരുവിതാംകൂർ ദേവസ്വംബോർഡിന്റെ മുൻ പ്രസിഡന്റ് എ. പത്മകുമാറിനെ അറസ്റ്റ് ചെയ്തതോടെ സിപിഎമ്മിന് വലിയ രാഷ്ട്രീയ തിരിച്ചടിയാണ്. തദ്ദേശതിരഞ്ഞെടുപ്പ് അടുത്തിരിക്കെ പത്തനംതിട്ടയിൽ നിന്നുള്ള മുതിർന്ന നേതാവിന്റെ അറസ്റ്റ് ഇടതുമുന്നണിക്ക് പ്രതിസന്ധി സൃഷ്ടിച്ചു.

കേസിന്റെ മുഖ്യ ആസൂത്രകൻ പത്മകുമാറാണെന്നാണ് എസ്‌ഐടിയുടെ നിലപാട്. 2019ൽ ദ്വാരപാലക കവചങ്ങൾ സ്വർണമാണെന്ന് സ്ഥിരീകരിച്ചിട്ടുണ്ടെങ്കിലും പിന്നീട് അത് ചെമ്പാണെന്ന് രേഖപ്പെടുത്തിയതാണ് അന്വേഷണത്തിന്റെ പ്രധാന കണ്ടെത്തൽ. ഉണ്ണികൃഷ്ണൻ പോറ്റിയടക്കമുള്ള പ്രതികളുടെ മൊഴികളും പത്മകുമാറിനെതിരെയാണ്.

കേസിൽ ആദ്യം അറസ്റ്റിലായത് ഉണ്ണികൃഷ്ണൻ പോറ്റിയായിരുന്നു. തുടർന്ന് മുരാരി ബാബു, ഡി. സുധീഷ് കുമാർ, മുൻ ദേവസ്വം കമ്മീഷണർ എൻ. വാസു എന്നിവർ പിടിയിലായി. ഇവരുടെ മൊഴികൾക്കു ശേഷമായിരുന്നു പത്മകുമാറിന്റെ അറസ്റ്റ് കൂടുതൽ ഉറപ്പായത്.

തെരഞ്ഞെടുപ്പിൽ ഹരിതചട്ടം പൂർണമായും പാലിക്കുന്നുണ്ടെന്ന് തെരഞ്ഞെടുപ്പ് കമ്മീഷന്റെയും തദ്ദേശ സ്വയംഭരണ വകുപ്പിന്റെയും ശുചിത്വ മിഷന്റെയും മേൽനോട്ടത്തിൽ ഉറപ്പാക്കും.

പ്രചരണത്തിന് പ്ലാസ്റ്റിക്, പി.വി.സി, ഫ്ലക്സ് തുടങ്ങിയവ പൂർണ്ണമായും നിരോധിച്ചു. ബോർഡുകൾ, ബാനറുകൾ, ഹോർഡിംഗുകൾ തുടങ്ങിയ നിർമിക്കുന്നതിന് പേപ്പർ, മലിനീകരണ നിയന്ത്രണ സർട്ടിഫൈ ചെയ്ത 100 ശതമാനം കോട്ടൺ, പുനചംക്രമണം ചെയ്യാവുന്ന പോളിഎഥിലീൻ പോലുള്ളവ ഉപയോഗിക്കാം. ഓരോ ബോർഡിലും പി.സി.ബി വെബ് സൈറ്റിൽ നിന്നും സർട്ടിഫിക്കറ്റ് ലഭിക്കും വിധമുള്ള ക്യു.ആർ.കോഡ്, പ്രിന്റിംഗ് യൂണിറ്റിന്റെ പേര്, ഫോൺ നമ്പർ എന്നിവ നിർബന്ധമായും പതിച്ചിരിക്കണം.

പോളിംഗ് ബൂത്തുകൾ, വോട്ടെണ്ണൽ കേന്ദ്രങ്ങൾ, പരിശീലന ക്യാമ്പുകൾ എന്നിവിടങ്ങളിൽ സ്റ്റീൽ, ചില്ല്, സെറാമിക് പാത്രങ്ങൾ മാത്രമേ ഭക്ഷണ പാനീയ വിതരണത്തിന് ഉപയോഗിക്കാവൂ. പ്ലാസ്റ്റിക് ബോട്ടിലുകൾ തെർമ്മോകോൾ കപ്പുകൾ, പ്ലാസ്റ്റിക് പാഴ് വസ്തുക്കൾ തുടങ്ങിയവ പൂർണ്ണമായും ഒഴിവാക്കണം.

പോളിംഗ് ബൂത്തുകൾ, വോട്ടെണ്ണൽ കേന്ദ്രങ്ങൾ എന്നിവയുടെ ക്രമീകരണത്തിനും ഇലക്ഷൻ സാധന സാമഗ്രികളുടെ കൈമാറ്റത്തിനും പ്ലാസ്റ്റിക് വസ്തുക്കളുടെ ഉപയോഗം നിയന്ത്രിക്കും. പ്രചാരണ സാമഗ്രികൾ ശേഖരിച്ച് യൂസർഫീ നൽകി ഹരിതകർമസേനയ്ക്ക് കൈമാറണം. അല്ലാത്തപക്ഷം തദ്ദേശ സ്ഥാപനങ്ങൾ അത് നീക്കം ചെയ്ത് ചെലവ് സ്ഥാനാർഥികളിൽ നിന്ന് ഈടാക്കും.ജില്ലാ എൻഫോഴ്‌സ്‌മെന്റ് സ്‌ക്വാഡ് മുഖേന നിരീക്ഷണം ശക്തമാക്കും.

യൂറോപ്പിൾ ആദ്യമായി മലയാളികൾ നേതൃത്വം നൽകുന്ന ഒരു ലയൺസ് ക്ലബ് രൂപീകൃതമാകുകയാണ്.
ലയൻസ് ക്ലബ്‌ കൊച്ചി യൂറോപ്പിന്റെ ആദ്യ യോഗം നവംബർ 15 ആം തിയതി ശനിയാഴ്ച ബിർമിംഹാമിലെ മാർസ്റ്റൺ ഗ്രീൻ ടെന്നീസ് ക്ലബ്ബിൽ വെച്ചാണ് നടന്നത് . ലയൺസ് ക്ലബ് കൊച്ചി യൂറോപ്പ് പ്രസിഡൻറ് ഷോയ് കുര്യാക്കോസിന്റെ അധ്യക്ഷതയിൽ നടന്ന മീറ്റിംഗിൽ ഭാവി പരിപാടികളെ കുറിച്ച് വിശദമായ ചർച്ച നടന്നു. ലോകത്താകമാനമായി 200 രാജ്യങ്ങളിലായി 1.4 മില്യൺ അംഗങ്ങളുള്ള ബ്രഹുത്തായ ഒരു സംഘടനയുടെ ഭാഗമായി ‘ലയൻസ് ക്ലബ്‌ കൊച്ചി യൂറോപ്പ്’ നിലവിൽ വരുമ്പോൾ അത് യൂറോപ്പിലെ മലയാളി കുടിയേറ്റ ചരിത്രത്തിൽ തന്നെ നാഴികകല്ലായി മാറും എന്ന് പ്രസിഡന്റ്‌ ഷോയ് കുര്യക്കോസ് തന്റെ അധ്യക്ഷ പ്രസംഗത്തിൽ പറഞ്ഞു. യോഗത്തിൽ സെക്രട്ടറി ജോളി തോമസ്, ട്രഷറർ ടിന്റു ഏബ്രഹം എന്നിവർ സന്നിഹിതരായിരുന്നു.

എക്സിക്യൂട്ടീവ് മെമ്പർമാരായ ബിജു വർഗീസ് , ജിബു ജേക്കബ്, സുവി കുരുവിള, ജിതേഷ് നായർ , സിജോ അറക്കൽ, സിറോഷ് ഫ്രാൻസിസ്,ജോൺസൻ മാളിയേക്കൽ ,ടിന്റു കുര്യാക്കോസ്, കനേഷ്യസ് അത്തിപ്പൊഴിയിൽ എന്നിവരും യോഗത്തിൽ പങ്കെടുത്തു.

ജനറൽ ബോഡി മീറ്റിംഗ് വിളിച്ചു കൂട്ടുവാനും സംഘടനയുടെ ഔദ്യോഗീകമായ ഉത്ഘാടനം,തുടർ നടപടികൾ എന്നിവയെക്കുറിച്ച് തീരുമാനം എടുക്കുവാനും എക്സിക്ക്യൂട്ടീവ് യോഗത്തിൽ ധാരണയായി . ആദ്യ ഘട്ടം എന്ന നിലയിൽ,ആരോഗ്യ പരിശോധനാ ക്യാമ്പുകൾ, വിവിധ ചാരിറ്റി പ്രവർത്തനങ്ങളുടെ എകോപനം, സമൂഹീക നന്മക്കായി ഉതകുന്ന വിവിധ പരിപാടികൽ എന്നിവ ലയൺസ് ക്ലബ് കൊച്ചി യൂറോപ്പിന്റെ ഭാഗമായി സംഘടിപ്പിക്കുമെന്ന് ഭാരവാഹികൾ അറിയിച്ചു .”we serve ” എന്ന മുദ്രാവാക്യവുമായി, ലോകം മുഴുവൻ സേവന സന്നദ്ധരുള്ള ഈ ആഗോള സംഘടനയുടെ പ്രവർത്തനങ്ങൾക്കു യുകെ, യൂറോപ്പ് മലയാളി സമൂഹത്തിൽ നിന്നും അകമഴിഞ്ഞ സഹകരണം പ്രതീക്ഷിക്കുന്നതായി പ്രസിഡന്റ് ഷോയ് കുര്യാക്കോസ് അറിയിച്ചു .

ദില്ലി: ചെങ്കോട്ട സ്ഫോടനവുമായി ബന്ധപ്പെട്ട് കൂടുതൽ നിർണായക വിവരങ്ങൾ പുറത്ത് വരുന്നു. പാക് അധീന കാശ്മീരും അഫ്‌ഗാനിസ്ഥാനും ഉൾപ്പെടെയുള്ള മേഖലകളിൽ നിന്ന് ഇന്ത്യയിലെ ബന്ധുക്കൾക്ക് നിരന്തരം ഫോൺകോളുകൾ വന്നതായി അന്വേഷണ ഏജൻസികൾ സ്ഥിരീകരിച്ചു. ഭീകരർ രൂപീകരിച്ച ടെലഗ്രാം ഗ്രൂപ്പിൽ പിടിയിലായവരും അംഗങ്ങളായിരുന്നുവെന്നും വ്യക്തമാക്കിയിട്ടുണ്ട്. കസ്റ്റഡിയിൽ ഉള്ളവരുടെ ബാങ്ക് അക്കൗണ്ടുകൾ മരവിപ്പിച്ചതായി അന്വേഷണ സംഘം അറിയിച്ചു.

അതേസമയം, കേസിലെ മുഖ്യ പ്രതി ഉമർ നബിയുമായി ബന്ധമുള്ളവരെ കണ്ടെത്താനുള്ള എൻഐഎയുടെ നീക്കം ശക്തമായി തുടരുന്നു. കഴിഞ്ഞ ഒരു മാസത്തിനിടെ ഉമർ നബി ഫോണിൽ ബന്ധപ്പെട്ടവരുടെ പട്ടിക പരിശോധിച്ചു വരികയാണ്. അൽഫലാ സർവകലാശാലയിലെ ഡോക്ടർമാർ ഉൾപ്പെടെയുള്ള ഏകദേശം 200 ജീവനക്കാർ അന്വേഷണ ഏജൻസികളുടെ നിരീക്ഷണത്തിലാണ്. സ്ഫോടനത്തിനുശേഷം ക്യാമ്പസിൽ നിന്ന് മാറിപ്പോയവരെ തിരിച്ചറിയാനുള്ള ശ്രമവും കൂടുതൽ ഊർജിതമാക്കിയിട്ടുണ്ട്.