സമീക്ഷ യുകെ നാലാമത് ദേശീയ ഡബിൾസ് ബാഡ്മിന്റൺ ടൂർണമെന്റിന്റെ ഗ്രാൻഡ് ഫിനാലെ 2026 നവംബർ 14 ശനിയാഴ്ച ലിവർപൂളിൽ നടക്കും. യുകെയുടെ വിവിധ ഭാഗങ്ങളിലായി സംഘടിപ്പിച്ച 17 റീജിയണൽ ടൂർണമെന്റുകളും വിജയകരമായി പൂർത്തിയായതോടെ, ദേശീയ കിരീടത്തിനായുള്ള പോരാട്ടത്തിന് അരങ്ങൊരുങ്ങിയിരിക്കുകയാണ്.
റീജിയണൽ മത്സരങ്ങളിലായി മാറ്റുരച്ച 250-ലധികം ടീമുകളിൽ നിന്ന് മികവ് തെളിയിച്ച 51 ടീമുകളാണ് ദേശീയ ഗ്രാൻഡ് ഫിനാലെയിലേക്ക് യോഗ്യത നേടിയിരിക്കുന്നത്. വിവിധ പ്രദേശങ്ങളിൽ നിന്നുള്ള ടീമുകളുടെ മികച്ച പങ്കാളിത്തവും കായികപ്രേമികളുടെ ആവേശകരമായ പിന്തുണയും ഈ വർഷത്തെ ടൂർണമെന്റിനെ സമീക്ഷ യുകെയുടെ ശ്രദ്ധേയമായ ദേശീയ കായികമേളകളിലൊന്നാക്കി മാറ്റിയിട്ടുണ്ട്.
2026 നവംബർ 14 ശനിയാഴ്ച രാവിലെ 9 മണി മുതൽ വൈകിട്ട് 5 മണി വരെ, Woodchurch High Sports Complex, Carr Bridge Road, Wirral, CH49 7NG-ൽ നടക്കുന്ന ഗ്രാൻഡ് ഫിനാലെയിൽ ദേശീയ കിരീടത്തിനായുള്ള വാശിയേറിയ മത്സരങ്ങൾ അരങ്ങേറും.
വിജയവും പരാജയവും എന്നതിലുപരി കായിക സൗഹൃദം, കൂട്ടായ്മ, സഹകരണം, ഐക്യം എന്നിവയുടെ സന്ദേശമാണ് ടൂർണമെന്റ് മുന്നോട്ടുവയ്ക്കുന്നത്. യുകെയുടെ വിവിധ ഭാഗങ്ങളിൽ താമസിക്കുന്ന മലയാളികളെ ഒരേ കായികവേദിയിൽ ഒന്നിപ്പിക്കുന്നതിനൊപ്പം, വ്യത്യസ്ത ഭാഷാ-ദേശീയ പശ്ചാത്തലങ്ങളിലുള്ളവർക്കിടയിൽ സൗഹൃദവും പരസ്പര സഹകരണവും വളർത്തുന്നതിനുള്ള അവസരമായും ഈ കായികമേള മാറുന്നു.
പ്രവാസജീവിതത്തിലെ തിരക്കുകൾക്കിടയിലും ആരോഗ്യകരമായ ജീവിതശൈലിയും കായിക സംസ്കാരവും പ്രോത്സാഹിപ്പിക്കുക, യുവതലമുറയ്ക്ക് കൂടുതൽ കായികാവസരങ്ങൾ ഒരുക്കുക, വിവിധ പ്രദേശങ്ങളിലെ അംഗങ്ങൾ തമ്മിലുള്ള ബന്ധം ശക്തിപ്പെടുത്തുക എന്നീ ലക്ഷ്യങ്ങളോടെയാണ് സമീക്ഷ യുകെ ദേശീയ ബാഡ്മിന്റൺ ടൂർണമെന്റ് സംഘടിപ്പിക്കുന്നത്.
ഗ്രാൻഡ് ഫിനാലെയുടെ ഒരുക്കങ്ങൾ പൂർത്തിയായതായി ദേശീയ ബാഡ്മിൻ്റൺ കോർഡിനേഷൻ കമ്മിറ്റി ജനറൽ കൺവീനർ അവെലിൻ ചീരനും ചെയർമാൻ സ്വരൂപ് കൃഷ്ണനും അറിയിച്ചു. മത്സരങ്ങൾ സുഗമമായും പ്രൊഫഷണൽ നിലവാരത്തിലും നടത്തുന്നതിനാവശ്യമായ എല്ലാ സംഘാടക ക്രമീകരണങ്ങളും പൂർത്തിയായതായി സംഘാടക സമിതിയും അറിയിച്ചു.
ടൂർണമെന്റിന്റെ വിജയത്തിനായി സഹകരിച്ച റീജിയണൽ കമ്മിറ്റികൾ, മത്സരാർത്ഥികൾ, സംഘാടകർ, സ്പോൺസർമാർ, വളണ്ടിയർമാർ, കായികപ്രേമികൾ, പിന്തുണ നൽകിയ എല്ലാവർക്കും സമീക്ഷ UK ദേശീയ കമ്മിറ്റി നന്ദി രേഖപ്പെടുത്തി.
സമീക്ഷ യുകെ നാലാമത് ദേശീയ ഡബിൾസ് ബാഡ്മിന്റൺ ടൂർണമെന്റിന്റെ ഗ്രാൻഡ് ഫിനാലെയിലേക്ക് എല്ലാ കായികപ്രേമികളെയും ഹൃദയപൂർവം സ്വാഗതം ചെയ്യുന്നതായി ദേശീയ കമ്മിറ്റി അറിയിച്ചു.
Leave a Reply