ന്യൂസ് ഡെസ്ക് മലയാളം യുകെ

ബ്രിട്ടനിലെ കോവിഡ് കേസുകളുടെ എണ്ണം ഒരാഴ്ചയ്ക്കുള്ളിൽ 12 ശതമാനം വർദ്ധിച്ചതായുള്ള കണക്കുകൾ പുറത്തുവന്നു. ഈ മാസം രണ്ടാം തവണയാണ് പ്രതിദിന കോവിഡ് കേസുകളുടെ എണ്ണം ഒരു ലക്ഷത്തിന് മുകളിലേക്ക് ഉയരുന്നത്. ഔദ്യോഗിക കണക്കുകൾ പ്രകാരം കഴിഞ്ഞ 24 മണിക്കൂറിനുള്ളിൽ 102,483 പേർക്കാണ് വൈറസ് ബാധ രേഖപ്പെടുത്തിയത്. ഒരാഴ്ചമുമ്പ് പ്രതിദിന രോഗവ്യാപന നിരക്ക് 91,345 ആയിരുന്നു.

രോഗവ്യാപനം കൂടുന്നതിനൊപ്പം തന്നെ മരണനിരക്കും വർദ്ധിച്ചിട്ടുണ്ട്. ഇന്നലെ 194 മരണങ്ങളാണ് രാജ്യത്ത് റിപ്പോർട്ട് ചെയ്യപ്പെട്ടത്. ഒരാഴ്ച മുമ്പുള്ള കണക്കുകളുമായി താരതമ്യം ചെയ്യുമ്പോൾ മരണനിരക്കിൽ 27 ശതമാനം വർദ്ധനവാണ് ഉണ്ടായിരിക്കുന്നത്. ഒരാഴ്ചയ്ക്കുള്ളിൽ ആശുപത്രി പ്രവേശനം 30 ശതമാനം വർദ്ധിച്ചതിനെ ആശങ്കയോടെയാണ് ആരോഗ്യ വിദഗ്ധർ വിലയിരുത്തുന്നത്.

യുകെയിൽ ഉടനീളം കോവിഡ് നിയന്ത്രണങ്ങൾ പിൻവലിച്ചതും ഒമിക്രോണിന്റെ പുതിയ വകഭേദമായ BA. 2 ഒമിക്രോൺ വ്യാപിക്കുന്നതുമാണ് രോഗവ്യാപനം കുതിച്ചുയരുന്നതിന് പിന്നിൽ. കൂടുതൽ അപകടകരമായ ജനിതക ഭേദങ്ങളുടെ ആവിർഭാവം വരും ദിനങ്ങളിൽ ഗുരുതരമായ രോഗവ്യാപനത്തിനും മരണനിരക്കിനും കാരണമായേക്കാമെന്ന് ചീഫ് മെഡിക്കൽ അഡ്വൈസർ ക്രിസ് വിറ്റി മുന്നറിയിപ്പ് നൽകി.