നോര്‍ത്ത് യോര്‍ക്ക്ഷയര്‍: പ്രാഥമികാവശ്യങ്ങള്‍ക്കുള്ള ഇടവേളകള്‍ രണ്ടാക്കി കുറച്ചതിനേത്തുടര്‍ന്ന് പ്രക്ഷോഭവുമായി വിദ്യാര്‍ത്ഥികള്‍. നോര്‍ത്ത് യോര്‍ക്ക്ഷയറിലെ ബെഡേല്‍ ഹൈസ്‌കൂളിലാണ് സംഭവം. സ്‌കൂളിലെ 580 വിദ്യാര്‍ത്ഥികള്‍ക്ക് ഇടവേളകള്‍ ദിവസത്തില്‍ രണ്ടു തവണ മാത്രമായി ചുരുക്കിയതിനെ രക്ഷാകര്‍ത്താക്കളും വിമര്‍ശിച്ചു. വിവാദ തീരുമാനത്തിനെതിരെ 40 വിദ്യാര്‍ത്ഥികളാണ് പ്രതിഷേധിച്ചത്. സ്‌കൂള്‍ ഗ്രൗണ്ടില്‍ പ്രതിഷേധവുമായി ഇവര്‍ ഇറങ്ങിയതിനെത്തുടര്‍ന്ന് സ്‌കൂള്‍ അധികൃതര്‍ പോലീസിനെ വിളിച്ചു.
രാവിലെ 11.05നും 11.25നുമിടയിലും ഉച്ചക്ക് 12.25നും 2.45നുമിടയിലാണ് ഇടവേളകള്‍ എന്ന് സ്‌കൂള്‍ അധികൃതര്‍ അറിയിച്ചു. ഈ തീരുമാനം മനുഷ്യാവകാശങ്ങളുടെ ലംഘനമാണെന്ന് വിമര്‍ശിക്കപ്പെടുന്നു. എന്നാല്‍ മെഡിക്കല്‍ കാര്‍ഡ് ഉള്ളവര്‍ക്ക് ഏത് സമയത്തും ടോയ്‌ലെറ്റുകള്‍ ഉപയോഗിക്കാമെന്നും സ്‌കൂള്‍ വ്യക്തമാക്കിയിട്ടുണ്ട്. ഫെബ്രുവരിയില്‍ രക്ഷിതാക്കള്‍ക്ക് അയച്ച കത്തിലാണ് സ്‌കൂള്‍ ഈ നിയന്ത്രണത്തേക്കുറിച്ച് അറിയിച്ചത്.
12.45ന് ശേഷം പ്രധാന കെട്ടിടത്തിലേക്ക് വിദ്യാര്‍ത്ഥികള്‍ക്ക് പ്രവേശനമുണ്ടാകില്ലെന്നാണ് അറിയിച്ചത്. ഈ കെട്ടിടത്തിലാണ് ടോയ്‌ലെറ്റുകള്‍ ഉള്ളത്. എന്നാല്‍ ലഞ്ച് സമയം അവസാനിക്കുന്നത് 1.10നാണ് അവസാനിക്കുന്നത്. ഇതാണ് പ്രതിഷേധം ആളിക്കത്തിച്ചത്. ബ്രേക്കുകള്‍ രണ്ടാക്കി കുറച്ചിട്ടുണ്ടെങ്കിലും ആവശ്യമുള്ള കുട്ടികള്‍ക്ക് ഏതു സമയത്തും ഇവ ഉപയോഗിക്കാമെന്നാണ് സ്‌കൂള്‍ അധികൃതര്‍ പറയുന്നത്. എന്നാല്‍ തന്റെ മകള്‍ക്ക് ഇത്തരത്തില്‍ അനുവാദം നല്‍കിയില്ലെന്ന് ഒരു രക്ഷിതാവ് ഫേസ്ബുക്കില്‍ കുറിച്ചു. പ്രതിഷേധത്തെത്തുടര്‍ന്ന് തങ്ങളെ വിളിച്ചതായി പോലീസ് സ്ഥിരീകരിച്ചു. എന്നാല്‍ ഇത് തങ്ങള്‍ കൈകാര്യം ചെയ്യേണ്ട വിഷയമല്ലെന്ന് സ്‌കൂള്‍ അധികൃതരെ അറിയിച്ചതായും നോര്‍ത്ത് യോര്‍ക്ക്ഷയര്‍ പോലീസ് വ്യക്തമാക്കി.
മുഹമ്മദ് ഹനീഫ് തളിക്കുളം
അസീര്‍ മുഹമ്മദ് ചരിത്ര നേട്ടത്തിലേക്ക് നടന്ന് കയറുകയാണ്. അസീറിന്റെ വയലിന് നാദവിസ്മയങ്ങളില്‍ ലോകം ശ്രദ്ധവെച്ച് തുടങ്ങിയിരിക്കുന്നു. ലോക പ്രശസ്ത വയലിന് ബ്രാന്‍ഡായ ക്യാന്റിനി തിരഞ്ഞെടുത്ത അന്താരാഷ്ട്ര നിലവാരമുള്ള വിരലിലെണ്ണാവുന്ന വയലിനിസ്റ്റുകളുടെ കൂട്ടത്തില്‍ ഇടം നേടിയ മലയാളി അസീര്‍ മുഹമ്മദിന് ലണ്ടന്‍ മലയാളികളുടെ ആദരവും വന്നുചേരുന്നു. ലണ്ടന്‍ ആസ്ഥാനമാക്കിയുള്ള സംഗീതപ്രേമികളായ മലയാളി കൂട്ടായ്മ, പ്രൗഢ ഗംഭീരമായ ചടങ്ങില്‍ വെച്ചാണ് അസീര്‍ മുഹമ്മദിനെ ആദരിക്കുന്നത്. കേരളത്തിനകത്തും പുറത്തുമുള്ള നിരവധി വ്യക്തിത്വങ്ങള്‍ സംബന്ധിക്കുന്ന ഈ ചടങ്ങ് ഈ വരുന്ന ജൂണ്‍ അവസാന വാരത്തില്‍ ലണ്ടനില്‍ വെച്ചായിരിക്കും നടക്കുക. ക്യാന്റിനിയുടെ ഈ വലിയ അംഗീകാരം ഒരു മ്യൂസിഷ്യന് നേടാന്‍ കഴിയുന്ന സ്വപ്ന തുല്യമായ നേട്ടമാണ്! അസീര്‍ ചെയ്ത ഫ്യുഷന്‍ വീഡിയോ ആകട്ടെ ഇന്ന് ക്യാന്റിനി വയലിന്റെ പ്രൊമോഷന് വേണ്ടി അവര്‍ ഉപയോഗിക്കുകയും ചെയ്യുന്നു. അങ്ങിനെ ലോക പ്രശസ്തമായ ക്യാന്റിനിയുടെ വെബ് സൈറ്റില്‍ പോലും അസീര്‍ മുഹമ്മദ് രേഖപ്പെടുത്തപ്പെട്ട് കഴിഞ്ഞിരിക്കുന്നു. മലയാളിയായ സംഗീതജ്ഞന്‍ ബാലഭാസ്‌കറിന് മാത്രമേ ഇന്ത്യയില്‍ നിന്ന് ഇതിന് മുന്‍പ് ഈ അസൂയാവഹമായ നേട്ടം കൈവരിക്കാന്‍ സാധിച്ചിട്ടുള്ളൂ. ലോക സമാധാനത്തിന് വേണ്ടി ലോകത്തിലെ ഇരുപത് രാജ്യങ്ങളിലെ മ്യൂസിക് ശാഖകളെ ചേര്‍ത്തുവെച്ചു കൊണ്ട് ഒരു ഫ്യുഷന്‍ തയ്യാറാക്കുന്ന തിരക്കിലാണ് അസീര്‍. ലണ്ടനില്‍ വെച്ച് നടക്കുന്ന സ്വീകരണ ചടങ്ങില്‍ തന്റെ ഡ്രീം പ്രോജക്ടായ ഈ ഫ്യൂഷന്‍ അവതരിപ്പിക്കാനുള്ള ശ്രമത്തിലാണ് അസീര്‍ ഇപ്പോള്‍.
കലാ പെരുമ കൊണ്ട് എന്നും പെരുമ്പാവൂര്‍ ഏറെ ശ്രദ്ധിക്കപ്പെട്ടയിടമാണ്. തലമുറകളുടെ പ്രതിനിധികളെന്നോണം പെരുമ്പാവൂര്‍ ജി. രവീന്ദ്രനാഥും ജയറാമുമൊക്കെ മുന്നേ നടന്ന് കലയില്‍ കയ്യൊപ്പ് ചാര്‍ത്തിയവര്‍. ആ ശ്രേണിയിലേക്കാണ് ഇളം തലമുറയുടെ പ്രതിനിധിയായി അസീര്‍ കടന്ന് വരുന്നത്. കൂട്ടുകാരൊക്കെ ക്രിക്കറ്റ് ബാറ്റുമായി ഗ്രൗണ്ടില്‍ കളിച്ചുല്ലസിക്കുമ്പോള്‍ ഒമ്പതാം വയസ്സിലേ വയലിനില്‍ താളവും ലയവും ആനന്ദവും കണ്ടെത്തി തുടങ്ങിയ ഈ പെരുമ്പാവൂരുകാരന് ഇന്ന് വയസ്സ് ഇരുപത്തിരണ്ട്. തൃപ്പൂണിത്തുറ ആര്‍ എല്‍ വി സംഗീത കോളേജില്‍ ഒന്നാംവര്‍ഷ വിദ്യാര്‍ത്ഥിയായ അസീര്‍ എന്നും വേറിട്ട് നടക്കാന്‍ ശ്രമിച്ച കലാകാരനാണ്. കുഞ്ഞുനാളില്‍ സ്‌കൂള്‍ പഠനകാലത്ത് ഒരു ചടങ്ങില്‍ വയലിന് വായിച്ചപ്പോള്‍ മോശമായതിന്റെ പേരില്‍ ആക്ഷേപിച്ച് അപമാനിച്ചു വിട്ട അധ്യാപകന്റെ മുന്നിലേക്ക് വര്‍ഷങ്ങള്‍ക്കിപ്പുറം താനൊരു മികച്ച വയലിനിസ്റ്റായി അറിയപ്പെടാന്‍ തുടങ്ങിയപ്പോള്‍ കടന്ന് ചെന്ന്, ആ അധ്യാപകന്റെ കാല്‍തൊട്ട് വന്ദിച്ച് അനുഗ്രഹം വാങ്ങി ‘സര്‍, അങ്ങ് എന്നിലുണ്ടാക്കിയ അദമ്യമായ ആഗ്രഹവും വാശിയുമാണ് എന്നെയിന്നൊരു കലാകാരനാക്കി മാറ്റിയതെന്ന്’ ആദരവോടെ പറഞ്ഞ ഈ ചെറുപ്പക്കാരന്റെ മുന്നില്‍ അധ്യാപകന്റെ കണ്ണുകള്‍ സ്‌നേഹത്തോടെ നിറഞ്ഞു തുളുമ്പിയത് സ്വാഭാവികം. അതേ വാശിയോടെയും, താല്പര്യത്തോടെയുമാണ് ഇന്നും പുതിയത് അറിയുവാനും മനസ്സിലാക്കുവാനും പഠിക്കുവാനും അവതരിപ്പിക്കാനും അസീര്‍ ശ്രമിക്കുന്നത് എന്നുള്ളിടത്താണ് അംഗീകാരങ്ങള്‍ അസീറിന്റെ വഴിയേ ഒന്നിന് പിറകെ മറ്റൊന്നായി വന്നണഞ്ഞുകൊണ്ടിരിക്കുന്നത്. ആ പാഷന്‍ കൈമോശം വരാതെ കാത്തുസൂക്ഷിക്കാന്‍ അദ്ദേഹം കാണിക്കുന്ന മിടുക്ക് ഈ വഴിയേ ഇനി സഞ്ചരിക്കുന്നവര്‍ക്ക് ഒരു വഴിവിളക്ക് കൂടിയാണ്.
ഏഷ്യാവിഷന്‍ ഫിലിം അവാര്‍ഡ് നൈറ്റ്, ‘ഹരിത ചന്ദ്രിക’ മിഡില്‍ ഈസ്റ്റ് വാര്‍ഷികോത്സവം, ‘മഴനിലാവ്’ മാധ്യമം വാര്‍ഷികോത്സവം, പെരുമ്പാവൂരില്‍ നടന്ന ഫഌവഴ്‌സ് ഫിലിം ക്രിട്ടിക്‌സ് അവാര്‍ഡ്, കൊച്ചിയില്‍ നടന്ന മാക്ട യുടെ പ്രണാമസന്ധ്യ തുടങ്ങി താര നിബിഡമായ എത്രയോ നിറഞ്ഞ സദസ്സുകള്‍ക്ക് മുന്നില്‍ അസീറിന്റെ വയലിനില്‍ നിന്ന് കണ്ണും മനസ്സും നിറക്കുന്ന ഹൃദയരാഗങ്ങള്‍ ഒരു മഴയായ് പെയ്തിറങ്ങിയിരിക്കുന്നു. അതുവഴി എത്രയോ പ്രഗത്ഭരുടെ സ്‌നേഹവാത്സല്യത്തിന്, അഭിനന്ദനങ്ങള്‍ നേരിട്ടനുഭവിക്കുന്നതിന് ഒരു കലാകാരന് ഈ ഇളം പ്രായത്തില്‍ കഴിയുക എന്നതും നിശ്ചയം ഒരു സുകൃതമാണ്. മെഗാസ്റ്റാര്‍ മമ്മൂട്ടിയുടെ പ്രത്യേക ക്ഷണപ്രകാരം, ഈ വരുന്ന ഏപ്രില്‍ 7 ന് കൈരളി ടിവി ദുബായില്‍ സംഘടിപ്പിക്കുന്ന ‘ഇശല്‍ ലൈല’ പ്രോഗ്രാമില്‍ പെര്‍ഫോം ചെയ്യാനായി തയ്യാറെടുക്കുകയാണ് അസീര്‍ ഇപ്പോള്‍. തന്നോട് കലാകേരളം കാണിക്കുന്ന ഈ സ്‌നേഹവാത്സല്യത്തെ നിറഞ്ഞ മനസ്സോടെ, ഹൃദയം തുളുമ്പുന്ന നന്ദിയോടെ ഓര്‍ക്കുന്നുണ്ട് അസീര്‍. ദുബായ് അല്‍ നാസര്‍ ലെഷര്‍ലാന്റില്‍ മലയാളത്തിന്റെ മാപ്പിളപ്പാട്ട് ഇതിഹാസം എരഞ്ഞോളി മൂസയെ ആദരിക്കുന്ന ചടങ്ങ് ‘മിഅറാജ് രാവിലെ കാറ്റ്’ എന്ന് പേരിട്ട വേദിയില്‍ സൂപ്പര്‍ഹിറ്റായ മാപ്പിളപ്പാട്ടുകള്‍ക്ക് വയലിനില്‍ മെഡ്‌ലെ വിരുന്നൊരുക്കികൊണ്ട് അസീര്‍ നടത്തിയ പ്രകടനം കലാപ്രേമികളുടെ ഓര്‍മ്മയിലെ മറക്കാത്ത ഒരനുഭവമായിരിക്കും എന്നും.! ഈയ്യടുത്ത് മസ്‌കറ്റിലെ റൂവിയില്‍ നടന്ന, ഉണ്ണിമേനോന്‍ അഫ്‌സല്‍ ടീം നയിച്ച ‘വൈശാഖസന്ധ്യ’ എന്ന പരിപാടിക്കിടെ അസീര്‍ നടത്തിയ വയലിന് പെര്‍ഫോമന്‍സിന് ശേഷം വിശിഷ്ട വ്യക്തിത്വങ്ങള്‍ അടങ്ങിയ സദസ്സ് മുഴുവന്‍ എഴുന്നേറ്റ് നിന്ന് കയ്യടിച്ച് അദ്ദേഹത്തെ ആദരിച്ചത് ഈ കലാകാരന്റെ കലാജീവിതത്തിലെ അവിസ്മരണീയമായ ഒരു ഏടാണ്.
ഒരിക്കലും കലാപാരമ്പര്യം കൊണ്ട് സമ്പന്നമായ ചുറ്റുപാടില്‍ നിന്നുള്ള വരവായിരുന്നില്ല അസീറിന്റേത്. ഉമ്മ റഷീദ അല്പസ്വല്പം പാടുമെന്നത് ഒഴിച്ച് നിര്‍ത്തിയാല്‍ അസീറിന്റെ വഴിയില്‍ മുന്നേനടന്ന് വഴികാട്ടിയവര്‍ ആരുമില്ലായിരുന്നു. ഇല്ലായ്മകളുടെ ഇന്നലെകളെ കഠിനാധ്വാനം കൊണ്ട്, നിരന്തരമായ തപസ്യ കൊണ്ട് മറികടന്ന് കൊണ്ടുള്ള വരവായിരുന്നു ഈ മിടുക്കന്റേത്. ആ പ്രയത്‌നങ്ങളൊന്നും വെറുതെ പാഴായിയില്ല എന്ന് നമ്മെ മനസ്സിലാക്കി തരുന്നുണ്ട് അസീറിന് കിട്ടുന്ന വേദികളും അംഗീകാരങ്ങളും. കല ഒരു ഉപാസനയാകുന്നിടത്ത് അംഗീകാരങ്ങള്‍ കലാകാരനെ പിന്തുടരും എന്നാണ്. ഈയടുത്ത ദിവസമാണ് ദുബായില്‍ വെച്ച് മികച്ച കലാകാരനുള്ള ‘ബെസ്‌ററ് പെര്‍ഫോര്‍മര്‍’ പുരസ്‌കാരം, എണ്ണം പറഞ്ഞ നിരവധി പ്രതിഭകളുടെ സാന്നിധ്യത്തില്‍ ദുബായ് ഭരണാധികാരി ഹിസ് ഹൈനെസ്സ് ഷെയ്ഖ് മുഹമ്മദ് ബിന്‍ റഷീദ് അല്‍ നഹ്‌യാന്റെ കൊട്ടാര കാര്യദര്‍ശിയും റീജന്‍സി ഗ്രൂപ് ചെയര്‍മാനുമായ ഷംസുദ്ദീന്‍ ബിന്‍ മുഹിയുദ്ദീന്‍ ഈ മിടുക്കന് സമ്മാനിച്ചത്. യു എ ഇ യിലെ വാണിജ്യ, വ്യാവസായിക, വിദ്യാഭ്യാസ, കല, സാഹിത്യ, സാമൂഹിക മേഖലകളില്‍ തനത് വ്യക്തിത്വം പ്രകടമാക്കിയ അതിശക്തരായ നൂറ് മലയാളികളെ ആദരിക്കുന്ന അതേ വേദിയില്‍ നിറഞ്ഞ സദസ്സിന് മുന്നില്‍ ഗസല്‍ വിദഗ്ദന്‍ ഉമ്പായിയോടൊപ്പം പെര്‍ഫോം ചെയ്യാനുള്ള അവസരവും അന്ന് അസീറിന് ലഭിച്ചു.
കര്‍ണാടക സംഗീതത്തിന്റെ താളാത്മകതയും, വെസ്‌റ്റേണ്‍ സംഗീതത്തിന്റെ ചടുലതയും, മാപ്പിളപ്പാട്ടുകളുടെ മൊഞ്ചുമൊക്കെ ഒരേ രീതിയില്‍ അസീറിന്റെ വയലിന് നന്നായി വഴങ്ങുന്നു എന്നത് അദ്ദേഹത്തിന്റെയൊരു സ്‌പെഷ്യാലിറ്റിയാണ്. ഒരു വയലിന് സ്വന്തമാക്കാനുള്ള ആഗ്രഹം ഉള്ളിലൊതുക്കി വിവാഹ സല്‍ക്കാരങ്ങളിലും നാട്ടിന്‍പുറത്തെ കലാപരിപാടികളും ഓടിനടന്നിരുന്ന പോയകാലം ഈ ചെറുപ്പക്കാരന്റെ ഇന്നലെകളിലുമുണ്ടായിരുന്നു. പോകുന്ന വേദികളില്‍ ആസ്വദിച്ചു വായിക്കുന്ന അസീറിന്റെ രീതി പക്ഷേ ഒരുപാട് ബന്ധങ്ങളും അദ്ദേഹത്തിനുണ്ടാക്കി കൊടുത്തു. വേദികളില്‍ നിന്ന് വേദികളിലേക്കുള്ള യാത്രക്ക് ആ ബന്ധങ്ങള്‍ നിദാനമായി. ഇതിനോടകം രാജ്യത്തിനകത്തും പുറത്തുമായി ആയിരത്തിലേറെ വേദികളില്‍ ആ വയലിനില്‍ വിസ്മയം തീര്‍ക്കാന്‍ അസീറിന് കഴിഞ്ഞിട്ടുണ്ട്. പ്രശസ്ത സംഗീത സംവിധായകരായ ഗോപി സുന്ദര്‍, സ്റ്റീഫന്‍ ദേവസ്സി തുടങ്ങിയവരുടെയൊക്കെ സംഗീത പരിപാടികളില്‍ ഇപ്പോള്‍ അസീര്‍ ഒരു സ്ഥിര സാന്നിധ്യമാണ്. ഇന്ന് ഗള്‍ഫ് വേദികളിലും ആ പ്രതിഭയുടെ മിന്നലാട്ടം സ്ഥിരമായി ആസ്വദിക്കാനുള്ള ഭാഗ്യം പ്രവാസി മലയാളികള്‍ക്ക് ഈയ്യിടെയായി ലഭിക്കുന്നുണ്ട്.
വയലിന് ജീവതാളമായെടുത്ത ഈ കലാകാരന്റെ ഹൃദയ താളത്തിനൊപ്പം മതിമറന്ന് ആസ്വദിക്കുന്നവരുടെ എണ്ണം ഇന്ന് ഏറിവരികയാണ്. യുട്യൂബിലും അസീറിന്റെ പ്രകടനങ്ങള്‍ക്ക് ആസ്വാദകരേറി വരികയാണ്. ഒരു കാര്യം ഉറപ്പാണ്, സംഗീത ലോകത്തെ നാളെകളില്‍ നിശ്ചയം ഈ ചെറുപ്പക്കാരന് ഉയരങ്ങളിലൊരിടമുണ്ട്. അത്രയും തെളിഞ്ഞ ടാലെന്റ്‌റ് കൈമുതലായുള്ള ഒരാളെ ആര്‍ക്കാണ് അവഗണിക്കാനാവുക, ആര്‍ക്കാണ് തടുത്ത് നിര്‍ത്താനാവുക. അസീര്‍ ഇനിയുമെത്ര വഴികള്‍, എത്ര ദൂരം താണ്ടാനിരിക്കുന്നു. നമുക്ക് കണ്ണയച്ച് കാത്തിരിക്കാം. കൈനിറയെ അവസരങ്ങള്‍ വന്ന് ചേരുമ്പോഴും വിനയം നിറയുന്ന ചിരിയോടെ, കണ്ണുകള്‍ മേലോട്ടയച്ച് അസീര്‍ പറയും ‘എല്ലാം പടച്ചവന്റെ അനുഗ്രഹം, ഉമ്മയുടെ പ്രാര്‍ത്ഥന’. !
യു.കെ മലയാളികളെ ദുഖത്തിലാഴ്ത്തി മറ്റൊരു മരണം കൂടി. ടെല്‍ഫോര്‍ഡില്‍ താമസിച്ചിരുന്ന മലയാളി നഴ്സ് ഉഷാ മേനോന്‍ (53) ആണ് കാന്‍സര്‍ രോഗം ബാധിച്ച് ചികിത്സയിലായിരിക്കെ മരണമടഞ്ഞത്.
ടെല്‍ഫോര്‍ഡിലെ പ്രിന്‍സസ് റോയല്‍ ആശുപത്രിയില്‍ നഴ്‌സായി ജോലി ചെയ്തിരുന്ന ഉഷ കഴിഞ്ഞ ആറു വര്‍ഷത്തോളമായി കാന്‍സര്‍ രോഗത്തിന് ചികിത്സയിലായിരുന്നു.
നാട്ടില്‍ കൂത്താട്ടുകുളം സ്വദേശിനിയായ ഉഷാ മേനോന്‍ യു.കെയിലും നാട്ടിലുമായി മാറി മാറി ചികിത്സതേടി വരുകയായിരുന്നു.
രണ്ട് ദിവസം മുമ്പ് അസുഖം കലശലായതിനെ തുടര്‍ന്ന് മാഞ്ചസ്റ്റര്‍ സിറ്റി ആശുപത്രിയില്‍ പ്രവേശിപ്പിക്കുകയായിരുന്നു. പിന്നീട് ടെല്‍ഫോര്‍ഡിലെ സതേണ്‍ ഹോസ്‌പൈസ് ആശുപത്രിയില്‍ എത്തിക്കുകയും അവിടെ വെച്ച് ജീവന്‍ നഷ്ടമാവുകയുമായിരുന്നു.
സംസ്‌കാരം യു.കെയില്‍ തന്നെ നടത്താനാണ് ബന്ധുക്കള്‍ തീരുമാനിച്ചിരിക്കുന്നത്. പത്തനംതിട്ട സ്വദേശിയായ സജിയാണ് ഭര്‍ത്താവ്. എ ലെവല്‍ വിദ്യാര്‍ത്ഥിനിയായ ശ്രീലക്ഷ്മി മകള്‍.
പാല: ഭീകരർ തട്ടിക്കൊണ്ടു പോയ മലയാളി വൈദികനും പാല സ്വദേശിയുമായ ഫാ.ടോം ഉഴുന്നാലിൻെറ ജൻമസ്ഥലമായ രാമപുരത്ത് മുൻ എം.പിയും ജനാധിപത്യ കേരളകോൺഗ്രസ് ചെയർമാനുമായ ഫ്രാൻസിസ് ജോർജിൻെറ നേതൃത്വത്തിൽ ഏകദിന ഉപവാസ സമരം നടന്നു. അച്ഛൻറെ മോചനം വൈകുന്നതിൽ എല്ലാവരും കടുത്ത ആശങ്കയിലാണെന് ഫ്രാൻസിസ് ജോർജ് പറഞ്ഞു. എല്ലാവരുടെയും പ്രാർത്ഥനകളിൽ അച്ഛനെ ഓർക്കണമെന്നും, വഴികൾ എല്ലാം തുറന്ന് സാധ്യമായതെല്ലാം ചെയ്യാൻ അദ്ദേഹം കേന്ദ്രസർക്കാരിനോട് അഭ്യർത്ഥിച്ചു.
കേന്ദ്രസർക്കാർ ഈ അവസരത്തിൽ ഉണർന്ന് പ്രവർത്തിച്ചു ഫാ.ടോം ഉഴുന്നാലിനെ മോചിപ്പിക്കാൻ എല്ലാ അവസരങ്ങളും ഉപയോഗിക്കണമെന്ന് ഉപവാസ സമരം ഉൽഘാടനം ചെയ്ത ജസ്റ്റിസ് നാരായണകുറുപ്പ് പറഞ്ഞു. ഇമാം നദിർ മൗലവി മുഖ്യപ്രഭാക്ഷണം നടത്തി. ഫാ.ടോം ഉഴുന്നാലിനെ മോചിപ്പിക്കേണ്ടത് ഒരു രാജ്യo ഭരിക്കുന്ന സർക്കാരിന്റെ കടമ്മയാണെന്ന് സമാപന സമ്മേളനം ഉൽഘാടനം ചെയ്ത മുൻ ഗവർണർ എം എം ജേക്കബ് ചൂണ്ടിക്കാട്ടി.
ഇൻഫാം ദേശീയ സെക്രട്ടറി ഷെവലിയാർ വി സി സെബാസ്റ്റ്യൻ, പി.സി. ജോസഫ് എക്സ് എം ൽ എ, മാത്യു സ്‌റ്റീഫൻ എക്സ് എം ൽ എ, എം പി പൊളി, അഡ്വ എ ജെ ജോസഫ്, ജോസ് വള്ളമറ്റo, റവ ഡോ ജോർജ് പരിയാത്ത, ഫാ ജൊസഫ് മുണ്ടക്കൽ, ഫാ ബേബി മങ്ങാട്ട്, മാത്യൂസ് ജോർജ്, അഡ്വ ഫ്രാൻസിസ് തോമസ്, ഏലിയാസ് സഖറിയ, ജോസ് പാറേക്കാട്ട്, അഡ്വ മൈക്കിൾ ജെയിംസ്, ആൻറ്ണി ആലഞ്ചേരി, നോബിൾ ജോസഫ്, ജോർജ് അഗസ്റ്റ്യൻ, അഡ്വ ഷൈസൺ പി മങ്ങുഴ, ബേബി പതിപ്പള്ളി. തോമസ് കുന്നപ്പിളി, വിനു ജോബ്, ബാബു മുകല, അഡ്വ കെ എം ജോർജ്, മജേഷ് കൊച്ചുമലയിൽ, കെ ൽ ബിജു നീണ്ടുർ എന്നിവർ പ്രസംഗിച്ചു.
കത്തോലിക്ക സഭയുടെ ആരാധനാലയങ്ങളില്‍ വിവാഹിതരായ പുരുഷന്മാരെയും പുരോഹിതന്മാരാക്കുന്നത് ഗൗരവകരമായി ആലോചിക്കുന്നുണ്ടെന്ന് ഫ്രാന്‍സിസ് മാര്‍പാപ്പ. ജര്‍മ്മന്‍ ദിനപത്രമായ ഡൈ സെയ്റ്റിന് നല്‍കിയ അഭിമുഖത്തിലാണ്, മാര്‍പാപ്പ വിപ്ലവകരമായ ഈ തീരുമാനം പറഞ്ഞത്.
വൈദികരുടെ കുറവ് പരിഹരിക്കുന്നതിനു വേണ്ടിയാണ് ഇക്കാര്യം പരിഗണിക്കുന്നതെന്നും മാര്‍പാപ്പ വ്യക്തമാക്കി. വൈദികരുടെ എണ്ണം വര്‍ധിക്കുന്നത് വഴി ലോകമെങ്ങും ക്രിസ്തുമതത്തിന്റെ പ്രചാരണം ശക്തമാക്കാന്‍ കഴിയുമെന്നും മാര്‍പാപ്പ വിലയിരുത്തുന്നു.അതേസമയം, ഇപ്പോള്‍ പുരോഹിതരായിരിക്കുന്നവര്‍ക്ക് വിവാഹം കഴിക്കുന്നതിന് അനുമതിയുണ്ടാവില്ല. നിലവില്‍ കത്തോലിക്കാ സഭയില്‍ വിവാഹിതര്‍ക്ക് പ്രത്യേക അനുമതിയോടെ മതപരമായ ചടങ്ങുകള്‍ നടത്താം.വൈദീകരുടെ ബ്രഹ്മചര്യവുമായി ബന്ധപ്പെട്ട നിയമത്തിലും ചില ഇളവുകള്‍ അനുവദിക്കുന്ന കാര്യം പരിഗണനയിലുണ്ടെന്ന സൂചനയും മാര്‍പാപ്പ നല്‍കിയിട്ടുണ്ട്.
സ്വന്തം ലേഖകന്‍
ഇറോം ശര്‍മിളയ്ക്ക് വെറും 90 വോട്ടോ ??? എവിടെയൊ എന്തൊക്കെയോ ചീഞ്ഞു നാറുന്നുവോ ??? ഇലക്ട്രോണിക് പെട്ടി എന്ന ജനാധിപത്യപെട്ടിക്ക് തെറ്റ് പറ്റിയിട്ടുണ്ടോ ?? സ്വന്തം ജനതയ്ക്ക് വേണ്ടി, പട്ടാളത്തിന്റെ മനുഷ്യത്വ വിരുദ്ധതക്കെതിരെ ഒരു ജന്മത്തിന്റെ യൌവനം മുഴുവന്‍ ഹോമിച്ചു പോരാടിയ ഇറോം ശര്‍മ്മിളയ്ക്ക് നൂറു വോട്ട് തികച്ചു നല്‍കാത്തവരണോ ഭാരതീയര്‍ ?.നോട്ടയ്ക്ക് പോലും 143 പേര്‍ വോട്ട് കിട്ടിയിട്ടുണ്ട്. ജനാധിപത്യപ്പെട്ടില്‍ വ്യക്തമായ കൈകടത്തല്‍ നടന്നതായി ആരോപണങ്ങള്‍ ഉയരുന്നു. പേപ്പർ ബാലറ്റ് പുനഃസ്ഥാപിക്കണ്ട സമയം അതിക്രമിച്ചു. ഇലക്ട്രോണിക് വോട്ടിംഗ് മെഷിനുകള്‍ വിശ്വാസ യോഗ്യം അല്ലാതായി മാറുന്നു.
ഉത്തർ പ്രദേശിൽ വോട്ടിങ്ങ് മെഷീനിൽ കൃത്രിമം കാട്ടിയാണ് ബി.ജെ.പി വൻ വിജയം കൊയ്തതെന്ന് ബി.എസ്.പി നേതാവ് മായാവതി ആവര്‍ത്തിക്കുന്നു. ഇക്കാര്യം ചൂണ്ടിക്കാട്ടി ഇലക്ഷൻ കമ്മീഷനു പരാതി നൽകുമെന്നും അവർ പറഞ്ഞു. ഇക്കാര്യത്തില്‍ അന്വേഷണം നടത്തണമെന്നും മായാവതി ആവശ്യപ്പെട്ടു.ഇലക്ട്രോണിക് വോട്ടിങ് യന്ത്രത്തിലുള്ള ജനവിശ്വാസം നഷ്ടപ്പെട്ടുവെന്നും മായാവതി പറഞ്ഞു. മുസ്ലീം ഭൂരിപക്ഷ പ്രദേശങ്ങളിൽ പോലും ബി.ജെ.പി വിജയിച്ചിരിക്കുന്നു. ഇത് തെളിയിക്കുന്നത് വോട്ടിങ്ങ് മെഷീനിൽ കൃത്രിമം കാട്ടിയിട്ടുണ്ടെന്നു തന്നെയല്ലേ ?. ചില വോട്ടിങ് മെഷീനുകളില്‍ ബിജെപിയുടെ ചിഹ്നം മാത്രമാണ് ഉണ്ടായിരുന്നത് എന്നും പുറത്ത് വരുന്നു.
ഇലക്ട്രോണിക് വോട്ടിങ്ങ് മെഷീന്‍ ബി.ജെ.പിയുടെതല്ലാത്ത മറ്റ് വോട്ടുകള്‍ സ്വീകരിക്കാതിരിക്കുകയോ മറ്റ് പാര്‍ട്ടികള്‍ക്ക് ചെയ്യുന്ന വോട്ടുകള്‍ ബി.ജെ.പിയിലേക്ക് പോവുകയോ ചെയ്യുന്നുണ്ടെന്ന് മായാവതി ആരോപിക്കുന്നു. ഇലക്ട്രോണിക് വോട്ടിങ് യന്ത്രത്തിലുള്ള ജനവിശ്വാസം നഷ്ടപ്പെട്ടുവെന്നും ഇതു സംബന്ധിച്ച്‌തെരഞ്ഞെടുപ്പ് കമ്മീഷന് പരാതി നല്‍കുമെന്നും മായാവതി പറഞ്ഞു.
ലണ്ടന്‍: 35 വര്‍ഷങ്ങള്‍ക്ക് മുമ്പ് കൊയര്‍ ബോയിയെ ലൈംഗികമായി പീഡിപ്പിച്ച കേസില്‍ റിട്ടയേര്‍ഡ് പള്ളി വികാരിക്ക് ശിക്ഷ. സിറില്‍ ആഷ്ടണ്‍ റോവ് എന്ന 78 കാരനായ മുന്‍ വികാരിക്കാണ് ശിക്ഷ ലഭിച്ചത്. നാല് വര്‍ഷത്തെ ജയില്‍ ശിക്ഷയാണ് ഇയാള്‍ക്ക് ബോണ്‍മൗത്ത് ക്രൗണ്‍ കോടതി നല്‍കിയത്. 1979നും 81നുമിടയില്‍ കൊയര്‍ബോയ് ആയിരുന്നയാളാണ് പരാതിക്കാരന്‍. ആ സമയത്ത് 11 വയസുണ്ടായിരുന്ന ഇയാളെ പ്രതി ലൈംഗിക ചൂഷണത്തിന് ഇരയാക്കിയെന്നാണ് പരാതി.
മോട്ടോര്‍ ന്യൂറോണ്‍ രോഗിയായിരുന്ന ഇര വിധി വന്ന ദിവസം മരിച്ചു. കോടതി പ്രഖ്യാപിച്ച ശിക്ഷാവിധിയേക്കുറിച്ച് അറിയാതെയാണ് ഈ 47കാരന്‍ മരിച്ചത്. സംസാരിക്കാന്‍ കഴിയാത്തതിനാല്‍ കണ്‍പോളകളുടെ ചലനം സംസാരമായി മാറ്റുന്ന ഐ ട്രാക്കിംഗ് സോഫ്റ്റ് വെയര്‍ ഉപയോഗിച്ചായിരുന്നു ഇയാളുടെ മൊഴി കോടതി എടുത്തത്. വികാരിയായിരുന്ന റോവ് തന്നെ പള്ളിയുടെ കവാടം അടച്ചതിനു ശേഷം പീഡിപ്പിക്കുകയും പിന്നീട് ക്ഷമാപണം നടത്തുകയും ഒരു പൗണ്ട് നല്‍കുകയും ചെയ്തതായി ഇര മൊഴി നല്‍കിയിരുന്നു.
സ്റ്റോക്ക് ന്യൂവിംഗ്ടണിലെ സെന്റ് മത്യാസ് ചര്‍ച്ചില്‍ വെച്ച് ഇരുപതോളം തവണ താന്‍ പീഡിപ്പിക്കപ്പെട്ടിട്ടുണ്ടെന്നാണ് മൊഴി. തന്റെ കുടുംബാംഗങ്ങളോട് പീഡനത്തേക്കുറിച്ച് ഇയാള്‍ വെളിപ്പെടുത്തിയതിനു ശേഷം 2015ലാണ് പോലീസ് കേസെടുത്ത് അന്വേഷണം ആരംഭിച്ചത്. 2016ല്‍ റോവിനെ ചോദ്യം ചെയ്തു. വര്‍ഷങ്ങള്‍ക്കു ശേഷവും പീഡനമുണ്ടാക്കിയ ആഘാതത്തില്‍ നിന്ന് ഇരയായയാള്‍ കര കയറിയിരുന്നില്ലെന്നാണ് അന്വേഷണോദ്യോഗസ്ഥന്‍ വെളിപ്പെടുത്തിയത്.
ന്യൂഡല്‍ഹി: അഞ്ച് സംസ്ഥാനങ്ങളില്‍ നടന്ന തെരഞ്ഞെടുപ്പില്‍ മൂന്നിടത്ത് ബിജെപി മുന്നേറ്റം. പഞ്ചാബില്‍ കോണ്‍ഗ്രസ് അധികാരത്തിലെത്തിയപ്പോള്‍ ആം ആദ്മി മൂന്നാം സ്ഥാനത്തേക്ക് പിന്തള്ളപ്പെട്ടു. ഉത്തര്‍പ്രദേശില്‍ ആദ്യ ലീഡുകളില്‍ പോലും വ്യക്തമായ ആധിപത്യം സ്ഥാപിച്ച് ബിജെപി അധികാരത്തിലെത്തി. ഉത്തരാഖണ്ഡിലും ബിജെപി 54 സീറ്റുകളുമായി അധികാരത്തിലെത്തി.
ബിജെപി അധികാരത്തിലിരുന്ന ഗോവയില്‍ മുഖ്യമന്ത്രിയായിരുന്ന ലക്ഷ്മീകാന്ത് പര്‍സേക്കര്‍ പരാജയപ്പെട്ടതാണ് ഏറ്റവും വലിയ അട്ടിമറി. ബിജെപി അകാലിദള്‍ സഖ്യം ഭരിച്ചിരുന്ന പഞ്ചാബില്‍ കോണ്‍ഗ്രസ് അധികാരം പിടിച്ചു. അതേസമയം മണിപ്പൂരില്‍ ആദ്യമായി അക്കൗണ്ട് തുറന്ന ബിജെപി 16 സീറ്റുകളിലാണ് വിജയിച്ചത്.
ഉത്തര്‍പ്രദേശില്‍ അധികാരത്തിലെത്തിയതോടെ ഭൂരിപക്ഷം കുറഞ്ഞ രാജ്യസഭയിലും ബിജെപിക്ക് മേല്‍ക്കൈ നേടാനാകും. കേന്ദ്രസര്‍ക്കാരിനും ബിജെപിക്കും നിര്‍ണായകമായ ഉത്തര്‍പ്രദേശിലെ തെരഞ്ഞെടുപ്പ് ഫലമായിരുന്നു ഏവരും ഉറ്റുനോക്കിയിരുന്നത്. ഗോവയൊഴികെ മറ്റെല്ലാ സംസ്ഥാനങ്ങളിലും ഭരണമാറ്റം ഉണ്ടാകുമെന്നായിരുന്നു എക്‌സിറ്റ് പോള്‍ ഫലങ്ങള്‍ പറഞ്ഞിരുന്നത്.
ലണ്ടന്‍: ഗ്രാമര്‍ സ്‌കൂളുകളില്‍ പ്രവേശനം ലഭിക്കാന്‍ ദരിദ്രരായ കുട്ടികള്‍ക്ക് മാര്‍ക്ക് ഇളവ് അനുവദിക്കാന്‍ നീക്കം. സാമ്പത്തികമായി മെച്ചപ്പെട്ട സാഹചര്യങ്ങളില്‍ നിന്ന് എത്തുന്ന കുട്ടികളേക്കാള്‍ കുറഞ്ഞ മാര്‍ക്ക് മതി ഇവര്‍ക്ക് ഇനി ഗ്രാമര്‍ സ്‌കൂളുകളില്‍ പ്രവേശനം നേടാന്‍. ഇത്തരക്കാര്‍ക്ക് പ്രവേശനം നല്‍കണമെന്ന് നിലവിലുള്ള ഗ്രാമര്‍ സ്‌കൂളുകള്‍ക്ക് നിര്‍ദേശം നല്‍കാനാണ് പുതിയ പദ്ധതിയനുസരിച്ച് സര്‍ക്കാര്‍ തയ്യാറെടുക്കുന്നത്. രാജ്യത്തെ ഏറ്റവും മികച്ച സ്റ്റേറ്റ് സ്‌കൂളുകളിലെ മധ്യവര്‍ഗ്ഗ ആധിപത്യം അവസാനിപ്പിക്കാനുള്ള നടപടികളുടെ ബാഗമായാണ് ഈ മാറ്റം.
അടുത്ത മാസം പ്രഖ്യാപിക്കുന്ന ഈ നടപടികളിലൂടെ രാജ്യത്തെ മികച്ച സ്‌കൂളുകളില്‍ സാധാരണക്കാരുടെ കുട്ടികള്‍ക്കും പ്രവേശനം ലഭ്യമാക്കാനാണ് ഉദ്ദേശിക്കുന്നത്. തെരേസ മേയ് പ്രഖ്യാപിച്ച പുതിയ തലമുറ ഗ്രാമര്‍ സ്‌കൂളുകളില്‍ മുമ്പ് ഉണ്ടായിരുന്ന വിധത്തില്‍ പ്രവേശനത്തിനുള്ള നിബന്ധനകള്‍ കര്‍ശനമായിരിക്കില്ലെന്ന് മന്ത്രിമാര്‍ വ്യക്തമാക്കിയിരുന്നു. നിലവിലുള്ള 168 ഗ്രാമര്‍ സ്‌കൂളുകളും പുതിയ നിബന്ധനകള്‍ പാലിക്കണം.
പ്രവേശനത്തിനായുള്ള പരീക്ഷകള്‍ പോലും സാമൂഹിക സാഹചര്യങ്ങള്‍ പരിഗണിച്ച് കൂടുതല്‍ എളുപ്പമുള്ളവയാക്കണമെന്നും നിര്‍ദേശങ്ങളില്‍ വ്യക്തമാക്കുന്നു. ഗ്രാമര്‍ സ്‌കൂളുകള്‍ മധ്യവര്‍ഗത്തിനു വേണ്ടി മാത്രമാണ് പ്രവര്‍ത്തിക്കുന്നത് എന്ന വിമര്‍ശനം ഉയര്‍ന്നിരുന്നു. ഓഫ്‌സ്റ്റെഡ് മുന്‍ തലവന്‍ സര്‍ മൈക്കിള്‍ വില്‍ഷോ പോലും ഈ സമ്പ്രദായത്തെ എതിര്‍ത്തിരുന്നു. ഗ്രാമര്‍ സ്‌കൂളുകൡ 3 ശതമാനം കുട്ടികള്‍ മാത്രമാണ് സൗജന്യ ഉച്ചഭക്ഷണത്തിന് അര്‍ഹരായവര്‍. അതേ സമയം മറ്റു സ്‌കൂളുകളില്‍ ഇത് 18 ശതമാനമാണ്.
ന്യൂഡല്‍ഹി: അഹമ്മദാബാദില്‍നിന്ന് ലണ്ടനിലേക്ക് വന്ന എയര്‍ ഇന്ത്യാ വിമാനവുമായുള്ള ബന്ധം നഷ്ടപ്പെട്ടതു പരിഭ്രാന്തിക്കിടയാക്കി. ഹംഗറിക്ക് മുകളിലൂടെ പറക്കവെയാണ് എയര്‍ ട്രാഫിക് കണ്‍ട്രോളുമായുള്ള ബന്ധം നഷ്ടമായത്. ഇതേത്തുടര്‍ന്നു വിമാനത്തിന് എന്തെങ്കിലും അപകടം പറ്റിയതാണോ എന്നു സംശയിച്ചു യുദ്ധവിമാനങ്ങള്‍ എയര്‍ ഇന്ത്യ വിമാനത്തിന് അകമ്പടി സേവിച്ചു.
231 യാത്രക്കാരും 18 ജീവനക്കാരുമായി രാവിലെ ഏഴ് മണിക്കാണ് മുംബൈയിലെ ഛത്രപതി ശിവജി രാജ്യാന്തര വിമാനത്താവളത്തില്‍ നിന്നു പുറപ്പെട്ട വിമാനവുമായി ബന്ധം നഷ്ടപ്പെടാന്‍ കാരണം ഫ്രീക്വെന്‍സിയില്‍ വന്ന വ്യതിയാനമാണെന്നു വ്യക്തമായതായി എയര്‍ ഇന്ത്യ വക്താവ് അറിയിച്ചു. ലണ്ടനിലെ ഹീത്രൂ വിമാനത്താവളത്തില്‍ 11.05ന് വിമാനം സുരക്ഷിതമായി ഇറങ്ങി.
കഴിഞ്ഞ ഫെബ്രുവരിയില്‍ ജെറ്റ് എയര്‍വേയ്‌സിന്റെ വിമാനം സമാനരീതിയില്‍ ഫ്രീക്വെന്‍സി തകരാര്‍ മൂലം ജര്‍മ്മനിക്ക് മുകളിലൂടെ പറക്കുമ്പോള്‍ ജര്‍മ്മന്‍ യുദ്ധവിമാനങ്ങള്‍ അകമ്പടി സേവിച്ചിരുന്നു
