ന്യൂസ് ഡെസ്ക്, മലയാളം യുകെ
ഇംഗ്ലണ്ടിലെ വെസ്റ്റ് സസെക്സിലെ സ്റ്റെയ്നിങ്ങിന് സമീപം നടന്ന ബിഗ് ചർച്ച് ക്രൈസ്തവ സംഗീതോത്സവത്തിനിടെ വലിയ സൈൻബോർഡ് തകർന്ന് വീണ് 41 വയസ്സുകാരൻ മരിച്ചു. ഈസ്റ്റ് സസെക്സിലെ ഈസ്റ്റ്ബോണിൽ നിന്നുള്ളയാളാണ് മരിച്ചത്. സംഭവത്തിൽ ആറുപേർ കൂടി പരിക്കേറ്റ് ആശുപത്രിയിൽ ചികിത്സ തേടി.
വെള്ളിയാഴ്ച ഉച്ചയ്ക്കുശേഷമാണ് അപകടമുണ്ടായത്. മരിച്ചയാളുടെ കുടുംബാംഗങ്ങളെ വിവരം അറിയിച്ചിട്ടുണ്ടെന്നും പ്രത്യേക പൊലീസ് സംഘം അവർക്കു പിന്തുണ നൽകുകയാണെന്നും സസെക്സ് പൊലീസ് അറിയിച്ചു. അപകടത്തിന്റെ സാഹചര്യങ്ങൾ അന്വേഷിച്ചുവരികയാണെന്നും സംഭവവുമായി ബന്ധപ്പെട്ട വിവരങ്ങളോ ദൃശ്യങ്ങളോ ഉള്ളവർ മുന്നോട്ടുവരണമെന്നും പൊലീസ് അഭ്യർഥിച്ചു.
അപകടത്തെ തുടർന്ന് ആയിരക്കണക്കിന് ആളുകൾ പങ്കെടുത്തിരുന്ന ബിഗ് ചർച്ച് ഫെസ്റ്റിവൽ ഉടൻ റദ്ദാക്കി. ഞായറാഴ്ചവരെ തുടരാനിരുന്ന പരിപാടിയുടെ ശേഷിക്കുന്ന ദിവസങ്ങളും ഒഴിവാക്കിയതായി സംഘാടകർ അറിയിച്ചു. സംഭവം ഹെൽത്ത് ആൻഡ് സേഫ്റ്റി എക്സിക്യൂട്ടീവിനും പ്രാദേശിക ഭരണകൂടത്തിനും റിപ്പോർട്ട് ചെയ്തിട്ടുണ്ട്.
Leave a Reply