ന്യൂസ് ഡെസ്ക്, മലയാളം യുകെ
ചാനൽ ടണലിൽ ഉണ്ടായ വലിയ സാങ്കേതിക തകരാറിനെ തുടർന്ന് തടസ്സപ്പെട്ട യൂറോസ്റ്റാറിലെ ഷട്ടിൽ ട്രെയിൻ സർവീസുകൾ വീണ്ടും സാധാരണ നിലയിലായി. യുകെയെയും ഫ്രാൻസിനെയും ബന്ധിപ്പിക്കുന്ന ടണലിലെ ഓവർഹെഡ് വൈദ്യുതി വിതരണ സംവിധാനത്തിലെ തകരാറും ഒരു ട്രെയിൻ വഴിയിൽ കുടുങ്ങിയതുമാണ് ചൊവ്വാഴ്ച ആയിരക്കണക്കിന് യാത്രക്കാരെ ദുരിതത്തിലാക്കിയത്. രാത്രിയിലുടനീളം നടത്തിയ അറ്റകുറ്റപ്പണികൾക്ക് ശേഷം ബുധനാഴ്ച രാവിലെയോടെ സർവീസുകൾ പുനരാരംഭിച്ചു.
എന്നാൽ ഇതിനെ തുടർന്ന് ചെറിയ വൈകലുകളും അവസാന നിമിഷ റദ്ദാക്കലുകളും ഉണ്ടാകാമെന്ന് യൂറോസ്റ്റാർ മുന്നറിയിപ്പ് നൽകി. ലണ്ടൻ സെന്റ് പാൻക്രാസ് സ്റ്റേഷനിൽ നിന്ന് പുറപ്പെടുന്ന ബുധനാഴ്ചത്തെ ഭൂരിഭാഗം സർവീസുകളും നടത്തിയെങ്കിലും, പാരീസ്, ബ്രസ്സൽസ്, ആംസ്റ്റർഡാം എന്നിവിടങ്ങളിലേക്കുള്ള മൂന്ന് സർവീസുകൾ റദ്ദാക്കി. യാത്രക്കാർ ഔദ്യോഗിക വെബ്സൈറ്റിലൂടെ തത്സമയ വിവരങ്ങൾ പരിശോധിക്കണമെന്നും യൂറോസ്റ്റാർ അറിയിച്ചു.
ന്യൂ ഇയർ ഈവ് യാത്രകൾക്കായി ടിക്കറ്റ് ബുക്ക് ചെയ്തിരുന്ന ആയിരങ്ങൾക്കാണ് തടസ്സം നേരിട്ടത്. ചൊവ്വാഴ്ച ലണ്ടൻ–പാരീസ്, ആംസ്റ്റർഡാം, ബ്രസ്സൽസ് റൂട്ടുകളിലെ മിക്ക ട്രെയിനുകളും റദ്ദാക്കിയതോടെ സ്റ്റേഷനുകളിൽ വൻ തിരക്കുണ്ടായി. ചില യാത്രക്കാർ മണിക്കൂറുകളോളം ട്രെയിനിനുള്ളിൽ കുടുങ്ങി. ടണൽ ഓപ്പറേറ്റർ ഗെറ്റ്ലിങ്ക് പ്രശ്നം പരിഹരിച്ചതായി അറിയിച്ചു. തടസ്സം നേരിട്ട യാത്രക്കാർക്ക് പൂർണ ടിക്കറ്റ് റീഫണ്ടും അധിക നഷ്ടപരിഹാരവും നൽകുമെന്നും യൂറോസ്റ്റാർ വ്യക്തമാക്കി.
Leave a Reply