ന്യൂസ് ഡെസ്ക് മലയാളം യുകെ
യുകെയുടെ പല ഭാഗങ്ങളിലും വീശിയടിച്ച ഹെങ്ക് കൊടുങ്കാറ്റ് വ്യാപകമായി നാശം വിതച്ചു. ഇംഗ്ലണ്ടിലും വെയിൽസിലുമാണ് പ്രധാനമായും കാറ്റ് വീശിയടിച്ചത്. പലഭാഗങ്ങളിലും കനത്ത മഴയെ തുടർന്ന് വെള്ളപ്പൊക്കവും ഉണ്ടായതായാണ് റിപ്പോർട്ടുകൾ . ഒട്ടേറെ സ്ഥലങ്ങളിൽ ഗതാഗതം തടസ്സപ്പെട്ടതിനൊപ്പം വൈദ്യുതി മുടങ്ങിയതായും ഉള്ള റിപ്പോർട്ടുകൾ പുറത്തുവന്നു.
സെവോണിലെ എക്സെറ്റർ എയർപോർട്ടിൽ ആണ് ഏറ്റവും വേഗത്തിൽ കാറ്റ് വീശിയടിച്ചതായി രേഖപ്പെടുത്തിയത്. മണിക്കൂറിൽ 81 മൈൽ വേഗത്തിലാണ് ഇവിടെ കാറ്റ് താണ്ഡവം ആടിയത്. മരങ്ങൾ കട പുഴകിയതു കാരണവും വൈദ്യുതി ലൈനിലെ തടസ്സങ്ങൾ മൂലവും യാത്ര ചെയ്യരുതെന്ന് നിരവധി റെയിൽവേ കമ്പനികൾ യാത്രക്കാർക്ക് മുന്നറിയിപ്പ് നൽകിയിട്ടുണ്ട് .
രാജ്യത്ത് 38,000 ഉപഭോക്താക്കൾക്ക് എങ്കിലും വൈദ്യുതി മുടങ്ങിയതായാണ് എനർജി നെറ്റ്‌വർക്ക് അസോസിയേഷൻ അറിയിച്ചത്. റോഡ്, റെയിൽ പാതകളിൽ വെള്ളപ്പൊക്കം അതിരൂക്ഷമായി തുടരുകയാണ്. വെള്ളപ്പൊക്കം ഉണ്ടാകാൻ സാധ്യതയുള്ള നദീതീരങ്ങളിൽ താമസിക്കുന്നവർ മുൻകരുതൽ എടുക്കണമെന്ന് എൻവയോൺമെൻറ് ഏജൻസി മുന്നറിയിപ്പ് നൽകിയിട്ടുണ്ട് . പലരെയും അപകടകരമായ സാഹചര്യങ്ങളിൽ നിന്ന് പോലീസും ഫയർഫോഴ്സും രക്ഷപ്പെടുത്തുന്നതിന്റെ വാർത്തകൾ പല സ്ഥലങ്ങളിൽ നിന്നും റിപ്പോർട്ട് ചെയ്യപ്പെടുന്നുണ്ട്. വെസ്റ്റ് മിഡ്ലാന്റിൽ പോലീസ് വെള്ളപ്പൊക്കത്തിൽ നിന്ന് മൂന്ന് വയസ്സുള്ള കുട്ടിയെയും ഡ്രൈവറിനെയും രക്ഷിച്ചു. ലണ്ടൻ പാഡിംഗ്ടണിനും സൗത്ത് വെയിൽസിനും ഇടയിലുള്ള ട്രെയിൻ സർവ്വീസുകൾ സ്വിന്ഡനും ബ്രിസ്റ്റോൾ പാർക്ക്‌വേയ്ക്കും ഇടയിൽ വെള്ളപ്പൊക്കം കാരണം വഴിതിരിച്ചുവിട്ടു . അതേസമയം കവൻട്രിക്കും ബർമിംഗ്ഹാം ഇന്റർനാഷണലിനും ഇടയിലുള്ള റെയിൽവേ പാതകൾ വെള്ളപ്പൊക്കത്തിൽ തകർന്നു.
Leave a Reply