ദുബായ്: പശ്ചിമേഷ്യയിൽ യുദ്ധഭീഷണി ശക്തമായതോടെ ദുബായിൽ നിന്നുള്ള നിക്ഷേപങ്ങൾ സുരക്ഷിത കേന്ദ്രങ്ങളിലേക്ക് മാറ്റാൻ ശ്രമം ശക്തമാകുന്നു. യു.എ.ഇയിലെ ബാങ്ക് അക്കൗണ്ടുകളിൽ നിന്നുള്ള പണം സിംഗപ്പൂരിലേക്കും ഹോങ്കോങ്ങിലേക്കും മാറ്റാൻ ഇന്ത്യൻ സംരംഭകർ ഉൾപ്പെടെ നിരവധി സമ്പന്നർ ശ്രമിക്കുന്നതായി റിപ്പോർട്ടുകൾ പറയുന്നു. ദുബായിൽ താമസിക്കുന്ന രണ്ട് ഇന്ത്യൻ സംരംഭകർ തങ്ങളുടെ പ്രാദേശിക ബാങ്ക് അക്കൗണ്ടുകളിൽ നിന്ന് ഒരു ലക്ഷം ഡോളറിലേറെ സിംഗപ്പൂർ ബാങ്ക് അക്കൗണ്ടിലേക്കു മാറ്റാൻ ശ്രമിച്ചതായി വിവരമുണ്ട്.
എന്നാൽ ഇറാൻ ആക്രമണങ്ങളെ തുടർന്നുണ്ടായ സാങ്കേതിക തടസങ്ങൾ കാരണം ആദ്യഘട്ടത്തിൽ പണം മാറ്റാൻ സാധിച്ചില്ലെന്ന് റിപ്പോർട്ടുകൾ പറയുന്നു. പിന്നീട് ദുബായ് ആസ്ഥാനമായ മറ്റൊരു ബാങ്ക് വഴി പണം സിംഗപ്പൂരിലെ അക്കൗണ്ടിലേക്ക് മാറ്റാൻ കഴിഞ്ഞുവെന്ന് പേര് വെളിപ്പെടുത്താൻ ആഗ്രഹിക്കാത്ത ഒരു സംരംഭകൻ പറഞ്ഞു. ഗൾഫ് മേഖലയിലെ അനിശ്ചിതാവസ്ഥയാണ് നിക്ഷേപകരെ ആശങ്കയിലാഴ്ത്തുന്നതെന്ന് സാമ്പത്തിക വിദഗ്ധരും ചൂണ്ടിക്കാട്ടുന്നു.
നികുതി സൗകര്യവും സ്വകാര്യതയും കണക്കിലെടുത്ത് കഴിഞ്ഞ കുറച്ച് വർഷങ്ങളായി ഏഷ്യയിലെ നിരവധി സംരംഭകരും സമ്പന്ന കുടുംബങ്ങളും ദുബായിൽ വലിയ തോതിൽ നിക്ഷേപം നടത്തിയിരുന്നു. ഇപ്പോൾ അവയെ മറ്റ് സാമ്പത്തിക കേന്ദ്രങ്ങളിലേക്ക് മാറ്റാനുള്ള നീക്കമാണ് ശക്തമാകുന്നത്. തന്റെ ഏകദേശം 20 ക്ലയന്റുകൾ ദുബായിൽ നിന്നുള്ള നിക്ഷേപങ്ങൾ സിംഗപ്പൂരിലേക്ക് മാറ്റിയിട്ടുണ്ടെന്ന് അഭിഭാഷകൻ റയാൻ ലിൻ വ്യക്തമാക്കി. പശ്ചിമേഷ്യയിലെ സംഘർഷം നീണ്ടാൽ കൂടുതൽ നിക്ഷേപകർ ദുബായിൽ നിന്നു പിന്മാറാൻ സാധ്യതയുണ്ടെന്നും വിദഗ്ധർ മുന്നറിയിപ്പ് നൽകുന്നു.
Leave a Reply