ന്യൂസ് ഡെസ്ക്, മലയാളം യുകെ
യുകെയിലെ മുസ്ലിം ആരാധനാലയങ്ങളുടെ സുരക്ഷയുമായി ബന്ധപ്പെട്ട് 3 മില്യൺ പൗണ്ട് ധനസഹായം സർക്കാർ നൽകിയതായുള്ള റിപ്പോർട്ടുകൾ പുറത്തുവന്നു. 2022- 2023 കാലത്ത് നൽകിയ ഈ തുക ഇതുവരെയുള്ളതിൽ വച്ച് ഏറ്റവും കൂടിയ ഫണ്ട് ആണ്. എന്നാൽ 2016 – 2017 കാലഘട്ടത്തിൽ 73,000 പൗണ്ട് മാത്രമായിരുന്നു സുരക്ഷാ പദ്ധതിക്കായി മോസ്കുകൾക്ക് നൽകിയത്. പാലസ്തീൻ സംഘർഷങ്ങളുടെ വെളിച്ചത്തിൽ വർദ്ധിച്ചുവരുന്ന മുസ്ലിം വിരുദ്ധ സംഭവങ്ങൾ ആണ് ഫണ്ട് കുത്തനെ ഉയർത്താൻ കാരണമായതായി ചൂണ്ടി കാണിക്കപ്പെടുന്നത്.
2016 -ൽ സുരക്ഷാ ഭീഷണിയെ തുടർന്നുള്ള ഫണ്ടിനായുള്ള അപേക്ഷകൾ 36 എണ്ണം മാത്രമായിരുന്നു. എന്നാൽ 2023 -ൽ അപേക്ഷകളുടെ എണ്ണം 304 ആയി ഉയർന്നതായാണ് പുറത്തുവരുന്ന റിപ്പോർട്ടുകൾ സൂചിപ്പിക്കുന്നത്. യുകെയിൽ നിലവിൽ 2000 ലധികം മസ്ജിദുകളും പ്രാർത്ഥനാ മുറികളും ഉണ്ടെങ്കിലും ഇപ്പോഴും ചെറിയ ഒരു ശതമാനം ആരാധനാലയങ്ങൾക്ക് മാത്രമെ ഈ ഫണ്ട് ഉപയോഗിച്ചുള്ള സംരക്ഷണം ലഭിക്കുന്നുള്ളൂ. 2023 ഒക്ടോബർ 7-ാം തീയതി ഇസ്രായേലിനെതിരെ ഹമാസ് നടത്തിയ ആക്രമണത്തെ തുടർന്നുണ്ടായ സംഭവവികാസങ്ങൾ മുസ്ലിം വിരുദ്ധ വിദ്വേഷ കുറ്റകൃത്യങ്ങളുടെ എണ്ണത്തിൽ വൻ വർദ്ധനവിന് കാരണമായിട്ടുണ്ട്.
എന്നാൽ സുരക്ഷാ ഫണ്ടിങ്ങിനായി അപേക്ഷിക്കുന്നതിൽ പള്ളികൾ ഒട്ടേറെ വെല്ലുവിളികൾ നേരിടുന്നതായി മുസ്ലീം കൗൺസിൽ ഓഫ് ബ്രിട്ടൻ്റെ (എംസിബി) ജനറൽ സെക്രട്ടറി സാറ മുഹമ്മദ് പറഞ്ഞു. പലർക്കും ഈ ധനസഹായത്തെ കുറിച്ച് കാര്യമായി അറിവ് ഉണ്ടായിരുന്നില്ല. ഫണ്ടിങ്ങിനെ കുറിച്ച് അറിയുന്നവർക്ക് പോലും സങ്കീർണ്ണവും സാങ്കേതിക പരിജ്ഞാനവും ആവശ്യമായ അപേക്ഷ പ്രക്രിയ തടസ്സമായി. ഫണ്ടിനുവേണ്ടി ആദ്യമായി അപേക്ഷിച്ച് പരാജയപ്പെട്ടതിനുശേഷം പലരും വീണ്ടും അപേക്ഷിച്ചില്ല എന്ന് അദ്ദേഹം പറഞ്ഞു.
Leave a Reply