കൊച്ചി: ഡോക്ടറെ മർദിച്ച കേസിൽ നിർണായക വെളിപ്പെടുത്തലുമായി അറസ്റ്റിലായ പ്രതികൾ. തങ്ങൾക്കെതിരായ പീഡനക്കേസ് ഒതുക്കിത്തീർക്കാൻ ഡോക്ടർ ജോൺസൺ കെ.എഫ്. വർഗീസ് ഒരു കോടി രൂപ വാഗ്ദാനം ചെയ്തിരുന്നുവെന്നാണ് പ്രതികളുടെ മൊഴി. പണം സംബന്ധിച്ച് പിന്നീട് തർക്കമുണ്ടായതായും ഇവർ പോലീസിനോട് പറഞ്ഞു. സംഭവത്തിൽ അറസ്റ്റിലായ നടൻ വിപിൻ പെരുമ്പള്ളി, നടി അതുല്യ ചന്ദ്ര, വിഷ്ണു എന്നിവരെ ഇന്ന് തെളിവെടുപ്പിന് കൊണ്ടുപോകും. അതേസമയം, ഒളിവിൽ കഴിയുന്ന ഡോക്ടറെ കണ്ടെത്താനുള്ള ശ്രമം പോലീസ് ഊർജിതമാക്കി.

പണം ആവശ്യപ്പെട്ട് തന്നെ മർദിച്ചുവെന്നായിരുന്നു ആദ്യം ഡോക്ടർ പോലീസിൽ പരാതി നൽകിയത്. എന്നാൽ, പിന്നീട് ഡോക്ടർക്കെതിരേ ബലാത്സംഗക്കേസ് രജിസ്റ്റർ ചെയ്തതോടെ ഇയാൾ ഒളിവിൽ പോവുകയായിരുന്നു. മർദനക്കേസിൽ പിടിയിലായ പ്രതികളെ ചോദ്യം ചെയ്തപ്പോഴാണ് പീഡനക്കേസ് ഒതുക്കാൻ ഒരു കോടി രൂപ വാഗ്ദാനം ചെയ്തെന്ന വിവരം പുറത്തുവന്നത്. കേസിൽ 12-ഓളം പേർ പ്രതികളാണെന്നാണ് എഫ്ഐആറിൽ പറയുന്നത്. ഡോക്ടറെ ഫ്ലാറ്റിലേക്ക് വിളിച്ചുവരുത്തിയപ്പോൾ ഇവരെല്ലാവരും അവിടെയുണ്ടായിരുന്നുവെന്നാണ് ഡോക്ടറുടെ നേരത്തെയുള്ള മൊഴി. ഇതിൽ മൂന്നുപേരാണ് നിലവിൽ അറസ്റ്റിലായത്. ഡോക്ടറുടെ പക്കൽനിന്ന് പ്രതികൾ പിടിച്ചെടുത്ത മൊബൈൽ ഫോൺ പീഡനപരാതി നൽകിയ യുവതി പോലീസിന് കൈമാറിയിട്ടുണ്ട്. ഫോണിൽനിന്ന് അശ്ലീല ദൃശ്യങ്ങളും കണ്ടെത്തിയതായി പോലീസ് അറിയിച്ചു.

അതിനിടെ, തനിക്കെതിരായ ബലാത്സംഗ ആരോപണം കെട്ടിച്ചമച്ചതാണെന്ന് ചൂണ്ടിക്കാട്ടി ഡോക്ടർ എറണാകുളം സെഷൻസ് കോടതിയിൽ മുൻകൂർ ജാമ്യാപേക്ഷ നൽകി. സംഭവത്തിൽ കടവന്ത്ര പോലീസും ഇൻഫോപാർക്ക് പോലീസും അന്വേഷണം തുടരുകയാണ്. പ്രതികളുടെ മൊഴികളും ഫോണിൽനിന്ന് ലഭിച്ച വിവരങ്ങളും അന്വേഷണത്തിൽ നിർണായകമാകുമെന്നാണ് വിലയിരുത്തൽ. ഡോക്ടറെ കണ്ടെത്താനുള്ള തിരച്ചിലും തുടരുകയാണ്.

കൊച്ചി: നഗരത്തിൽ പൊലീസുകാർക്കുനേരെ തുടർച്ചയായ ആക്രമണങ്ങൾ. ലഹരി ഉപയോഗിച്ച് അവശനിലയിലായ യുവാവ് പൊലീസുകാരന്റെ കൈ കടിച്ചുമുറിച്ചു. സംഭവത്തിൽ കൊല്ലം ശാസ്താംകോട്ട സ്വദേശി മുഹമ്മദ് ഇക്ബാലിനെ പൊലീസ് പിടികൂടി. കൊച്ചി നോർത്ത് സ്റ്റേഷനിലെ ഡ്രൈവർ അജിത് പോളിനാണ് കടിയേറ്റത്. വൈദ്യപരിശോധനയ്ക്കായി ആശുപത്രിയിലെത്തിച്ചപ്പോഴായിരുന്നു ആക്രമണം. നോർത്ത് പാലത്തിന് സമീപത്തുനിന്നാണ് ഇക്ബാലിനെ പൊലീസ് കസ്റ്റഡിയിലെടുത്തത്.

മറ്റൊരു സംഭവത്തിൽ കൊച്ചിയിലെ ഇന്ദിരാഗാന്ധി ആശുപത്രിയിൽ ബഹളമുണ്ടാക്കിയ കൊല്ലം സ്വദേശി അജ്മൽ, സ്ഥലത്തെത്തിയ എസ്ഐ ഹരികൃഷ്ണനെ ആക്രമിച്ചു. ആശുപത്രിയിൽ ബഹളമുണ്ടാക്കുന്നതായി ലഭിച്ച പരാതിയെ തുടർന്നാണ് പൊലീസ് എത്തിയത്. ഔദ്യോഗിക കൃത്യനിർവഹണം തടസ്സപ്പെടുത്തിയതിനും പൊലീസിനെ ആക്രമിച്ചതിനും അജ്മലിനെതിരെ കേസെടുത്തു. രണ്ട് സംഭവങ്ങളിലുമായി രണ്ടുപേരെയാണ് പൊലീസ് പിടികൂടിയത്.

അതിനിടെ, കൊച്ചിയിൽ കഴിഞ്ഞ ദിവസം സ്വകാര്യ ബസ് ഇടിച്ച് ട്രാഫിക് പൊലീസുകാരന് പരുക്കേറ്റിരുന്നു. ഹൈക്കോടതിക്ക് സമീപം വൈകിട്ട് ഏഴരയോടെയായിരുന്നു സംഭവം. മേനക ഭാഗത്തുനിന്ന് അമിതവേഗത്തിലും അശ്രദ്ധമായും എത്തിയ മഹാത്മ ബസ് ബാനർജി റോഡിലേക്ക് തിരിയുന്നതിനിടെയാണ് സിപിഒ ശ്രീദത്തിനെ ഇടിച്ചിട്ടത്. പരുക്കേറ്റ പൊലീസുകാരൻ ആശുപത്രിയിൽ ചികിത്സ തേടി. അപകടമുണ്ടാക്കിയ ബസ് പൊലീസ് കസ്റ്റഡിയിലെടുത്തു. ഡ്രൈവർ കാക്കനാട് സ്വദേശി അനീഷിനെയും കസ്റ്റഡിയിലെടുത്തിട്ടുണ്ട്.

തിരുവനന്തപുരം ആര്യനാട് ഏഴാം ക്ലാസിൽ പഠിക്കുന്ന 13കാരിയെ പീഡിപ്പിച്ച് ഗർഭിണിയാക്കിയ കേസിൽ 17കാരനായ ഐടിഐ വിദ്യാർഥി അറസ്റ്റിൽ. ആര്യനാട് സ്വദേശിയായ കൗമാരക്കാരനാണ് പിടിയിലായത്. പെൺകുട്ടിയുടെ ബന്ധുവായ പ്രതി കുട്ടിയെ നിരന്തരം പീഡിപ്പിച്ചിരുന്നതായാണ് പൊലീസിന്റെ പ്രാഥമിക കണ്ടെത്തൽ. സംഭവത്തിൽ പോക്സോ നിയമപ്രകാരം കേസെടുത്തിട്ടുണ്ട്.

ഏഴുമാസം ഗർഭിണിയായ പെൺകുട്ടിയെ ബന്ധുക്കൾ ആശുപത്രിയിൽ എത്തിച്ചതോടെയാണ് സംഭവം പുറത്തറിയുന്നത്. പരിശോധനയിൽ കുട്ടി ഗർഭിണിയാണെന്ന് വ്യക്തമായതോടെ ആശുപത്രിയിലെ ഡോക്ടർ വിവരം പൊലീസിനെ അറിയിക്കുകയായിരുന്നു. തുടർന്ന് നടത്തിയ അന്വേഷണത്തിലാണ് പ്രതിയെ തിരിച്ചറിഞ്ഞ് കസ്റ്റഡിയിലെടുത്തത്. കുട്ടിയുടെ മൊഴിയും മറ്റു വിവരങ്ങളും അടിസ്ഥാനമാക്കി പൊലീസ് അന്വേഷണം തുടരുകയാണ്.

പ്രായപൂർത്തിയാകാത്ത പ്രതിയെ ജുവനൈൽ കോടതിയിൽ ഹാജരാക്കി. കുട്ടിയുടെ ബന്ധുവായിരുന്ന പ്രതി തന്നെ നിരന്തരം പീഡിപ്പിച്ചിരുന്നുവെന്ന വിവരമാണ് പുറത്തുവന്നിരിക്കുന്നത്. പ്രായപൂർത്തിയാകാത്ത പെൺകുട്ടി ഏഴുമാസം ഗർഭിണിയായ സംഭവത്തിൽ കൂടുതൽ അന്വേഷണം നടത്തി വരികയാണെന്ന് പൊലീസ് അറിയിച്ചു.

കൊച്ചി: മലയാള സിനിമയിലെ പ്രശസ്ത ഛായാഗ്രാഹകൻ ഷാജി കുമാർ (57) അന്തരിച്ചു. കൊച്ചിയിലെ സ്വകാര്യ ആശുപത്രിയിൽ ഇന്ന് പുലർച്ചെയായിരുന്നു അന്ത്യം. സിനിമാ സെറ്റിൽ കുഴഞ്ഞുവീണതിനെ തുടർന്ന് ആശുപത്രിയിൽ പ്രവേശിപ്പിച്ചിരിക്കുകയായിരുന്നു. ‘പുലിമുരുകൻ’, ‘നരൻ’, ‘ഒടിയൻ’ തുടങ്ങി അമ്പതിലേറെ സിനിമകൾക്ക് അദ്ദേഹം ക്യാമറ ചലിപ്പിച്ചിട്ടുണ്ട്. മാസ് ആക്ഷൻ ചിത്രങ്ങൾക്ക് മികവുറ്റ ദൃശ്യഭംഗിയൊരുക്കിയ ഛായാഗ്രാഹകൻ എന്ന നിലയിൽ മലയാള സിനിമയിൽ ശ്രദ്ധേയനായിരുന്നു.

മലയാളത്തിന് പുറമെ തമിഴ്, ഹിന്ദി സിനിമകളിലും അദ്ദേഹം പ്രവർത്തിച്ചിട്ടുണ്ട്. വൈശാഖ്, ഷാജി കൈലാസ്, ജോഷി തുടങ്ങിയ പ്രമുഖ സംവിധായകർക്കൊപ്പം നിരവധി ചിത്രങ്ങളിൽ സഹകരിച്ചു. ‘ഉത്തമൻ’, ‘പകൽപ്പൂരം’, ‘പട്ടണത്തിൽ സുന്ദരൻ’, ‘നസ്രാണി’, ‘റോബിൻഹുഡ്’, ‘ബാബാ കല്യാണി’, ‘മല്ലു സിങ്’, ‘മധുരരാജ’, ‘രാമലീല’, ‘പത്തൊൻപതാം നൂറ്റാണ്ട്’, ‘ബാന്ദ്ര’, ‘തുടരും’ തുടങ്ങിയവയാണ് ശ്രദ്ധേയ ചിത്രങ്ങൾ. 2016ൽ പുറത്തിറങ്ങിയ ‘പുലിമുരുകൻ’ അദ്ദേഹത്തിന്റെ കരിയറിലെ പ്രധാന ചിത്രങ്ങളിലൊന്നായി മാറി.

ചെറുതും വലുതുമായ സിനിമകളെ ഒരുപോലെ സമീപിച്ചിരുന്ന കലാകാരനായിരുന്നു ഷാജി കുമാർ. റിലീസിന് ഒരുങ്ങുന്ന ‘അതിമനോഹരം’, ‘ഒറ്റക്കൊമ്പൻ’ എന്നീ ചിത്രങ്ങളുടെയും ഛായാഗ്രാഹകനായിരുന്നു. അദ്ദേഹത്തിന്റെ വിയോഗം മലയാള സിനിമാ ലോകത്തിന് വലിയ നഷ്ടമാണ്. മൃതദേഹം കൊച്ചിയിലെ സ്വകാര്യ ആശുപത്രി മോർച്ചറിയിൽ സൂക്ഷിച്ചിരിക്കുകയാണ്. രാവിലെ എട്ടുമണിയോടെ സുഹൃത്തിന്റെ ഫ്ലാറ്റിലേക്ക് മൃതദേഹം എത്തിക്കുമെന്നാണ് റിപ്പോർട്ട്.

ആലുവ: ഹാലോവിൻ ആഘോഷത്തിനിടെ പ്രായപൂർത്തിയാകാത്ത പെൺകുട്ടിക്ക് നേരെ ലൈംഗികാതിക്രമം നടന്ന സംഭവത്തിൽ 21കാരൻ അറസ്റ്റിൽ. കടവന്ത്ര സ്വദേശി അലക്സിനെയാണ് ആലുവ പൊലീസ് അറസ്റ്റ് ചെയ്തത്. 15 വയസ്സുകാരിയാണ് അതിക്രമത്തിനിരയായത്. മുപ്പതിലധികം പേർ പങ്കെടുത്ത പാർട്ടിയിലാണ് സംഭവം. വിദ്യാർഥികൾ ഉൾപ്പെടെ നിരവധി പ്രായപൂർത്തിയാകാത്ത പെൺകുട്ടികളും ആൺകുട്ടികളും ആഘോഷത്തിൽ പങ്കെടുത്തിരുന്നതായാണ് വിവരം.

പാർട്ടിക്കിടെ മദ്യസൽക്കാരവും ലഹരിമരുന്ന് ഉപയോഗവും നടന്നതായി പൊലീസ് കണ്ടെത്തിയിട്ടുണ്ട്. ആഘോഷം സംഘടിപ്പിക്കുന്നതിനും നേതൃത്വം നൽകുന്നതിനും അലക്സ് മുൻപന്തിയിലുണ്ടായിരുന്നുവെന്നാണ് അന്വേഷണത്തിൽ ലഭിച്ച വിവരം. പാർട്ടിയിൽ പങ്കെടുത്തവരിൽ പ്രമുഖ വ്യക്തികളുടെ മക്കളും ഉണ്ടായിരുന്നതായുള്ള സൂചനകളും പുറത്തുവന്നിട്ടുണ്ട്. പ്രായപൂർത്തിയാകാത്തവർക്ക് മദ്യം നൽകിയിട്ടുണ്ടോയെന്നും ലഹരിമരുന്ന് ഉപയോഗം നടന്നിട്ടുണ്ടോയെന്നും പൊലീസ് വിശദമായി അന്വേഷിച്ചുവരികയാണ്.

പെൺകുട്ടിയുടെ അമ്മ നൽകിയ പരാതിയുടെ അടിസ്ഥാനത്തിലാണ് പൊലീസ് കേസെടുത്തത്. സംഭവത്തിൽ അറസ്റ്റിലായ അലക്സിനെ കേന്ദ്രീകരിച്ച് അന്വേഷണം തുടരുകയാണ്. പാർട്ടിയിൽ പങ്കെടുത്ത മറ്റുള്ളവരുടെ മൊഴികളും പൊലീസ് ശേഖരിക്കും. പ്രായപൂർത്തിയാകാത്ത കുട്ടികൾ പങ്കെടുത്ത ആഘോഷത്തിൽ മദ്യവും ലഹരിമരുന്നും ഉപയോഗിച്ചെന്ന ആരോപണം സംഭവത്തിന്റെ ഗൗരവം വർധിപ്പിച്ചിട്ടുണ്ട്.

കൊച്ചി: വാഴക്കുലകൾക്കുള്ളിൽ ഒളിപ്പിച്ച് ബെംഗളൂരുവിൽനിന്ന് കേരളത്തിലേക്ക് വൻതോതിൽ എംഡിഎംഎ കടത്തുന്ന സംഘത്തിന്റെ മുഖ്യപ്രതി പിടിയിൽ. ‘ഡാനി ഭായ്’ എന്നറിയപ്പെടുന്ന ഹരിപ്പാട് പായിപ്പാട് സ്വദേശി ധനേഷ് എസ്. നായർ (31) ആണ് ആലുവ ഡിവൈ.എസ്.പി. ബൈജു പൗലോസിന്റെ നേതൃത്വത്തിലുള്ള പ്രത്യേക അന്വേഷണസംഘത്തിന്റെ പിടിയിലായത്. അങ്കമാലിയിൽ നിന്ന് അറസ്റ്റിലായ ഇയാളിൽനിന്ന് 803 ഗ്രാം ഹാഷിഷ് ഓയിലും എട്ട് ഗ്രാം എംഡിഎംഎയും പിടിച്ചെടുത്തു. ലഹരിമരുന്ന് വാഴക്കുലകൾക്കുള്ളിൽ ഒളിപ്പിച്ച് കടത്തുന്നതിന്റെ വീഡിയോകളും പ്രതികളുടെ മൊബൈൽ ഫോണുകളിൽനിന്ന് പോലീസ് കണ്ടെത്തിയിട്ടുണ്ട്.

ആലുവയിൽ 185 ഗ്രാം എംഡിഎംഎയുമായി അറസ്റ്റിലായ ഹരികൃഷ്ണന്റെ മൊബൈൽ ഫോൺ പരിശോധിച്ചതിലൂടെയാണ് ധനേഷിനെക്കുറിച്ചുള്ള നിർണായക വിവരങ്ങൾ ലഭിച്ചത്. തുടർന്ന് തമിഴ്നാട്ടിലും കർണാടകയിലും അന്വേഷണം വ്യാപിപ്പിച്ച പോലീസ് ഇയാളെ കണ്ടെത്തുകയായിരുന്നു. മൈസൂരിനടുത്ത് നഞ്ചൻഗുഡുവിൽ താമസിക്കുന്ന ധനേഷിന് അവിടെ വാഴത്തോട്ടവും കൃഷിയിടങ്ങളും ഉള്ളതായി അന്വേഷണത്തിൽ വ്യക്തമായി. ഇവയുടെ മറവിലാണ് ലഹരിമരുന്ന് കടത്തും വിതരണവും നടത്തിയിരുന്നതെന്നാണ് പോലീസിന്റെ കണ്ടെത്തൽ. ബെംഗളൂരു–മൈസൂരു മേഖലകളിൽനിന്ന് കേരളത്തിലേക്ക് ലഹരിമരുന്ന് എത്തിക്കുന്ന ശൃംഖലയിലെ പ്രധാന കണ്ണിയായിരുന്നു ഇയാൾ.

യുവാക്കളെ ലഹരിക്കടത്തിനും വിതരണത്തിനുമായി റിക്രൂട്ട് ചെയ്തിരുന്നത് ധനേഷാണെന്നും അന്വേഷണത്തിൽ കണ്ടെത്തിയിട്ടുണ്ട്. ‘ഡാനി ഭായ്’ എന്ന പേരിൽ ഇൻസ്റ്റഗ്രാം വഴി നൽകുന്ന നിർദേശങ്ങൾ അനുസരിച്ചാണ് ഹരികൃഷ്ണനും നേരത്തെ പിടിയിലായ ഷിനു സെബാസ്റ്റ്യനും ലഹരിമരുന്ന് വിതരണം ചെയ്തിരുന്നത്. ഉപഭോക്താക്കൾക്ക് ലഹരിമരുന്ന് കൈമാറി പണം ധനേഷിന് എത്തിക്കുകയായിരുന്നു ഇവരുടെ ചുമതല. ബെംഗളൂരു, മൈസൂരു മേഖലകളിലെ ലഹരിവിതരണ ശൃംഖലയിലെ കൂടുതൽ കണ്ണികളെ കണ്ടെത്താനും സംഘത്തെ പൂർണമായി തകർക്കാനുമുള്ള അന്വേഷണം പോലീസ് തുടരുകയാണ്.

ജോർജ് മാത്യു

ബിർമിംഗ്ഹാം: പരിശുദ്ധ പരുമല തിരുമേനിയുടെ 124-ാമത് ഓർമപ്പെരുന്നാൾ ബിർമിംഗ്ഹാം സെന്റ് സ്റ്റീഫൻസ് ഇന്ത്യൻ ഓർത്തഡോക്സ് പള്ളിയിൽ ഭക്തിനിർഭരമായ ചടങ്ങുകളോടെ സമാപിച്ചു.

ഇടവക വികാരി ഫാ. ബിനോയ് ജോഷ്വ പെരുന്നാൾ ശുശ്രൂഷകൾക്ക് മുഖ്യകാർമികത്വം വഹിച്ചു. വിശുദ്ധിയുടെ ഉന്നത പടവുകൾ താണ്ടിയ പരുമല കൊച്ചുതിരുമേനിയുടെ ജീവിതം വിശ്വാസത്തിന്റെയും ത്യാഗത്തിന്റെയും നിസ്വാർഥ സേവനത്തിന്റെയും ഉത്തമ മാതൃകയാണെന്നും ഓരോ വിശ്വാസിയും ആ ജീവിതസാക്ഷ്യം സ്വന്തം ജീവിതത്തിൽ പകർത്താൻ ശ്രമിക്കണമെന്നും വിശുദ്ധ കുർബാന മധ്യേ നടത്തിയ സന്ദേശത്തിൽ അദ്ദേഹം അനുസ്മരിപ്പിച്ചു.

പ്രഭാതപ്രാർത്ഥന, വിശുദ്ധ കുർബാന, അനുസ്മരണ സന്ദേശം, മധ്യസ്ഥപ്രാർത്ഥന, ഭക്തിനിർഭരമായ പ്രദക്ഷിണം, നേർച്ചവിളമ്പ് എന്നിവയായിരുന്നു പെരുന്നാളിനോടനുബന്ധിച്ചുള്ള പ്രധാന ചടങ്ങുകൾ.

ജീവകാരുണ്യ പ്രവർത്തനങ്ങൾക്ക് പിന്തുണ നൽകുക എന്ന ലക്ഷ്യത്തോടെ മർത്തമറിയം സമാജത്തിന്റെ ആഭിമുഖ്യത്തിൽ സംഘടിപ്പിച്ച ഫുഡ് ഫെസ്റ്റിവൽ പെരുന്നാൾ ആഘോഷങ്ങൾക്ക് സാമൂഹികമായൊരു സവിശേഷത പകർന്നു. സ്നേഹത്തിന്റെയും പങ്കുവെക്കലിന്റെയും സേവനത്തിന്റെയും സന്ദേശം ഉയർത്തിപ്പിടിച്ച ഈ സംരംഭം ശ്രദ്ധേയമായി.

ഇടവക ട്രസ്റ്റി അരുൺ ചാക്കോ, സെക്രട്ടറി ലിജിയ തോമസ്, മാനേജിങ് കമ്മിറ്റി അംഗങ്ങൾ, വിവിധ ആത്മീയ സംഘടനകളുടെ ഭാരവാഹികൾ എന്നിവർ പെരുന്നാൾ ചടങ്ങുകൾക്ക് നേതൃത്വം നൽകി.

ടോം ജോസ് തടിയംപാട്

കരിംങ്കുന്നം തൊടുപുഴ പ്രദേശത്തു കരിംങ്കുന്നം ലൈവിന്റെ ആംബുലെൻസ് ഓടിച്ചു കുടുംബം നടത്തിയിരുന്ന ക്യൻസർ രോഗിയായ ചൂരക്കാട്ടു ജോമോൻ ജോർജിനു വേണ്ടി ഇടുക്കി ചാരിറ്റി ഗ്രൂപ്പ് യു കെ നടത്തിയ ചാരിറ്റിയിലൂടെ ലഭിച്ച £1410 (173475 Rs ) ഒരു ലക്ഷത്തി എഴുപത്തയ്യായിരത്തി നാനൂറ്റി എഴുപത്തഞ്ചു രൂപയുടെ ചെക്ക് കരിംങ്കുന്നം ലൈവ് ഉടമയെ ഏൽപ്പിക്കാൻ ജോമോൻ പറഞ്ഞതനുസരിച്ചു മാഞ്ചെസ്റ്റിറിൽ താമസിക്കുന്ന ഷോയ് ചെറിയാന്റെ മകൻ മാർട്ടിൻ ഷോയ് കരിംങ്കുന്നം ലൈവ് ഉടമ ജെയിംസ് ചാക്കോയ്ക്ക് ചെക്ക് കൈമാറി .. പരിപാടിയിൽ ഷോയ് ചെറിയാൻ സന്നിഹിതനായിരുന്നു . ഇടുക്കി ചാരിറ്റി ഗ്രൂപ്പ് യു കെ യെ സഹായിച്ച എല്ലാവർക്കും നന്ദി അറിയിക്കുന്നു .

ഇടുക്കി ചാരിറ്റി ഗ്രൂപ്പ് യു കെ എന്നത് കേരളത്തിൽ നിന്നും യു കെയിൽ കുടിയേറിയ കഷ്ട്ടപാടും ബുദ്ധിമുട്ടും അറിഞ്ഞവരുടെ ഒരു കൂട്ടായ്‌മയാണ്‌. ഞങ്ങൾ ‍ സൂതാരൃവും സതൃസന്തവുമായി ജാതി ,മത ,വർഗ ,വർണ്ണ, സ്ഥല ,കാല ഭേതമെന്യയെ കേരളത്തിലും, യു കെ യിലും , നടത്തിയ ചാരിറ്റി പ്രവർത്തനത്തിലൂടെ ഇതുവരെ ഏകദേശം ഒരു കോടി എൺപത്തിനാലു ലക്ഷം രൂപ (18400000) നാട്ടിലും യു കെ യിലുമുള്ള പാവപ്പെട്ട ആളുകൾക്ക് നൽകി സഹായിക്കാൻ കഴിഞ്ഞിട്ടുണ്ട് ഇതിൽ ഏറ്റവും വലിയ തുക ലണ്ടനിൽ കാരവൻ പാർക്കിൽ ആൽമഹത്യയല്ലാതെ മാർഗമില്ലാതെ കഴിഞ്ഞ ഒരു കുടുബത്തിനു 31 ലക്ഷം രൂപ പിരിച്ചു കൊടുക്കാൻ കഴിഞ്ഞതാണ് .

ഇടുക്കി ചാരിറ്റിക്കു നേതൃത്വ൦കൊടുക്കുന്നത് സാബു ഫിലിപ്പ് 07708181997 ടോം ജോസ് തടിയംപാട് 07859060320 സജി തോമസ്‌ 07803276626.. .എന്നിവരാണ് .ഞങ്ങളുടെ രക്ഷാധികാരി ബഹുമാനപ്പെട്ട തമ്പി ജോസാണ്‌ .
ദാരിദ്രൃം എന്തെന്നറിഞ്ഞവർക്കെ പാരിൽ പരക്ലേശവിവേകമുള്ളു.

കൊച്ചി: എറണാകുളം കാക്കനാട് ഇടച്ചിറയിലെ അപ്പാർട്ട്മെന്റിൽ സുഹൃത്തിനൊപ്പം എത്തിയ യുവാവിനെ മരിച്ചനിലയിൽ കണ്ടെത്തി. ആലുവ ചൂർണിക്കര പള്ളിക്കുന്നം മാടവന ബിജു ജോസഫിന്റെ മകൻ ബ്രൈറ്റ് ബിജു (22) ആണ് മരിച്ചത്. ശനിയാഴ്ച ഉച്ചയ്ക്ക് മൂന്നുമണിയോടെയാണ് ബ്രൈറ്റും ചെമ്പുമുക്ക് സ്വദേശിനിയായ സുഹൃത്തും അപ്പാർട്മെന്റിലെത്തിയത്. രാത്രി എട്ടുമണിയോടെ ബ്രൈറ്റ് മുറിയിൽ കുഴഞ്ഞുവീഴുകയായിരുന്നുവെന്നാണ് യുവതി പൊലീസിന് നൽകിയ മൊഴി.

തുടർന്ന് ബ്രൈറ്റിന്റെ സഹോദരനെ വിവരമറിയിക്കുകയും ഇരുവരും ചേർന്ന് യുവാവിനെ സ്വകാര്യ ആശുപത്രിയിലെത്തിക്കുകയും ചെയ്തെങ്കിലും ജീവൻ രക്ഷിക്കാനായില്ല. യുവതിയുടെ മൊഴി രേഖപ്പെടുത്തിയ ശേഷം പൊലീസ് അവരെ ബന്ധുക്കൾക്കൊപ്പം വിട്ടയച്ചു. അതേസമയം, ബ്രൈറ്റ് കുഴഞ്ഞുവീണ ഉടൻ ആശുപത്രിയിലെത്തിക്കുന്നതിനു പകരം സഹോദരൻ വരുന്നതുവരെ കാത്തുനിന്നുവെന്ന ആരോപണവുമായി ബന്ധുക്കൾ രംഗത്തെത്തിയിട്ടുണ്ട്. അപ്പാർട്മെന്റിൽ സെക്യൂരിറ്റി ജീവനക്കാരൻ ഉൾപ്പെടെ ഉണ്ടായിരുന്നിട്ടും ചികിത്സ വൈകിയെന്നാണ് ബന്ധുക്കളുടെ പരാതി.

പോസ്റ്റ്മോർട്ടത്തിലെ പ്രാഥമിക കണ്ടെത്തലുകൾ പ്രകാരം ഹൃദയാഘാതമാണ് മരണകാരണമെന്നാണ് പൊലീസിന്റെ സൂചന. സംഭവത്തിൽ കൂടുതൽ വിവരങ്ങൾ പൊലീസ് പരിശോധിച്ചുവരികയാണ്. ബ്രൈറ്റിന്റെ സംസ്കാരം ഇന്ന് രാവിലെ 10ന് അശോകപുരം സെന്റ് സെബാസ്റ്റ്യൻ പള്ളിയിൽ നടക്കും. മാതാവ് ടിൻസി. സഹോദരങ്ങൾ: ബ്രിസ്റ്റോ ബിജു, ബെനീറ്റ ബിജു.

തിരുവനന്തപുരം: എയ്ഡഡ്, സ്വാശ്രയ സ്വയംഭരണ കോളേജുകളിൽ പുതിയ സ്വാശ്രയ കോഴ്‌സുകൾ ആരംഭിക്കുന്നതിനും സീറ്റുകൾ വർധിപ്പിക്കുന്നതിനും സർക്കാരിന്റെ മുൻകൂർ അനുമതിയായ എൻഒസി (NOC) ഒഴിവാക്കിയ നടപടിയെ ന്യായീകരിച്ച് ഉന്നതവിദ്യാഭ്യാസ മന്ത്രി റോജി എം. ജോൺ. ഉന്നതവിദ്യാഭ്യാസ മേഖലയിൽ സമഗ്രമായ മാറ്റങ്ങൾ കൊണ്ടുവരുന്നതിന്റെ ഭാഗമായാണ് പുതിയ സർക്കുലർ പുറത്തിറക്കിയതെന്ന് മന്ത്രി വ്യക്തമാക്കി. കോഴ്‌സുകൾ ആരംഭിക്കുന്നതിനുള്ള അനാവശ്യ കാലതാമസം ഒഴിവാക്കുകയാണ് പ്രധാന ലക്ഷ്യം. കേരളത്തിൽ മാത്രം നിലനിൽക്കുന്ന എൻഒസി സമ്പ്രദായം ഒഴിവാക്കുന്നത് ഉന്നതവിദ്യാഭ്യാസ രംഗത്ത് വലിയ മുന്നേറ്റത്തിന് വഴിയൊരുക്കുമെന്നും അദ്ദേഹം പറഞ്ഞു.

സ്വയംഭരണ കോളേജുകൾക്ക് സർക്കാർ വാരിക്കോരി ഇളവുകൾ നൽകുകയാണെന്ന പ്രതിപക്ഷത്തിന്റെ ആരോപണം അടിസ്ഥാനരഹിതമാണെന്നും മന്ത്രി പ്രതികരിച്ചു. മികച്ച നിലവാരം പുലർത്തുന്ന സ്ഥാപനങ്ങൾക്കു മാത്രമാണ് സ്വയംഭരണ പദവി നൽകിയിട്ടുള്ളത്. പുതിയ പരിഷ്‌കരണം മെറിറ്റ്, സംവരണ തത്വങ്ങളെ ബാധിക്കില്ലെന്നും സർക്കാർ കോളേജുകളുടെ പ്രവർത്തനത്തെ പ്രതികൂലമായി ബാധിക്കില്ലെന്നും അദ്ദേഹം വ്യക്തമാക്കി. യുജിസി ചട്ടപ്രകാരം സ്വയംഭരണ കോളേജുകൾക്ക് കോഴ്‌സുകൾ ആരംഭിക്കാൻ സർക്കാരിന്റെയോ സർവകലാശാലയുടെയോ അനുമതി ആവശ്യമില്ലെങ്കിലും കേരളത്തിൽ സർവകലാശാലയുടെ പരിശോധനയും അനുമതിയും തുടരും. അതിനുശേഷം വീണ്ടും സർക്കാരിന്റെ എൻഒസി ആവശ്യപ്പെടേണ്ടതില്ലെന്നാണ് പുതിയ തീരുമാനം.

2014ലും 2021ലും നിയമസഭ പാസാക്കിയ സർവകലാശാലാ നിയമങ്ങളിലെ എൻഒസി സംബന്ധിച്ച വ്യവസ്ഥകളിൽ ഭേദഗതി വരുത്താനാണ് സർക്കാർ തീരുമാനിച്ചിരിക്കുന്നതെന്നും മന്ത്രി പറഞ്ഞു. അതേസമയം, ഈ ഇളവുകൾ വിദ്യാഭ്യാസ കച്ചവടത്തിന് വഴിയൊരുക്കുമെന്നാണ് പ്രതിപക്ഷത്തിന്റെ വിമർശനം. വർഷംതോറും പുതുക്കേണ്ടിയിരുന്ന അനുമതി ഇനി മൂന്ന് വർഷത്തിലൊരിക്കൽ പുതുക്കിയാൽ മതിയെന്ന തീരുമാനത്തെയും പ്രതിപക്ഷം ചോദ്യം ചെയ്യുന്നുണ്ട്. നടപടിക്കെതിരെ എസ്എഫ്ഐയും പ്രക്ഷോഭത്തിന് ഒരുങ്ങിയതോടെ ഉന്നതവിദ്യാഭ്യാസ മേഖലയിലെ പുതിയ പരിഷ്‌കരണങ്ങൾ രാഷ്ട്രീയ വിവാദത്തിന് വഴിവെച്ചിരിക്കുകയാണ്.