പമ്പാനദിയില്‍ ഒഴുക്കില്‍പ്പെട്ടു വിദ്യാര്‍ത്ഥിയെ കാണാതായി. തൃക്കൊടിത്താനം മണികണ്ഠവയല്‍ കടവുങ്കല്‍ സജീവ്- ശ്രീജ ദമ്പതികളുടെ മകള്‍ സൂര്യ സജീവ് (18) നെയാണ് വടശേരിക്കര പമ്പയില്‍ ഒഴുക്കില്‍പ്പെട്ടത് കാണാതായത്. ഉച്ചക്ക് 12 മണിയോടെയായിരുന്നു സംഭവം. രാവിലെ സഹോദരനോടൊപ്പം അമ്മയുടെ സഹോദരിയുടെ വീട്ടില്‍ പോയതാണ് സൂര്യ. വീടിനോട് ചേര്‍ന്നുള്ള ആറ്റില്‍ കുളിക്കാനായി ഒന്നിച്ചിറങ്ങിയതായിരുന്നു സഹോദരങ്ങള്‍. അതിനിടെ സഹോദരന്‍ സുധി ഒഴുക്കില്‍പ്പെടുന്നത് കണ്ട് രക്ഷിക്കാന്‍ പിന്നാലെ ഇറങ്ങിയ സൂര്യ പിന്നീട് ഒഴുക്കില്‍ പെടുകയായിരുന്നു.
എല്ലാ വിഷയത്തിനും എപ്ലസ് നേടി പ്ലസ്ടു പരീക്ഷയില്‍ ഉന്നത വിജയം നേടിയ സൂര്യ ക്രിസ്തു ജ്യോതി കോളേജില്‍ ഒന്നാം വര്‍ഷം ഡിഗ്രിക്ക് ചേര്‍ന്നിരുന്നു. തിങ്കളാഴ്ച ക്ലാസ് ആരംഭിക്കാനിരിക്കുകയായിരുന്നു. എസ്.എസ്.എല്‍.സി പരീക്ഷയ്ക്കും എല്ലാ വിഷയത്തിനും ഉന്നത വിജയം കരസ്ഥമാക്കിയിരുന്നു. തൃക്കൊടിത്താനം എസ്.എന്‍.ഡി.പി 59-ാം നമ്പര്‍ ശാഖയുടെ കുമാരിസംഘത്തിന്റെ സെക്രട്ടറി കൂടിയായിരുന്നു സൂര്യ. കൂടാതെ, കലാകായിക മത്സരങ്ങളില്‍ എല്ലാം ജേതാവായിരുന്നു. ഫയര്‍ഫോഴ്സിന്റെയും നാട്ടുകാരുടെയും സഹായത്തോടെ രാത്രി വൈകിയും പമ്പയാറ്റില്‍ തിരച്ചില്‍ നടത്തിയെങ്കിലും ഒഴുക്കില്‍ പെട്ട വിദ്യാര്‍ത്ഥിനിയെ കണ്ടെത്താന്‍ കഴിഞ്ഞില്ല.
Leave a Reply