തിരുവനന്തപുരം: കേരള കോൺഗ്രസ് (മാണി) വിഭാഗത്തെ വീണ്ടും യുഡിഎഫിലേക്കു കൊണ്ടുവരാൻ ശ്രമിക്കണമെന്ന് കോൺഗ്രസ് കേരള നേതൃത്വത്തിന് രാഹുൽ ഗാന്ധിയുടെ നിർദേശം. ഡൽഹിയിൽ വെള്ളിയാഴ്ച ചേർന്ന തിരഞ്ഞെടുപ്പ് അവലോകന യോഗത്തിലാണ് ഇക്കാര്യം രാഹുൽ വ്യക്തമാക്കിയത്. വരാനിരിക്കുന്ന നിയമസഭാ തിരഞ്ഞെടുപ്പിൽ സ്ഥാനാർഥി നിർണയത്തിൽ വിജയസാധ്യത മാത്രമേ മാനദണ്ഡമാക്കേണ്ടതുള്ളുവെന്നും ഹൈക്കമാൻഡ് നേതാക്കളോട് നിർദേശിച്ചു.
ജോസ് കെ. മാണി യുഡിഎഫിലേക്കു തിരിച്ചെത്തിയാൽ മധ്യകേരളത്തിൽ വലിയ രാഷ്ട്രീയ മുന്നേറ്റം സാധ്യമാകുമെന്നാണ് രാഹുൽ ഗാന്ധിയുടെ വിലയിരുത്തൽ. അതിനാൽ അദ്ദേഹത്തെ മുന്നണിയിലേക്കു തിരികെ കൊണ്ടുവരാൻ ആവശ്യമായ എല്ലാ ശ്രമങ്ങളും നടത്തണമെന്ന് കേരളത്തിലെ നേതാക്കളോട് രാഹുൽ ആവശ്യപ്പെട്ടു. മധ്യകേരളത്തിലെ രാഷ്ട്രീയ സാഹചര്യം കണക്കിലെടുത്താണ് ഹൈക്കമാൻഡ് ഈ നിലപാട് സ്വീകരിച്ചതെന്നാണ് സൂചന.
എന്നാൽ, ജോസ് കെ. മാണി എൽഡിഎഫിൽ തന്നെ ഉറച്ചുനിൽക്കുമെന്ന നിലപാടിലാണ്. യുഡിഎഫിലേക്കുള്ള വാതിൽ ഇനി തുറക്കാനില്ലെന്നും, ഇടതുമുന്നണിയിൽ തുടരുന്നതിൽ ഒരു മാറ്റവുമില്ലെന്നും അദ്ദേഹം കഴിഞ്ഞ ദിവസം ആവർത്തിച്ചു പറഞ്ഞു. അതേസമയം, ജോസ് വിഭാഗം ഇല്ലാതെയും ക്രൈസ്തവ സമൂഹത്തിൽ യുഡിഎഫിന് മുന്നേറ്റം സാധിച്ചിട്ടുണ്ടെന്ന വിലയിരുത്തലും മുന്നണിക്കുള്ളിലുണ്ട്. ജോസ് കെ. മാണിയെ തിരികെ കൊണ്ടുവരാനുള്ള ശ്രമം മുന്നണിയിലും പാർട്ടിയിലും ഭിന്നത സൃഷ്ടിക്കുമോയെന്ന ആശങ്കയും ചില നേതാക്കൾ ഉയർത്തുന്നുണ്ട്.
Leave a Reply