ന്യൂസ് ഡെസ്ക്, മലയാളം യുകെ
യുകെയിൽ മലയാളി കുടുംബങ്ങളുടെ എണ്ണം കൂടി വരുന്നതിന് അനുസരിച്ച് ഒരു സമൂഹമന്ന നിലയിൽ അവരുടെ ഇടയിലുള്ള പ്രശ്നങ്ങൾ വർദ്ധിക്കുന്നതായുള്ള വാർത്തകളാണ് ദിനംപ്രതി വന്നുകൊണ്ടിരിക്കുന്നത്. ലിങ്കണിൽ ഭർത്താവ് ഭാര്യയെ കുത്തി പരിക്കേൽപ്പിച്ച സംഭവം ആണ് ഏറ്റവും പുതിയതായി ഇത്തരത്തിലുള്ള സംഭവം. 51 വയസ്സുകാരനായ ഭർത്താവ് ഭാര്യയെ കുത്തി പരിക്കേൽപ്പിക്കുകയായിരുന്നു.
പ്രതിയെ ഉടനെ തന്നെ കോടതിയിൽ ഹാജരാക്കും എന്നാണ് പുറത്തുവരുന്ന വിവരങ്ങൾ സൂചിപ്പിക്കുന്നത്. തിരുവല്ല മാന്നാർ സ്വദേശികളായ ഇവർ രണ്ടുവർഷം മുൻപ് മാത്രമാണ് യുകെയിൽ എത്തിയത്. സംഭവത്തിന് ദൃക്സാക്ഷിയായ കൗമാരക്കാരിയായ മകളുടെ മൊഴി കേസിൽ നിർണ്ണായകമാകുമെന്നാണ് അറിയാൻ സാധിച്ചത്. കേസ് കോടതിയിൽ എത്തുന്ന സാഹചര്യത്തിൽ ഗാർഹിക പീഡനം പരാതിയായതിനാൽ കടുത്ത ശിക്ഷയാണ് ഇയാളെ കാത്തിരിക്കുന്നത്. അതുകൂടാതെ പുതിയ നിയമമനുസരിച്ച് യുകെയിൽ നിന്നുള്ള നാടുകടത്തലും നേരിടേണ്ടി വരും.
രണ്ട് മക്കളാണ് ദമ്പതികൾക്ക് ഉള്ളത്. ഒരാൾ യുകെയിൽ മാതാപിതാക്കളോടൊപ്പവും മറ്റൊരാൾ നാട്ടിലും ആണ് ഉള്ളത് . പിതാവ് ജയിലിലും മാതാവ് ഗുരുതരാവസ്ഥയിൽ ആശുപത്രിയിലും ആയതോടെ ഇവരുടെ കുട്ടിയുടെ കാര്യം ആണ് കഷ്ടത്തിലായത്. നിലവിൽ കുട്ടിയെ പോലീസ് സോഷ്യൽ കെയർ സംരക്ഷണത്തിൽ ആക്കിയിരിക്കുകയാണ് .
Leave a Reply