ന്യൂയോര്‍ക്ക്: വിദ്യാര്‍ത്ഥിനികളുയുമായി അധ്യാപികമാര്‍ ലൈംഗിക ബന്ധം പുലര്‍ത്തിയ സംഭവത്തില്‍ അതേ സ്‌കൂളിലെ മൂന്നാമത്തെ അധ്യാപികയും സമാനമായ കുറ്റത്തിന് പിടിയില്‍. പുതിയ സംഭവം ഉണ്ടായിരിയ്ക്കുന്നത് അമേരിക്കയിലുള്ള ലൂസിയാനയിലെ ദെസ്ത്രഹാന്‍ ഹൈസ്‌കൂളിലാണ്. ഇപ്പോള്‍ അറസ്റ്റിലായത് കിംബര്‍ലി നാക്വിന്‍ എന്ന 26കാരിയാണ്. ഇവര്‍ അറസ്റ്റിലായത് 16 വയസ്സുള്ള വിദ്യാര്‍ത്ഥിനിയുമായി സ്വവര്‍ഗ ലൈംഗിക ബന്ധം പുലര്‍ത്തിയെന്ന കുറ്റത്തിനാണ്. അറസ്റ്റ് നടന്നിരിയ്ക്കുന്നത് വിദ്യാര്‍ത്ഥിനിയുടെ ബന്ധു നല്‍കിയ വിവരപ്രകാരം നടത്തിയ അന്വേഷണത്തിലാണ്.
ഇവര്‍ വിദ്യാര്‍ത്ഥിനിയുമായി ഒരു വര്‍ഷത്തോളമായി സ്വവര്‍ഗ ബന്ധം പുലര്‍ത്തുന്നതായി പൊലീസ് പറഞ്ഞു. പൊലീസ് പറയുന്നത് സെന്റ് ചാള്‍സ് പാരിഷ് സ്‌കൂള്‍ ബോര്‍ഡ് പ്രസിഡന്റിന്റെ മകളായ ഈ അധ്യാപിക വിദ്യാര്‍ത്ഥിനിയെ കുടുംബ വീട്ടില്‍കൊണ്ടുപോയാണ് ലൈംഗിക ബന്ധം പുലര്‍ത്തിയിരുന്നതെന്നാണ്.
ഇതേ സകൂളിലെ രണ്ട് അധ്യാപികമാര്‍ കഴിഞ്ഞ വര്‍ഷം സെപ്തംബറിലാണ് അറസ്റ്റിലായത്. അന്ന് അറസ്റ്റ് നടന്നത് 17കാരനായ വിദ്യാര്‍ത്ഥിയുമായി ഇരുവരും പല വട്ടം ലൈംഗിക ബന്ധം പുലര്‍ത്തി എന്ന കുറ്റത്തിനായിരുന്നു. 24കാരിയായ റേച്ചല്‌റെസ്പസ്, 32കാരിയായ ഷെല്ലി ഡെഫേഴ്‌സണ്‍ എന്നിവരാണ് അറസ്റ്റിലായത്.
ഹൈദരാബാദ്: എയര്‍ ഇന്ത്യ ജീവനക്കാരനെ തല്ലിയ കേസില്‍ ആന്ധ്രപ്രദേശില്‍ നിന്നുള്ള എംഎല്‍എ പി. മിഥുന്‍ റെഡ്ഡിയെ അറസ്റ്റ് ചെയ്തു. കഴിഞ്ഞ നവംബറില്‍ തിരുപ്പതി വിമാനത്താവളത്തില്‍ വെച്ചാണ് എയര്‍ ഇന്ത്യ ജീവനക്കാരനെ നിയമസഭ സാമാജികന്‍ കൈയ്യേറ്റം ചെയ്തത്. ഇന്നലെ അര്‍ദ്ധരാത്രിയില്‍ ചെന്നൈയിലെ വിമാനത്താവളത്തില്‍ നിന്നാണ് മിഥുന്‍ റെഡ്ഡിയെ അറസ്റ്റ് ചെയ്തത്.
വൈഎസ്ആര്‍ കോണ്‍ഗ്രസ് നേതാവായ മിഥുന്‍ റെഡ്ഡി തിരുപ്പതി എയര്‍പോര്‍ട്ട് മാനേജര്‍ രാജശേഖറിനെയാണ് തല്ലിയത്. ഡല്‍ഹിയിലേക്കുള്ള വിമാനത്തില്‍ പോകേണ്ട ബന്ധുക്കള്‍ക്ക് ബോര്‍ഡിംഗ് പാസ് അനുവദിക്കാത്തതിലാണ് രാഷ്ട്രീയ നേതാവിന് ദേഷ്യം പിടിച്ചത്. താമസിച്ചെത്തിയതിനാല്‍ പാസ് നല്‍കാനാവില്ലെന്ന് മാനേജര്‍ അറിയിച്ചതാണ് എംഎല്‍എയെ ചൊടിപ്പിച്ചത്.
ചെന്നൈയില്‍ നിന്ന് അറസ്റ്റ് ചെയ്ത എംഎല്‍എയെ 14 ദിവസത്തെ ജുഡീഷ്യല്‍ കസ്റ്റഡിയില്‍ നെല്ലൂര്‍ ജയിലിലേക്ക് അയച്ചു. വൈഎസ്ആര്‍ കോണ്‍ഗ്രസ് അധ്യക്ഷന്‍ ജഗമോഹന്‍ റെഡ്ഡി കേസ് രാഷ്ട്രീയ പ്രേരിതമെന്ന് ആരോപിച്ചു. എന്നാല്‍ വിമാനത്താവളത്തിലെ സിസിടിവി ദൃശ്യങ്ങളില്‍ എംഎല്‍എയുടെ കൈയ്യേറ്റം വ്യക്തമാണ്. രാജശേഖരന്റെ മെഡിക്കല്‍ പരിശോധനയില്‍ നിന്നും ആക്രമണമേറ്റത് സത്യമാണെന്ന് തെളിഞ്ഞിട്ടുണ്ട്.
ന്യൂയോര്‍ക്ക്: ഇറാന് ആണവ പദ്ധതികളില്‍ നിന്ന് പിന്‍മാറിയതായി ഐക്യരാഷ്ട്രസഭ സ്ഥിരീകരിച്ചു. ലോകം സുരക്ഷിതമായിരിക്കുന്നുവെന്നും ഇവര്‍ വ്യക്തമാക്കി. ലോകരാഷ്ട്രങ്ങള്‍ ഇറാനുമേല്‍ ഏര്‍പ്പെടുത്തിയിട്ടുളള ഉപരോധങ്ങള്‍ പിന്‍വലിക്കാമെന്നും സഭ ശുപാര്‍ശ ചെയ്തു. ഐഎഇഎയുടെ നിര്‍ദേശങ്ങള്‍ ഇറാന് പാലിച്ചതിനാല്‍ ഉടന്‍ തന്നെ വാണിജ്യ ഉപരോധങ്ങള്‍ പിന്‍വലിക്കാനുളള നടപടികള്‍ കൈക്കൊളളുമെന്ന് അമേരിക്കയും യൂറോപ്യന്‍ യൂണിയന്‍ അധികൃതരും വ്യക്തമാക്കിയിട്ടുണ്ട്. ഇറാന് ആണവായുദ്ധ നിര്‍മാണം നടത്തുന്നു എന്ന കാലങ്ങളായി കേട്ട് കൊണ്ടിരുന്ന പഴിയാണ് ഇതിലൂടെ ഇല്ലാതായിരിക്കുന്നത്.
തങ്ങള്‍ ആണവായുധങ്ങള്‍ നിര്‍മിക്കുന്നില്ലെന്ന് ടെഹ്‌റാന്‍ ആവര്‍ത്തിച്ച് വ്യക്തമാക്കിയിട്ടും ലോകരാജ്യങ്ങള്‍ ഈ നിലപാടില്‍ ഉറച്ച് നില്‍ക്കുകയായിരുന്നു. ഇറാനും ആറ് രാജ്യങ്ങളുമായി കഴിഞ്ഞ ദിവസമുണ്ടാക്കിയ ആണവായുധ കരാറിന്റെ അടിസ്ഥാനത്തില്‍ ആണവായുധ നിര്‍മാണത്തില്‍ നിന്ന് പിന്തിരിയാന്‍ ഇറാന് തീരുമാനിച്ചിട്ടുണ്ട്. രാജ്യാന്തര സമൂഹത്തിന് ഇതൊരു സുപ്രധാന ദിനമെന്നാണ് ഐഎഇഎ ഡയറക്ടര്‍ ജനറല്‍ യുകിയ അമാനോ പ്രതികരിച്ചത്.
ഇറാനൊരിക്കലും ആണവ പദ്ധതി ഉപേക്ഷിക്കില്ലെന്നായിരുന്നു കരുതിയതെന്ന് ബ്രിട്ടീഷ് വിദേശകാര്യ സെക്രട്ടറി ഫിലിപ്പ് ഹാമണ്ട് അഭിപ്രായപ്പെട്ടു. ബ്രിട്ടനാണ് ഈ കരാറിന് വേണ്ടി മുഖ്യ പങ്ക് വഹിച്ചതെന്നും അദ്ദേഹം അവകാശപ്പെട്ടു. വര്‍ഷങ്ങള്‍ നീണ്ട ക്ഷമയോടെയുളള ചര്‍ച്ചകളാണ് ഇപ്പോള്‍ ഫലം കണ്ടിരിക്കുന്നതെന്നും അദ്ദേഹം പറഞ്ഞു. ഏറെ ബുദ്ധിമുട്ടുളള ഒരു ജോലിയാണ് ഇപ്പോള്‍ ഫലവത്തായിരിക്കുന്നത്. പലരും ഇറാന് ആണവ പരിപാടിയില്‍ നിന്ന് പിന്‍മാറില്ലെന്ന് ഉറച്ച് വിശ്വസിച്ചപ്പോള്‍ അങ്ങനെയല്ലെന്ന് തെളിയിക്കാന്‍ ഐഎഇഎയ്ക്കായി.
ഇറാനില്‍ നിന്ന് ടണ്‍ കണക്കിന് യുറേനിയം കയറ്റുമതി ചെയ്ത് കഴിഞ്ഞു. അറാക് റിയാക്ടറില്‍ നിന്നുളള സെന്‍ട്രിഫ്യൂഗല്‍ പമ്പുകള്‍ പോലും നീക്കം ചെയ്ത് കഴിഞ്ഞു. ഇറാന് തങ്ങളുടെ ആണവ പദ്ധതിയില്‍ നിന്ന് പിന്തിരിയുകയാണ്. ഇതോടെ ആഗോള സമൂഹം ഏര്‍പ്പെടുത്തിയിട്ടുളള ഉപരോധങ്ങള്‍ പിന്‍വലിക്കപ്പെടും. ഇത് ഇറാന് സാമ്പത്തികമായി ഏറെ നേട്ടമാകും. ഇതോടെ ഇറാന് ലോകവ്യാപകമായി എണ്ണ വ്യാപാരം നടത്താനും കഴിയും. രാജ്യത്തെ കോടിക്കണക്കിന് ഡോളറിന്റെ ആസ്തികളും ഇതോടെ വീണ്ടെടുക്കാനാകും.
ഉപരോധങ്ങള്‍ പിന്‍വലിച്ചതിനു തൊട്ടു പിന്നാലെ ഇറാന് തടവിലാക്കിയിട്ടുളള അഞ്ച് അമേരിക്കക്കാരെ ഇറാന് മോചിപ്പിച്ചു. വാഷിംഗ്ടണ്‍ പോസ്റ്റിലെ കറസ്‌പോണ്ടന്റ് ജയിസണ്‍ റെസിയാന്‍ ഉള്‍പ്പെടെയുളളവരെയാണ് മോചിപ്പിച്ചത്. ഇതിന് പകരമായി അമേരിക്കയില്‍ തടവിലാക്കിയിട്ടുളള ഏഴ് ഇറാന്‍കാരെയും മോചിപ്പിക്കും.
റിയാദ്: സൗദി അറേബ്യയിലേക്ക് പോകുന്ന ഇന്ത്യന്‍ നഴ്‌സുമാര്‍ക്ക് തിരിച്ചടിയായി പുതിയ നിയമം. സൗദി അറേബ്യയിലെ സര്‍ക്കാര്‍ ആശുപത്രികളില്‍ അറബ് രാജ്യങ്ങളില്‍ നിന്നുള്ള നഴ്‌സുമാര്‍ക്ക് മുന്‍ഗണന നല്‍കിക്കൊണ്ട് പുതിയ നിയമനം നിലവില്‍വന്നു. ഇന്ത്യന്‍ നഴ്‌സുമാരുടെ റിക്രൂട്ട്‌മെന്റിന് സൗദി അറേബ്യ അപേക്ഷ ക്ഷണിച്ചെങ്കിലും സര്‍ക്കാര്‍ ഏജന്‍സിയായ നോര്‍ക്ക സൗദി സര്‍ക്കാരിന്റെ അംഗീകൃത ഏജന്‍സികളുടെ പട്ടികയില്‍ ഇടം ലഭിച്ചില്ല. സര്‍ക്കാര്‍ ഏജന്‍സിയായ ഒഡേപെക് പട്ടികയിലുണ്ടെങ്കിലും സംസ്ഥാനത്ത് റിക്രൂട്ട്‌മെന്റിന് അവസരം ലഭിച്ചതുമില്ല.
ഇന്ത്യയില്‍ നിന്നും ഫിലിപ്പീന്‍സില്‍ നിന്നുമുള്ള നഴ്‌സുമാര്‍ക്ക് മുന്‍ഗണന നല്‍കിയിരുന്ന സൗദി സര്‍ക്കാര്‍ പുതിയ നിയമത്തിന്റെ ഭാഗമായി ഈജിപ്ത്, സുഡാന്‍ തുടങ്ങിയ രാജ്യങ്ങളില്‍നിന്നുള്ള നഴ്‌സുമാര്‍ക്ക് മുന്‍ഗണനനല്‍കി റിക്രൂട്ട് ചെയ്യാനാണ് സൗദി ആരോഗ്യമന്ത്രാലയത്തിന്റെ നടപടി.
സര്‍ക്കാര്‍ ആശുപത്രികളിലെ തീവ്രപരിചരണ വിഭാഗം, അത്യാഹിത വിഭാഗം. മാനസികാരോഗ്യ ചികില്‍സാകേന്ദ്രങ്ങള്‍ തുടങ്ങിയവയിലേക്ക് ഈജിപ്തില്‍ നിന്നും സുഡാനില്‍ നിന്നുമുള്ള നഴ്‌സ് നിയമനം തുടങ്ങിയെന്നാണു റിപ്പോര്‍ട്ട്. ഇതിനായി സൗദി ആരോഗ്യ മന്ത്രാലയം പ്രത്യേക സമിതിയെ ചുമതലപ്പെടുത്തിയിട്ടുണ്ട്.
നിലവില്‍ സൗദി അറേബ്യയില്‍ ജോലി ചെയ്യുന്ന വിദേശ നഴ്‌സുമാരില്‍ ബഹുഭൂരിപക്ഷവും മലയാളികളാണ്. അറബ് രാജ്യങ്ങളില്‍ നിന്നുള്ള നഴ്‌സുമാര്‍ക്കു മുന്‍ഗണന നല്‍കാനുള്ള തീരുമാനം സൗദിയിലെ ജോലി സ്വപ്നം കാണുന്ന മലയാളി നഴ്‌സുമാര്‍ക്ക് തിരിച്ചടിയാകും. സൗദിയിലെ സര്‍ക്കാര്‍ ആശുപത്രികളില്‍ ജോലി ചെയ്യുന്ന ജനറല്‍ നഴ്‌സുമാര്‍ തൊഴില്‍നഷ്ട ഭീഷണിയില്‍ നില്‍ക്കുമ്പോഴാണ് മറ്റുള്ളവര്‍ക്കു മുന്നിലും അവസരങ്ങള്‍ അടയുന്നത്.
ആഭ്യന്തര കലാപം രൂക്ഷമായ ലിബിയ, യമന്‍ തുടങ്ങിയ രാജ്യങ്ങളില്‍ നിന്നു മടങ്ങിയെത്തിയ നഴ്‌സുമാരുടെ പുനരധിവാസം ഇനിയുമായിട്ടില്ല. നഴ്‌സ് നിയമനകാര്യത്തില്‍ സൗദി അധികൃതരുമായി ബന്ധപ്പെട്ട് അനുകൂല തീരുമാനമെടുക്കാന്‍ കേന്ദ്ര, സംസ്ഥാന സര്‍ക്കാരുകള്‍ക്കു കഴിഞ്ഞില്ലെങ്കില്‍ കോടിക്കണക്കിനു രൂപയുടെ വിദേശനാണ്യം കൂടിയാകും നഷ്ടമാകുക. നിലവില്‍ രാജ്യത്തിലേക്ക് ഏറ്റവും കൂടുതല്‍ വിദേശനാണ്യമെത്തിക്കുന്നത് പ്രവാസി നഴ്‌സുമാരാണ്.
ജീവകാരുണ്യ പ്രവര്‍ത്തനങ്ങളുടെ കാര്യത്തില്‍ ദിലീപും മഞ്ജു വാര്യറും പരസ്പരം മത്സര സ്വഭാവത്തോടെ തന്നെ സഹായ ഹസ്തവുമായി രംഗത്തുണ്ടെന്നത് സത്യമാണ് . മഞ്ജു ഒരിടത്ത് സഹായിച്ചതായി അറിഞ്ഞാല്‍ മറ്റൊരിടത്ത് ദിലീപും സഹായവസ്തവുമായെത്തും. എന്നാല്‍ പേരിനു ചെയ്യുന്നു എന്ന ആക്ഷേപത്തിന് ഇട നല്‍കാതെ സഹായം ആവശ്യമുള്ളിടത്ത് വാരിക്കോരി നല്‍കാന്‍ ദിലീപിന് മടിയില്ലെന്ന് സിനിമയിലെ സുഹൃത്തുക്കള്‍ തന്നെ സാക്ഷ്യം പറയും.
ചെയ്യുന്നത് മറ്റുള്ളവര്‍ അറിയാതെ ചെയ്തിരുന്ന ദിലീപ് അടുത്തിടെ മഞ്ജുവിന്‍റെ ചില ഔദാര്യങ്ങള്‍ മനോരമ ഉള്‍പ്പെടെയുള്ള മാധ്യമങ്ങള്‍ വലിയ സംഭവമായി ഏറ്റു പിടിക്കാന്‍ തുടങ്ങിയതോടെയാണ് ദിലീപും താന്‍ ചെയ്ത കാര്യങ്ങള്‍ കുറച്ചൊക്കെ ലോകം അറിയട്ടെ എന്ന നിലപാടിലെത്തിയതെന്ന് പറയപ്പെടുന്നു .
ജനോപകാരപ്രദമായ പരിപാടികളെ കുറിച്ച് ദിലീപ്..
“കുട്ടിക്കാലത്ത് എന്റെ അച്ഛന്‍ പലരേയം സഹായിക്കുന്നത് കണ്ടി്ടുണ്ട്. മറ്റൊരാളും അറിയാതെ അച്ഛന്‍ സഹായം എത്തിച്ച് കൊടുക്കാറുണ്ട്. ഒരാള്‍ക്ക് ജീവിക്കാന്‍ മറ്റൊരാളുടെ ഒരു കൈതാങ്ങ്. അത് പണം കൊണ്ടാവാം. ചിലപ്പോള്‍ ഒരു ഉപദേശം, അല്ലെങ്കില്‍ ചിലപ്പോള്‍ ഒരു മാര്‍ഗ്ഗം അങ്ങനെ പലതും. അച്ഛനാണ് എന്നെ മറ്റുള്ളവരെ സഹായിക്കാന്‍ പഠിപ്പിച്ചത്. അതിനാണ് ഞാന്‍ അച്ഛന്റെ പേരില്‍ ജിപി ചാരിറ്റബിള്‍ ട്രസ്റ്റ് തുടങ്ങിയത്. സിനിമകളില്‍ നിന്നു കിട്ടുന്ന പ്രതിഫലത്തിന്റെ നല്ലൊരു വിഹിതം ജനങ്ങള്‍ക്കു തന്നെ തിരിച്ചു കൊടുക്കും. കൂടുതലും പൈസയായിട്ടല്ല കൊടുക്കുന്നത്.
ഒരിക്കല്‍ ഒരാള്‍ എന്നോട് മരുന്ന് വാങ്ങാന്‍ പണം ചോദിച്ചു. ഞാന്‍ കൊടുത്തു. അയാള്‍ നേരെ പോയത് ബ്രാണ്ടി ഷോപ്പിലേക്ക് അയാള്‍ ഉദ്ദേശിച്ച മരുന്ന് ഇതാണെന്ന് ഞാന്‍ അറിഞ്ഞില്ല. അതോടെ പൈസ കൊടുക്കുന്നത് നിര്‍ത്തി. നിങ്ങളുടെ വിഷയം പറഞ്ഞോളു മരുന്നു വേണോ മരുന്ന് വാങ്ങിത്തരാം. ചികിത്സയ്ക്ക് പണം വേണോ ഡീറ്റെയ്ല്‍സ് തരൂ. ഞാന്‍ പണമടയ്ക്കാം. പഠിക്കണോ ആ ഇന്‍സ്റ്റിറ്റിയൂഷന്റെ നമ്പര്‍ തരൂ ഞാന്‍ ചെയ്തു തരാം ആ രീതിയിലായിരുന്നു കാര്യങ്ങള്‍.
അതു തന്നെ ദൈവത്തോടു ചോദിച്ചിട്ടേ ചെയ്യൂ. കാരണം സഹായിക്കുമ്പോ നോക്കി വേണം സഹായിക്കാന്‍ . ചിലപ്പോള്‍ ദൈവം ഒരാളെ ഒരുപാട് ശിക്ഷിച്ചോണ്ടിരിക്കുന്ന സമയത്ത് നമ്മള്‍ കയറിട്ട് ഞാന്‍ നോക്കികൊള്ളാം ഇവന്റെ കാര്യം എന്നു പറഞ്ഞാല്‍ ആ അടി മുഴുവന്‍ നമുക്ക് കിട്ടും. ദൈവം വിചാരിക്കും “ഓഹോ എന്നേക്കാള്‍ വല്ല്യാളോ ഇവന്‍.”
ദൈവത്തോടു നമ്മള്‍ ഇവനിങ്ങനെ ഒരു വിഷമമുണ്ട് കൊടുക്കട്ടേ എന്നു ചോദിച്ചിട്ട് ഉം എന്നൊരു മൂളല്‍ കിട്ടാതെ കൊടുത്താല്‍ നമ്മള്‍ മൂളിമൂളി ഒരു പരുവമാവും എനിക്കങ്ങനെ ഇഷ്ടം പോലെ കിട്ടീട്ടുണ്ട്യ വേറൊരാള്‍ തന്നേക്കാള്‍ വലുതാവുന്നത് ആര്‍ക്കാ ഇഷ്ടം ആ ഒരു ചിന്ത ചെറുതായിട്ട് ദൈവത്തിനും ഉണ്ട് നീ എന്നോടു ചോദിച്ചിട്ടു ചെയ്‌തോ എന്നു പറയുന്നതു പോലെ തോന്നും.”
ബ്രിസ്‌ബേന്‍: ബ്രിസ്‌ബേനില്‍ നടന്ന രണ്ടാം ഏകദിനത്തില്‍ ഇന്ത്യയ്‌ക്കെതിരെ ആസ്‌ട്രേലിയയ്ക്ക് ഏഴ് വിക്കറ്റ് ജയം. എട്ട് വിക്കറ്റ് നഷ്ടത്തില്‍ 308 റണ്‍സാണ് ഇന്ത്യ നേടിയത്. കളി തീരാന്‍ ഒരു ഓവര്‍ ബാക്കി നില്‍ക്കെയാണ് മൂന്ന് വിക്കറ്റ് മാത്രം നഷ്ടപ്പെടുത്തി ആസ്‌ട്രേലിയ വിജയലക്ഷ്യം മറികടന്നത്. ഇതോടെ അഞ്ച് മത്സരങ്ങളുള്ള പരമ്പരയില്‍ ആസ്‌ട്രേലിയ 2-0ന് മുന്നിലെത്തി.
ആസ്‌ട്രേലിയയ്ക്ക് വേണ്ടി ജോര്‍ജ് ബെയ്‌ലിയും (76) ഷോണ്‍ മാര്‍ഷും (71) ആരോണ്‍ ഫിഞ്ചും (71) അര്‍ദ്ധസെഞ്ചുറി നേടി. ഇന്ത്യയ്ക്ക് വേണ്ടി തുടര്‍ച്ചയായ രണ്ടാം മത്സരത്തിലും സെഞ്ചുറി നേടിയ രോഹിത് ശര്‍മ്മയ്ക്ക് (124) പെര്‍ത്തിലെ ആദ്യ മത്സരത്തിലെന്ന പോലെ ഇത്തവണയും ടീമിന്റെ പരാജയം കാണേണ്ടി വന്നു. ഷോണ്‍ മാഷിനെ പുറത്താക്കാന്‍ ലഭിച്ച നാല് അവസരങ്ങള്‍ ഇന്ത്യ തുലച്ചു. ഇന്ത്യയ്ക്ക് വേണ്ടി നേരത്തെ അജിങ്ക്യ രഹാനെയും (89) വിരാട് കോഹ്‌ലിയും അര്‍ദ്ധ സെഞ്ചുറി നേടിയിരുന്നു, ഇഷാന്ത് ശര്‍മ്മ, രവീന്ദ്ര ജഡേജ, ഉമേഷ് യാദവ് എന്നിവര്‍ ഓരോ വിക്കറ്റ് വീതം വീഴ്ത്തി.
സ്‌കോര്‍ പിന്തുടര്‍ന്ന് നേടുന്ന വിജയത്തിന്റെ കാര്യത്തില്‍ ബ്രിസ്‌ബേനിലെ ഗാബ സ്റ്റേഡിയത്തില്‍ ഇത് റെക്കോര്‍ഡാണ്. നേരത്തെ ഇംഗ്ലണ്ടിന്റെ സ്‌കോര്‍ പിന്തുടര്‍ന്ന് ആസ്‌ട്രേലിയ നേടിയ 301 റണ്‍സായിരുന്നു ഉയര്‍ന്ന ചേസിംഗ് സ്‌കോര്‍. 330നും മുകളിലെങ്കിലും സ്‌കോര്‍ ചെയ്താല്‍ മാത്രമേ വിജയം സംബന്ധിച്ച് ആത്മവിശ്വാസമുണ്ടാക്കാനാവൂ എന്ന അവസ്ഥയാണുള്ളതെന്നും ഇത് വരും മത്സരങ്ങളില്‍ വലിയ സമ്മര്‍ദ്ദമുണ്ടാക്കുമെന്നും മത്സരശേഷം ക്യാപ്റ്റന്‍ എം.എസ്.ധോണി അഭിപ്രായപ്പെട്ടു. സെഞ്ചുറി അടിച്ച ശേഷം ടീം തോല്‍ക്കുകയെന്നത് ഏറെ നിരാശയുണ്ടാക്കുന്ന കാര്യമാണെന്ന് രോഹിത് ശര്‍മ്മ പറഞ്ഞു.
ന്യൂഡല്‍ഹി: പരിസ്ഥിതി ചട്ടങ്ങള്‍ ലംഘിക്കുന്നു എന്ന മത്സ്യബന്ധന തൊഴിലാളികളുടെഹര്‍ജിയില്‍ ഗൗതം അദാനിക്ക് 25 കോടി രൂപ പിഴ ചുമത്തി.
ദേശീയ ഹരിത ട്രൈബ്യൂണലില്‍ മത്സ്യബന്ധന തൊഴിലാളികള്‍ നല്‍കിയ ഹര്‍ജിയിലാണ് അദാനിക്ക് പിഴ ചുമത്തിയത്. ഹര്‍ജി നല്‍കിയ കക്ഷികള്‍ക്ക രണ്ട് ലക്ഷം രൂപ വീതം ചെലവ് നല്‍കാനും ട്രൈബ്യൂണല്‍ നിര്‍ദ്ദേശിച്ചിട്ടുണ്ട്.
ഗുജറാത്തില്‍ അദാനിയുടെ ഉടമസ്ഥതയിലുള്ള ഫാസിറ തുറമുഖമാണ് ചട്ടങ്ങള്‍ ലംഘിച്ചു പ്രവര്‍ത്തിച്ചത്. പരമ്പരാഗത മത്സ്യത്തൊഴിലാളികളെ വിലക്കുകയും ചെയ്തിരുന്നു. ഇതിനെതിരൊണ് മത്സ്യ തൊഴിലാളികള്‍ രംഗത്തു വന്നത്. ചട്ടങ്ങള്‍ ലംഘിച്ചതു കൊണ്ട് നശിപ്പിക്കപെട്ട പരിസ്ഥിതിയുടെ പുനസ്ഥാപനത്തിന് 25 കോടി രൂപ അദാനി നല്‍കണമെന്നാണ് ട്രൈബ്യൂണല്‍ വിധി.
നേരത്തെ തുറമുഖത്തിന്റെ വിപുലീകരണ പ്രവര്‍ത്തനങ്ങള്‍ക്കു വേണ്ടി നല്‍കിയ പാരിസ്ഥികാനുമതിയും ട്രൈബ്യൂണല്‍ എടുത്തുമാറ്റി.
ഞായറാഴ്ച അന്തരിച്ച വിഖ്യാത ഗായകന്‍ ഡേവിഡ് ബോവിയുടെ മൃതദേഹം അദ്ദേഹത്തിന്റെ ആഗ്രഹപ്രകാരം ആളും ആരവവുമില്ലാതെ രഹസ്യമായി അമേരിക്കയില്‍ ദഹിപ്പിച്ചു. ന്യൂയോര്‍ക്കിലാണ് ചിതയോരുങ്ങിയത്. ലണ്ടനിലെ വീട്ടുകാരെയും സുഹൃത്തുക്കളെയും പോലും പങ്കെടുപ്പിച്ചില്ല. സ്വസ്ഥമായ ഒരു മടക്കം ആയിരുന്നു ആരാധകരുടെ പ്രിയങ്കരനായ ഡേവിഡ് ബോവി തന്റെ കുടുംബത്തോട് പറഞ്ഞ അവസാനത്തെ ആഗ്രഹം. കുഴിച്ചിടരുത് ദഹിപ്പിക്കണം എന്ന് പറഞ്ഞിരുന്നതിനാലാണ് മൃതദേഹം അഗ്‌നിക്ക് നല്‍കിയത്.
തന്നെ പറഞ്ഞയയ്ക്കുന്ന വേളയില്‍ കുടുംബവും സുഹൃത്തുക്കളുമൊന്നും വേണ്ടെന്നായിരുന്നു ബോവിയുടെ അന്ത്യാഭിലാഷം. നല്ല ജീവിതത്തിന്റെയും, സംഗീതത്തിന്റെയും പേരില്‍ മാത്രം ഓര്‍മ്മിക്കപ്പെടാനാണ് തന്റെ ആഗ്രഹമെന്ന് കുടുബത്തോടും, ഭാര്യയോടും, സുഹൃത്തുക്കളോടും അദ്ദേഹം ആവശ്യപ്പെട്ടിരുന്നു. തനിക്ക് ഒരു കല്ലറയുണ്ടാക്കി, അതൊരു സ്മാരകമായി തീരേണ്ട കാര്യമില്ലെന്ന് തീരുമാനിച്ച ബോവി, മൃതദേഹം ദഹിപ്പിക്കണം എന്നാവശ്യപ്പെടുകയായിരുന്നു.
ആഘോഷമോന്നുമില്ലാതെ നടന്ന സംസ്‌കാരത്തിന് 480640 പൌണ്ടേ ചെലവു വന്നിട്ടുള്ളൂ.
തന്റെ സ്മരണയ്ക്കായി കേട്ടുമതിവരാത്ത സംഗീതം ഇവിടെയുണ്ടെന്ന് അദ്ദേഹം തിരിച്ചറിഞ്ഞിരിക്കാമെന്ന് ഒരു വക്താവ് അഭിപ്രായപ്പെട്ടത്. വലിയ സമ്മേളനങ്ങളും, കോലാഹലങ്ങളുമില്ലാതെ ഒരു മടക്കയാത്രയാണ് അദ്ദേഹം ആഗ്രഹിച്ചത്. ബ്ലാക്ക്സ്റ്റാര്‍ എന്ന ആല്‍ബം മരണത്തിന് ഒരാഴ്ച മുന്‍പ് പുറത്തിറക്കി ലോകത്തെ ഞെട്ടിച്ച ബോവി, ഇതാണ് തന്റെ വിടപറയലിന് പറ്റിയതെന്ന് ചിന്തിച്ചിരുന്നു. സംസ്‌കാരം വേണ്ടെന്ന് വച്ചെങ്കിലും പലയിടങ്ങളിലും അദ്ദേഹത്തിന്റെ സ്മരണയ്ക്കായി പരിപാടികള്‍ സംഘടിപ്പിക്കപ്പെടുന്നുണ്ട്. അടുത്ത മാസം നടക്കുന്ന ബ്രിട്ട് അവാര്‍ഡുകള്‍ ബോവിയ്ക്കുള്ള സ്മരണക്കായി തീരുമാനിച്ചു കഴിഞ്ഞു.
കാന്‍സറിനോട് 18 മാസമായി പൊരുതി ഞായറാഴ്ചയാണ് ഡേവിഡ് ബോവി വിടപറഞ്ഞത്. തലമുറകളുടെ സംഗീതമായിരുന്നു ഇതോടെ ഓര്‍മ്മയായത്. സൌത്ത് ലണ്ടനില്‍ ജനിച്ച അദ്ദേഹം പിന്നീട് അമേരിക്കയിലേയ്ക്ക് ചേക്കേറുകയായിരുന്നു.
മമ്മൂട്ടിയും സുരേഷ്ഗോപിയും ഇനി ഒരുമിച്ച് അഭിനയിക്കുമോ? ഇരുവരും തമ്മില്‍ പിണക്കം മറന്ന് അഭിനയിച്ച അവസാനചിത്രം ‘ദി കിംഗ് ആന്‍റ് ദി കമ്മീഷണര്‍’ ആയിരുന്നു. അതിനുശേഷം രണ്ട് സൂപ്പര്‍സ്റ്റാറുകളും ഒരുമിച്ചിട്ടില്ല. രണ്ടുപേരും വീണ്ടും ഒന്നിക്കും എന്ന് പ്രതീക്ഷയുണ്ടാക്കിയ ഒരു പ്രൊജക്ട് ‘സി ബി ഐ’ സീരീസിന്‍റെ അഞ്ചാം ഭാഗമാണ്. എന്നാല്‍ അതില്‍ സുരേഷ്ഗോപി ഉണ്ടാകില്ലെന്ന് ഉറപ്പായി.
സേതുരാമയ്യരുടെ പ്രധാന സഹായി ഹാരിയായി സുരേഷ്ഗോപി വരുമെന്നായിരുന്നു ആദ്യം കേട്ട വാര്‍ത്ത. പിന്നീട് മമ്മൂട്ടി ഈ പ്രൊജക്ടിനോട് താല്‍പ്പര്യം കാണിക്കാതിരുന്നപ്പോള്‍ സുരേഷ്ഗോപിയെ നായകനാക്കി സി ബി ഐയുടെ അഞ്ചാം ഭാഗം ഒരുക്കുമെന്നും വാര്‍ത്തയുണ്ടായിരുന്നു. എന്നാല്‍ ഇപ്പോള്‍ ചിത്രം തെളിഞ്ഞിരിക്കുന്നു, മമ്മൂട്ടി തന്നെ സി ബി ഐയുടെ അഞ്ചാം പതിപ്പില്‍ നായകനാകും. സുരേഷ്ഗോപി ചിത്രത്തിന്‍റെ ഭാഗമാകില്ല.
കെ മധു സംവിധാനം ചെയ്യുന്ന ഈ ചിത്രത്തിന്‍റെ തിരക്കഥ എസ് എന്‍ സ്വാമി പൂര്‍ത്തിയാക്കി. ഏപ്രിലില്‍ ചിത്രീകരണം ആരംഭിക്കും. സ്വര്‍ഗചിത്ര അപ്പച്ചനാണ് ചിത്രം നിര്‍മ്മിക്കുന്നത്. സായ്കുമാര്‍ ഒരു വില്ലന്‍ കഥാപാത്രത്തെ അവതരിപ്പിക്കുമ്പോള്‍ പ്രധാന വില്ലന്‍ വേഷത്തില്‍ എത്തുക രണ്‍‌ജി പണിക്കരാകുമെന്നറിയുന്നു.
പ്രവചനാതീതമായ കഥാഗതികളില്‍ മുന്നേറുന്ന തിരക്കഥയാണ് സി ബി ഐയുടെ പുതിയ ചിത്രത്തിനായി സ്വാമി എഴുതിയിരിക്കുന്നത്.
കൊച്ചി: സംസ്ഥാന നിയമസഭാ തെരഞ്ഞെടുപ്പിന് മാസങ്ങള്‍ മാത്രം ശേഷിക്കേ സിപിഐഎം പോളിറ്റ് ബ്യൂറോ അംഗം പിണറായി വിജയനെതിരേ ലാവ്‌ലിന്‍ കേസ് വീണ്ടും ഉയര്‍ത്തിക്കൊണ്ടുവരാനൊരുങ്ങി സര്‍ക്കാര്‍. പിണറായിയെ വെറുതെവിട്ട നടപടി പുനഃപരിശോധിക്കണമെന്നാവശ്യപ്പെട്ട് സിബിഐ സമര്‍പ്പിച്ച റിവിഷന്‍ ഹര്‍ജി എത്രയും വേഗം തീര്‍പ്പാക്കണമെന്നാവശ്യപ്പെട്ട് സര്‍ക്കാര്‍ ഉപഹര്‍ജി നല്‍കും. ാജ്യത്തെ പ്രധാന അഴിമതിക്കേസാണ് ലാവ്‌ലിന്‍ എന്നും വിദേശ കമ്പനിക്ക് ചട്ടവിരുദ്ധമായി കരാര്‍ നല്‍കിയത് വഴി ഖജനാവിന് നഷ്ടം വരുത്തിയെന്നുമാണ് ഉപഹര്‍ജിയിലൂടെ കോടതിയെ അറിയിക്കാന്‍ സര്‍ക്കാര്‍ ഒരുങ്ങുന്നത്.
ഈ വിഷയങ്ങള്‍ ഉന്നയിച്ചുകൊണ്ടുള്ള ഉപഹര്‍ജി ഡയറക്റ്റര്‍ ജനറല്‍ ഓഫ് പ്രൊസിക്യൂഷന്‍ ടി.ആസിഫലി ഹൈക്കോടതിയില്‍ നല്‍കും. 2013 നവംബറിലാണ് പിണറായി വിജയനെ തിരുവനന്തപുരം സിബിഐ കോടതി വെറുതെ വിട്ടത്. തെളിവുകള്‍ വേണ്ട വിധം പരിശോധിക്കാതെയാണ് കീഴ്‌ക്കോടതി പിണറായി വിജയനെ വെറുതെ വിട്ടതെന്നും സര്‍ക്കാര്‍ ഹര്‍ജിയില്‍ ചൂണ്ടിക്കാട്ടും. നിയമസഭാ തെരഞ്ഞെടുപ്പിന് മുന്നോടിയായി പിണറായി വിജയന്‍ നയിക്കുന്ന നവകേരള യാത്ര അടുത്ത ദിവസം ആരംഭിക്കാനിരിക്കെയാണ് ഉമ്മന്‍ചാണ്ടി സര്‍ക്കാരിന്റെ നീക്കം.
അതേസമയം തെരഞ്ഞെടുപ്പ് മുന്നില്‍ കണ്ടുകൊണ്ടാണ് യുഡിഎഫ് വീണ്ടും ലാവ്‌ലിനുമായി രംഗത്തിറങ്ങിയിരിക്കുന്നതെന്ന് സിപിഐഎം നേതാവ് എം.വി.ജയരാജന്‍ പറഞ്ഞു. സോളാര്‍ തട്ടിപ്പ് കേസില്‍ മുഖ്യമന്ത്രിയെ സോളാര്‍ കമ്മീഷന്‍ വിചാരണയ്ക്കു വിധേയമാക്കുന്ന സാഹചര്യത്തിലാണ് സര്‍ക്കാരിന്റെ നീക്കമെന്നും ജയരാജന്‍ ചൂണ്ടിക്കാട്ടി. പുകമറ സൃഷ്ടിക്കാനുളള ശ്രമമാണ് ഇതെന്നും, രാഷ്ട്രീയമായി തന്നെ ഇതിനെ നേരിടുമെന്നും തോമസ് ഐസക്ക് എംഎല്‍എ പറഞ്ഞു. പിണറായിക്ക് തെരഞ്ഞെടുപ്പില്‍ മത്സരിക്കാന്‍ ഇതൊന്നും ബാധകമാകില്ലെന്ന് സിപിഐഎം പൊളിറ്റ് ബ്യൂറോ മെംബര്‍ എസ്.രാമചന്ദ്രന്‍പിളള അറിയിച്ചു.
