ന്യൂസ് ഡെസ്ക് മലയാളം യുകെ ന്യൂസ്

ലണ്ടൻ: മദ്യപിക്കുന്നവർ സ്ഥിരമായി അഭിമുഖീകരിക്കുന്ന പ്രശ്നമാണ് ഹാങ് ഓവർ. എന്താണ് ഇതിനു പിന്നിലെ കാരണമെന്ന് വെളിപ്പെടുത്തി ഇപ്പോൾ രംഗത്ത് വന്നിരിക്കുകയാണ് ഓസ്‌ട്രേലിയയിലെ ക്വീൻസ്ലാൻഡ് യൂണിവേഴ്സിറ്റിയിലെ ഗവേഷകയായ ഡോ. മേഗാൻ റോസി. പല കാരണങ്ങൾ ചൂണ്ടിക്കാണിക്കാൻ ഉണ്ടെങ്കിലും പ്രധാനമായും ജനിതക തകരാറാണ് ഇതിന് പ്രധാന കാരണം. ഒന്നോ രണ്ടോ ഗ്ലാസ്‌ മദ്യം കുടിച്ചു കഴിയുമ്പോൾ പലർക്കും അലർജിപോലെ രൂപപ്പെടുന്നതും ഇതിന്റെ ഭാഗമാണ്. പലപ്പോഴും ശ്വസിക്കാൻ ബുദ്ധിമുട്ട്, വയറുവേദന തുടങ്ങിയവ ഇനി മദ്യത്തിൻെറ ഉപയോഗം കുറയ്ക്കണം എന്നതിന്റെ സൂചനയാണ്.

മദ്യപിച്ചുകഴിഞ്ഞുള്ള ഹാങ്ഓവർ ജനിതകമായ ഘടകങ്ങളുടെ ഭാഗമായാണ് ഉണ്ടാകുന്നത്. ആൽഡിഹൈഡ് ഡൈഹൈഡ്രജനേസ് എന്ന എൻസൈമിന്റെ പ്രവർത്തനത്തെ തുടർന്നാണിത് സംഭവിക്കുന്നത്. മദ്യം കഴിക്കുന്നതിനെ തുടർന്ന് കരളിൻെറ പ്രവർത്തനം സുഗമമാക്കുന്നതിനും മേൽപറഞ്ഞ എൻസൈമിന് നിർണ്ണായക പങ്കുണ്ട് .

ആൽഡിഹൈഡ് ഡൈഹൈഡ്രജനേസ് കൃത്യമായി പ്രവർത്തിക്കുന്നില്ലെങ്കിൽ അത് പലവിധത്തിൽ ശരീരത്തിന് പ്രശ്നങ്ങൾ സൃഷ്ടിക്കും. ഇത് വിഷാംശം ശരീരത്തിൽ തങ്ങി നിൽക്കുന്നതിനും കാരണമാകുന്നു. ഇതൊക്കെകൊണ്ടാണ് പലപ്പോഴും മദ്യപാനത്തെ തുടർന്ന് ക്ഷീണം , ശരീരവേദന ,ഓക്കാനം, ഛർദ്ദി എന്നിവ ഉണ്ടാകാറ്. അതേപോലെ രക്തകുഴലുകളുടെ പ്രവർത്തനത്തെയും ഇത് സാരമായി ബാധിക്കും. നിസാരമെന്ന് പുറമെ തോന്നുമെങ്കിലും മദ്യപാനം മൂലം പലവിധ ആരോഗ്യ പ്രശ്നങ്ങൾ ഉണ്ടാകുന്നതിന് പ്രധാന കാരണങ്ങൾ ഇവയൊക്കെയാണ് .