ന്യൂസ് ഡെസ്ക് മലയാളം യുകെ ന്യൂസ്
ലണ്ടൻ: സ്കോട്ട്ലാൻഡിലെ ഏറ്റവും പ്രായം കൂടി വ്യക്തി തന്റെ 110-ാം ജന്മദിനം ഇന്ന് ആഘോഷിക്കുകയാണ്. അതുകൊണ്ട് തന്നെ ഇത്രയും കാലത്തെ ജീവിതത്തിന്റെ രഹസ്യം എന്തെന്നുള്ള ചർച്ചയും ഇതിനോടകം തന്നെ സജീവമായിരിക്കുകയാണ്. ഇപ്പോഴിതാ അതിന്റെ പിന്നിലെ കാരണം തുറന്നുപറഞ്ഞു രംഗത്ത് വന്നിരിക്കുകയാണ് സ്കോട്ട്ലാൻഡിന്റെ മുത്തശ്ശി. 1913 ലാണ് മരിയോൺ ഡോസൺ ജനിച്ചത്. ലോകത്തെ പിടിച്ചു കുലുക്കിയ ലോകമഹായുദ്ധങ്ങൾ, സ്പാനിഷ് ഫ്ലൂ പകർച്ചവ്യാധി, കോവിഡ് -19 എന്നിവയുടെ നേർസാക്ഷികൂടിയാണ് മരിയോൺ.
സ്കോട്ട്ലാൻഡിലെ റെൻഫ്രൂഷയറിലായിരുന്നു താമസം. 1941 അവൾ വിവാഹിതയായി. 100 വയസു പിന്നിട്ട ജീവിതത്തിൽ മക്കളെയും മക്കളുടെ മക്കളെയും കാണുവാൻ ലഭിച്ചത് വലിയ ഭാഗ്യമാണെന്നും, മദ്യത്തിൽ നിന്ന് അകന്ന് നിന്നതാണ് ആയുസിന്റെ പിന്നിലെ രഹസ്യമെന്നും മരിയോൺ വ്യക്തമാക്കി. ‘ഒരിക്കലും മദ്യം ഉപയോഗിച്ചിട്ടില്ല. അതുകൊണ്ടാണ് ഞാൻ ഇത്രയുംകാലം ജീവിച്ചത്. ആകെ ഉപയോഗിക്കുന്നത് നാരങ്ങാവെള്ളമാണ്. ഞാൻ ജനിച്ചത് ഈ നാട്ടിലാണ്. ഞാൻ സ്കൂളിൽ പോയതും, കളിക്കാൻ പോയതുമെല്ലാം ഇവിടെയാണ്. എനിക്ക് പ്രിയപ്പെട്ട ഒരിടമാണ് ഇവിടം’- മരിയൻ പറഞ്ഞു.
ജീവിതത്തിൽ ഇത്രയും കാലത്തിനിടയിൽ കഴിഞ്ഞ വർഷം റെൻഫ്രൂഷയറിലെ സ്വന്തം വീട്ടിൽ നിന്ന് അടുത്തുള്ള മൊറാർ ലിവിംഗ് കെയർ ഹോമിലേക്ക് മാത്രമാണ് മാറിയിട്ടുള്ളത്. വീട്ടിലെ ഏതു കാര്യങ്ങളിലും മരിയോൺ സജീവമായി ഇടപെടുന്നുണ്ട്. മരിയോൺ ഇവിടെ ഉണ്ടായിരിക്കുന്നത് വളരെ സന്തോഷമുള്ള കാര്യമാണെന്നും, മാത്രമല്ല അവൾ തന്റെ എല്ലാ കമ്മ്യൂണിറ്റി ബന്ധങ്ങളും കാത്തു സൂക്ഷിക്കുന്നതിൽ പ്രത്യേകം ശ്രദ്ധിക്കാറുണ്ടെന്നും ഹോം മാനേജർ കാരെൻ ആംസ്ട്രോംഗ് ചൂണ്ടിക്കാട്ടുന്നു. ഇതിനോടകം തന്നെ മരിയോണിന്റെ ജീവിതം കേന്ദ്രീകരിച്ചു സമീപത്തെ സ്കൂൾ കുട്ടികൾ ഒരു നാടകം അവതരിപ്പിച്ചിട്ടുണ്ട്.
Leave a Reply