കൂത്തുപറമ്പ് ∙ മൊബൈൽ ഫോണിൽ വിഡിയോ ചിത്രീകരിക്കാനുള്ള ‘ടിക് ടോക്’ സംബന്ധിച്ച പരിശീലന ക്യാംപിൽ പങ്കെടുപ്പിക്കാനെന്ന പേരിൽ പ്ലസ്ടു വിദ്യാർഥിനിയെ തിരുവനന്തപുരത്തെത്തിച്ചു പീഡിപ്പിച്ച സംഭവത്തിൽ യുവാവ് അറസ്റ്റിൽ. ആലപ്പുഴ നൂറനാട്ടെ അരുൺ നിവാസിൽ എസ്.അരുണിനെയാണ് (20) കൂത്തുപറമ്പ് പൊലീസ് അറസ്റ്റ് ചെയ്തത്.

ഒരു വർഷം മുൻപു മറ്റൊരു യുവാവും പീഡിപ്പിച്ചതായി പെൺകുട്ടി വെളിപ്പെടുത്തിയതിന്റെ അടിസ്ഥാനത്തിൽ കണ്ണൂർ ശിവപുരം വെമ്പടിത്തട്ടിലെ ലിജിൽ നിവാസിൽ എം.ലിജിലിനെയും (26), ഇയാൾക്കൊപ്പം പെൺകുട്ടിയെ ആളൊഴിഞ്ഞ പ്രദേശത്ത് എത്തിച്ചതിനു സുഹൃത്ത് ശിവപുരം കരുന്നിയിലെ എമ്പയിൽ ഹൗസിൽ കെ.സന്തോഷിനെയും (29) അറസ്റ്റ് ചെയ്തു. ടിക് ടോക് വിഡിയോ വഴിയാണു കൂത്തുപറമ്പ് സ്വദേശിനിയെ അരുൺ പരിചയപ്പെട്ടത്.