ന്യൂസ് ഡെസ്ക് മലയാളം യുകെ ന്യൂസ്

ലണ്ടൻ: നേഴ്‌സിംഗ് ആൻഡ് മിഡ്‌വൈഫറി കൗൺസിൽ, പ്രീ-രജിസ്‌ട്രേഷൻ എജ്യുക്കേഷൻ പ്രോഗ്രാം സ്റ്റാൻഡേർഡുകളിലെ മാറ്റങ്ങൾക്ക് അംഗീകാരം നൽകി. നേഴ്‌സിംഗ് മേഖലയിലെ പങ്കാളിത്തം വിപുലമാക്കുന്നതിന്റെ ഭാഗമായാണ് നടപടി. സിമുലേറ്റഡ് പ്രാക്ടീസ് ലേണിംഗിനായി നേഴ്സിംഗ് വിദ്യാർത്ഥികൾക്ക് ലഭിക്കുന്ന മണിക്കൂറുകളുടെ എണ്ണം ഇരട്ടിയാക്കുന്നതും, കൂടുതൽ ആളുകളെ പ്രോഗ്രാമിലേക്ക് കൊണ്ടുവരുന്നതിന്റെ ഭാഗമായാണ് നടപടി.

യുകെ യൂറോപ്യൻ യൂണിയൻ വിട്ടതിനെ തുടർന്നാണ് സുപ്രധാനമായ മാറ്റങ്ങൾ കൈകൊണ്ടത്. ഇതനുസരിച്ച് എൻഎംസി ഇനി യൂറോപ്യൻ യൂണിയൻ നിയന്ത്രണങ്ങൾ പാലിക്കാൻ ബാധ്യസ്ഥരല്ല. തുടർന്ന് നടന്ന മീറ്റിങ്ങിൽ കാലഹരണപ്പെട്ട നടപടികളും പതിവുകളും അടിയന്തിരമായി ഒഴിവാക്കണമെന്നും, മാറ്റങ്ങൾ കാലത്തിനൊത്ത രീതിയിൽ ആയിരിക്കുമെന്നും എൻഎംസിയിലെ മുതിർന്ന നേഴ്സിംഗ് വിദ്യാഭ്യാസ ഉപദേഷ്ടാവ് സ്യൂ വെസ്റ്റ് പറഞ്ഞു.

പ്രവേശനത്തിനുള്ള അനാവശ്യ തടസങ്ങൾ ഒഴിവാക്കി കൂടുതൽ ആളുകളെ കോഴ്സുകളിലേക്ക് കൊണ്ടുവരികയും ചെയ്യാൻ ഈ നടപടികൾ കൊണ്ട് കഴിയുമെന്നും അവർ കൂട്ടിചേർത്തു. 2022 ജൂലൈ 13 നും സെപ്റ്റംബർ 21 നും ഇടയിൽ നടന്ന 10 ആഴ്ചത്തെ പബ്ലിക് കൺസൾട്ടേഷനെ തുടർന്നാണ് തീരുമാനം. ശക്തമായ പ്രവേശന നടപടിക്രമങ്ങൾ സജ്ജീകരിക്കുന്നതിന് വിദ്യാഭ്യാസ സ്ഥാപനങ്ങൾക്ക് കൂടുതൽ അവസരം നൽകുന്നതാണ് തീരുമാനം.