ഞായറാഴ്ച രാത്രി താൻ സഞ്ചരിച്ച വാഹനത്തിന് നേരെ അജ്ഞാതർ വെടിയുതിർത്തതായി പാകിസ്ഥാൻ പ്രധാനമന്ത്രി ഇമ്രാൻ ഖാന്റെ മുൻ ഭാര്യ റെഹം ഖാൻ ആരോപിച്ചു. ഇമ്രാൻ ഖാന്റെ ഭരണത്തിന് കീഴിൽ പാകിസ്ഥാൻ “ഭീരുക്കളുടെയും കൊള്ളക്കാരുടെയും അത്യാഗ്രഹികളുടെയും” നാടായി മാറിയെന്ന് ആക്രമണത്തെ കുറിച്ച് തന്റെ മുൻ ഭർത്താവിനെ ലക്ഷ്യംവെച്ച് റെഹം ഖാൻ പറഞ്ഞു.
“എന്റെ അനന്തരവന്റെ വിവാഹം കഴിഞ്ഞ് മടങ്ങുംവഴി എന്റെ കാറിന് നേരെ വെടിയുതിർത്തു, മോട്ടോർ ബൈക്കിലെത്തിയ രണ്ട് പേർ തോക്കിന് മുനയിൽ വാഹനം നിർത്തി! ഞാൻ ഈ അടുത്ത് വാഹനം മാറിയതേയുള്ളു. എന്റെ പിഎസും ഡ്രൈവറും കാറിൽ ഉണ്ടായിരുന്നു. ഇതാണോ ഇമ്രാൻ ഖാന്റെ പുതിയ പാകിസ്ഥാൻ? ഭീരുക്കളുടെയും തെമ്മാടികളുടെയും അത്യാഗ്രഹികളുടെയും രാജ്യത്തിലേക്ക് സ്വാഗതം!,” അവർ ട്വീറ്റ് ചെയ്തു.
പരിക്കേറ്റില്ലെങ്കിലും സംഭവം തന്നിൽ “രോഷവും ആശങ്കയും” ഉളവാക്കിയെന്ന് റെഹം ഖാൻ പറഞ്ഞു. “ഭീരുത്വം നിറഞ്ഞ ഗൂഢശ്രമ”ത്തേക്കാൾ ഒരു ‘ദ്വന്ദ്വയുദ്ധ’മാണ് താൻ ഇഷ്ടപ്പെടുന്നതെന്നും അവർ അഭിപ്രായപ്പെട്ടു.
Leave a Reply