ന്യൂസ് ഡെസ്ക്, മലയാളം യുകെ
മുൻ ഇംഗ്ലണ്ട്, മാഞ്ചസ്റ്റർ യുണൈറ്റഡ് ഫുട്ബോൾ താരം പോൾ ഇൻസിനെ മദ്യപിച്ച് വാഹനമോടിച്ചതിന് പിടിയിലായി. ശനിയാഴ്ച വൈകുന്നേരം 5 മണിയോടെയാണ് 57 കാരനായ ഇയാളെ പോലീസ് അറസ്റ്റ് ചെയ്തത്. ചെസ്റ്റർ ഹൈറോഡിൽ പോൾ ഓടിച്ചിരുന്ന കറുത്ത റേഞ്ച് റോവർ അപകടത്തിൽ പെട്ടിരുന്നു. ഇൻസിനെ പോലീസ് ജാമ്യത്തിൽ വിട്ടയച്ചു. ഇനി ജൂലൈ 18 വെള്ളിയാഴ്ച ചെസ്റ്റർ മജിസ്‌ട്രേറ്റ് കോടതിയിൽ തുടർ നടപടികൾക്കായി ഇയാളെ ഹാജരാക്കും.
1990 കളുടെ ആരംഭം മുതൽ മധ്യം വരെ മാഞ്ചസ്റ്റർ യുണൈറ്റഡിനായി 200 ലധികം മത്സരങ്ങളിൽ പങ്കെടുത്ത മുൻ ഫുട്ബോൾ താരം രണ്ട് പ്രീമിയർ ലീഗ് കിരീടങ്ങളും രണ്ട് എഫ്എ കപ്പുകളും ഒരു യൂറോപ്യൻ കപ്പും നേടിയിട്ടുണ്ട് . 20 വർഷം നീണ്ടുനിന്ന കരിയറിൽ വെസ്റ്റ് ഹാം, വോൾവർഹാംപ്ടൺ വാണ്ടറേഴ്‌സ്, ഇന്റർ മിലാൻ എന്നിവയ്‌ക്ക് വേണ്ടിയും ഇൻസ് കളിച്ചിരുന്നു. ഇംഗ്ലണ്ടിനായി 53 മത്സരങ്ങൾ കളിച്ച അദ്ദേഹം 1993-ൽ ദേശീയ ടീമിനെ നയിച്ച ആദ്യത്തെ കറുത്ത വർഗക്കാരനായ ഫുട്ബോൾ കളിക്കാരനാണ് .
Leave a Reply