ന്യൂസ് ഡെസ്ക്, മലയാളം യുകെ
യുകെയിൽ താമസിക്കുന്ന മലയാളികളുടെ നാട്ടിലേക്കുള്ള യാത്ര ടിക്കറ്റുകളുടെ ചിലവ് കുത്തനെ ഉയർന്നിരിക്കുകയാണ്. ഇപ്പോൾ കേരളത്തിലേക്ക് പോകാൻ കുറഞ്ഞത് ആയിരം പൗണ്ടിലധികം വിമാന ടിക്കറ്റുകൾക്ക് നൽകേണ്ട സാഹചര്യം ആണുള്ളത്. യാത്ര ചെയ്യാൻ ആഗ്രഹിക്കുന്നവരുടെ എണ്ണം വർധിച്ചതോടെ വിമാനടിക്കറ്റുകളുടെ വില കുത്തനെ ഉയർന്നതായി യാത്രക്കാരും ട്രാവൽ മേഖലയിലുള്ളവരും പറയുന്നു. മിക്ക വിമാനങ്ങളിലെയും എക്കണോമി ക്ലാസ് സീറ്റുകൾ ബുക്ക് ആയി കഴിഞ്ഞു. അതുകൊണ്ട് അവസാന നിമിഷം ടിക്കറ്റ് എടുക്കാൻ ശ്രമിക്കുന്നവർക്ക് കൂടുതൽ പണം നൽകേണ്ട അവസ്ഥയാണ്. നേരത്തെ കുറഞ്ഞ നിരക്കിൽ ലഭിച്ചിരുന്ന ടിക്കറ്റുകൾ ഇപ്പോൾ കുത്തനെ ഉയർന്നതും യാത്രക്കാരെ ആശങ്കപ്പെടുത്തുന്നു.
മുൻകാലങ്ങളിൽ പലരും ഉപയോഗിച്ചിരുന്ന ഗൾഫ് രാജ്യങ്ങൾ വഴി പോകുന്ന വിമാന സർവീസുകൾ ഇപ്പോൾ നിന്നിരിക്കുകയാണ്. കൂടുതൽ സമയം എടുക്കുന്നതും യാത്രയിലെ അസൗകര്യങ്ങളും കാരണം നേരിട്ടോ കുറവ് സ്റ്റോപ്പുകളോടെയോ ഉള്ള സർവീസുകൾക്കാണ് യാത്രക്കാർ ഇപ്പോൾ മുൻഗണന നൽകുന്നത്. ഇതിനിടെ നേരിട്ട് ഇന്ത്യയിലേക്കുള്ള സർവീസുകളിൽ വലിയ തിരക്കാണ് റിപ്പോർട്ട് ചെയ്തിരിക്കുന്നത്.
ടിക്കറ്റുകൾ വേഗത്തിൽ വിറ്റുപോകുന്നതിനാൽ മുമ്പേ തന്നെ ഇവ ബുക്ക് ചെയ്ത് ഇടേണ്ടതായി വരുന്നു. വിമാന സർവീസുകളുടെ ലഭ്യതയും യാത്രക്കാരുടെ തിരക്കുമാണ് ഇപ്പോഴത്തെ ഉയർന്ന നിരക്കുകൾക്ക് പ്രധാന കാരണമെന്ന് ട്രാവൽ രംഗത്തുള്ളവർ പറയുന്നു. യുകെയിൽ നിന്ന് നാട്ടിലേക്കുള്ള യാത്രകളിൽ അടുത്ത ദിവസങ്ങളിലും ഇതേ പ്രവണത തുടരുമെന്നാണ് സൂചന. ആവശ്യത്തിന് വിമാന സർവീസുകൾ കൂട്ടിയില്ലെങ്കിൽ ടിക്കറ്റ് നിരക്കുകൾ കുറയാൻ സാധ്യത കുറവാണെന്നും യാത്രാ മേഖലയിലുള്ളവർ വിലയിരുത്തുന്നു.
Leave a Reply