ന്യൂസ് ഡെസ്ക് മലയാളം യുകെ
മെൽബണിലെ ആർ എം ഐ ടി യിൽ ഗവേഷണ വിദ്യാർഥിനിയായ ശ്രുതിയുടേത് ശാസ്ത്രത്തിനും ഐടി മേഖലയ്ക്കും മുതൽക്കൂട്ടാവുമെന്നുറപ്പുള്ള കണ്ടെത്തൽ. എഞ്ചിനീയേഴ്സ് ഓസ്ട്രേലിയ എന്ന നാഷണൽ പ്രൊഫഷണൽ അസോസിയേഷൻ ആണ് ശ്രുതിയെ മികച്ച 30 ഇന്നോവേറ്റീവ് സയന്റിസ്റ്റ്കളിൽ ഒരാളായി തെരഞ്ഞെടുത്തത്. പ്രശസ്തി പത്രവും ഫലകവും അടങ്ങുന്ന സമ്മാനം തനിക്ക് ലഭിച്ചതിൽ തനിക്കും ടീമിനും സന്തോഷവും അഭിമാനവും ഉണ്ടെന്ന് ശ്രുതി പറഞ്ഞു. ഈ അംഗീകാരം മുന്നോട്ടുള്ള യാത്രയ്ക്ക് ഏറെ സഹായിക്കും എന്നും ശ്രുതി പറഞ്ഞു.
ഇലക്ട്രോണിക്സ് ആൻഡ് കമ്യൂണിക്കേഷൻ വിഭാഗത്തിൽ മൂന്ന് പേരാണ് പട്ടികയിൽ ഇടം നേടിയത്. 10 കാറ്റഗറികളിൽ നിന്നാണ് ശാസ്ത്രജ്ഞരെ തെരഞ്ഞെടുക്കുക.ഇലക്ട്രോണിക്സ് എഞ്ചിനീയറിംഗിൽ പി എച്ച് ഡി ചെയ്യുന്ന ശ്രുതി മെറ്റീരിയൽ സയൻസിനാണ് പ്രാധാന്യം കൊടുക്കുന്നത്.
സിലിക്കോൺ എന്ന ത്രീ ഡയമെൻഷനൽ മെറ്റീരിയലിന് പകരം വെക്കാൻ ആവുംവിധം ബ്ലാക്ക് ഫോസ് ഫറസ് എന്ന റ്റു ഡയമെൻഷനൽ വസ്തുവിന്റെ പ്രത്യേകതകൾ കണ്ടെത്തുകയാണ് ശ്രുതി ചെയ്തത്. ഭാവിയിൽ സിലിക്കൺ ലഭ്യമല്ലാതാവുന്നതിനെ പ്രതിരോധിക്കാൻ ബ്ലാക്ക് ഫോസ് ഫറസിന് കഴിയും, 2021ലെ ന്യൂജനറേഷൻ കമ്പ്യൂട്ടറുകൾക്ക് ആവശ്യമായ കുറച്ചുകൂടി ചെറിയ ചിപ്പുകളും മറ്റും നിർമ്മിക്കാനും, ഒരു ത്രീ ഡയമെൻഷനൽ വസ്തുവിനുണ്ടാകുന്ന എനർജി നഷ്ടവും, വേഗത കുറവും പരിഹരിക്കാനും ബ്ലാക്ക് ഫോസ്ഫറസിന് കഴിയും.
തന്റെ റിസർച്ച് ഫണ്ടമെന്റൽ മേഖലയിൽ എത്തിയിട്ട് ഉള്ളൂവെന്നും കൂടുതൽ വികസിപ്പിച്ചുകൊണ്ടുള്ള പ്രൊഡക്ട് ആക്കി മാർക്കറ്റിൽ ഇറക്കണമെന്നും ശ്രുതി പറഞ്ഞു.
ഈ വസ്തു വളരെ പെട്ടെന്ന് ദ്രവിച്ചു പോകും എന്നത് പ്രധാനപ്പെട്ട വെല്ലുവിളിയാണ്, എന്നാൽ അതിനെ നേരിടാനായി പാച്ചിവേഷൻ ടെക് നിക് എന്ന വിദ്യയും ശ്രുതി മുന്നോട്ടുവെക്കുന്നു. ട്രാൻസിസ്റ്ററുകൾ ഉപയോഗിച്ച് ഡെമോൺസ്ട്രേഷൻ നടത്തിയതിനാൽ മനസ്സിലാക്കാൻ കൂടുതൽ എളുപ്പമാണ്.ഐബിഎം, എച്ച്പി സാംസങ്, ഇന്റൽ തുടങ്ങിയ കമ്പനികൾ വളരെ കാലമായി സിലിക്കോണിന് പകരം വെക്കാവുന്ന പുതിയ വസ്തുവിനായുള്ള അന്വേഷണത്തിലായിരുന്നു. ശ്രുതിയുടെ കണ്ടെത്തൽ ഇതിനൊരു പരിഹാരമാകും.
ശ്രുതിയുടെ മേഖലയിൽ സമാനമായ രീതിയിൽ അൾട്രാ ലാർജ് പൈസൊഇലക്ട്രിക് ഫിലിം കണ്ടെത്തിയ ആർ എം ഐ ടി യൂണിവേഴ്സിറ്റിയിലെ ഡോക്ടർ നീതു സൈദ് ആണ് പട്ടികയിൽ ഇടം നേടിയ രണ്ടാമത്തെ വ്യക്തി. യുദ്ധ മേഖലയിൽ ആശുപത്രികൾ മറ്റു സുരക്ഷാ പ്രാധാന്യമുള്ള വസ്തുക്കൾ എന്നിവയെ ആർട്ടിഫിഷ്യൽ ഇന്റലിജൻസ് ഉപയോഗിച്ച് കണ്ടെത്താനും ആക്രമണങ്ങളിൽ നിന്ന് ഒഴിവാക്കാനും സാധിക്കുന്ന സാങ്കേതിക വിദ്യ കണ്ടെത്തിയ സ്റ്റീഫൻ ബോൺസ്റ്റീൻ ആണ് പട്ടികയിലെ മൂന്നാമൻ.
Leave a Reply