ന്യൂസ് ഡെസ്ക്, മലയാളം യുകെ

കോട്ടയം: യുകെയിൽ ഉപരിപഠനത്തിന് പോകാനുള്ള തയ്യാറെടുപ്പിലായിരുന്ന കൃപ മെറിൻ കുര്യന്റെ അപ്രതീക്ഷിത വിയോഗം നാടിനെയും കുടുംബാംഗങ്ങളെയും കണ്ണീരിലാഴ്ത്തി. പാമ്പാടി പതിമൂന്നാം മൈലിൽ ബസും സ്കൂട്ടറും കൂട്ടിയിടിച്ചുണ്ടായ അപകടത്തിൽ കൃപ മെറിൻ കുര്യനും സുഹൃത്ത് ആഷ്‌ലി ആൻ തോമസും മരിച്ചു. പാമ്പാടി പൊത്തൻപുറം സ്വദേശി ഫാ. കുര്യാക്കോസ് കടവുംഭാഗത്തിന്റെ മകളാണ് കൃപ മെറിൻ. മീനടം വട്ടക്കാവുങ്കൽ തോമസിന്റെ മകളാണ് ആഷ്‌ലി ആൻ തോമസ് (25).

ബുധനാഴ്ച രാവിലെ ഒൻപതോടെ ദേശീയപാത 183ലെ കെ.കെ. റോഡിൽ പതിമൂന്നാം മൈലിലായിരുന്നു അപകടം. കട്ടപ്പനയിൽനിന്ന് കോട്ടയത്തേക്ക് വരികയായിരുന്ന സ്വകാര്യ ബസിനടിയിലേക്ക് സ്കൂട്ടർ തെന്നിവീഴുകയായിരുന്നു. മുന്നിൽ സഞ്ചരിച്ചിരുന്ന കാർ പെട്ടെന്ന് ബ്രേക്ക് ചെയ്തതിനെത്തുടർന്ന് സ്കൂട്ടറിന്റെ നിയന്ത്രണം നഷ്ടപ്പെട്ടെന്നാണ് സിസിടിവി ദൃശ്യങ്ങൾ പരിശോധിച്ച പൊലീസ് നൽകുന്ന പ്രാഥമിക വിവരം. ബസിനടിയിൽപ്പെട്ട ഇരുവരും സംഭവസ്ഥലത്തുതന്നെ മരിക്കുകയായിരുന്നു.

ഓസ്‌ട്രേലിയയിൽ എം.എസ്.ഡബ്ല്യു പഠനം പൂർത്തിയാക്കിയ കൃപ രണ്ട് ദിവസം മുമ്പാണ് നാട്ടിലെത്തിയത്. തുടർന്ന് യുകെയിൽ ഉപരിപഠനം നടത്താനുള്ള ഒരുക്കങ്ങളിലായിരുന്നു. പുതിയൊരു ജീവിതത്തിനും പഠനത്തിനുമായി വിദേശത്തേക്ക് പോകാൻ തയ്യാറെടുക്കുന്നതിനിടെയാണ് ദുരന്തം സംഭവിച്ചത്. ആഷ്‌ലിയും ഉപരിപഠനത്തിനായി വിദേശത്തേക്ക് പോകാനുള്ള തയ്യാറെടുപ്പിലായിരുന്നു. ഇരുവരുടെയും ഭാവിസ്വപ്നങ്ങൾ പൂവണിയാനിരിക്കെ സംഭവിച്ച ദുരന്തം കുടുംബങ്ങൾക്കും സുഹൃത്തുക്കൾക്കും തീരാനഷ്ടമായി.

കൃപയുടെയും ആഷ്‌ലിയുടെയും നിര്യാണത്തിൽ മലയാളം യുകെ ന്യൂസിന്റെ അനുശോചനം ബന്ധുക്കളെയും സുഹൃത്തുക്കളെയും അറിയിക്കുന്നു.

ന്യൂസ് ഡെസ്ക്, മലയാളം യുകെ

ലണ്ടൻ: പഠനത്തിനായി യുകെയിലെത്തി ഒരു മാസം പിന്നിടുന്നതിനിടെ മലയാളി യുവതി അന്തരിച്ചു. കൊല്ലം റൂറൽ എസ്.പി. ഓഫീസിൽ അസിസ്റ്റന്റ് സബ് ഇൻസ്‌പെക്ടർ ആയി ജോലി ചെയ്യുന്ന
ജിനുവിൻെറ ഇളയ മകൾ നന്ദന (20) ആണ് അകാലത്തിൽ വിടപറഞ്ഞത് . യുവതിയുടെ അപ്രതീക്ഷിത വിയോഗവാർത്ത യുകെയിലെയും കേരളത്തിലെയും ബന്ധുക്കളെയും സുഹൃത്തുക്കളെയും ദുഃഖത്തിലാഴ്ത്തി.

ഒരു മാസം മുമ്പാണ് നന്ദന ഉപരിപഠനത്തിനായി യുകെയിലെത്തിത് . വിദേശത്ത് പഠനം നടത്തി ഭാവി കെട്ടിപ്പടുക്കാനുള്ള സ്വപ്നങ്ങളുമായി എത്തിയ യുവതിയുടെ അപ്രതീക്ഷിത മരണം കുടുംബത്തിന് തീരാനഷ്ടമായി. മരണകാരണം സംബന്ധിച്ച് ഔദ്യോഗിക സ്ഥിരീകരണം ലഭ്യമായിട്ടില്ല.

നന്ദനയുടെ നിര്യാണത്തിൽ മലയാളം യുകെ ന്യൂസിന്റെ അനുശോചനം ബന്ധുക്കളെയും സുഹൃത്തുക്കളെയും അറിയിക്കുന്നു.

ന്യൂസ് ഡെസ്ക്, മലയാളം യുകെ

യുകെയിലെ വാർവിക്‌ഷയറിലെ നനീട്ടനിൽ മലയാളി യുവതി ജെനി ജോളി ജോൺസൺ (35) അന്തരിച്ചു. ആലപ്പുഴ ഹരിപ്പാട് പള്ളിപ്പാട് പ്ലാന്തറയിൽ വീട്ടിൽ നിതിൻ വർഗീസിന്റെ ഭാര്യയാണ് . കൊല്ലം കരുനാഗപ്പള്ളി കന്നേറ്റി സ്വദേശികളായ പൗലോസ് ജോൺസന്റെയും ജോളമ്മ ജോൺസന്റെയും ഏക മകളാണ്. നഥാനിയേൽ (7), ജൊവാന (4) എന്നിവരാണ് മക്കൾ. നാട്ടിൽ ഡെന്റൽ ഡോക്ടറായി ജോലി ചെയ്തിരുന്ന ജെനി 2023ലാണ് വെയിൽസിലെ സ്വാൻസി യൂണിവേഴ്സിറ്റിയിൽ എംഎസ്‌സി പബ്ലിക് ഹെൽത്ത് പഠനത്തിനായി യുകെയിലെത്തിയത്. പഠനം പൂർത്തിയാക്കിയ ശേഷം നനീട്ടനിൽ ഡെന്റൽ അസിസ്റ്റന്റായി ജോലി ചെയ്യുകയായിരുന്നു.

ഏകദേശം ആറുമാസം മുൻപാണ് ജെനിക്ക് ലുക്കീമിയ സ്ഥിരീകരിച്ചത്. ചികിത്സയിലൂടെ ആരോഗ്യനില മെച്ചപ്പെട്ട് ജീവിതത്തിലേക്ക് തിരിച്ചെത്തിയിരുന്നെങ്കിലും അപ്രതീക്ഷിതമായി വീണ്ടും ആരോഗ്യപ്രശ്നങ്ങൾ ഉണ്ടാകുകയായിരുന്നു . ഇൻഫെക്ഷനെ തുടർന്ന് രണ്ട് ദിവസം മുൻപ് നനീട്ടനിലെ ജോർജ് എലിയറ്റ് ഹോസ്പിറ്റലിൽ പ്രവേശിപ്പിച്ച ജെനി, ചികിത്സയിലിരിക്കെ കഴിഞ്ഞ ദിവസം വൈകിട്ട് മരണത്തിന് കീഴടങ്ങുകയായിരുന്നു. ജെനിയുടെ അപ്രതീക്ഷിതമായ വേർപാടിന്റെ ഞെട്ടലിലാണ് യുകെയിലും നാട്ടിലുമുള്ള ബന്ധുക്കളും സുഹൃത്തുക്കളും.

അഞ്ചുമാസം മുൻപ് ജെനിയുടെ മാതാപിതാക്കളായ പൗലോസും ജോളമ്മയും യുകെയിലെത്തിയിരുന്നു . ഏക മകൾക്കും കുടുംബത്തിനുമൊപ്പം കഴിയുന്നതിനിടെയുണ്ടായ വിയോഗം മാതാപിതാക്കളെ തീരാദുഃഖത്തിലാഴ്ത്തി. മിഡ്‌ലാൻഡ്സിലെ ഹെർമ്മോൻ മാർത്തോമാ പള്ളി അംഗങ്ങളാണ് നിതിനും കുടുംബവും. ജെനിയുടെ സംസ്കാരം നാട്ടിൽ നടത്താനാണ് കുടുംബത്തിന്റെ തീരുമാനം. യുകെയിലെ പൊതുദർശനത്തിന്റെയും നാട്ടിലെ സംസ്കാര ചടങ്ങുകളുടെയും തീയതിയും സമയവും പിന്നീട് അറിയിക്കും.

ജെനിയുടെ നിര്യാണത്തിൽ മലയാളം യുകെ ന്യൂസിന്റെ അനുശോചനം ബന്ധുക്കളെയും സുഹൃത്തുക്കളെയും അറിയിക്കുന്നു.

ന്യൂസ് ഡെസ്ക്, മലയാളം യുകെ

സ്റ്റോക്ക്-ഓൺ-ട്രെന്റിൽ താമസിക്കുന്ന യുകെ മലയാളി വിനു പോൾ (37) അന്തരിച്ചു. നാട്ടിൽ ചികിത്സയിലിരിക്കെയാണ് മരണം സംഭവിച്ചത്. ഓൾഫ് മിഷൻ സ്റ്റോക്ക്-ഓൺ-ട്രെന്റിലെ സെന്റ് തോമസ് വാട്ടർഹേയ്സ് ഫാമിലി യൂണിറ്റംഗമായിരുന്നു.

ഓണത്തിന് രണ്ടാഴ്ച മുമ്പ് കുടുംബസമേതം നാട്ടിലെത്തിയ വിനുവിന് ശക്തമായ വയറുവേദന അനുഭവപ്പെട്ടതിനെ തുടർന്ന് നടത്തിയ പരിശോധനയിലാണ് ക്യാൻസർ നാലാം ഘട്ടത്തിലാണെന്ന് കണ്ടെത്തിയത്. തുടർന്ന് ചികിത്സ നാട്ടിൽ തുടരുകയായിരുന്നു. യുകെയിൽ നടത്തിയ പ്രാഥമിക പരിശോധനകളിൽ രോഗം തിരിച്ചറിയാൻ കഴിഞ്ഞിരുന്നില്ലെന്നാണ് ലഭിക്കുന്ന വിവരം.

ഭാര്യ ഷെറിൻ. നാഥൻ, യോഹാൻ, ഇഹാൻ എന്നിവരാണ് മക്കൾ. തിരിച്ചുവരാനായി നാട്ടിൽ പോയ പ്രിയ സുഹൃത്തിന്റെ അകാല വിയോഗത്തിന്റെ ഞെട്ടലിലാണ് വിനുവിന്റെ യുകെയിലെ സുഹൃത്തുക്കൾ. പൊതുദർശനത്തിന്റെയും മൃതസംസ്കാര ചടങ്ങുകളുടെയും കൂടുതൽ വിവരങ്ങൾ പിന്നീട് അറിയിക്കുന്നതായിരിക്കും.

വിനു പോളിൻെറ നിര്യാണത്തിൽ മലയാളം യുകെ ന്യൂസിന്റെ അനുശോചനം ബന്ധുക്കളെയും സുഹൃത്തുക്കളെയും അറിയിക്കുന്നു.

ന്യൂസ് ഡെസ്ക്, മലയാളം യുകെ

സൗത്ത് വെസ്റ്റ് ഇംഗ്ലണ്ടിലെ വിൽറ്റ്‌ഷെയർ കൗണ്ടിയിലെ വാർമിൻസ്റ്ററിൽ തൃശൂർ ഇരിങ്ങാലക്കുട സ്വദേശി സേവ്യർ ലോനപ്പൻ (44) അന്തരിച്ചു. കാഞ്ഞിരത്തിങ്കൽ ഇയ്യപ്പൻ ലോനപ്പനാണ് പിതാവ്. പരേതയായ എൽസിയാണ് മാതാവ്. ഭാര്യ നിജാ ജോസ്. മക്കൾ: ജോഷ്വാ സേവ്യർ (12), ജെറോം സേവ്യർ (5), ജെയ്റോ സേവ്യർ (3). ഏകദേശം മൂന്ന് വർഷം മുൻപാണ് സേവ്യർ മക്കളോടൊപ്പം ഡിപ്പെൻഡന്റ് വിസയിൽ യുകെയിലെത്തിയത്. ഭാര്യ ജോലി ചെയ്യുന്ന കെയർ ഹോമിൽ തന്നെയായിരുന്നു സേവ്യറും ജോലി ചെയ്തിരുന്നത്.

ഡേ ഷിഫ്റ്റിന് ജോലിക്ക് പോകേണ്ടിയിരുന്ന ദിവസം രാവിലെ സേവ്യർ ഉണരാത്തതിനെ തുടർന്ന് മക്കൾ പിതാവിനെ വിളിച്ച് എഴുന്നേൽപ്പിക്കാൻ ശ്രമിച്ചു. പ്രതികരണമില്ലാത്തതിനെ തുടർന്ന് പരിശോധിച്ചപ്പോഴാണ് അനക്കമറ്റ നിലയിൽ കണ്ടെത്തിയത്. അയൽവാസികളെ വിവരം അറിയിക്കുകയും മെഡിക്കൽ എമർജൻസി സംഘത്തിന്റെ സഹായം തേടുകയും ചെയ്തു. സ്ഥലത്തെത്തിയ മെഡിക്കൽ സംഘം പരിശോധന നടത്തിയെങ്കിലും സേവ്യർ മരിച്ചതായി സ്ഥിരീകരിച്ചു. സംഭവസമയത്ത് ഭാര്യ നിജാ ജോസ് ഡ്യൂട്ടിയിലായിരുന്നു.

രാത്രി ഭക്ഷണം കഴിച്ചശേഷം ഉറങ്ങാൻ കിടന്ന സേവ്യറിന് ഉറക്കത്തിനിടെ ഹൃദയാഘാതമുണ്ടായതാകാം മരണകാരണമെന്നാണ് പ്രാഥമിക നിഗമനം. വിവരമറിഞ്ഞ് ലിങ്കൺഷെയറിൽ താമസിക്കുന്ന സഹോദരി സിജി ലോനപ്പനും ഭർത്താവ് ഷാജിൽ പൗലോസും വാർമിൻസ്റ്ററിൽ എത്തി. മറ്റൊരു സഹോദരി സിനി ചാക്കപ്പൻ ഇരിങ്ങാലക്കുടയിലാണ്. സേവ്യറിന്റെ അപ്രതീക്ഷിത വിയോഗത്തിന്റെ ഞെട്ടലിലാണ് കുടുംബവും സുഹൃത്തുക്കളും. സംസ്കാരം യുകെയിൽ തന്നെ നടത്താനാണ് കുടുംബത്തിന്റെ തീരുമാനം.

സേവ്യർ ലോനപ്പൻെറ നിര്യാണത്തിൽ മലയാളം യുകെ ന്യൂസിന്റെ അനുശോചനം ബന്ധുക്കളെയും സുഹൃത്തുക്കളെയും അറിയിക്കുന്നു.

ന്യൂസ് ഡെസ്ക്, മലയാളം യുകെ

യുകെയിലെ നോർത്തേൺ അയർലൻഡിലെ ലണ്ടൻഡെറിയിൽ ഇടുക്കി തോപ്രാംകുടി സ്വദേശിയായ മലയാളി യുവാവ് മരിച്ചു. തോപ്രാംകുടി കോനാട്ട് വീട്ടിൽ കെ.എസ്. രാജൻ–മിനി രാജൻ ദമ്പതികളുടെ മകൻ ആർ. വിഷ്ണു പ്രസാദ് (34) ആണ് അന്തരിച്ചത്. രണ്ട് വർഷം മുൻപാണ് വിഷ്ണു പ്രസാദ് ഡിപെൻഡന്റ് വിസയിൽ യുകെയിലെത്തിയത്. നോർത്തേൺ അയർലൻഡിലെ സ്വകാര്യ ഹോട്ടലിൽ ജീവനക്കാരനായി ജോലി ചെയ്തുവരികയായിരുന്നു.

ഭാര്യ ശ്യാമിലി എൻഎച്ച്എസ് നേഴ്സാണ്. മക്കൾ രോഹിത് കൃഷ്ണ, ഇഷാനി വിഷ്ണു. സഹോദരൻ സുരേഷ് രാജൻ. മരണകാരണം സംബന്ധിച്ച വിവരങ്ങൾ കൂടുതൽ അറിവായിട്ടില്ല . മൃതദേഹം യുകെയിൽ തന്നെ സംസ്കരിക്കുന്നതിനുള്ള ക്രമീകരണങ്ങൾ നടന്നുവരുന്നതായി കുടുംബാംഗങ്ങൾ അറിയിച്ചു. ഇതിനായി കുടുംബാംഗങ്ങളും സുഹൃത്തുക്കളും പ്രാദേശിക മലയാളി കൂട്ടായ്മകളുമായും മലയാളി അസോസിയേഷനുമായും ബന്ധപ്പെടുന്നുണ്ട്.

വിഷ്ണു പ്രസാദിന്റെ അപ്രതീക്ഷിത വിയോഗത്തിന്റെ ഞെട്ടലിലാണ് നാട്ടിലെയും യുകെയിലെയും കുടുംബാംഗങ്ങളും സുഹൃത്തുക്കളും.

വിഷ്ണു പ്രസാദിൻെറ നിര്യാണത്തിൽ മലയാളം യുകെ ന്യൂസിന്റെ അനുശോചനം ബന്ധുക്കളെയും സുഹൃത്തുക്കളെയും അറിയിക്കുന്നു.

ന്യൂസ് ഡെസ്ക്, മലയാളം യുകെ

ഇപ്സ്വിച്ചിലെ മലയാളി സമൂഹത്തിന്റെ പ്രിയങ്കരനായിരുന്ന കേരള കൾച്ചറൽ അസോസിയേഷൻ ഇപ്സ്വിച്ചിന്റെ മുൻ പ്രസിഡന്റും കുട്ടനാട് സംഗമം യുകെയുടെ സജീവ പ്രവർത്തകനുമായിരുന്ന ബാബു മത്തായിയുടെ അനുസ്മരണ ശുശ്രൂഷകൾ സെപ്റ്റംബർ 16ന് നടക്കും. രാവിലെ 11ന് ടഡൻഹാം റോഡിലെ ‘Venue 16’, Ipswich, IP4 3QJ എന്ന വിലാസത്തിലാണ് മെമ്മോറിയൽ മാസ് നടക്കുന്നത് .

കേരള കൾച്ചറൽ അസോസിയേഷൻ ഇപ്സ്വിച്ചിന്റെ പ്രസിഡന്റായി രണ്ടുതവണ സേവനമനുഷ്ഠിച്ച ബാബു മത്തായി വിവിധ സാമൂഹിക – സാംസ്കാരിക പ്രവർത്തനങ്ങളിൽ സജീവ സാന്നിധ്യമായിരുന്നു. ഇപ്സ്വിച്ചിൽ നടന്ന അഞ്ചാമത് കുട്ടനാട് സംഗമത്തിന്റെ കൺവീനർ സ്ഥാനവും അദ്ദേഹം വഹിച്ചിരുന്നു. കുട്ടനാടിന്റെ പാരമ്പര്യവും സൗഹൃദവും യുകെയിലെ മലയാളി സമൂഹവുമായി ചേർത്തുനിർത്തുന്നതിൽ അദ്ദേഹം നൽകിയ നേതൃത്വവും പിന്തുണയും ഏറെ ശ്രദ്ധേയമായിരുന്നു. അദ്ദേഹത്തിന്റെ വിയോഗത്തിൽ ദുഃഖം രേഖപ്പെടുത്താനും അവസാനമായി പ്രിയപ്പെട്ട ബാബുവിന് ആദരാഞ്ജലി അർപ്പിക്കാനും നിരവധി പേരാണ് ചടങ്ങിൽ എത്തുന്നത്.

59-ാം വയസ്സിലാണ് ബാബു മത്തായി വിടപറഞ്ഞത്. സംഘടനാ പ്രവർത്തനങ്ങളിലെ നേതൃത്വവും സമൂഹത്തോടുള്ള പ്രതിബദ്ധതയും സൗഹൃദപരമായ ഇടപെടലുകളും അദ്ദേഹത്തെ ഏവരുടെയും പ്രിയങ്കരനാക്കി. കുടുംബാംഗങ്ങൾ എല്ലാവരെയും മെമ്മോറിയൽ മാസിലേക്കും തുടർന്നുള്ള അന്ത്യകർമങ്ങളിലേക്കും സാദരം ക്ഷണിച്ചിട്ടുണ്ട്. പ്രിയപ്പെട്ട ബാബു മത്തായിക്ക് അന്ത്യാഞ്ജലി അർപ്പിക്കാനും കുടുംബത്തോടൊപ്പം ദുഃഖത്തിൽ പങ്കുചേരാനും ഇപ്സ്വിച്ചിലെ മലയാളി സമൂഹം ഒരുമിച്ചെത്തും.

തൽസമയ ദൃശ്യങ്ങൾ കാണാൻ താഴെ കാണുന്ന ലിങ്കിൽ ക്ലിക്ക് ചെയ്യുക.

ന്യൂസ് ഡെസ്ക്, മലയാളം യുകെ

ചെസ്റ്റർ: കോതമംഗലം രൂപതാ വൈദികൻ ബഹുമാനപ്പെട്ട ജെയിംസ് ഏഴാനിക്കാട്ടച്ചന്റെ ഇളയ സഹോദരി ജെമ്മയുടെ ഭർത്താവ് ജോഷി ജെയിംസ് ചിറക്കൽ ഇംഗ്ലണ്ടിൽ അന്തരിച്ചു. ഏറെക്കാലം അബുദാബിയിലെ അലൈൻ മേഖലയിൽ ജോലി ചെയ്തിരുന്ന അദ്ദേഹം മൂന്ന് വർഷം മുൻപാണ് കുടുംബത്തോടൊപ്പം യുകെയിലെ ചെസ്റ്ററിൽ എത്തിയത്. അലൈൻ മലയാളികൾക്കിടയിൽ ഏറെ പരിചിതരായിരുന്ന ജോഷിയും ജെമ്മയും ചെസ്റ്ററിലെത്തിയ ശേഷവും മലയാളി സമൂഹവുമായി അടുത്ത ബന്ധം പുലർത്തിയിരുന്നു. അപ്രതീക്ഷിതമായി കണ്ടെത്തിയ ബ്രെയിൻ ട്യൂമറാണ് മരണകാരണം. ജോഷിയുടെ ആകസ്മിക വേർപാട് ചെസ്റ്ററിലെ മലയാളി സമൂഹത്തിനും സുഹൃത്തുക്കൾക്കും വലിയ വേദനയായി മാറിയിരിക്കുകയാണ് .

ജോഷിയുടെ ഭൗതികശരീരം സെപ്റ്റംബർ 12 ശനിയാഴ്ച ചെസ്റ്ററിലെ സെന്റ് കൊളംബാസ് ചർച്ചിൽ (Plas Newton Lane, Chester, CH2 1SA) പൊതുദർശനത്തിന് എത്തിക്കും. രാവിലെ 11.30ന് മൃതദേഹം പള്ളിയിൽ എത്തിച്ചേരും. 12.15ന് വിശുദ്ധ കുർബാനയും പ്രാർഥനാ ചടങ്ങുകളും നടക്കും. സംസ്കാര ചടങ്ങുകൾ പിന്നീട് നാട്ടിൽ നടത്തും എന്നാണ് അറിയിച്ചിരിക്കുന്നത് .

ജോഷി ജെയിംസ് ചിറക്കലിൻെറ നിര്യാണത്തിൽ മലയാളം യുകെ ന്യൂസിന്റെ അനുശോചനം ബന്ധുക്കളെയും സുഹൃത്തുക്കളെയും അറിയിക്കുന്നു.

ന്യൂസ് ഡെസ്ക്, മലയാളം യുകെ

ഗ്ലാസ്‌ഗോ: ഗ്ലാസ്‌ഗോയിലെ പ്രമുഖ സൗത്ത് ഇന്ത്യൻ റെസ്റ്റോറന്റായ മാധ (Madha – North & South Indian Kitchen) ഉടമകളും സെന്റ് തോമസ് സീറോ മലബാർ കത്തോലിക്കാ മിഷൻ അംഗങ്ങളുമായ സജോ (ജോർജ് മാത്യു), റെജി മാത്യു, ജയ്മോൻ ജോസഫിന്റെ ഭാര്യ ജെസ്സി എന്നിവരുടെ മാതാവ് മേരി മാത്യു നെടിയകാലായിൽ (81) നിര്യാതയായി. വാർദ്ധക്യസഹജമായ അസുഖങ്ങളെ തുടർന്ന് സെപ്റ്റംബർ ഒന്നിന് ഇളയമകൻ സജോയുടെ ഗ്ലാസ്‌ഗോയിലെ വസതിയിലായിരുന്നു അന്ത്യം.

മേരി മാത്യുവിന് ആദരാഞ്ജലി അർപ്പിക്കുന്നതിനും പ്രത്യേക പ്രാർഥനാ ശുശ്രൂഷകൾക്കുമായി ഇന്ന് (സെപ്റ്റംബർ 9) വൈകുന്നേരം 4 മുതൽ ഗ്ലാസ്‌ഗോ സെന്റ് തോമസ് സീറോ മലബാർ കത്തോലിക്കാ മിഷനിൽ പൊതുദർശനം നടക്കും. ഫാ. വർഗീസ് കൊച്ചുപുരയ്ക്കൽ ശുശ്രൂഷകൾക്ക് നേതൃത്വം നൽകും. സംസ്കാരം പിന്നീട് കേരളത്തിൽ നടത്തുമെന്ന് ബന്ധുക്കൾ അറിയിച്ചു.

കലാകേരളം ഗ്ലാസ്‌ഗോയുടെ സ്ഥാപക നേതാക്കളും സജീവ പ്രവർത്തകരുമാണ് മേരി മാത്യുവിന്റെ മക്കളായ സജോയും റെജിയും. മേരി മാത്യുവിന്റെ നിര്യാണത്തിൽ കലാകേരളം ഗ്ലാസ്‌ഗോയും സെന്റ് തോമസ് സീറോ മലബാർ കാത്തലിക് മിഷനും അനുശോചനം രേഖപ്പെടുത്തി.

മേരി മാത്യുവിൻെറ നിര്യാണത്തിൽ മലയാളം യുകെ ന്യൂസിന്റെ അനുശോചനം ബന്ധുക്കളെയും സുഹൃത്തുക്കളെയും അറിയിക്കുന്നു.

ന്യൂസ് ഡെസ്ക്, മലയാളം യുകെ

യുകെയിലെ ബോസ്റ്റണിൽ നാലാമത്തെ കുഞ്ഞിന് ജന്മം നൽകി ആശുപത്രിയിൽനിന്ന് വീട്ടിലെത്തി മണിക്കൂറുകൾക്കകം മലയാളി യുവതി മരിച്ചു. പാലക്കാട് കാഞ്ഞിരപ്പുഴ സ്വദേശിനി ചിഞ്ചു മമ്പള്ളിൽ തോമസ് (34) ആണ് മരിച്ചത്. പ്രസവത്തെ തുടർന്ന് ആരോഗ്യനില തൃപ്തികരമായിരുന്ന ചിഞ്ചുവിനെ ജൂലൈ 8 -ന് വൈകിട്ട് ആശുപത്രിയിൽനിന്ന് ഡിസ്ചാർജ് ചെയ്തിരുന്നു. വീട്ടിലെത്തിയതിന് പിന്നാലെ അസ്വസ്ഥത അനുഭവപ്പെട്ട് കുഴഞ്ഞുവീണതിനെ തുടർന്ന് ബോസ്റ്റൺ പിൽഗ്രിം എൻഎച്ച്എസ് ആശുപത്രിയിൽ എത്തിച്ചെങ്കിലും വ്യാഴാഴ്ച പുലർച്ചെ 12.20ന് മരണം സംഭവിച്ചു. മരണകാരണം സംബന്ധിച്ച ഔദ്യോഗിക സ്ഥിരീകരണം ലഭിച്ചിട്ടില്ല.

നാലു വർഷം മുൻപ് നേഴ്സായി ജോലി ലഭിച്ചതിനെ തുടർന്നാണ് ചിഞ്ചു ലിങ്കൺഷെയറിലെ ബോസ്റ്റൺ പിൽഗ്രിം എൻഎച്ച്എസ് ആശുപത്രിയിലെത്തിയത്. പിന്നീട് ഭർത്താവ് എമിൽ ജോസും രണ്ട് മക്കളും യുകെയിലെത്തി. മൂന്നാമത്തെ കുഞ്ഞും യുകെയിലാണ് ജനിച്ചത്. ഒരു വർഷം മുൻപ് ബോസ്റ്റണിൽ സ്വന്തമായി വീട് വാങ്ങി താമസം ആരംഭിച്ച കുടുംബം നാലാമത്തെ കുഞ്ഞിന്റെ വരവോടെ സന്തോഷത്തിലായിരുന്നു. ജൂലൈ 7ന് ഉച്ചയ്ക്ക് 1.30ഓടെ ചിഞ്ചു ആരോഗ്യവതിയായ പെൺകുഞ്ഞിന് സാധാരണ പ്രസവത്തിലൂടെ ജന്മം നൽകിയിരുന്നു. എമിലിനും ചിഞ്ചുവിനും എട്ടും ആറും മൂന്നും വയസ്സുള്ള മൂന്ന് മക്കളും നവജാത പെൺകുഞ്ഞുമാണുള്ളത്. പ്രസവശുശ്രൂഷയ്ക്കായി ഏതാനും മാസങ്ങൾക്ക് മുൻപ് യുകെയിലെത്തിയ ചിഞ്ചുവിന്റെ മാതാപിതാക്കളായ തോമസും റോസമ്മയും മകളുടെ അപ്രതീക്ഷിത വേർപാടിൽ തകർന്നിരിക്കുകയാണ്.

ബോസ്റ്റൺ മേഖലയിലെ സിറോ-മലബാർ സഭയുടെ മാർ യൗസേപ്പ് പ്രൊപ്പോസ്ഡ് മിഷൻ ചർച്ചിലെ സജീവ അംഗങ്ങളായിരുന്നു എമിലും കുടുംബവും. ചിഞ്ചുവിന്റെ വേർപാട് ബോസ്റ്റണിലെ മലയാളി സമൂഹത്തെയും ദുഃഖത്തിലാഴ്ത്തി. എമിലിനും നാല് മക്കൾക്കും ആവശ്യമായ പിന്തുണ നൽകുന്നതിനായി ബന്ധുക്കളും സുഹൃത്തുക്കളും സഭാംഗങ്ങളും മലയാളി സമൂഹവും കൈകോർക്കുകയാണ്. കുഞ്ഞിന്റെ വരവോടെ സന്തോഷത്തിലായിരുന്ന കുടുംബത്തെ മണിക്കൂറുകൾക്കകം ദുരന്തം തേടിയെത്തിയത് യുകെയിലെ മലയാളി സമൂഹത്തിനാകെ തീരാനഷ്ടമായി.

ചിഞ്ചുവിൻെറ നിര്യാണത്തിൽ മലയാളം യുകെ ന്യൂസിന്റെ അനുശോചനം ബന്ധുക്കളെയും സുഹൃത്തുക്കളെയും അറിയിക്കുന്നു.