പറവൂർ: വീട്ടിലേക്ക് നടന്നു പോകുകയായിരുന്ന പെരുവാരം കാടാശ്ശേരി ഉഷ (64)യുടെ എട്ടുപവൻ തൂക്കം വരുന്ന സ്വർണമാല സ്കൂട്ടറിലെത്തിയ രണ്ടുപേർ പൊട്ടിച്ചെടുത്തു കടന്നു. നഗരസഭ 21-ാം വാർഡിലെ പെരുവാരം ഞാറക്കാട്ട് റോഡിന്റെ കിഴക്കുവശത്തുള്ള അങ്കണവാടി റോഡിൽ തിങ്കളാഴ്ച വൈകിട്ട് നാലോടെയായിരുന്നു സംഭവം.
ദേശീയപാതയിലെ പെരുവാരം പൂശാരിപ്പടി റോഡിലൂടെ നടന്ന് അങ്കണവാടിക്ക് സമീപത്തെ വീട്ടിലേക്ക് പോകുന്നതിനിടെയാണ് ആക്രമണം. ഹെൽമെറ്റ് ധരിച്ചെത്തിയ രണ്ട് യുവാക്കൾ സ്കൂട്ടറിൽ പിന്തുടർന്നെത്തി. സ്കൂട്ടറിൽ നിന്ന് ഒരാൾ ഇറങ്ങി ഉഷയുടെ സമീപത്തേക്ക് ചെന്നപ്പോൾ മറ്റേയാൾ സ്കൂട്ടർ കുറച്ച് മുന്നോട്ടു മാറ്റി നിർത്തി. പിന്നാലെ പിന്നിൽ നിന്നിറങ്ങിയ യുവാവ് ബലമായി മാല പൊട്ടിച്ചെടുത്തു.
മാല പിടിക്കാനുള്ള ശ്രമത്തിനിടെ ഉഷ റോഡിലേക്ക് വീണു. ഇതിനിടെ സ്കൂട്ടർ ഓടിച്ചിരുന്നയാൾ അടുത്തേക്ക് വാഹനം എത്തിക്കുകയും മാല പൊട്ടിച്ചയാൾ പിന്നിൽ കയറി ഇരുവരും രക്ഷപ്പെടുകയും ചെയ്തു. പരിക്കേറ്റ ഉഷയെ താലൂക്ക് സർക്കാർ ആശുപത്രിയിൽ പ്രവേശിപ്പിച്ചു. പോലീസ് സ്ഥലത്തെത്തി സിസിടിവി ദൃശ്യങ്ങൾ ഉൾപ്പെടെ ശേഖരിച്ച് അന്വേഷണം ആരംഭിച്ചിട്ടുണ്ട്.
Leave a Reply