ലണ്ടന്: 178 വര്ഷം പഴക്കമുള്ള ട്രാവല് ഏജന്സിയായ തോമസ് കുക്ക് കമ്പനി അടച്ചു പൂട്ടി. 25 കോടി ഡോളര് (ഏകദേശം 18,000 കോടി രൂപ) ബാധ്യത തീര്ക്കാന് സാധിക്കാത്തതാണ് കമ്പനി അടച്ചു പൂട്ടാനുള്ള കാരണം. ഇതോടെ കമ്പനിയെ പാപ്പരായി പ്രഖ്യാപിക്കുകയും ചെയ്തു. കമ്പനി പൂട്ടിയതോടെ 16 രാജ്യങ്ങളിലായി 20,000 ജീവനക്കാരാണ് തൊഴില്രഹിതരായത്. ഇവരില് 9000 ഓളം പേര് ബ്രിട്ടനിലാണ്.
സാമ്പത്തിക ബാധ്യത തീര്ക്കാനായി റോയല് ബാങ്ക് ഓഫ് സ്കോട്ട്ലന്ഡുമായും ലോയിഡ്സ് ബാങ്കുമായും കമ്പനി ചര്ച്ചകള് നടത്തിയിരുന്നെങ്കിലും ബാങ്കുകള് ബാധ്യത ഏറ്റെടുക്കാന് തയാറായില്ല. ഇതോടെയാണ് കമ്പനി അടച്ചു പൂട്ടേണ്ടി വന്നത്. തോമസ് കുക്കിന്റെ നൂറിലേറെ വിമാനങ്ങളും തിരിച്ചിറക്കി.
അതേസമയം കമ്പനി പൂട്ടിയതിനെത്തുടര്ന്ന് ഒന്നരലക്ഷം ബ്രിട്ടീഷ് യാത്രക്കാര് പെരുവഴിയിലായതായാണു റിപ്പോര്ട്ട്. ലോകത്തിന്റെ വിവിധ ഭാഗങ്ങളിലുള്ള കമ്പനിയുടെ ഒന്നരലക്ഷത്തോളം വിനോദസഞ്ചാരികളെ ബ്രിട്ടീഷ് സര്ക്കാര് തിരികെ അതാതു സ്ഥലങ്ങളില് എത്തിക്കുമെന്നാണു വിവരം.
തോമസ് കുക്കുമായി ബന്ധപ്പെട്ടു പ്രവര്ത്തിക്കുന്ന മണി എക്സേഞ്ചുകള്, വിമാന സര്വീസുകള്, ഫെറി സര്വീസുകള് എന്നിവയെയും കമ്പനിയുടെ അടച്ചുപൂട്ടല് ബാധിക്കും. അതേസമയം, തോമസ് കുക്ക് ഇന്ത്യ വേറെ കമ്പനി ആയതിനാല് പ്രതിസന്ധി ബാധിക്കില്ലെന്നും അധികൃതര് വ്യക്തമാക്കി. 1841-ല് ആരംഭിച്ച കമ്പനി പിന്നീട് 16 രാജ്യങ്ങളിലേക്കു പ്രവര്ത്തനം വ്യാപിപ്പിക്കുകയായിരുന്നു.
രണ്ട് മാസത്തിലേറെ നീണ്ട അനിശ്ചിത്വത്തിനൊടുവില് ഇറാന് പിടിച്ചെടുത്ത ബ്രിട്ടീഷ് എണ്ണകപ്പല് സ്റ്റെന ഇംപരോ വിട്ടയച്ചു. അവശേഷിച്ചിരുന്ന 16 കപ്പല് ജീവനക്കാരും മോചിതരായി.
സ്വീഡിഷ് ഉടമസ്ഥയിലുള്ള സ്റ്റെന ഇംപരോ ബ്രിട്ടന്റെ പതാകയാണ് വഹിക്കുന്നത്. എത്രയും പെട്ടെന്ന് ഇറാന് സമുദ്ര പരിധിയില് നിന്ന് നീങ്ങുമെന്ന് കപ്പല് ഉടമസ്ഥര് അറിയിച്ചു. അന്താരാഷ്ട്ര സമുദ്ര ചട്ടങ്ങള് ലംഘിച്ചതിന്റെ പേരിലാണ് കപ്പല് പിടികൂടിയതെന്നാണ് ഇറാന്റെ വിശദീകരണം.
യൂറോപ്യന് യൂനിയന് ഉപരോധം നിലനില്ക്കെ, സിറിയയിലേക്ക് എണ്ണ കടത്തുന്നു എന്നാരോപിച്ച് ഇറാന്റെ എണ്ണ കപ്പല് ജിബ്രാള്ട്ടറില് തടഞ്ഞതില് പ്രതിഷേധിച്ചായിരുന്നു ജൂലൈ 19ന് ബ്രിട്ടീഷ് എണ്ണ കപ്പല് സ്റ്റെന ഇംപരോ തെഹ്റാന് പിടിച്ചെടുത്തത്. ഇതേ തുടര്ന്ന് ഹോര്മുസ് കടലിടുക്കില് സംഘര്ഷം രൂക്ഷമാവുകയും രണ്ട് യുദ്ധകപ്പലുകള് ബ്രിട്ടന് മേഖലയിലേക്ക് അയക്കുകയും ചെയ്തു.
ആഗസ്റ്റ് 18ന് ജിബ്രാര്ട്ടര് കോടതി ഇറാന് കപ്പല് വിട്ടയച്ചതോടെയാണ് സ്റ്റെന ഇംപരോ കൈമാറാനുള്ള നടപടി ഇറാന് ആരംഭിച്ചത്. എട്ട് ജീവനക്കാരെ നേരത്തെ ഇറാന് മോചിപ്പിച്ചിരുന്നു.
നടി എമി ജാക്സണ് അമ്മയായി. ഈ വിവരം എമി തന്നെയാണ് തന്റെ ഇന്സ്റ്റഗ്രാമിലൂടെ ലോകത്തെ അറിയിച്ചത്. കുഞ്ഞ് ആണ്കുട്ടിയാണെന്ന് ദിവസങ്ങള്ക്ക് മുമ്പ് എമി പരിശോധനയിലൂടെ അറിയുകയും ആരാധകരെ അറിയിക്കുകയും ചെയ്തിരുന്നു.
ഗര്ഭിണിയാണെന്ന വിവരം അറിയിച്ചതു മുതല് തന്റെ ഗര്ഭകാലത്തെ ഓരോ ഘട്ടവും സോഷ്യല് മീഡിയയിലൂടെ പങ്കുവച്ചിരുന്നു എമി ജാക്സണ്. തന്റെ ബേബി ഷവറില്നിന്നുളള ചിത്രങ്ങളും താരം ഇന്സ്റ്റഗ്രാമിലൂടെ പുറത്തുവിട്ടിരുന്നു. കുടുംബാംഗങ്ങള്ക്കും അടുത്ത സുഹൃത്തുക്കള്ക്കും ഒപ്പമാണ് എമി തന്റെ ബേബി ഷവര് ആഘോഷിച്ചത്. ഇളം ബ്ലൂ നിറത്തിലുളള വസ്ത്രമണിഞ്ഞാണ് എമി എത്തിയത്. അതിന് അനുസൃതമായാണ് ബേബി ഷവര് ആഘോഷ വേദിയൊരുക്കിയതും.
എമിയും ജോര്ജും 2015 മുതല് പ്രണയത്തിലായിരുന്നു. ഇരുവരും പ്രണയത്തിലാണെന്ന് ഗോസിപ്പുകള് പരന്നെങ്കിലും അവയൊക്കെ എമി നിഷേധിച്ചിരുന്നു. ജോര്ജിനൊപ്പമുളള ചിത്രങ്ങള് സോഷ്യല് മീഡിയയില് എമി ജാക്സണ് പോസ്റ്റ് ചെയ്തിരുന്നുവെങ്കിലും അവയിലൊന്നും മുഖം വ്യക്തമായിരുന്നില്ല. കഴിഞ്ഞ വാലന്റൈന്സ് ദിനത്തിലാണ് ജോര്ജുമായുള്ള ചിത്രം പങ്കുവച്ച് എമി തന്റെ പ്രണയം പുറംലോകത്തെ അറിയിച്ചത്.
ഗ്ലോസ്റ്റർ : ഗൃഹാതുരുത്വം ഉണർത്തുന്ന പ്രവാസി മലയാളികളുടെ ഓണാഘോഷങ്ങളുടെ ഇടയിൽ വ്യത്യസ്തതയുമായി ഗ്ലോസ്റ്റർഷെയർ മലയാളി അസോസിയേഷൻ(ജി എം എ ) .101 വനിതകൾ പങ്കെടുത്ത മെഗാ തിരുവാതിര ആയിരുന്നു ജി എം എ യുടെ ഓണാഘോഷങ്ങളുടെ മുഖ്യ ആകർഷണം. മാസങ്ങൾ നീണ്ട ചിട്ടയായ പരിശീലനം അവസാനം സഫലീകൃതമായി .
ചുവടുകൾ അണുവിട തെറ്റാതെ കേരളീയ വേഷത്തിൽ അണിനിരന്ന തിരുവാതിര നൃത്തം ആസ്വാദകരെ ആനന്ദത്തിലാക്കി . യുകെയുടെ ചരിത്രത്തിൽ ആദ്യമായാണ് ഇത്ര വിപുലമായ രീതിയിൽ പരിശീലനം നടത്തി 101 പേരെ ഉൾപ്പെടുത്തി തിരുവാതിരകളി അരങ്ങേറുന്നത് .
തിരുവാതിര കളി കൂടാതെ 15 ഓളം വനിതകൾ അണിനിരന്ന ചെണ്ടമേളവും , പുലികളിയും ,മുത്തുകുടയും , താലപ്പൊലിയും ഒക്കെ ആസ്വാദകരുടെ കണ്ണിനും കാതിനും കുളിർമയേകുന്നതുമായിരുന്നു . തിരുവാതിരക്കു ശേഷം ചെൽറ്റൻഹാമും ഗ്ലോസ്റ്ററും തമ്മിൽ നടന്ന വാശിയേറിയ വടം വലി മത്സരത്തിൽ ചെൽറ്റൻഹാമും വിജയികളായി. എന്നും മനസ്സിൽ സൂക്ഷിക്കാൻ പറ്റുന്ന ഒരു പറ്റം ഓർമകളുമായാണ് ഗ്ലോസ്റ്റെർ ഷെയർ മലയാളി അസോസിയേഷൻെറ (ജി എം എ )യുടെ ഓണാഘോഷത്തിന് തിരശീലവീണത് .
സ്റ്റോക്ക് ഓൺ ട്രെന്റ്: ഓരോ മലയാളിയ്ക്കും ഓണനാളുകള്, പ്രത്യേകിച്ചും തിരുവോണദിനം കാത്തിരിപ്പുകളുടെ സാഫല്യത്തിന്റെ ദിനമാണ്. ഏറെ നാളായി ദൂരദേശങ്ങളില് വസിക്കുന്ന ബന്ധു മിത്രാദികള് നാട്ടിലേക്ക് ഓടിയെത്തി, പഴയ ഓര്മ്മകളും, സ്നേഹബന്ധങ്ങളും പുതുക്കുന്ന സുന്ദര ദിനം. പലദേശങ്ങളില് ജോലി ചെയ്യുന്ന മക്കള്, വേര്പാടിന്റെയും ഒറ്റപെടലിന്റെയും വേദന പേറി ജീവിക്കുന്ന അച്ഛനമ്മമാരെ സന്ദര്ശിച്ച് അവര്ക്കൊപ്പമിരുന്ന് പൂക്കളം തീര്ത്തും, സദ്യയുണ്ടും അടുത്ത ഓണനാളുകള് വരുന്നത് വരെ ഓര്ത്തു വെക്കാനുള്ള നനുത്ത ദിനങ്ങള് തീര്ക്കുന്ന ദിനങ്ങളാണ് ഓണക്കാലം. യൂറോപ്പിലെ പ്രവാസികളെ സംബന്ധിച്ചു പല പ്രായോഗിക ബുദ്ധിമുട്ടുകളും ഓണദിനങ്ങളിലുള്ള ഇത്തരം ഒത്തുചേരലിന് തടസം സൃഷ്ടിക്കുമെങ്കിലും തന്റെ ഓർമ്മകളെ മക്കളുമായി പങ്കിടുവാൻ കിട്ടുന്ന അവസരം പ്രവാസി മലയാളികൾ നഷ്ടപ്പെടുത്താറില്ല എന്നതിന്റെ ഉത്തമ ഉദാഹരണമാണ് ഇന്നലെ ബ്രാഡ്വെൽ കമ്മ്യൂണിറ്റി ഹാളിൽ കണ്ടത്..
മലയാളി തനിമ തൊട്ടുണർത്തി… സ്റ്റോക്ക് മലയാളികളുടെ ഹൃദയങ്ങളിൽ സന്തോഷത്തിന്റെ പൂക്കളം തീർത്ത ഓണാഘോഷം.. പ്രെസ്റ്റണിൽ നിന്നുള്ള ജുമോനോപ്പം സ്റ്റോക്ക് മലയാളി വീട്ടമ്മമാരുടെ ഒരുമയിൽ ഒരു കയ്യൊപ്പ് പതിഞ്ഞപ്പോൾ നാവില് രുചിയേറുന്ന ഓണസദ്യയുമായി എസ് എം എ സ്റ്റോക്ക് ഓൺ ട്രെന്റ് ഒരുക്കിയത് അവർണ്ണനീയമായ ആഘോഷപരിപാടികൾ..
മലയാളിയുടെ മനസ്സില് സ്നേഹത്തിന്റെ പച്ചപ്പും, സാഹോദര്യത്തിന്റെ നറുമണവും നിറയ്ക്കുന്ന തിരുവോണനാളുകൾ ഓർമ്മയിൽ നിന്നും പൊടിതട്ടിയെടുത്തപ്പോൾ ഇന്നലെ സ്റ്റോക്ക് ഓൺ റെന്റിലെ ബ്രാഡ്വെൽ കമ്മ്യൂണിറ്റി ഹാളിലേക്ക് സ്റ്റോക്ക് മലയാളികൾ ഒഴുകിയെത്തി… രാവിലെ പതിനൊന്ന് മണിയോടുകൂടി മത്സരങ്ങൾക്ക് തുടക്കം… എല്ലാവര്ക്കും പങ്കെടുക്കാൻ ഉതകും വിധം പലതരം മത്സരങ്ങൾ.. മത്സരങ്ങൾക്ക് വിടനൽകി ഓണസദ്യയിലേക്ക്.. മറ്റൊരു ഹാളിൽ രുചിയേറും ഓണസദ്യ.. അസോസിയേഷനിലെ അംഗങ്ങളുടെ ഭവനങ്ങളിൽ സ്റ്റോക്ക് അമ്മമാർ ഒരുക്കിയത് രുചിയേറും ഓണസദ്യ… കഴിച്ചത് നൂറുകണക്കിന് മലയാളികൾ …
ഓണപ്പരിപാടികളുടെ നാന്ദി കുറിച്ച് തിരുവോണദിനത്തില് മഹാബലി തമ്പുരാന് തന്റെ പ്രജകളെ കാണാന് വന്നെത്തും എന്ന വിശ്വാസം തെറ്റിക്കാതെ താളമേളങ്ങളുടെയും മുത്തുക്കുടകളും പുലികളിയുടെയും ആർപ്പുവിളികളുടെയും അകമ്പടിയോടെ മാവേലിയുടെ ആഗമനം.. 
അതിമനോഹരമായ വെൽക്കം ഡാൻസുമായി എസ് എം എ യുടെ ഡാൻസ് സ്കൂളിലെ കുട്ടികൾ സ്റ്റേജിൽ എത്തിയപ്പോൾ കണ്ടത് ഇന്നുവരെ സ്റ്റോക്ക് മലയാളികൾ കാണാത്ത അവിസ്മരണീയ പ്രകടനം… കേരള നാട്ടിലെ കൊടികുത്തിയ തിരുവാതിരക്കാരെ തോൽപ്പിക്കുന്ന കൃത്യതയോടെ എസ് എം എ യുടെ നെടുംതൂണുകളായ പെൺകുട്ടികളുടെ മാസ്മരിക പെർഫോമൻസ്…. തുടർന്ന് എസ് എം എ പ്രസിഡണ്ട് വിജി കെ പി അധ്യക്ഷനായി സാംസ്ക്കാരിക സമ്മേളനം…. വിശിഷ്ടതിഥിയായി യുക്മ നാഷണൽ പ്രെഡിഡന്റ് മനോജ് കുമാർ പിള്ള… ഏവർക്കും സ്വാഗതമോതി എസ് എം എ യുടെ സെക്രട്ടറി സിനി ആൻറ്റോ.. വേദിയിൽ ട്രെഷറർ റ്റിജു, വൈസ് പ്രസിഡന്റ് അഭിനേഷ്, ഈ വർഷത്തെ മാവേലിയും, ജോയിന്റ് സെക്രട്ടറിയും ആയ വർഗീസ്, ആർട്സ് കോഡിനേറ്റർ ഷാജിൽ, ബിജു, കൺവീനർമ്മരായ സിറിൽ, ജിജോ, തങ്കച്ചൻ തുടങ്ങിയവർ വേദിയിൽ സന്നിഹിതരായിരുന്നു.
പിന്നീട് യുക്മ നാഷണൽ പ്രസിഡന്റ് മനോജ്കുമാർ പിള്ള ഓണാഘോഷപരിപാടികളുടെ ഔദ്യോഗികമായ ഉത്ഘാടനം നിർവഹിച്ചപ്പോൾ ആശംസകളുമായി ഓണാഘോഷപരിപാടിയുടെ കൺവീനർമാരിൽ നിന്ന് സിറിൽ മാഞ്ഞൂരാൻ.. എസ് എം എ യുടെ ട്രെഷറർ റ്റിജുവിന്റെ നന്ദിപ്രകാശനത്തോടെ സാംസ്ക്കാരിക സമ്മേളനത്തിന് തിരശീല വീണു.. 
പാട്ടുകളും സിനിമാറ്റിക് ഡാൻസുകളും കൊണ്ട് കളം നിറഞ്ഞപ്പോൾ താളമേളങ്ങളുടെ പെരുമ്പറ മുഴക്കിയത് നാട്ടിൽ ഇന്നും എത്തിയ സ്റ്റേജ് ഷോ ക്കാരുടെ .. പത്തുപേരുടെ ടീമുമായി ഇറങ്ങിയ അവർ അതിമനോഹരമായ ഒരു കലാവിരുന്ന് തന്നെയാണ് സ്റ്റോക്ക് ഓൺ ട്രെന്റ് മലയാളികൾക്കായി കാഴ്ചവെച്ചത്. ഡാൻസ് സ്കൂളിലെ കൊച്ചുകുട്ടികൾ ഡാൻസുമായി സ്റ്റേജിൽ എത്തിയപ്പോൾ ആ കുരുന്നുകളെ കരഘോഷത്തോടെ പ്രോത്സാഹിപ്പിക്കാൻ ആരും മറന്നില്ല എന്നത് ഓർമ്മയിൽ തെളിഞ്ഞു നിൽക്കും എന്നത് ഒരു പരമ സത്യം..
ക്ലാസിക്കൽ ഡാൻസുകളും, ഫ്യൂഷനുകളും പാട്ടുകളും ഒക്കെയായി കളം മുറുകിയപ്പോൾ, എത്തി കുള്ളൻ ഡാൻസുമായി സകലകലാ വല്ലഭൻ അജി മംഗലത്തും എബിൻ ബേബിയും.. കാത് കൂർപ്പിച്ചു കണ്ടിരുന്നവരുടെ ശ്രദ്ധ പിടിച്ചുപറ്റി താളം തെറ്റാതെ ഒരു ക്ലാസിക് പെർഫോമൻസ് എന്നുപറഞ്ഞാൽ അൽപം കുറഞ്ഞു പോയി എന്ന് തോന്നിപ്പോകുന്ന പ്രകടനം… ആഘോഷം ഇടമുറിയാതെ മുന്നേറിയപ്പോൾ സമയം കടന്നുപോയത് പലരും അറിയാതെപോയി.. ഓണസദ്യകൊണ്ട് തീർന്നു എന്ന് കരുതിയവരുടെ പ്രതീക്ഷകളെ മാറ്റിമറിച്ചു ചായയും ചെറു കടിയുമായി വീണ്ടും..
ഫെയ്സ്ബുക്ക്, വാട്സ് ആപ്പ് പോലുള്ള സോഷ്യല് നെറ്റ് വര്ക്കിങ് സൈറ്റുകളിലൂടെ നിറഞ്ഞൊഴുകുന്ന ഓണാശംസകള് മാറ്റിവച്ച്, തിരക്കിന്റെ ഈ ആധുനികകാലത്ത് മനുഷ്യ സ്നേഹം ഊട്ടിയുറപ്പിക്കാന് ഇത്തരം കൂട്ടായ്മകൾ പര്യാപ്തമാവും എന്ന് പ്രത്യാശിക്കുന്നതോടൊപ്പം മറ്റൊരു ഓണപ്പുലരിക്കായി കാത്തിരിക്കാം എന്ന് പറഞ്ഞു എട്ടര മണിയോടെ പരിപാടികൾക്ക് തിരശീല വീണു. 
സജീഷ് ടോം
(യുക്മ നാഷണൽ പി ആർ ഒ & മീഡിയ കോർഡിനേറ്റർ)
ദശാബ്ദി വർഷം നടക്കുന്ന പത്താമത് യുക്മ ദേശീയ കലാമേളക്കുള്ള ഒരുക്കങ്ങൾ പുരോഗമിക്കവേ, മത്സരങ്ങളുടെ നിയമാവലി അടങ്ങിയ “കലാമേള മാനുവൽ” പ്രകാശനം ചെയ്തു. ഇനിയുള്ള ദിവസങ്ങളിൽ അസോസിയേഷനുകളുടെ പരിശീലനം പരിഷ്ക്കരിച്ച കലാമേള മാനുവലിലെ കൃത്യമായ മാർഗ്ഗരേഖകളുടെ അടിസ്ഥാനത്തിലാകും പുരോഗമിക്കുക.
പുതുക്കിയ കലാമേള മാനുവൽ റീജിയണുകൾ വഴി അംഗ അസ്സോസിയേഷനുകളിലേക്ക് ഇതിനകം എത്തിച്ചു കഴിഞ്ഞതായി യുക്മ നാഷണൽ പ്രസിഡൻറും ദേശീയ കലാമേള ചെയർമാനുമായ മനോജ്കുമാർ പിള്ള, ജനറൽ സെക്രട്ടറിയും ദേശീയ കലാമേള ചീഫ് കോർഡിനേറ്ററുമായ അലക്സ് വർഗീസ് എന്നിവർ അറിയിച്ചു. കേരളത്തിന് പുറത്തു നടക്കുന്ന മലയാളി സമൂഹത്തിന്റെ ഏറ്റവും വലിയ കലാ മാമാങ്കം എന്ന ഖ്യാതി ഇതിനകം നേടി കഴിഞ്ഞിട്ടുണ്ട് യുക്മ ദേശീയ കലാമേളകൾ. നൂറ്റി ഇരുപതോളം അംഗ അസോസിയേഷനുകൾ, ഒൻപത് റീജിയണുകളിൽ നടക്കുന്ന മേഖലാ കലാമേളകളിൽ മികവുതെളിയിച്ചാണ് ദേശീയ കലാമേളയിൽ എത്തുന്നത്.
കലാകാരന്റെ ക്രീയാത്മകതക്കോ ആവിഷ്ക്കാര സ്വാതന്ത്രത്തിനോ അതിർവരമ്പുകൾ സൃഷ്ടിക്കാതെ, പ്രായോഗീകത എന്ന ആശയം മുൻനിറുത്തി, യു കെ മലയാളികളുടെ കലാപരമായ കഴിവുകളുടെ വളർച്ചക്കും വികാസത്തിനും ഒരു വേദിയൊരുക്കുക എന്ന യുക്മ കലാമേളകളുടെ പരമമായ ലക്ഷ്യം സാക്ഷാത്ക്കരിക്കുന്ന വിധമാണ് പരിഷ്ക്കരിച്ച കലാമേള മാനുവൽ തയ്യാർ ചെയ്തിരിക്കുന്നതെന്ന് യുക്മ നാഷണൽ ജോയിന്റ് സെക്രട്ടറിയും ദേശീയ കലാമേള ജനറൽ കൺവീനറുമായ സാജൻ സത്യൻ പറഞ്ഞു. പ്രശസ്ത ചിത്രകാരനും കേരള ലളിതകലാ അക്കാഡമി സംസ്ഥാന അവാർഡ് ജേതാവും, ശംഖുമുഖം ആർട്ട് മ്യൂസിയം ഡയറക്റ്ററുമായ ഡോ.അജിത്കുമാർ ജി ആണ് കലാമേള 2019 മാനുവൽ രൂപകൽപ്പന ചെയ്തിരിക്കുന്നത്.
ലണ്ടൻ കേന്ദ്രീകരിച്ച് പ്രവർത്തിക്കുന്ന JMP സോഫ്റ്റ്വെയർ എന്ന കമ്പനി യുക്മക്ക് വേണ്ടി വികസിപ്പിച്ചെടുത്ത സാങ്കേതികവിദ്യയാണ് ഈ വർഷത്തെ കലാമേളയുടെ രജിസ്ട്രേഷൻ മുതൽ സമ്മാനദാനം വരെയുള്ള എല്ലാ പ്രവർത്തനങ്ങളെയും ഏകോപിക്കുന്നത്. യുക്മയുടെ സഹയാത്രികൻ കൂടിയായ ജോസ് പി എം ന്റെ ഉടമസ്ഥതയിലുള്ള സ്ഥാപനമാണ് jmpsoftware.co.uk.
നവംബർ രണ്ട് ശനിയാഴ്ച മാഞ്ചസ്റ്ററിലാണ് പത്താമത് യുക്മ ദേശീയ കലാമേള അരങ്ങേറുന്നത്. രാവിലെ പത്തുമണിമുതൽ രാത്രി പത്തുമണിവരെ, അഞ്ചു സ്റ്റേജുകളിലായി നടക്കുന്ന മേളയിൽ, യു കെ യുടെ വിവിധ ഭാഗങ്ങളിൽ നിന്നായി ആയിരത്തോളം കാലാകാരന്മാരും കലാകാരികളും വേദിയിലെത്തും. മത്സരാർത്ഥികളും കുടുംബാംഗങ്ങളും കാണികളും വിപുലമായ സംഘാടക നിരയുമുൾപ്പെടെ അയ്യായിരത്തോളമാളുകൾ വന്നെത്തുന്ന, ലോക പ്രവാസി മലയാളികൾക്കിടയിലെ ഏറ്റവും വലിയ സാംസ്ക്കാരിക ഒത്തുകൂടലിനായിരിക്കും നവംബർ രണ്ടിന് ചരിത്രനഗരമായ മാഞ്ചസ്റ്റർ സാക്ഷ്യംവഹിക്കുക.
യുക്മ ദേശീയ കലാമേള 2019 മാനുവൽ താഴെ കൊടുത്തിരിക്കുന്ന ലിങ്കിലൂടെ വായിക്കുക:-
ലണ്ടൻ∙ ലോകത്താകമാനം ഉപയോക്താക്കളും ഓഫിസും ബിസിനസ് ശൃംഖലയുമുള്ള തോമസ് കുക്ക് ട്രാവൽ സംഘാടകർ അടച്ചുപൂട്ടൽ ഭീഷണിയിൽ. 178 വർഷത്തെ പ്രവർത്തന പാരമ്പര്യവും നിരവധി രാജ്യങ്ങളിലായി 20,000 പേർ ജോലി ചെയ്യുന്നതുമായ സ്ഥാപനം സാമ്പത്തിക പ്രതിസന്ധിയിൽ രണ്ടുദിവസത്തിനുള്ളിൽ പ്രവർത്തനം നിർത്തുമെന്നാണ് ഏറ്റവും ഒടുവിൽ പുറത്തുവരുന്ന വിവരങ്ങൾ. ഇതോടെ വിവിധ രാജ്യങ്ങളിൽ ഇവരിലൂടെ സന്ദർശനത്തിലായിരുന്ന ലക്ഷക്കണക്കിന് ആളുകളുടെ മടക്കയാത്രയും സുരക്ഷിതത്വവും അപകടത്തിലായി.
തോമസ് കുക്കിന്റെ പ്രവർത്തനങ്ങൾ നിലവിലെ സ്ഥിതിയിൽ രണ്ടു ദിവസത്തിനകം അവസാനിക്കുമെന്നാണ് ബിബിസി അടക്കമുള്ള രാജ്യാന്തര മാധ്യമങ്ങൾ റിപ്പോർട്ടു ചെയ്യുന്നത്. അത്രമാത്രം സാമ്പത്തിക പ്രതിസന്ധിയിലാണ് ബ്രിട്ടീഷ് ഉടമസ്ഥതയിലുള്ള ലോകത്തിലെ ഏറ്റവും പ്രശസ്തമായ ട്രാവൽ ഫേമായ തോമസ് കുക്ക്.
ലോകകത്തെ പ്രമുഖ വിമാനത്താവളങ്ങളിലും പ്രധാനപ്പെട്ട നഗരങ്ങളിലും തോമസ് കുക്കിന് സ്വന്തമായി ഓഫിസും പ്രവർത്തന സംവിധാനങ്ങളുമുണ്ട്. 16 രാജ്യങ്ങളിലായി 20,000 പേർ തോമസ് കുക്കിൽ ജോലി ചെയ്യുന്നുണ്ടെന്നാണ് ഏകദേശ കണക്ക്. ഇവരുമായി ബന്ധപ്പെട്ടു പ്രവർത്തിക്കുന്ന മണി എക്സേഞ്ചുകളും വിമാന സർവീസുകളും ഫെറി സർവീസുകളും വേറെയും.
തോമസ് കുക്കിലൂടെ ബ്രിട്ടീഷുകാരായ വിനോദ സഞ്ചാരികൾ മാത്രം നിലവിൽ 1,80,000 പേർ വിവിധ രാജ്യങ്ങളിൽ സന്ദർശനത്തിൽ ഉണ്ടെന്നാണ് കണക്ക്. മറ്റു രാജ്യങ്ങളിൽനിന്നുള്ള ലക്ഷക്കണക്കിന് വിനോദ സഞ്ചാരികൾ വേറെയും. കമ്പനി പ്രവർത്തനം നിർത്തുന്നതോടെ ഇവരുടെ മടക്കയാത്രയും മറ്റ് അനുബന്ധ സേവനങ്ങളും അവതാളത്തിലാകും.
200 മില്യൻ പൗണ്ടിന്റെ ധനകമ്മി നേരിടുന്ന സ്ഥാപനം ഇതിനുള്ള പരിഹാരം രണ്ടുദിവസത്തിനുള്ളിൽ കണ്ടെത്തിയില്ലെങ്കിൽ ഞായറാഴ്ചയോടെ പ്രവർത്തനം നിർത്തേണ്ടിവരുമെന്നാണ് മുന്നിറിയിപ്പ്. റോയൽ ബാങ്ക് ഓഫ് സ്കോട്ട്ലൻഡുമായും ലോയിഡ്സ് ബാങ്കുമായും ബന്ധപ്പെട്ട് ഇതിനുള്ള അവസാനവട്ട ശ്രമങ്ങൾ കമ്പനി നടത്തുന്നുണ്ടെങ്കിലും ഇത്രയേറെ ഭീമമായ ബാധ്യത ഏറ്റെടുക്കാൻ ബാങ്കുകൾ തയാറാകാൻ സാധ്യതയില്ലെന്നാണ് റിപ്പോർട്ടുകൾ. അങ്ങനെ വന്നാൽ 1.6 ബില്യൻ പൗണ്ടിന്റെ കടബാധ്യതയിൽ അകപ്പെട്ട കമ്പനിക്ക് സ്വാഭാവികമായും പൂട്ടുവീഴും. ഇത് ആയിരക്കണക്കിന് ആളുകളുടെ ജോലിക്കും ലക്ഷക്കണക്കിനാളുകളുടെ ടൂറിസം പദ്ധതികൾക്കും അവസാനമാകും.
കമ്പനിയുടെ ഏറ്റവും വലിയ ഷെയർ ഹോൾഡമാരായ ചൈനീസ് കമ്പനി ഫോസനുമായി ചേർന്നും രക്ഷാദൗത്യത്തിന് കമ്പനി ശ്രമം തുടരുന്നുണ്ട്. എന്നാൽ അടിയന്തര സഹായമായ 2000 മില്യൻ പൗണ്ട് നൽകാൻ ഇവരും തയാറാകാതിരുന്നതോടെയാണ് കമ്പനി വലിയ പ്രതിസന്ധിയിലേക്ക് കൂപ്പുകുത്തിയത്.
അതേസമയം, തോമസ് കുക്ക് യുകെയുടെ ഭാഗമല്ല തോമസ് കുക്ക് (ഇന്ത്യ)യെന്ന് ചെയര്മാനും മാനേജിംഗ് ഡയറക്ടറുമായ മാധവന് മേനോൻ അറിയിച്ചു. 2012 ഓഗസ്റ്റ് മുതല് തോമസ് കുക്ക് (ഇന്ത്യ) ബ്രിട്ടീഷ് കമ്പനിയുടെ ഭാഗമല്ല. 2012 ഓഗസ്റ്റില് കാനഡ ആസ്ഥാനമായ ഫെയര്ഫാക്സ് ഫിനാന്ഷ്യല് ഹോള്ഡിംഗ്സ് (ഫെയര്ഫാക്സ്) തോമസ് കുക്ക് (ഇന്ത്യ)യെ ഏറ്റൈടുത്തിരുന്നു. അന്നു മുതല് ഇന്ത്യന് കമ്പനിയ്ക്ക് തീര്ത്തും വ്യത്യസ്തമായ നിലനില്പ്പാണുള്ളതെന്നും മാധവന് മേനോൻ പറഞ്ഞു.
സ്റ്റോക്ക് ഓണ് ട്രെന്റ്: സ്റ്റഫോർഡ്ഷയർ മലയാളി അസ്സോസിയേഷന്റെ (എസ് എം എ) ഓണാഘോഷപരിപാടിയ്ക്കായുള്ള ഒരുക്കങ്ങള് പൂര്ത്തിയായി. സ്റ്റോക്കിലെ മലയാളി സമൂഹത്തിന്റെ അഭിരുചിക്കനുസരിച്ചുള്ള പരിപാടികളാണ് ഇക്കുറിയും രൂപം നല്കിയിരിക്കുന്നത്.
കൊച്ചു കുട്ടികള് മുതല് മുതിര്ന്നവര് വരെ പങ്കെടുക്കുന്ന എസ് എം എയുടെ കലാകാരന്മാര് ഒരുക്കുന്ന പുലികളി, ചെണ്ടമേളം, തിരുവാതിര, മോഹിനിയാട്ടം, ഭരതനാട്യം തുടങ്ങിയ വിവിധയിനം പരിപാടികളുടെ പരിശീലനങ്ങള് പൂര്ത്തിയായിക്കഴിഞ്ഞു. താളമേളക്കൊഴുപ്പകളുടെ അകമ്പടിയോടെ വര്ണ്ണാഭമായ പൂക്കളത്തിന് ചുറ്റും ചാടിമറിയുന്ന പുലികളോടൊപ്പം മാവേലിയും എത്തുന്നതോടെ ആഘോഷങ്ങള്ക്ക് തുടക്കമാകും. യുക്മ ദേശീയ പ്രസിഡന്റ് ശ്രീ മനോജ്കുമാര് പിള്ള ‘ഓണനിലാവ് 2019’ ഉത്ഘാടനം ചെയ്യും.
ഓണനിലാവിന്റെ ആഘോഷങ്ങള്ക്ക് മാറ്റ് കൂട്ടുവാന് പ്രമുഖ മലയാള ടെലിവിഷന് കോമഡി ഷോകളായ കോമഡി സര്ക്കസ്, കോമഡി ഉത്സവം എന്നീ വേദികളിലൂടെ പ്രശസ്തരായ കലാകാരന്മാരെ കോര്ത്തിണക്കിക്കൊണ്ട് അനൂപ് പാലായുടെ നേതൃത്വത്തിലുള്ള സംഘം അവതരിപ്പിക്കുന്ന സ്റ്റേജ് പ്രോഗ്രാമാണ് ഓണനിലവിന്റെ മാറ്റ് കൂട്ടുന്നതെന്ന് നിസ്സംശയം പറയാം.
കൃത്യസമത്ത് തന്നെ പരിപാടികള് ആരംഭിക്കുന്നതിനുള്ള ഒരുക്കങ്ങള് പൂര്ത്തിയായതായി ഇന്നലെ കൂടിയ വിവിധ ആഘോഷ കമ്മിറ്റികളുടെ കണ്വീനര്മാരുടെയും ഭാരവാഹികളുടെയും യോഗം വിലയിരുത്തി. സെപ്റ്റംബര് 22 ഞായറാഴ്ച്ച രാവിലെ പതിനൊന്ന് മണിക്ക് തന്നെ ഓണനിലാവ് അരങ്ങേറുന്ന ബ്രാഡ്വെല് കമ്മ്യുണിറ്റി എഡ്യൂക്കേഷന് സെന്ററില് മുഴുവന് മലയാളി കുടുംബങ്ങളും എത്തിച്ചേരണമെന്ന് സംഘാടക സമിതി അഭ്യര്ത്ഥിച്ചു.
യുകെ: മലങ്കര യാക്കോബായ സുറിയാനി സഭയുടെ ഈ വര്ഷത്തെ യുകെ മേഖല ഫാമിലി കോണ്ഫറന്സിനു അരങ്ങൊരുങ്ങി. പോര്ട്ട്സ്മോത് അടുത്തുള്ള വര്ത്തിങ്ങില്, വര്ത്തിങ് അസംബ്ലി ഹാളില് വെച്ച് ,സെപ്റ്റംബര് മാസം 21,22 ശനി ഞായര് തീയതികളില് കോണ്ഫറന്സ് നടത്തപ്പെടുന്നു. മലങ്കര യാക്കോബായ സുറിയാനി സഭയുടെ കീഴിലുള്ള എല്ലാ പള്ളികളില് നിന്നും ഇടവകക്കാര് കുടുംബത്തോടെ പങ്കെടുക്കുന്ന കോണ്ഫറന്സിനു കൗണ്സില് നേരിട്ട് ആഥിത്യം, വഹിക്കുന്നു. അതോടൊപ്പം സെയിന്റ് തോമസ് യാക്കോബായ സുറിയാനി ഓര്ത്തഡോക്സ് പോര്ട്ട്സ്മോത് ,സെയിന്റ് ജോര്ജ് യാക്കോബായ സുറിയാനി ഓര്ത്തഡോക്സ് ബേസിംഗ്സ്റ്റോക്ക് എന്നീ പള്ളികളുടെയും സംയുക്തമായ സഹകരണത്തോടെയാണ് കോണ്ഫറന്സ് നടത്തപ്പെടുന്നത്.
21 ശനി രാവിലെ 10 മണിക്ക് വര്ത്തിങ് മേയര് മിസ് ഹസില് തോര്പ്പ് ഉദ്ഘാടനം നിര്വഹിക്കുന്നതാണ്.തുടര്ന്ന് അംഗങ്ങളുടെ രെജിസ്ട്രേഷനു ശേഷം പതാകയുര്ത്തി കാര്യപരിപാടികള്ക്ക് തുടക്കം കുറിക്കുന്നതാണ് . ഡോ:പി.ജി ജോര്ജ് ,വെരി റെവ ഫാദര് ഡോ:രാജന് മാണി കോര് എപ്പിസ്കോപ്പ, മലങ്കര യാക്കോബായ സുറിയാനി സഭ യു കെ പാത്രിയര്ക്കല് വികാര് അഭിവന്ദ്യ ഡോ: മാത്യൂസ് മോര് അന്തിമോസ് മെത്രാപ്പോലീത്ത എന്നിവര് വിവിധ സെമിനാറുകള്ക്ക് നേതൃത്വവും നല്കുന്നതാണ്. അതോടോപ്പം യൂത്തു അസോസിയേഷന് അംഗങ്ങള്ക്കും, സണ്ഡേ സ്കൂള് കുട്ടികള്ക്കും ആധ്യാത്മീയമായ വിവിധ ക്ലാസുകള് നടത്തപ്പെടുന്നതാണ്. വൈകുന്നേരം 5.30 ന് സന്ധ്യ പ്രാര്ത്ഥനക്കു ശേഷം എല്ലാ പള്ളികള്ക്കും കള്ച്ചറല് പ്രോഗ്രാമുകള് നടത്തുവാന് അവസരം ലഭിക്കുന്നതായിരിക്കും.തുടര്ന്ന് അത്താഴ വിരുന്നോടു കൂടി അന്നേ ദിവസത്തെ പ്രോഗ്രാമുകള് പര്യവസാനിക്കുന്നതാണ് .
22 ഞായര് രാവിലെ 9.15 നു പ്രഭാത പ്രാര്ത്ഥനയും അതിനു ശേഷം 10.00നു മലങ്കര യാക്കോബായ സുറിയാനി സഭ യുകെ പാത്രിയാര്ക്കല് വികാര് അഭിവന്ദ്യ ഡോ. മാത്യൂസ് മോര് അന്തിമോസ് മെത്രാപ്പോലീത്തയുടെ മുഖ്യകാര്മ്മീകത്തില് വിശുദ്ധ കുര്ബാനയും ആരംഭിക്കുന്നതാണ്. തുടര്ന്ന് സമാപന സമ്മേളനത്തിനു ശേഷം പതാക താഴ്ത്തി ഉച്ചഭക്ഷണത്തോടെ ഈ വര്ഷത്തെ ഫാമിലി കോണ്ഫറന്സിനു തിരശീല വീഴും.
ഫാമിലി കോണ്ഫറന്സ് അംഗങ്ങള് എല്ലാവരും തന്നെ സെപ്റ്റംബര് 21 ശനിയാഴ്ച 9.00 മണിക്ക് മുന്പ് തന്നെ എത്തിച്ചേരണമെന്ന് സംഘാടകര് അറിയിച്ചിട്ടുണ്ട് .
വിലാസം:
Assembly Hall Worthing
Stoke Abbott Rd,
Worthing BN11 1HQ
United Kingdom
കൂടുതല് വിവരങ്ങള്ക്കു താഴെ പറയുന്ന നമ്പറുകളില് ബന്ധപ്പെടാവുന്നതാണ്.
(പ്രോഗ്രാം കണ്വീനര്)
റെവ ഫാദര് ബിജി ചിറത്തലാട്ട് 07460235878
(കൗണ്സില് സെക്രട്ടറി)
റെവ ഫാദര് എബിന് ഊന്നുകല്ലിങ്കല് 0773654746
(കള്ച്ചറല് പ്രോഗ്രാം )
മധു മാമ്മന് 07737353847
വാര്ത്ത: ഷിബു ജേക്കബ് രാമനാട്ടുതറയില്, പി.ര്.ഒ MSOC UK Council.
[ot-video][/ot-video]
അബുദാബി: യാത്രക്കാരന്റെ ടാബ്ലറ്റ് ഡിവൈസില് നിന്ന് പുക ഉയര്ന്നതിനെ തുടര്ന്ന് വിമാനം അടിയന്തരമായി നിലത്തിറക്കി. അബുദാബിയില് നിന്ന് വാഷിങ്ടണ് ഡിസിയിലേക്ക് പുറപ്പെട്ട ഇത്തിഹാദ് എയര്വേയ്സിന്റെ ഇ.വൈ 131 വിമാനമാണ് അയര്ലന്ഡ് തലസ്ഥാനമായ ഡബ്ലിനില് അടിയന്തരമായി ഇറക്കിയത്.
അടിയന്തര സാഹചര്യത്തെ തുടര്ന്ന് വിമാനം വഴിതിരിച്ചുവിടുകയായിരുന്നുവെന്ന് ഇത്തിഹാദ് പുറത്തിറക്കിയ പ്രസ്താവനയില് പറയുന്നു. വിമാനം സുരക്ഷിതമായി ഡബ്ലിനില് ഇറക്കിയ ശേഷം ടാബ്ലറ്റ് ഡിവൈസ് വിമാനത്തില് നിന്നുമാറ്റി. തുടര്ന്ന് യാത്ര തുടരുകയായിരുന്നു.
ബാറ്ററികളില് നിന്ന് തീപിടിക്കാനുള്ള സാധ്യതകള് കണക്കിലെടുത്ത് ആപ്പിള് മാക്ബുക്ക് പ്രോ കംപ്യൂട്ടറുകളുടെ ചില മോഡലുകള്ക്ക് നേരത്തെ വിവിധ വിമാനക്കമ്പനികള് വിലക്കേര്പ്പെടുത്തിയിരുന്നു. യാത്രക്കാരുടെയും ജീവനക്കാരുടെയും സുരക്ഷയ്ക്കാണ് പ്രഥമ പരിഗണന നല്കുന്നതെന്നും വിമാനം വഴിതിരിച്ചുവിട്ടതുകൊണ്ടുണ്ടായ ബുദ്ധിമുട്ടുകള്ക്ക് ക്ഷമ ചോദിക്കുന്നുവെന്നും ഇത്തിഹാദ് വക്താവ് മാധ്യമങ്ങളോട് പറഞ്ഞു.
