ലിസ മാത്യു, മലയാളം യു കെ ന്യൂസ്‌ ടീം

യു കെ :- ബ്രിട്ടനിൽ കഴിഞ്ഞ കുറേ ദിവസങ്ങളായി നിലനിന്നിരുന്ന ഉഷ്ണ തരംഗം അവസാനിച്ച് കനത്ത മഴ ലഭിച്ചിരിക്കുകയാണ്. ഇതോടെ പലയിടങ്ങളിലും അപ്രതീക്ഷിത വെള്ളപ്പൊക്കം ഉണ്ടായതായാണ് പ്രാഥമിക നിഗമനം. അതോടൊപ്പം തന്നെ ചിലയിടങ്ങളിൽ റോഡുകൾ മണ്ണിടിഞ്ഞുവീണ് ഗതാഗത തടസ്സവും ഉണ്ടായി. സോമർസെറ്റിലെ എ 358 റോഡിലാണ് മണ്ണിടിഞ്ഞ് വീണ് ഗതാഗത തടസ്സം ഉണ്ടായത്. ഇതു വരെ ഏകദേശം 50 ടണ്ണോളം മണ്ണാണ് നീക്കം ചെയ്തതെന്ന് അധികൃതർ വ്യക്തമാക്കി. നിലവിൽ റോഡ് പൂർണമായും അടച്ചിട്ടിരിക്കുകയാണ്. ഇന്ന് വൈകിട്ട് 4:00 മണിയോടെ തുറക്കാൻ ആകുമെന്നാണ് അധികൃതർ അറിയിച്ചത്. ജനങ്ങളെല്ലാവരും തന്നെ ജാഗ്രത പാലിക്കണമെന്നും, അത്യാവശ്യഘട്ടങ്ങളിൽ എമർജൻസി കിറ്റ് തയ്യാറാക്കി വെക്കണമെന്നും അധികൃതർ വ്യക്തമാക്കി. ഡെവൺ, കോൺവോൾ എന്നിവിടങ്ങളിൽ കാലത്ത് വെള്ളപ്പൊക്കത്തിന്റെ വീഡിയോകളാണ് സമൂഹമാധ്യമങ്ങളിൽ പ്രചരിക്കുന്നത്.

മഴയുണ്ടായെങ്കിലും താപനിലയിൽ ക്രമാതീതമായ കുറവ് ഇല്ലെന്നാണ് പ്രാഥമിക നിഗമനം വ്യക്തമാക്കുന്നത്. നിലവിൽ ഉണ്ടായിരിക്കുന്ന വരൾച്ച നീങ്ങുവാൻ ദിവസങ്ങളോളം മഴ ആവശ്യമാണെന്ന് വിദഗ്ധർ പറഞ്ഞു. കനത്ത വരൾച്ച മൂലം ഭൂമി വരണ്ടു കിടക്കുന്നതിനാൽ ആണ് ലഭിക്കുന്ന മഴ ഒഴുകി പോകുന്നത്. അതിനാൽ തന്നെയാണ് അപ്രതീക്ഷിത വെള്ളപ്പൊക്കം പല സ്ഥലങ്ങളിലും ഉണ്ടാകുന്നത്.