കൊച്ചി: മുന്മന്ത്രി വി കെ ഇബ്രാഹിംകുഞ്ഞ് (74) അന്തരിച്ചു. കൊച്ചിയിലെ സ്വകാര്യ ആശുപത്രിയിലായിരുന്നു അന്ത്യം. ശ്വാസകോശ അര്ബുദത്തെ തുടര്ന്ന് ദീര്ഘകാലമായി ചികിത്സയിലായിരുന്ന അദ്ദേഹം, ആരോഗ്യനില ഗുരുതരമായതിനെ തുടര്ന്ന് ഇന്നലെയാണ് വീണ്ടും ആശുപത്രിയില് പ്രവേശിപ്പിച്ചത്. ഇന്ന് വൈകിട്ട് അഞ്ച് മണിയോടെ മൃതദേഹം ആശുപത്രിയില് നിന്ന് കൊണ്ടുപോയി കളമശ്ശേരി ഞാലകം കണ്വെന്ഷന് സെന്ററില് ആറുമണി മുതല് രാത്രി പത്ത് വരെ പൊതുദര്ശനത്തിന് വെക്കും. പിന്നീട് ആലുവയിലെ വസതിയിലേക്ക് കൊണ്ടുപോകും. നാളെ രാവിലെ പത്ത് മണിക്ക് ആലങ്ങാട് ജുമാ മസ്ജിദിലാണ് കബറടക്കം.
നാല് തവണ എംഎല്എയും രണ്ട് തവണ മന്ത്രിയുമായ ഇബ്രാഹിംകുഞ്ഞ് മധ്യകേരളത്തിലെ മുസ്ലിം ലീഗിന്റെ ജനകീയമുഖമായിരുന്നു. എംഎസ്എഫിലൂടെ രാഷ്ട്രീയജീവിതം ആരംഭിച്ച അദ്ദേഹം 2001, 2006 മട്ടാഞ്ചേരി മണ്ഡലത്തെയും 2011, 2016 കളമശ്ശേരി മണ്ഡലത്തെയും നിയമസഭയില് പ്രതിനിധീകരിച്ചു. മട്ടാഞ്ചേരിയുടെ അവസാന എംഎല്എയും കളമശ്ശേരിയുടെ ആദ്യ എംഎല്എയുമെന്ന അപൂര്വ്വ നേട്ടവും അദ്ദേഹത്തിനാണ്. 2005–06 കാലത്ത് വ്യവസായ–സാമൂഹ്യക്ഷേമ മന്ത്രിയായും 2011–16 കാലത്ത് പൊതുമരാമത്ത് മന്ത്രിയായും സേവനമനുഷ്ഠിച്ചു. നിലവില് ഐയുഎംഎല് ദേശീയ എക്സിക്യൂട്ടീവ് അംഗമായിരുന്നു.
മുസ്ലിം ലീഗിനെ മലബാറില് നിന്ന് മധ്യകേരളത്തിലേക്ക് ശക്തമായി വ്യാപിപ്പിക്കുന്നതില് നിര്ണായക പങ്കുവഹിച്ച നേതാവായിരുന്നു വി കെ ഇബ്രാഹിംകുഞ്ഞ്. സാധാരണക്കാര്ക്ക് എപ്പോഴും സമീപിക്കാവുന്ന രാഷ്ട്രീയനേതാവെന്ന നിലയിലാണ് അദ്ദേഹം അറിയപ്പെട്ടത്. പാണക്കാട് കുടുംബത്തിന്റെ വിശ്വസ്തനായി യുഡിഎഫ് മന്ത്രിസഭകളില് പ്രവര്ത്തിച്ച ഇബ്രാഹിംകുഞ്ഞിന്റെ കാലഘട്ടത്തില് പൊതുമരാമത്ത് വകുപ്പില് ശ്രദ്ധേയമായ മാറ്റങ്ങളും വികസനപ്രവര്ത്തനങ്ങളും നടപ്പായി. രാഷ്ട്രീയ–സാമൂഹിക രംഗത്ത് നിറഞ്ഞുനിന്ന ജനകീയ നേതാവിനെയാണ് കേരളത്തിന് നഷ്ടമായിരിക്കുന്നത്.
Leave a Reply