അമ്മു മറിയം തോമസ്, മലയാളം യുകെ ന്യൂസ് ടീം

കൊറോണ വൈറസിൻെറ പുതിയ വകഭേദം ബ്രിട്ടനെ വളരെ വലിയ പ്രതിസന്ധിയിലേക്കാണ് തള്ളിവിട്ടിരിക്കുന്നത്. വൈറസ് വ്യാപന ഭീതിയിൽ യൂറോപ്യൻ യൂണിയൻ രാജ്യങ്ങൾ ഉൾപ്പെടെ യുകെയുമായുള്ള ഗതാഗതമാർഗങ്ങൾ അടച്ചു കഴിഞ്ഞു . ഫ്രാൻസിൽ നിന്നുള്ള ചരക്ക് നീക്കങ്ങളും നിലച്ചിരിക്കുകയാണ്. ഇതു കൂടാതെ യാത്രാവിലക്ക് ഡിസംബർ 31ന് ശേഷവും തുടരുമോ എന്ന ആശങ്കയും ഉടലെടുത്തിട്ടുണ്ട്.

ഈ സാഹചര്യത്തിൽ ക്രിസ്മസ് കാലത്തെ ഭക്ഷ്യക്ഷാമം ഒഴിവാക്കാനായി പ്രധാനമന്ത്രി ബോറിസ് ജോൺസൺ അടിയന്തര ചർച്ചകൾ ആരംഭിച്ചു . ഇറക്കുമതി ചെയ്ത ഭക്ഷ്യവസ്തുക്കൾ രണ്ടാഴ്ചയ്ക്കുള്ളിൽ തീർന്നുപോകും എന്ന ആശങ്കക്കിടയിലാണ് മുതിർന്ന മന്ത്രിമാരും ഉദ്യോഗസ്ഥരുമായി അടിയന്തര യോഗത്തിന് പ്രധാനമന്ത്രി നേതൃത്വം നൽകുന്നത്. യാത്രാവിലക്ക് ഭക്ഷ്യവസ്തുക്കളുടെ ദൗർലഭ്യത്തിന് മാത്രമല്ല കോവിഡ് വാക്സിൻെറ വിതരണത്തെ പോലും ബാധിക്കുമോ എന്ന ആശങ്കയിലാണ് യു.കെ ഭരണകൂടം. യാത്രാവിലക്കിനെ തുടർന്ന് ഇന്നലെ പൗണ്ടിൻെറ വില കുത്തനെ ഇടിഞ്ഞിരുന്നു. രണ്ട് ദിവസത്തേക്കാൾ കൂടുതൽ ചരക്കുനീക്കം നിലച്ചാൽ എന്ത് ചെയ്യണമെന്ന കാര്യത്തിൽ ചർച്ചകൾ ഉന്നതതലത്തിൽ പുരോഗമിക്കുകയാണ് . ഇതിനോടനുബന്ധിച്ച് സൂപ്പർ മാർക്കറ്റുകളിൽ എത്രത്തോളം ഭക്ഷ്യ വസ്തുക്കൾ ഉണ്ട് എന്നതിൻെറ കണക്കുകൾ ഗവൺമെന്റിൻെറ ഭാഗത്ത് നിന്ന് നിരീക്ഷിക്കപ്പെടുന്നുണ്ട് എന്ന് മാധ്യമങ്ങൾ റിപ്പോർട്ട് ചെയ്തു. അവശ്യമെങ്കിൽ ഫൈസർ വാക്‌സിനുകൾ ബെൽജിയത്തിൽ നിന്ന് സൈനിക വിമാനത്തിൽ കൊണ്ടുവരാനുള്ള ആലോചനകളും പുരോഗമിക്കുന്നുണ്ട്.

നവംബറിൽ ആരംഭിച്ച് ഡിസംബർ 2 -ന് അവസാനിച്ച ലോക്ക്ഡൗണോടെ വൈറസ് വ്യാപനത്തെ പിടിച്ചുനിർത്താം എന്നായിരുന്നു ഗവൺമെന്റിൻെറയും ആരോഗ്യ വിദഗ്ധരുടെയും പ്രത്യാശ. അതിൻറെ അടിസ്ഥാനത്തിലാണ് ഗവൺമെൻറ് 5 ദിവസത്തെ ക്രിസ്മസ് കാല ഇളവുകളുമായി മുന്നോട്ടു പോയത്. എന്നാൽ യുകെയിലെ സ്ഥിതി അനുദിനം വഷളായി കൊണ്ടിരിക്കുകയാണ്. കൊറോണ വൈറസിൻെറ പുതിയ വകഭേദം കൂടുതൽ വേഗത്തിൽ വ്യാപിക്കുന്നതും അപകടകരവുമാണെന്ന വെളിപ്പെടുത്തലുകൾക്ക് പുറമെ പലസ്ഥലങ്ങളിലും ടയർ 4 നിയന്ത്രണങ്ങൾ ഏർപ്പെടുത്താൻ ഗവൺമെൻറ് നിർബന്ധമാക്കപ്പെട്ടിരിക്കുകയാണ്. ഇതിനെ തുടർന്നാണ് യൂറോപ്യൻ രാജ്യങ്ങൾക്ക് പിന്നാലെ ഇന്ത്യയും യുകെയിൽ നിന്നും തിരിച്ചുമുള്ള എല്ലാ വിമാന സർവീസുകളും നിർത്തിവയ്ക്കാൻ തീരുമാനിച്ചത്. യാത്രാവിലക്കിനെ തുടർന്ന് ലണ്ടനിൽ നിന്ന് എയർഇന്ത്യയുടെ സർവീസ് ഉപയോഗിച്ച് നാട്ടിൽ പോകാനുള്ള പരിമിതമായ അവസരങ്ങൾ നഷ്ടപ്പെട്ട ആശങ്കയിലാണ് പ്രവാസി മലയാളികൾ.

ന്യൂസ് ഡെസ്ക് , മലയാളം യുകെ

ലണ്ടൻ : വാക്സിൻ കണ്ടെത്തിയതിലൂടെ മനുഷ്യരാശിയുടെ മുന്നോട്ടുള്ള പ്രയാണം എളുപ്പമാകുമെന്ന ആത്മവിശ്വാസത്തിലാണ് ലോകജനത. എന്നാൽ ഇതിനിടയിലാണ്​ ലോകത്തെ വീണ്ടും ഭീതിയിലാക്കി ബ്രിട്ടനിൽ ജനിതകമാറ്റം സംഭവിച്ച കോവിഡ് പടർന്നുപിടിക്കുന്നത്. നിലവിലെ വൈറസിനെ അപേക്ഷിച്ച്​ (ഡി-614) വളരെവേഗം വ്യാപിക്കാനുള്ള ശേഷി പുതിയതിന്​ (ജി-614) ഉണ്ടെന്നാണ്​ വിലയിരുത്തൽ. മുൻ വൈറസിനെക്കാൾ 70 ശതമാനം വേഗത്തിലാണ് പുതിയത് വ്യാപിക്കുന്നത്. ഇതോടെ മുൻകരുതൽ നടപടിയെന്ന നിലയിൽ പല രാജ്യങ്ങളും ബ്രിട്ടനിലേക്കുള്ള വിമാന സർവീസ് അനിശ്ചിതമായി നിർത്തിവെച്ചു. വകഭേദം വന്ന കൊറോണയിൽ നിന്നുള്ള കേസുകൾ കണ്ടെത്തിയതിനെ തുടർന്ന് സ്വീഡൻ ഡെൻമാർക്കിൽ നിന്നുള്ള വിദേശ യാത്രക്കാരെ വിലക്കി. പുതിയ സ്‌ട്രെയിനുകൾ മഹാമാരിയുടെ പരിണാമത്തിന്റെ ഒരു സാധാരണ ഭാഗമാണെന്നും ഇത് നിയന്ത്രണാതീതമല്ലെന്നും ലോകാരോഗ്യ സംഘടനയുടെ അത്യാഹിത വിഭാഗം മേധാവി മൈക്ക് റയാൻ പറഞ്ഞു.

യുകെയിൽ നിന്നുള്ള യാത്രക്കാർക്കും ചരക്കുനീക്കത്തിനും ഫ്രാൻസ് വിലക്ക് ഏർപ്പെടുത്തി. വ്യാപാരം പുനരാരംഭിക്കാൻ ഫ്രഞ്ച് പ്രസിഡന്റ് ഇമ്മാനുവൽ മാക്രോണിനൊപ്പം പ്രവർത്തിക്കുകയാണെന്നും പ്രശ്‌നം എത്രയും വേഗം പരിഹരിക്കപ്പെടുമെന്ന് പ്രതീക്ഷിക്കുന്നതായും യുകെ പ്രധാനമന്ത്രി ബോറിസ് ജോൺസൺ പറഞ്ഞു. ഫ്രാൻസ് ബ്രിട്ടനുമായുള്ള അതിർത്തി 48 മണിക്കൂർ അടച്ചതിനെത്തുടർന്ന് ആയിരക്കണക്കിനു ട്രക്കുകൾ വഴിയിൽ കുടുങ്ങികിടന്നു. ചരക്കുനീക്കം നിലച്ചതുമൂലം ഭക്ഷ്യക്ഷാമം ഉണ്ടാകാതിരിക്കാനുള്ള നടപടികൾക്കായി പ്രധാനമന്ത്രി ബോറിസ് ജോൺസൺ അടിയന്തര യോഗം വിളിച്ചു. അതേസമയം യൂറോപ്യൻ യൂണിയന്റെ മെഡിസിൻ റെഗുലേറ്റർ ഫൈസർ-ബയോൺടെക് കൊറോണ വൈറസ് വാക്സിൻ അംഗീകരിച്ചു. ഇന്ത്യ മുതൽ ഇറാൻ , കാനഡ വരെയുള്ള മറ്റു പല രാജ്യങ്ങളും യുകെയിൽ നിന്നുള്ള യാത്ര നിരോധിച്ചിട്ടുണ്ട്.

യുഎസ് ഇതുവരെയും ഈ തീരുമാനം കൈക്കൊണ്ടിട്ടില്ല. എന്നാൽ ബ്രിട്ടീഷ് എയർവേയ്‌സ്, ഡെൽറ്റ എന്നീ രണ്ട് എയർലൈനുകൾ വൈറസ് ടെസ്റ്റ് നടത്തി നെഗറ്റീവ് ആകുന്ന യാത്രക്കാരെ മാത്രമേ ന്യൂയോർക്കിലെ ജോൺ എഫ് കെന്നഡി വിമാനത്താവളത്തിലേക്ക് പറക്കാൻ അനുവദിക്കൂ. സൗദി അറേബ്യ , കുവൈറ്റ് , ഒമാൻ എന്നീ രാജ്യങ്ങൾ അതിർത്തികൾ പൂർണ്ണമായും അടച്ചു യാത്രാവിലക്ക് ഏർപ്പെടുത്തി. ഡെൻമാർക്കിനൊപ്പം ഓസ്‌ട്രേലിയ, ഇറ്റലി, നെതർലാൻഡ്‌സ് എന്നിവിടങ്ങളിലും ജനിതകമാറ്റം സംഭവിച്ച വൈറസ് കണ്ടെത്തിയിട്ടുണ്ട്. “വരും ദിവസങ്ങളിൽ മറ്റ് പല രാജ്യങ്ങളും ഇത് കണ്ടെത്തുമെന്ന് ഞങ്ങൾ കരുതുന്നു.” ബെൽജിയത്തിലെ റെഗ ഇൻസ്റ്റിറ്റ്യൂട്ട് ഫോർ മെഡിക്കൽ റിസർച്ചിലെ വൈറോളജിസ്റ്റ് മാർക്ക് വാൻ റാൻസ്റ്റ് മുന്നറിയിപ്പ് നൽകി.

സ്വന്തം ലേഖകൻ

ഗവൺമെന്റിന്റെ ‘റൂൾ ഓഫ് സിക്സ്’ നിയമം തെറ്റിച്ചതിന് രാജകുടുംബത്തിലെ കേംബ്രിഡ്ജസിനും വെസെക്സിനും രൂക്ഷവിമർശനം. വില്യത്തിന്റെയും കേറ്റിന്റെയും മൂന്നു കുട്ടികളും എഡ്വേഡ് സോഫി രാജദമ്പതിമാരും രണ്ടു കുട്ടികളും സൻഡിംഗ്ഗ്രാമിലെ ക്രിസ്മസ് തീമിലുള്ള ലൂമിനേറ്റ് വുഡ് ലാൻഡിൽ ഒരേ സമയത്ത് വൈകുന്നേരം ആസ്വദിക്കാൻ എത്തിയിരുന്നു. ഇരുകുടുംബങ്ങളും ഇടവേളകളിൽ ഇടകലർന്ന് നടക്കുന്നതും കൈകൾ കോർത്തു പിടിക്കുന്നതുമായ ചിത്രങ്ങൾ പുറത്തുവന്നിട്ടുണ്ട്. പ്രിൻസ് ജോർജ്(7) പ്രിൻസസ് ചാർലറ്റ് (5) പ്രിൻസ് ലൂയിസ്(2), മാതാപിതാക്കൾക്കും അങ്കിളിനും ആന്റിക്കും, മക്കളായ ലേഡി ലൂയിസ് വിൻസർ (17) ജെയിംസ് വിസ്കൗണ്ട് സെവേൺ (13) എന്നിവർക്കും ഒപ്പം പൊതു സ്ഥലത്ത് സമയം ചെലവഴിച്ചത് പൊതുജന ശ്രദ്ധ ആകർഷിച്ചു.

ഞായറാഴ്ച വൈകുന്നേരം രാജ്ഞിയുടെ നോർഫോക് റസിഡൻസിന് സമീപം പൊതു ജനങ്ങൾക്കൊപ്പം ആണ്, നടക്കാൻ ഇറങ്ങിയത്. ഇരുകുടുംബങ്ങളും ഒരുമിച്ചല്ല എത്തിച്ചേർന്നത് എന്നും, ഒമ്പത് പേരടങ്ങുന്ന ഒരു പാർട്ടിയായി കറങ്ങി നടക്കാൻ ഉദ്ദേശിച്ചിരുന്നില്ലെന്നും ഔദ്യോഗിക വൃത്തങ്ങൾ അറിയിച്ചു. എന്നാൽ ഒരു മൈലോളം നീളമുള്ള ഒറ്റ വരി പാതയിൽ ഇരുകുടുംബങ്ങളും പലസ്ഥലത്തും ഒരുമിക്കുന്നതും സംസാരിക്കുന്നതും കൈകോർത്തു നടക്കുന്നതും കാണാമായിരുന്നു. ടയർ 2 നിയമപ്രകാരം വ്യത്യസ്ത കുടുംബങ്ങളിൽ നിന്നുള്ള ആറ് പേരിൽ കൂടുതൽ പരസ്പരം സന്ദർശനം നടത്താൻ പാടില്ല, അല്ലെങ്കിൽ അവർ ഒരേ വീട്ടിൽ നിന്നുള്ളവരോ, ഒരേ സപ്പോർട്ട് ബബിളിൽ നിന്നുള്ളവരോ ആയിരിക്കണം. കുട്ടികൾ ഉൾപ്പെടെ ആറ് പേർക്കുമാത്രമാണ് പുറത്ത് കണ്ടുമുട്ടാനുള്ള അവസരം. നിയമം തെറ്റിക്കുന്നവർക്ക് 200 പൗണ്ട് പെനാൽറ്റിയുണ്ട്, വീണ്ടും നിയമം തെറ്റിക്കുന്നതായി ശ്രദ്ധയിൽപ്പെട്ടാൽ പിഴ 64,00 പൗണ്ട് വരെ വർദ്ധിക്കാം.

9 അംഗങ്ങളടങ്ങിയ ഇരുകുടുംബങ്ങളും വൈകുന്നേരം ആസ്വദിക്കുന്നതിന്റെ ചിത്രങ്ങൾ പകർത്തിയ വ്യക്തി രാജകുടുംബത്തിന്റെ അശ്രദ്ധയിൽ കടുത്ത അമർഷം രേഖപ്പെടുത്തി. “രാജകുടുംബത്തിലെ കുട്ടികളുൾപ്പെടെ പുറത്ത് സമയം ചെലവഴിച്ചത് അവർക്ക് അങ്ങേയറ്റം സന്തോഷം നൽകി എന്ന് വിശ്വസിക്കുന്നു, എന്നാൽ പൊതുജനങ്ങൾ മാതൃകയാക്കുന്ന ഒരു കുടുംബപശ്ചാത്തലത്തിൽ നിന്നുള്ളവർ ഇത്തരത്തിൽ അശ്രദ്ധമായി പെരുമാറാൻ പാടില്ലായിരുന്നു” എന്നും ” അംഗരക്ഷകരോടൊപ്പമെത്തിയ കുടുംബം കോവിഡ് നിയമങ്ങൾ പ്രത്യക്ഷമായി ലംഘിക്കുകയായിരുന്നു എന്നും വുഡ് ലാൻഡിൽ ഉണ്ടായിരുന്ന വ്യക്തി അഭിപ്രായപ്പെട്ടു.

അതേസമയം ഇരുകുടുംബങ്ങളും വ്യത്യസ്ത സമയങ്ങളിൽ ആണ് എത്തിച്ചേർന്നത് എന്നും നിയമം ലംഘിക്കാൻ ഒരു വിധത്തിലും ഉദ്ദേശിച്ചിരുന്നില്ലെന്നുമാണ് ഔദ്യോഗിക വൃത്തങ്ങൾ സംഭവത്തോട് പ്രതികരിച്ചത്.

ന്യൂസ് ഡെസ്ക് , മലയാളം യുകെ

കൊറോണ വൈറസിൻെറ പുതിയ വകഭേദം യുകെയിൽ കണ്ടെത്തിയതിനെതുടർന്ന് യൂറോപ്യൻ രാജ്യങ്ങൾക്ക് പിന്നാലെ ഇന്ത്യയും യുകെയിൽ നിന്നും തിരിച്ചുമുള്ള എല്ലാ വിമാന സർവീസുകളും നിർത്തിവയ്ക്കാൻ തീരുമാനിച്ചു. ഡിസംബർ 22 ചൊവ്വാഴ്ച അർധരാത്രി മുതൽ ഡിസംബർ 31 അർധരാത്രി വരെയാണ് യുകെയിൽ നിന്നും തിരിച്ചുമുള്ള യാത്രയ്ക്ക് ഇന്ത്യ വിലക്ക് ഏർപ്പെടുത്തിയിരിക്കുന്നത്. അതോടൊപ്പം തന്നെ ചൊവ്വാഴ്ച അർദ്ധരാത്രിയ്ക്ക് മുമ്പായി യുകെയിൽ നിന്നെത്തുന്ന എല്ലാ യാത്രക്കാർക്കും കർശനമായി ആര്‍ടി-പിസിആര്‍ ടെസ്റ്റിന് വിധേയരാകാനുള്ള നിർദ്ദേശം വ്യോമയാന മന്ത്രാലയം നൽകി.

പുതിയ നിർദ്ദേശം ക്രിസ്മസ് കാലത്ത് നാട്ടിൽ തങ്ങളുടെ ബന്ധുക്കളെയും പ്രിയപ്പെട്ടവരെയും കാണാൻ പോകാനിരുന്ന ഒട്ടേറെ പ്രവാസി മലയാളികളെയാണ് പ്രതികൂലമായി ബാധിച്ചിരിക്കുന്നത്. ലണ്ടനിൽ നിന്ന് കൊച്ചിയിലേയ്ക്കുള്ള എയർ ഇന്ത്യ ഫ്ലൈറ്റിൽ ഡിസംബർ 22 മുതൽ 31 വരെ ടിക്കറ്റ് ബുക്ക് ചെയ്ത ഒട്ടേറെപ്പേരുടെ യാത്ര അനിശ്ചിതത്വത്തിലായി. കൂടാതെ യാത്രാവിലക്ക് ഡിസംബർ 31ന് ശേഷവും തുടരുമോ എന്ന ആശങ്കയും ഉടലെടുത്തിട്ടുണ്ട്.

പുതിയ കൊറോണ വൈറസ് വകഭേദം കൂടുതൽ വേഗത്തിൽ വ്യാപിക്കുന്നതും അപകടകാരിയാണെന്നും ആരോഗ്യ സെക്രട്ടറി മാറ്റ് ഹാൻകോക്ക് വെളിപ്പെടുത്തിയിരുന്നു. ഇറ്റലി, ജർമനി, നെതർലാൻഡ് ,ഓസ്ട്രേലിയ ഉൾപ്പെടെയുള്ള പലരാജ്യങ്ങളും യുകെയിലേക്ക് ഉള്ള എല്ലാ വിമാന സർവീസുകളും നിർത്തിവയ്ക്കാൻ നേരത്തെ തീരുമാനിച്ചിരുന്നു. .

ന്യൂസ് ഡെസ്ക് , മലയാളം യുകെ

ലണ്ടൻ : കോവിഡ് ബാധിതരായ ഏതാനും സ്ത്രീകളുടെ അനുഭവത്തിൽ നിന്നാണ് രോഗം ആർത്തവത്തെയും ബാധിക്കുമെന്ന റിപ്പോർട്ടുകൾ കടന്നുവരുന്നത്. തായ്‌ലൻഡിൽ അവധിക്കാലം ആഘോഷിച്ചശേഷം തിരിച്ചെത്തിയ 46കാരിയായ ഡോൺ നൈറ്റിന് കോവിഡ് ലക്ഷണങ്ങൾ കാണപ്പെട്ടുതുടങ്ങി. എന്നാൽ അസുഖം ബാധിച്ച് ഏതാനും ആഴ്ചകൾക്കുള്ളിൽ തന്നെ ആർത്തവം തെറ്റുന്നതായി കാണപ്പെട്ടു. ‘എന്റെ കോവിഡ് ലക്ഷണങ്ങൾ വളരെ ഭയാനകമായിരുന്നു. മാസങ്ങളോളം അത് തുടർന്നു. സോഫയിൽ നിന്ന് മാറാൻ എനിക്ക് കഴിയാതെയായി.” സോമർസെറ്റിലെ മാനസികാരോഗ്യ നേഴ്‌സ് കൂടിയായ ഡോൺ വെളിപ്പെടുത്തി. മാസങ്ങൾ പിന്നിട്ടപ്പോൾ തനിക്ക് ലോങ്ങ്‌ കോവിഡ് എന്ന അവസ്ഥ ഉണ്ടായതായി അവൾ പറഞ്ഞു. ഇത് എന്തുകൊണ്ടെന്ന് ഗവേഷകർക്ക് പൂർണ്ണമായും അറിയില്ലെങ്കിലും 20 പേരിൽ ഒരാളെ, പ്രത്യേകിച്ച് സ്ത്രീകളെ ലോങ്ങ്‌ കോവിഡ് ബാധിക്കുമെന്ന് കരുതപ്പെടുന്നു.

ജൂൺ മാസത്തിൽ, ഡോൺ ഡോക്ടറെ സന്ദർശിക്കുകയുണ്ടായി. എന്നാൽ പുറത്തുവന്ന രക്തപരിശോധനാ ഫലങ്ങൾ അമ്പരപ്പിക്കുന്നതായിരുന്നു. അവളുടെ പ്രത്യുൽപാദന ഹോർമോണുകളായ ഈസ്ട്രജൻ, പ്രോജസ്റ്ററോൺ, ഫോളിക്കിൾ-സ്റ്റിമുലേറ്റിംഗ് ഹോർമോൺ (എഫ്എസ്എച്ച്) എന്നിവ ആർത്തവവിരാമത്തിനു ശേഷമുള്ള തലത്തിലാണ്. അതോടെ അവളിൽ ആർത്തവവിരാമം ഉണ്ടായിക്കഴിഞ്ഞതായി ഡോക്ടർ അറിയിച്ചു. യുകെയിൽ ആർത്തവവിരാമം സംഭവിക്കുന്ന ശരാശരി പ്രായം 51 ആണ്. സ്ത്രീകളില്‍ പൂർണമായും ആർത്തവം അവസാനിക്കുന്ന അവസ്ഥയാണ് ആർത്തവ വിരാമം (Menopause). ഒരു സ്ത്രീ ശാരീരികമായും മാനസികമായും വളരെയധികം പ്രയാസങ്ങള്‍ അനുഭവിക്കുന്ന കാലം കൂടിയാണ് ഈ സമയം. ശരാശരി 45 മുതൽ 55 വയസ്സുവരെയാണ് ആർത്തവവിരാമം സംഭവിക്കുന്നത്.

എന്നാൽ കോവിഡ് രോഗം പെട്ടെന്നുള്ള ആർത്തവവിരാമത്തിന് കാരണമായെന്ന് പല സ്ത്രീകളും റിപ്പോർട്ട്‌ ചെയ്തിട്ടുണ്ട്. സമാന അനുഭവങ്ങൾ റിപ്പോർട്ട് ചെയ്തുകൊണ്ട് നൂറുകണക്കിന് സ്ത്രീകളാണ് സാമൂഹ്യ മാധ്യമങ്ങളിൽ എത്തിയത്. നൂറിലധികം അംഗങ്ങൾക്കിടയിൽ നടന്ന വോട്ടെടുപ്പിൽ 80 ശതമാനം പേരും കോവിഡ് ബാധിച്ചതിനുശേഷം തങ്ങളുടെ ആർത്തവം തെറ്റിയതായി അറിയിച്ചു. ഇത്തരം അനുഭവങ്ങൾ ഡോക്ടർമാരെ പുതിയ പഠനത്തിലേക്കാണ് നയിക്കുന്നത്. സ്ട്രാറ്റ്‌ഫോർഡ്-ഓൺ-അവോണിൽ ഒരു സ്വകാര്യ ക്ലിനിക് നടത്തുന്ന ജിപിയും മേനോപോസ് വിദഗ്ധനുമായ ഡോ. ലൂയിസ് ന്യൂസൺ, എഡിൻബർഗ് സർവകലാശാലയിലെയും ലണ്ടൻ യൂണിവേഴ്‌സിറ്റി കോളജിലെയും വിദഗ്ധരുമായി ചേർന്ന് കോവിഡ് രോഗം, നേരത്തെയുള്ള ആർത്തവവിരാമത്തിന് കാരണമാകുമോ എന്ന് അന്വേഷിക്കുന്നുണ്ട്.

അമ്മു മറിയം തോമസ്, മലയാളം യുകെ ന്യൂസ് ടീം

കൊറോണാ വൈറസിൻെറ പുതിയ വകഭേദം കൂടുതൽ വേഗത്തിൽ വ്യാപിക്കുന്നത് അപകടകരമാണെന്ന കണ്ടെത്തൽ കടുത്ത ആശങ്കയാണ് ഉളവാക്കിയിരിക്കുന്നത്. പുതിയ കൊറോണ വൈറസ് വകഭേദം കൂടുതൽ വേഗത്തിൽ വ്യാപിക്കുന്നതും അപകടകാരിയാണെന്നും ആരോഗ്യ സെക്രട്ടറി മാറ്റ് ഹാൻകോക്ക് വെളിപ്പെടുത്തി . പലരാജ്യങ്ങളും മുൻകരുതൽ എന്ന രീതിയിൽ യുകെയിൽ നിന്ന് യാത്രാവിലക്ക് ഏർപ്പെടുത്തി. ഇറ്റലി, ജർമനി, നെതർലാൻഡ് ,ഓസ്ട്രേലിയ തുടങ്ങിയ രാജ്യങ്ങൾ യുകെയിലേക്ക് ഉള്ള എല്ലാ വിമാന സർവീസുകളും നിർത്തിവയ്ക്കാൻ തീരുമാനിച്ചു. ഇന്ന് നടത്തപ്പെടുന്ന യൂറോപ്യൻ യൂണിയൻ രാജ്യങ്ങളുടെ സംയുക്ത യോഗത്തിന് ശേഷം കൂടുതൽ നടപടികൾ ഉണ്ടാകാനാണ് സാധ്യത.

ലോകത്തിലെ ഏറ്റവും തിരക്കേറിയ യാത്ര തുറമുഖങ്ങളിൽ ഒന്നായ പോർട്ട് ഓഫ് ഡോവർ അടുത്ത 48 മണിക്കൂർ നേരത്തേയ്ക്ക് അടച്ചിടാൻ തീരുമാനമായി. ഫ്രാൻസിനോട് ഏറ്റവും അടുത്തായി 21 മൈൽ മാത്രം അകലെയാണ് പോർട്ട് ഓഫ് ഡോവർ. അതുപോലെതന്നെ യുകെയിൽ നിന്നുള്ള എല്ലാവിധ ചരക്ക് നീക്കങ്ങളും നിർത്തിവയ്ക്കാൻ ഫ്രാൻസ് അടിയന്തരമായി നടപടികൾ ആരംഭിച്ചു.

നെതർലൻഡ് ജനുവരി ഒന്നു വരെ ബ്രിട്ടനിൽ നിന്നുള്ള വിമാനയാത്രയ്ക്ക് വിലക്കേർപ്പെടുത്തി. ബ്രിട്ടനിൽ കണ്ടെത്തിയതിന് സമാനമായ വൈറസ് കണ്ടെത്തിയതിനെത്തുടർന്നാണ് നെതർലൻഡ് യാത്രാ വിലക്ക് ഏർപ്പെടുത്താൻ തീരുമാനിച്ചത്. ഞായറാഴ്ച അർധരാത്രി മുതൽ 24 മണിക്കൂർ നേരത്തേയ്ക്ക് ബെൽജിയത്തിൽ നിന്നുള്ള യാത്രാവിലക്ക് ആരംഭിച്ചു കഴിഞ്ഞു.

ന്യൂസ് ഡെസ്ക് , മലയാളം യുകെ

യു കെ :- മക്കളും മരുമക്കളും മൂന്നുതവണ അന്ത്യയാത്രാമൊഴി നൽകിയ കോവിഡ് രോഗി 222 ദിവസത്തിനുശേഷം ജീവിതത്തിലേക്ക് മടങ്ങി വന്നിരിക്കുകയാണ്. അലി സകാലി ഓഗ്‌ലൂ എന്ന അമ്പത്തിയേഴുകാരനാണ് അത്ഭുതകരമായി തന്റെ ജീവിതത്തിലേക്ക് മടങ്ങി വന്നിരിക്കുന്നത്. ഇദ്ദേഹത്തിന്റെ വെന്റിലേറ്റർ സംവിധാനം മാറ്റുന്നതിന് ബന്ധുക്കൾ എപ്പോഴും നിരാകരിച്ചിരുന്നു. ജീവൻ പിടിച്ച് നിർത്താനുള്ള അവസാനശ്രമമെന്ന നിലയിൽ അലി സകാലിയെ കമഴ്ത്തി കിടത്തി ചികത്സ നൽകാനുള്ള ഡോക്ടർമാരോടുള്ള ബന്ധുക്കളുടെ അഭ്യർത്‌ഥന ഫലം കണ്ടു.

ക്രിസ്മസ് കാലത്ത്‌, അലിയുടെ ബന്ധുക്കൾക്ക് ലഭിച്ച ഏറ്റവും വലിയ സമ്മാനമാണ് അദ്ദേഹത്തിന്റെ രോഗസൗഖ്യം. അദ്ദേഹത്തിന്റെ രോഗസൗഖ്യം എൻ എച്ച് എസിലെ ഡോക്ടർമാരുടെയും നഴ്സുമാരുടെയും അതുല്യമായ സേവനത്തിൻെറ അനന്തരഫലമാണ് ബന്ധുക്കൾ എല്ലാവരും സാക്ഷീകരിച്ചു. ടാക്സി ഡ്രൈവറായ അലിയെ ഹാർട്ടറ്റാക്ക് വന്നതിനെ തുടർന്നാണ് ആശുപത്രിയിൽ പ്രവേശിപ്പിച്ചത്. ഇദ്ദേഹത്തിന് മരണം സംഭവിക്കുമെന്ന് മൂന്ന് പ്രാവശ്യം കുടുംബാംഗങ്ങളെ വിവരമറിയിച്ചെങ്കിലും, എല്ലാം തരണം ചെയ്ത് അദ്ദേഹം ജീവിതത്തിലേക്ക് തിരിച്ചെത്തിയിരിക്കുകയാണ്.

രോഗസൗഖ്യം നേടിയ അദ്ദേഹം ജനങ്ങളോട് ജാഗ്രത പാലിക്കാൻ ഉള്ള നിർദ്ദേശം കർശനമായി പാലിക്കണമെന്ന് അഭ്യർത്ഥിച്ചിട്ടുണ്ട്. പ്രതിരോധകുത്തിവയ്പ് എടുക്കാനുള്ള കാത്തിരിപ്പിലാണ് അലി. രോഗഭയം ഇല്ലാതെ പഴയതുപോലെ തൻറെ ജോലിയുമായി മുന്നോട്ടു പോകുവാൻ വാക്സിനേഷൻ മൂലം സാധിക്കുമല്ലോ എന്ന് അദ്ദേഹം കൂട്ടിച്ചേർത്തു.

ഏപ്രിലിലാണ് ഇദ്ദേഹം രോഗബാധിതനായത്. തുടക്ക നാളിൽ ആഴ്ചയോളം കോമയിൽ ആയിരുന്നു അലി. എൻഎച്ച്എസ് ഡോക്ടർമാരുടെയും നഴ്സുമാരുടെയും സേവനം ബ്രിട്ടണിൽ വളരെ വലുതാണെന്ന് അദ്ദേഹം സാക്ഷ്യപ്പെടുത്തി. ഇന്ത്യ, അമേരിക്ക തുടങ്ങിയ മറ്റു രാജ്യങ്ങളിൽ നിന്ന് ഉപരിയായി ആരോഗ്യരംഗത്ത് എൻഎച്ച്എസ് ബ്രിട്ടണിൽ നടത്തുന്ന സേവനങ്ങൾ വിലപ്പെട്ടതാണ്. കോവിഡ് രോഗത്തെ അതിജീവിക്കുവാൻ അവരുടെ പ്രവർത്തനങ്ങൾ അത്യന്താപേക്ഷിതമാണെന്ന് പ്രധാനമന്ത്രി ബോറിസ് ജോൺസൺ കഴിഞ്ഞദിവസം പ്രസ്താവിച്ചിരുന്നു. അലിയുടെ രോഗസൗഖ്യം ബ്രിട്ടന്റെ ആരോഗ്യരംഗത്തിന്റെ മികവാണ് വെളിവാക്കുന്നത്.

ന്യൂസ് ഡെസ്ക് , മലയാളം യുകെ

യു കെ :- ലണ്ടനിലും, തെക്കു കിഴക്കൻ പ്രവിശ്യയിലും നാലാം ഘട്ട ലോക്ക്ഡൗൺ നിബന്ധനങ്ങൾ ഏർപ്പെടുത്തി പ്രധാനമന്ത്രി ബോറിസ് ജോൺസൺ. 18 മില്യനോളം ആളുകൾക്ക് ക്രിസ്മസ് ആഘോഷിക്കാൻ ഉള്ള അവസരം ഇതോടെ നഷ്ടമാകും. യാത്രകളും, കുടുംബങ്ങൾ തമ്മിലുള്ള ഒത്തുചേരലും ഈ ഘട്ടത്തിൽ അനുവദനീയമല്ല. തന്റെ ക്രിസ്മസ് ഈ ജനങ്ങൾക്ക് വേണ്ടി ഉപേക്ഷിക്കുകയാണെന്ന് പ്രധാനമന്ത്രിയും അറിയിച്ചു. ജനിതകമാറ്റം സംഭവിച്ച പുതിയ തരത്തിലുള്ള കൊറോണവൈറസ് ലണ്ടനിലും മറ്റും വ്യാപിക്കുന്നതിനെ തുടർന്നാണ് ഇത്തരത്തിലുള്ള കർശന നിയമങ്ങൾ ഏർപ്പെടുത്തിയത്. ജനങ്ങൾ സാഹചര്യത്തെ മനസ്സിലാക്കണം എന്ന് പ്രധാനമന്ത്രി അഭ്യർഥിച്ചു.

കുടുംബാംഗങ്ങളുടെ സുരക്ഷയ്ക്കായാണ് അവരെ സന്ദർശിക്കുന്നത് നാം ഒഴിവാക്കുന്നതെന്നു ജനങ്ങൾ മനസ്സിലാക്കണമെന്നും പ്രധാനമന്ത്രി അറിയിച്ചു. സ്കോട്ട്‌ലൻഡിലും ലോക്ക്ഡൗൺ നിബന്ധനകൾ കർശനമാക്കിയിരിക്കുകയാണ്. സ്കോട്ട്ലൻഡിൽ നിന്നും യുകെയുടെ മറ്റു ഭാഗങ്ങളിലേക്കുള്ള യാത്ര നിരോധിച്ചിട്ടുണ്ട്. വെയിൽസിലും ഇന്നുമുതൽ ലോക്ക്ഡൗൺ ഏർപ്പെടുത്താനുള്ള തീരുമാനങ്ങൾ കൈക്കൊണ്ടിട്ടുണ്ട്. എന്നാൽ നോർത്തേൺ അയർലൻഡിൽ ഡിസംബർ 26ന് ശേഷം മാത്രമേ ലോക്ക്ഡൗൺ ഏർപ്പെടുത്തുകയുള്ളൂ എന്ന് അധികൃതർ അറിയിച്ചു.

മറ്റൊരു വഴിയും മുന്നിൽ ഇല്ലാത്തതിനാലാണ് ക്രിസ്മസ് കാലത്ത് ഇത്തരത്തിലൊരു തീരുമാനം കൈക്കൊണ്ടതെന്ന് പ്രധാനമന്ത്രി അറിയിച്ചു. ജനിതക മാറ്റം സംഭവിച്ച കൊറോണ വൈറസ് കൂടുതൽ പ്രശ്നമുണ്ടാക്കും എന്നാണ് ശാസ്ത്രജ്ഞരും വിലയിരുത്തുന്നത്. സർക്കാർ എടുത്ത തീരുമാനത്തോട് ജനങ്ങൾ എല്ലാവരും സഹകരിക്കണമെന്ന ആവശ്യം പ്രധാനമന്ത്രി ഓർമിപ്പിച്ചിട്ടുണ്ട്. സാഹചര്യങ്ങൾ മോശമാണെങ്കിലും, വാക്സിൻ ഒരു പരിധിവരെ സാഹചര്യങ്ങളെ നേരെ ആക്കുമെന്ന് പ്രതീക്ഷിക്കുന്നതായി ഇംഗ്ലണ്ട് മെഡിക്കൽ ഓഫീസർ പ്രൊഫസർ ക്രിസ് വിറ്റി രേഖപ്പെടുത്തി. ജനിതക മാറ്റം സംഭവിച്ച് പുതിയ വേറെ 70 ശതമാനത്തോളം കൂടുതൽ രോഗബാധ ഉണ്ടാക്കുന്നതായി ശാസ്ത്രജ്ഞർ കണ്ടെത്തിയിട്ടുണ്ട്. അത്തരമൊരു സാഹചര്യത്തിൽ ജനങ്ങളുടെ സുരക്ഷ മുൻനിർത്തിയാണ് ഇത്തരത്തിലൊരു തീരുമാനം സർക്കാർ കൈക്കൊണ്ടത്.

ന്യൂസ് ഡെസ്ക് , മലയാളം യുകെ

യുകെയിൽ ചില സ്ഥലങ്ങളിൽ കൊറോണ വൈറസിൻെറ പുതിയ വകഭേദത്തെ കണ്ടെത്തി. ആരോഗ്യ സെക്രട്ടറി മാറ്റ് ഹാൻകോക്ക് ആണ് ഇത് സംബന്ധിച്ച് ആദ്യം പ്രസ്താവന നടത്തിയത്. രാജ്യത്ത് അതിവേഗം പടരുന്ന പുതിയതരം കൊറോണ വൈറസുണ്ടെന്ന് ഇംഗ്ലണ്ടിലെ ചീഫ് മെഡിക്കൽ ഓഫിസർ ക്രിസ് വിറ്റിയും വെളിപ്പെടുത്തിയിരുക്കുകയാണ് .

യുകെയിൽ ഉടനീളം കർശന നിയന്ത്രണങ്ങളുമായി കൊറോണ വൈറസ് വ്യാപനം തടയാൻ നടത്തുന്ന ശ്രമങ്ങൾക്കിടയിൽ പുതിയ വൈറസ് വകഭേദത്തെ കണ്ടെത്തിയത്. നിലവിലെ വാക്സിൻ പുതിയ ജനിതകം രൂപമാറ്റം വന്ന വൈറസിനെ പ്രതിരോധിക്കുമോ എന്ന ചോദ്യത്തിന് ഉത്തരം കണ്ടെത്തേണ്ടതുണ്ട്. ഇപ്പോൾ കോവിഡ് -19 സ്ഥിരീകരിക്കാനായി നടത്തുന്ന സ്വാപ്പ് ടെസ്റ്റിന് ജനിതകമാറ്റം വന്ന വൈറസ് ബാധയെയും തിരിച്ചറിയാനുള്ള ശേഷിയുണ്ടെന്ന് ഇംഗ്ലണ്ട് ചീഫ് മെഡിക്കൽ ഓഫീസർ പ്രൊഫസർ ക്രിസ് വിറ്റി പറഞ്ഞു.

ഇംഗ്ലണ്ടിൻെറ ചില ഭാഗങ്ങളിൽ പുതിയ വൈറസിന്റെ വ്യാപനം നടക്കുന്നതായുള്ള വാർത്തകൾ ആരോഗ്യ വിദഗ്ധരുടെ ഇടയിൽ ആശങ്ക ജനിപ്പിച്ചിരിക്കുകയാണ്‌ . പുതിയ വൈറസ് മൂലമുള്ള കേസുകൾ അറുപതോളം പ്രദേശങ്ങളിൽ നിന്ന് റിപ്പോർട്ട് ചെയ്യപ്പെട്ടു കഴിഞ്ഞു. വൈറസിൻെറ പുതിയ വകഭേദത്തെ കണ്ടെത്തിയതിനെ കുറിച്ച് ലോകാരോഗ്യസംഘടനയെ വിവരം അറിയിച്ചിട്ടുണ്ടെന്ന് ഹെൽത്ത് സെക്രട്ടറി മാറ്റ് ഹാൻകോക്ക് പറഞ്ഞു.