ന്യൂസ് ഡെസ്ക്, മലയാളം യുകെ
സതേൺ ഇംഗ്ലണ്ടിൽ മോശം മഞ്ഞുവീഴ്ചയെ തുടർന്ന് പുതിയ കാലാവസ്ഥാ മുന്നറിയിപ്പ് പ്രഖ്യാപിച്ച് മെറ്റ് ഓഫീസ്. നിലവിൽ രാജ്യത്തിൻെറ ഭൂരിഭാഗം പ്രദേശങ്ങളിലും മഞ്ഞ് വീഴ്ചയും അതു സംബന്ധമായ പ്രശനങ്ങളും മൂലം വാണിംഗുകൾ ലഭിച്ചിട്ടുണ്ട്. ബുധനാഴ്ച രാവിലെ 9 മുതൽ അർദ്ധരാത്രി വരെ ഇംഗ്ലണ്ടിൻ്റെ തെക്കൻ കൗണ്ടിയിൽ മഞ്ഞുവീഴ്ചയെ തുടർന്ന് കാലാവസ്ഥാ നിരീക്ഷണ കേന്ദ്രം യെല്ലോ വാണിംഗ് പുറപ്പെടുവിച്ചു.
മുന്നറിയിപ്പ് കെൻ്റ് മുതൽ കോൺവാൾ വരെയും തെക്കൻ ലണ്ടൻ വരെയും ഉണ്ട്. രണ്ട് മുതൽ അഞ്ച് സെൻ്റീമീറ്റർ വരെ മഞ്ഞ് വീഴ്ചയ്ക്ക് സാധ്യത ഉണ്ട്. അതേസമയം, ഉയർന്ന പ്രദേശങ്ങളിൽ 10 സെൻ്റീമീറ്റർ വരെ മഞ്ഞു വീഴ്ച ഉണ്ടാവാൻ സാധ്യത ഉള്ളതായി കാലാവസ്ഥാ നിരീക്ഷണ കേന്ദ്രം അറിയിച്ചു. വടക്ക് കിഴക്കൻ ഇംഗ്ലണ്ടിലും സ്കോട്ട് ലൻഡിലും ബുധനാഴ്ച രാത്രി താപനില -14C ഉം വ്യാഴാഴ്ച രാത്രി -16C ഉം എത്താൻ സാധ്യതയുണ്ടെന്ന് മെറ്റ് ഓഫീസ് അറിയിച്ചു.
മിഡ്‌ലാൻഡ്‌സ്, നോർത്ത് വെയിൽസിൻ്റെ ചില ഭാഗങ്ങൾ, ഇംഗ്ലണ്ടിൻ്റെ വടക്ക് പടിഞ്ഞാറ്, സ്കോട്ട് ലൻഡിൻ്റെ പടിഞ്ഞാറ്, വടക്കൻ ഭാഗങ്ങൾ, വടക്കൻ അയർലൻഡ് എന്നിവിടങ്ങളിൽ കനത്ത മഞ്ഞ് വീഴ്ച ഉണ്ടായിരിക്കും. ഇവ റോഡുകളെയും റെയിൽവയേയും ബാധിക്കാൻ സാധ്യതയുണ്ട്. അതേസമയം, 2025 തുടങ്ങിയതിന് ശേഷം ഇംഗ്ലണ്ടിലുടനീളം കുറഞ്ഞത് 300 സ്ഥലങ്ങളിലെങ്കിലും വെള്ളം കയറിയതായി പരിസ്ഥിതി ഏജൻസി അറിയിച്ചു. പുതുവർഷത്തിൽ പെയ്ത കനത്ത മഴ ഇംഗ്ലണ്ടിൻ്റെ വടക്ക് പടിഞ്ഞാറ് ഭാഗത്തും യോർക്ക്ഷെയറിലും വെള്ളപ്പൊക്കത്തിന് കാരണമായിരുന്നു
Leave a Reply