സൂര്യ ടിവി പരിപാടിയിലെ മമ്മൂട്ടിയെക്കുറിച്ചുള്ള പരാമര്‍ശത്തിന് നടി അന്ന രേഷ്മ രാജനെ മമ്മൂട്ടി ആരാധകര്‍ സോഷ്യല്‍ മീഡിയയില്‍ ആക്രമിച്ച സംഭവത്തില്‍ പ്രതികരണവുമായി റിമ കല്ലിങ്കല്‍. 65 വയസുള്ള നടന് തന്റെ അച്ഛനായി അഭിനയിക്കാന്‍ കഴിയും എന്ന് പറഞ്ഞതിനാണോ ലിച്ചി പരിഹസിക്കപ്പെടുന്നതെന്ന് റിമ ചോദിക്കുന്നു. മമ്മൂട്ടിക്ക് ആ വേഷം അഭിനയിക്കാനാവില്ലെന്നാണോ രേഷ്മയെ പരിഹസിക്കുന്നവര്‍ കരുതുന്നതെന്നും റിമ ഫേസ്ബുക്ക് പോസ്റ്റില്‍ ചോദിക്കുന്നു.
കൗരവര്‍ ഓര്‍മ്മയില്ലേ? അതുപോലെ മമ്മൂട്ടിക്ക് നിസാരമായി അത്തരം റോളുകള്‍ ചെയ്യാനാകും. അദ്ദേഹം വളരെ ഗംഭീ നടനാണ്. 70കാരനായും 30കാരനായും അഭിനയിച്ചാല്‍ അദ്ദേഹത്തെ നാം സ്വീകരിക്കും. ശോഭന, ഉര്‍വശി, രേവതി എന്നിവരും അങ്ങനെ ചെയ്തിട്ടുള്ളവരാണ്. പ്രായ, ലിംഗഭേദമില്ലാതെ കാപട്യങ്ങളില്ലാതെ ഇത്തരം കാര്യങ്ങള്‍ അംഗീകരിച്ചിട്ടുള്ളവരാണ് നാം. എന്നിട്ടും ലിച്ചിയെ ട്രോള്‍ ചെയ്ത് നമ്മുടെ ഈ പേര് കളയുന്നത് ആരാണ്. എന്ത് പ്രശ്‌നമാണ് ഇവിടെയുള്ളത്? എന്തിനാണ് ലിച്ചി മാപ്പ് പറയുന്നത്? എന്നാണ് ഫേസ്ബുക്ക് പോസ്റ്റില്‍ റിമ ഉന്നയിക്കുന്ന ചോദ്യം.
മമ്മൂട്ടിയും ദുല്‍ഖറുമൊത്ത് അഭിനയിച്ചാല്‍ ആരെ നായകനാക്കും എന്ന ചോദ്യത്തിന് നല്‍കിയ മറുപടിയാണ് ലിച്ചിക്ക് വിനയായത്. ദുല്‍ഖര്‍ നായകനായി അഭിനയിച്ചോട്ടെ മമ്മൂട്ടി അച്ഛനും എന്ന് നല്‍കിയ മറുപടിയില്‍ പ്രകോപിതരായ മമ്മൂട്ടി ആരാധകര്‍ ലിച്ചിയുടെ പേജില്‍ തെറിവിളിയുമായെത്തി. പിന്നീട് വിശദീകരണവുമായി ഫേസ്ബുക്ക് ലൈവ് നടത്തിയ ലിച്ചി പൊട്ടിക്കരയുകയും ചെയ്തിരുന്നു.
Leave a Reply