ന്യൂസ് ഡെസ്ക്, മലയാളം യുകെ
ഡെവോണിൽ സ്കൈ ഡൈവിങ്ങിനിടെ രണ്ട് പേർ ദാരുണമായി കൊല്ലപ്പെട്ടെന്ന റിപ്പോർട്ടുകൾ പുറത്തുവന്നു. അപകടത്തെ തുടർന്ന് വെള്ളിയാഴ്ച ഉച്ചയ്ക്ക് ഒരു മണിയോടു കൂടി ഹോണിറ്റണിനടുത്തുള്ള ഡങ്കസ്‌വെൽ എയർഡ്രോമിലേയ്ക്ക് അടിയന്തിര സേവനങ്ങളെ വിളിപ്പിച്ചതായി കോൺവാൾ പോലീസ് പറഞ്ഞു. അപകടത്തിൽ പെട്ടവർ സ്കൈഡൈവർമാർ ആണെന്നും ഇരുവരും സംഭവസ്ഥലത്ത് തന്നെ മരിച്ചതായി സ്ഥിരീകരിച്ചതായും പോലീസ് അറിയിച്ചു. അവരുടെ കുടുംബങ്ങളെ വിവരം അറിയിച്ചിട്ടുണ്ട്.
സംഭവത്തെ കുറിച്ച് അറിയുന്നവർ വിവരം നൽകണമെന്ന് പോലീസ് അഭ്യർത്ഥിച്ചു. ഡെവണിന്റെ സോമർസെറ്റുമായുള്ള അതിർത്തിയോട് ചേർന്ന് ബ്ലാക്ക്ഡൗൺ ഹിൽസ് പ്രദേശത്തുള്ള ഡങ്കസ്‌വെൽ എയറോഡ്രോം ഒരു മുൻ ആർ‌എ‌എഫ് സൈറ്റാണ്. എയറോഡ്രോമിന്റെ വെബ്‌സൈറ്റ് പ്രകാരം രണ്ടാം ലോകമഹായുദ്ധസമയത്ത് യുഎസ് നാവിക താവളമായി സ്ഥാപിച്ച സമുദ്രനിരപ്പിൽ നിന്ന് 839 അടി ഉയരത്തിൽ ഉള്ള എയർ ഫീൽഡാണിത് . സ്ഥിതിവിവരക്കണക്കനുസരിച്ച് യുകെയിൽ സ്കൈഡൈവിംഗ് മരണങ്ങൾ അപൂർവമാണ്. ടാൻഡം ജമ്പുകൾ പ്രത്യേകിച്ച് സുരക്ഷിതമാണ് എന്നാണ് ഈ രംഗത്തെ വിദഗ്ദ്ധർ അഭിപ്രായപ്പെടുന്നത് . 2001 മുതൽ 2020 വരെയുള്ള കാലയളവിൽ യുകെയിൽ ടാൻഡം സ്കൈഡൈവ് മരണങ്ങളൊന്നും ഉണ്ടായിട്ടില്ലെന്ന് ബ്രിട്ടീഷ് പാരച്യൂട്ട് അസോസിയേഷൻ മുമ്പ് പറഞ്ഞിരുന്നു.
Leave a Reply