ന്യൂസ് ഡെസ്ക്, മലയാളം യുകെ

അമേരിക്കയിലെ വിമാനത്താവളങ്ങളിൽ രാജ്യവ്യാപകമായി വിമാന സർവീസുകൾക്ക് താൽക്കാലിക നിയന്ത്രണം ഏർപ്പെടുത്തി ഫെഡറൽ ഏവിയേഷൻ അഡ്മിനിസ്ട്രേഷൻ (എഫ്എഎ). രാജ്യത്തെ വിവിധ എയർ ട്രാഫിക് കൺട്രോൾ കേന്ദ്രങ്ങളെ ബന്ധിപ്പിക്കുന്ന ആശയവിനിമയ സംവിധാനത്തിലുണ്ടായ തകരാറാണ് പ്രതിസന്ധിക്ക് കാരണമായത്. അസാധാരണ സാഹചര്യവും യാത്രക്കാരുടെ സുരക്ഷയും കണക്കിലെടുത്ത് എല്ലാ വിമാനത്താവളങ്ങളിലും പുറപ്പെടുന്ന വിമാന സർവീസുകൾ നിർത്തിവെക്കാൻ നിർദേശം നൽകിയതായി യുഎസ് ഗതാഗത സെക്രട്ടറി സീൻ ഡഫി അറിയിച്ചു. ആകാശത്തുള്ള വിമാനങ്ങൾക്ക് യാത്ര തുടരാൻ അനുമതി നൽകിയെങ്കിലും ചില വിമാനങ്ങൾ വഴിതിരിച്ചുവിടേണ്ടിവന്നു. വാഷിങ്ടണിലെ റൊണാൾഡ് റീഗൻ വിമാനത്താവളം വിമാനങ്ങൾ സ്വീകരിക്കാനുള്ള പരമാവധി ശേഷിയിലെത്തിയതായും ചിക്കാഗോ ഒഹെയർ വിമാനത്താവളത്തിലും സമാന സാഹചര്യമുണ്ടായതായും റിപ്പോർട്ടുകളുണ്ട്.

പ്രതിസന്ധി അമേരിക്കയിലേക്കുള്ള രാജ്യാന്തര വിമാന സർവീസുകളെയും ബാധിച്ചു. ബ്രിട്ടനിൽനിന്ന് അമേരിക്കയിലേക്കുള്ള ചില വിമാനങ്ങൾ റദ്ദാക്കി. ഹീത്രൂവിൽനിന്ന് ന്യൂയോർക്കിലെ ജെഎഫ്കെ വിമാനത്താവളത്തിലേക്കുള്ള രാത്രി 10.30ലെ സർവീസും റദ്ദാക്കിയവയിൽ ഉൾപ്പെടുന്നു. മാഞ്ചസ്റ്ററിൽനിന്ന് ശനിയാഴ്ച രാവിലെ പുറപ്പെടേണ്ട മൂന്ന് വിർജിൻ അറ്റ്ലാന്റിക് സർവീസുകളെയും പ്രതിസന്ധി ബാധിക്കാൻ സാധ്യതയുണ്ടെന്ന് വിമാനത്താവള അധികൃതർ അറിയിച്ചു. യൂറോപ്യൻ രാജ്യങ്ങളിൽനിന്ന് അമേരിക്കയിലേക്കുള്ള വിമാന സർവീസുകൾക്കും താൽക്കാലിക നിയന്ത്രണം ഏർപ്പെടുത്തി. ഫ്ലൈറ്റ് റഡാർ 24ന്റെ കണക്കനുസരിച്ച് റദ്ദാക്കിയ വിമാനങ്ങളുടെ എണ്ണം 1,700 കടന്നു. 7,000ത്തിലധികം വിമാനങ്ങൾ വൈകുകയോ റദ്ദാക്കുകയോ ചെയ്തതായും 15 ലക്ഷത്തിലധികം യാത്രക്കാർ യാത്രയ്ക്കായി കാത്തിരിക്കുന്നതായും റിപ്പോർട്ടുകളുണ്ട്.

സൈബർ ആക്രമണമാണോ മൈക്രോസോഫ്റ്റ് സംവിധാനങ്ങളിലെ തകരാറുമായി ബന്ധപ്പെട്ട പ്രശ്നമാണോ എന്ന സംശയങ്ങൾ ഉയർന്നെങ്കിലും നിലവിൽ സൈബർ ആക്രമണത്തിന് തെളിവുകളില്ലെന്ന് അധികൃതർ വ്യക്തമാക്കി. മൈക്രോസോഫ്റ്റിന്റെ വ്യാപകമായ തകരാറുമായി സംഭവത്തിന് ബന്ധമില്ലെന്നാണ് പ്രാഥമിക വിലയിരുത്തൽ. അമേരിക്കൻ ആഭ്യന്തര സുരക്ഷാ സെക്രട്ടറി മാർക്ക്വെയ്ൻ മുള്ളിൻ ഇത് ഭീകരാക്രമണമോ 9/11ന് സമാനമായ സാഹചര്യമോ അല്ലെന്ന് വ്യക്തമാക്കി. പിന്നീട് ആശയവിനിമയ സംവിധാനങ്ങൾ പുനഃസ്ഥാപിച്ചതോടെ എഫ്എഎ നിയന്ത്രണങ്ങൾ ഘട്ടംഘട്ടമായി പിൻവലിക്കുകയും വിമാന സർവീസുകൾ പുനരാരംഭിക്കുകയും ചെയ്തു. എന്നാൽ വൈകലുകളും റദ്ദാക്കലുകളും തുടരുമെന്ന് അധികൃതർ മുന്നറിയിപ്പ് നൽകി. അമേരിക്കയിലേക്കുള്ള യാത്രക്കാർ വിമാനത്താവളത്തിലേക്ക് പുറപ്പെടുന്നതിന് മുമ്പ് വിമാനക്കമ്പനികളുമായി ബന്ധപ്പെട്ട് സർവീസുകളുടെ സ്ഥിതി ഉറപ്പാക്കണമെന്നും നിർദേശിച്ചിട്ടുണ്ട്.

ന്യൂസ് ഡെസ്ക്, മലയാളം യുകെ

ബ്രിട്ടനിലെ ബർമിങ് ഹാമിൽ ജാമ്യാധികാരിക്കു നേരെ കത്തിയാക്രമണം നടത്തിയ കേസിൽ ഹമാസ് മുൻ നേതാവ് ഇസ്മായിൽ ഹനിയ്യയുടെ അംഗരക്ഷകനായിരുന്ന മുഹമ്മദ് അൽഫത്തിഹ് കുറ്റക്കാരനെന്ന് കോടതി കണ്ടെത്തി. ഭാര്യയുടെ 2,250 പൗണ്ടിലധികം വരുന്ന പിഴയുമായി ബന്ധപ്പെട്ട് കാർ പിടിച്ചെടുക്കാനെത്തിയ ജാമ്യാധികാരി കെവിൻ ബക്നലിനെതിരെയായിരുന്നു ആക്രമണം. 2025 ഒക്ടോബർ 14ന് നടന്ന സംഭവത്തിൽ രണ്ട് വലിയ കത്തികളുമായി ഇയാൾ ഉദ്യോഗസ്ഥനെ പിന്തുടർന്ന് ആക്രമിക്കുകയായിരുന്നു. തലയ്ക്ക് മുറിവേറ്റ ഉദ്യോഗസ്ഥന് ആശുപത്രിയിൽ ചികിത്സ തേടേണ്ടിവന്നു. നിയമവിരുദ്ധമായി പരിക്കേൽപ്പിക്കൽ, രണ്ട് കത്തികൾ കൈവശംവെക്കൽ, നാശനഷ്ടം വരുത്തൽ എന്നീ കുറ്റങ്ങളിലാണ് ഭൂരിപക്ഷ വിധിയിലൂടെ അൽഫത്തിഹ് കുറ്റക്കാരനായത്. എന്നാൽ കൊലപ്പെടുത്താനുള്ള ഉദ്ദേശ്യത്തോടെ പരിക്കേൽപ്പിച്ചെന്ന കുറ്റത്തിൽനിന്ന് കോടതി ഇയാളെ ഒഴിവാക്കി.

ജർമനിയിൽ ജനിച്ച 40കാരനായ അൽഫത്തിഹ് 2006 മുതൽ 2008 വരെ ഹമാസ് മുൻ നേതാവ് ഇസ്മായിൽ ഹനിയ്യയുടെ അംഗരക്ഷകനായി പ്രവർത്തിച്ചിരുന്നുവെന്നാണ് ബിബിസി റിപ്പോർട്ട്. മുഹമ്മദ് നയിം എന്ന പേരിലാണ് ഇയാൾ നേരത്തെ അറിയപ്പെട്ടിരുന്നത്. 2015ൽ ബ്രിട്ടനിൽ അഭയം ലഭിക്കുകയും 2021ൽ ബ്രിട്ടീഷ് പൗരത്വം നേടുകയും ചെയ്തു. ബർമിങ്ങാമിലെ ആക്രമണസമയത്ത് ഭീകരവിരുദ്ധ വിഭാഗത്തിന്റെ നിരീക്ഷണത്തിലായിരുന്നു ഇയാൾ. കേസിൽ അറസ്റ്റിലായിരിക്കെ ജർമൻ അധികൃതരുടെ ആവശ്യപ്രകാരം വീണ്ടും അറസ്റ്റ് ചെയ്തു. ജർമനിയിൽ ജൂതരുടെ കേന്ദ്രങ്ങൾ ലക്ഷ്യമിട്ട് വെടിവെപ്പ് നടത്താനുള്ള ഗൂഢാലോചനയിൽ ഇയാൾക്ക് പങ്കുണ്ടെന്നാണ് ആരോപണം. ആയുധങ്ങൾ എത്തിക്കുന്നതിലും ആക്രമണത്തിന്റെ ആസൂത്രണത്തിലും പങ്കാളിയായിരുന്നുവെന്നാണ് ജർമൻ അന്വേഷണസംഘത്തിന്റെ കണ്ടെത്തൽ. ഇസ്രയേൽ രഹസ്യാന്വേഷണ ഏജൻസിയായ മൊസാദിന് ലഭിച്ച വിവരത്തെ തുടർന്നാണ് ആക്രമണപദ്ധതി തടയാനായതെന്നും റിപ്പോർട്ടിൽ പറയുന്നു.

രണ്ടാഴ്ച നീണ്ട വിചാരണയ്ക്കിടെ ഹമാസുമായുള്ള ബന്ധവും അംഗരക്ഷകനായിരുന്ന വിവരവും ജൂറിയെ അറിയിച്ചിരുന്നില്ല. ആക്രമണം നടന്നത് സ്വയംരക്ഷയ്ക്കായിരുന്നുവെന്നാണ് അൽഫത്തിഹ് കോടതിയിൽ വാദിച്ചത്. ഗാസയിൽ സഹോദരൻ കൊല്ലപ്പെട്ട വിവരം അറിഞ്ഞതിന്റെ തൊട്ടടുത്ത ദിവസമാണ് സംഭവമെന്നും മുൻകാലത്തെ പീഡനാനുഭവങ്ങളും ഭയവും തന്നെ മാനസികമായി തളർത്തിയിരുന്നുവെന്നും ഇയാൾ പറഞ്ഞു. എന്നാൽ കോടതി കുറ്റക്കാരനെന്ന് കണ്ടെത്തിയതോടെ ജനുവരി 11ന് ബാർമിംഗ് ഹാമിൽ ശിക്ഷ വിധിക്കും. ബ്രിട്ടനിലെ ശിക്ഷ പൂർത്തിയാക്കിയശേഷം ജർമനിയിലേക്ക് നാടുകടത്തൽ നടപടികൾ നേരിടേണ്ടിവരും. അഭയം നൽകിയതും പിന്നീട് പൗരത്വം അനുവദിച്ചതും അതിശയകരമാണെന്ന് ബ്രിട്ടീഷ് സർക്കാർ വൃത്തങ്ങൾ പ്രതികരിച്ചു. ഹമാസ് നിരോധിത ഭീകരസംഘടനയാണെന്നും അതിന്റെ പ്രവർത്തനങ്ങളെ പിന്തുണയ്ക്കുന്നവരെ സർക്കാർ അപലപിക്കുന്നുവെന്നും ആഭ്യന്തര മന്ത്രാലയം വ്യക്തമാക്കി.

ന്യൂസ് ഡെസ്ക്, മലയാളം യുകെ

ലണ്ടനിലെ പ്രശസ്ത ഹാസ്യനടനും കുട്ടികളുടെ എഴുത്തുകാരനുമായ ഡേവിഡ് വാലിയംസിനെതിരായ ലൈംഗികാതിക്രമ ആരോപണങ്ങൾ ബ്രിട്ടനിൽ വലിയ വിവാദമാകുന്നു. ആരോപണങ്ങൾ പുറത്തുവന്നതിനു പിന്നാലെ നിരവധി കുടുംബങ്ങൾ കുട്ടികളുടെ പുസ്തകശേഖരത്തിൽനിന്ന് അദ്ദേഹത്തിന്റെ പുസ്തകങ്ങൾ നീക്കം ചെയ്യുകയാണ്. കുട്ടികൾക്ക് ഏറെ പ്രിയപ്പെട്ടിരുന്ന വാലിയംസിന്റെ പുസ്തകങ്ങൾ ഇനി വീട്ടിൽ സൂക്ഷിക്കേണ്ടതില്ലെന്നാണ് ചില മാതാപിതാക്കളുടെ നിലപാട്. ദി വർക്സ്, ടിജി ജോൺസ് തുടങ്ങിയ വ്യാപാരസ്ഥാപനങ്ങളും പുസ്തകങ്ങൾ വിൽപ്പനയിൽനിന്ന് പിൻവലിച്ചു. വാട്ടർസ്റ്റോൺസ് നിലവിലുള്ള പുസ്തകങ്ങൾ പ്രസാധകരായ ഹാർപ്പർകോളിൻസിന് തിരികെ നൽകുന്നതിനെക്കുറിച്ച് ചർച്ച നടത്തുകയാണ്. ചില സ്വതന്ത്ര പുസ്തകശാലകൾ വർഷങ്ങൾക്കു മുമ്പുതന്നെ അദ്ദേഹത്തിന്റെ പുസ്തകങ്ങൾ വിൽക്കുന്നത് നിർത്തിയിരുന്നു.

അതിനിടെ, വാലിയംസിനെതിരായ ഗുരുതരമായ ലൈംഗികാതിക്രമ ആരോപണങ്ങളിൽ ലണ്ടൻ മെട്രോപൊളിറ്റൻ പൊലീസ് ക്രിമിനൽ അന്വേഷണം ആരംഭിച്ചു. 2000 – കളിൽ നടന്നതായി പറയപ്പെടുന്ന സംഭവങ്ങളുമായി ബന്ധപ്പെട്ട് നിരവധി പേർ പൊലീസിൽ പരാതികൾ നൽകിയിട്ടുണ്ട്. മാധ്യമറിപ്പോർട്ടുകളിലെ വിവരങ്ങളും അന്വേഷണത്തിന്റെ ഭാഗമായി പരിശോധിക്കുമെന്നും പൊലീസ് വ്യക്തമാക്കി. പരാതിക്കാരുടെ സ്വകാര്യതയും സുരക്ഷയും പരിഗണിച്ച് സംഭവങ്ങളുടെ കൂടുതൽ വിശദാംശങ്ങൾ പൊലീസ് പുറത്തുവിട്ടിട്ടില്ല. പ്രത്യേക ലൈംഗികാതിക്രമ അന്വേഷണവിഭാഗമാണ് കേസ് അന്വേഷിക്കുന്നത്. ഇതുവരെ വാലിയംസിനെ അറസ്റ്റ് ചെയ്യുകയോ പരിശോധനകൾ നടത്തുകയോ ചെയ്തിട്ടില്ല.

15 വയസ്സുള്ളപ്പോഴാണ് വാലിയംസിനെ പരിചയപ്പെട്ടതെന്നും പിന്നീട് തങ്ങൾ ലൈംഗികമായി ചൂഷണം ചെയ്യപ്പെട്ടതായി തോന്നിയെന്നും രണ്ട് സ്ത്രീകൾ നേരത്തെ വെളിപ്പെടുത്തിയിരുന്നു. ബ്രിട്ടനിലെ “Britain’s Got Talent ” എന്ന ടെലിവിഷൻ പരിപാടിയിലും മുൻ പ്രസാധകസ്ഥാപനമായ ഹാർപ്പർകോളിൻസിലും തന്റെ പ്രശസ്തിയും അധികാരവും ഉപയോഗിച്ച് യുവതികളെ സമീപിച്ചെന്ന ആരോപണങ്ങളും ഉയർന്നിട്ടുണ്ട്. എന്നാൽ താൻ ലൈംഗികചൂഷണം നടത്തിയിട്ടില്ലെന്നും നിയമം ലംഘിച്ചിട്ടില്ലെന്നും വാലിയംസ് ആരോപണങ്ങൾ നിഷേധിച്ചു. അതേസമയം, ചില ബന്ധങ്ങളിൽ മറ്റുള്ളവരുടെ വികാരങ്ങൾ വേണ്ടത്ര പരിഗണിക്കാതിരുന്നതിൽ ഖേദിക്കുന്നതായും അദ്ദേഹം വ്യക്തമാക്കി. വിവാദത്തെ തുടർന്ന് അദ്ദേഹത്തിന്റെ സാഹിത്യ ഏജൻസി ബന്ധം അവസാനിപ്പിക്കുകയും ബിബിസി ഐപ്ലെയറിൽനിന്ന് അദ്ദേഹത്തിന്റെ പരിപാടികൾ നീക്കിത്തുടങ്ങുകയും ചെയ്തിട്ടുണ്ട്.

ന്യൂസ് ഡെസ്ക്, മലയാളം യുകെ

ലണ്ടൻ: ആഗോളതലത്തിലുണ്ടായ മൈക്രോസോഫ്റ്റ് സാങ്കേതിക തകരാറിനെത്തുടർന്ന് ബ്രിട്ടനിലെ ആശുപത്രികൾ, ജിപി ക്ലിനിക്കുകൾ, സ്കൂളുകൾ, സർവകലാശാലകൾ, പൊലീസ് സംവിധാനങ്ങൾ എന്നിവയുടെ പ്രവർത്തനം തടസ്സപ്പെട്ടു. എൻഎച്ച്എസ് സേവനങ്ങളെ സാരമായി ബാധിച്ചതോടെ രോഗികളുടെ വിവരങ്ങൾ പരിശോധിക്കാനും ഇമെയിൽ ഉപയോഗിക്കാനും കഴിയാതെ വന്ന ആരോഗ്യപ്രവർത്തകർ പേപ്പർ രേഖകളെ ആശ്രയിച്ചാണ് ചികിത്സാ നടപടികൾ തുടർന്നത്. ചില ആശുപത്രികളിൽ യോഗങ്ങളും റദ്ദാക്കി. മരുന്നുകളുടെ കുറിപ്പടി നൽകുന്നതിലും കാലതാമസമുണ്ടാകുമെന്ന് ഫാർമസിസ്റ്റുകൾ മുന്നറിയിപ്പ് നൽകി. അതേസമയം, അടിയന്തരവും ജീവന് ഭീഷണിയുള്ളതുമായ ആംബുലൻസ് സേവനങ്ങളെ കാര്യമായി ബാധിച്ചിട്ടില്ലെന്നാണ് റിപ്പോർട്ട്.

വ്യാഴാഴ്ച വൈകുന്നേരത്തോടെ ആരംഭിച്ച തകരാറിനെത്തുടർന്ന് ലോകമെമ്പാടുമുള്ള ആയിരക്കണക്കിന് ഉപയോക്താക്കൾക്ക് മൈക്രോസോഫ്റ്റിന്റെ ഔട്ട്‌ലുക്ക് ഇമെയിൽ സേവനം ഉൾപ്പെടെയുള്ള സംവിധാനങ്ങൾ ഉപയോഗിക്കാനായില്ല. റെയിൽ യാത്രക്കാർക്ക് ഇമെയിൽ വഴി ലഭിച്ച ഡിജിറ്റൽ ടിക്കറ്റുകൾ തുറക്കാൻ കഴിയാത്ത സാഹചര്യമുണ്ടാകാമെന്ന് നാഷണൽ റെയിൽ മുന്നറിയിപ്പ് നൽകി. കോടതികളുടെ പ്രവർത്തനവും തടസ്സപ്പെട്ടു. ചില കേസുകളിൽ വിചാരണ മാറ്റിവയ്ക്കുകയും തടവുകാരെ കോടതിയിൽ എത്തിക്കാനാകാതെ വരികയും ചെയ്തു. മാഞ്ചസ്റ്ററിലെ മിൻഷുൾ സ്ട്രീറ്റ് കോടതിയിൽ ഫാക്സ് മെഷീൻ കണ്ടെത്താൻ ജീവനക്കാർ ശ്രമിക്കേണ്ടിവന്നതായും റിപ്പോർട്ടുണ്ട്. പൊലീസ് വെബ്സൈറ്റുകൾ വഴി കുറ്റകൃത്യങ്ങൾ റിപ്പോർട്ട് ചെയ്യുന്നതിനും തടസ്സമുണ്ടായി.

സ്കൂൾ പരിശോധനകൾ ഉൾപ്പെടെ വിദ്യാഭ്യാസ മേഖലയിലെ പ്രവർത്തനങ്ങളെയും തകരാർ ബാധിച്ചു. നൂറുകണക്കിന് സ്കൂളുകൾക്കും കോളജുകൾക്കും സർവകലാശാലകൾക്കും ഇമെയിൽ സേവനങ്ങൾ ലഭ്യമല്ലാതായി. ബാങ്ക് ഓഫ് ഇംഗ്ലണ്ട്, ഫിനാൻഷ്യൽ കണ്ടക്ട് അതോറിറ്റി തുടങ്ങിയ സ്ഥാപനങ്ങളെയും പ്രശ്നം ബാധിച്ചെങ്കിലും നിർണായക പ്രവർത്തനങ്ങൾ സാധാരണ നിലയിൽ തുടരുന്നതായി ബാങ്ക് അറിയിച്ചു. സൈബർ ആക്രമണമല്ല തകരാറിന് കാരണമെന്നാണ് മൈക്രോസോഫ്റ്റിന്റെ പ്രാഥമിക വിലയിരുത്തൽ. വെള്ളിയാഴ്ച രാവിലെ മുതൽ സേവനങ്ങൾ ക്രമേണ പുനഃസ്ഥാപിക്കപ്പെടുന്നതിന്റെ സൂചനകൾ ലഭിച്ചതായും കമ്പനി അറിയിച്ചു. സംഭവത്തിന്റെ വ്യാപ്തി വിലയിരുത്താൻ സർക്കാർ മൈക്രോസോഫ്റ്റുമായി ചേർന്ന് പ്രവർത്തിക്കുകയാണ്. സാങ്കേതിക സംവിധാനങ്ങളെ അമിതമായി ആശ്രയിക്കുന്നതിന്റെ അപകടം ഈ സംഭവം വ്യക്തമാക്കുന്നതായും സർക്കാർ വൃത്തങ്ങൾ ചൂണ്ടിക്കാട്ടി.

ന്യൂസ് ഡെസ്ക്, മലയാളം യുകെ

ലണ്ടൻ: ബ്രിട്ടനും യൂറോപ്യൻ യൂണിയനും തമ്മിൽ വ്യാപാരം നടത്തുന്ന ഇലക്ട്രിക് വാഹനങ്ങൾക്ക് അധിക ഇറക്കുമതി തീരുവ ഏർപ്പെടുത്തുന്നത് ഒഴിവാക്കാൻ രണ്ടു വർഷത്തെ ഇളവ് ആവശ്യപ്പെടാനൊരുങ്ങി ബ്രിട്ടീഷ് വാഹന വ്യവസായം. ബ്രെക്സിറ്റിനു ശേഷമുള്ള വ്യാപാര കരാറിലെ ബാറ്ററി ഉത്ഭവനിയമങ്ങൾ 2027 ജനുവരി ഒന്നുമുതൽ പ്രാബല്യത്തിൽ വരാനിരിക്കെയാണ് പുതിയ നീക്കം. ഇതു സംബന്ധിച്ച് വീണ്ടും കാലാവധി നീട്ടാൻ ഇരുവിഭാഗവും ധാരണയിലെത്തിയില്ലെങ്കിൽ ബ്രിട്ടനിൽനിന്ന് യൂറോപ്യൻ യൂണിയനിലേക്കും തിരിച്ചുമുള്ള ഭൂരിഭാഗം ഇലക്ട്രിക് വാഹനങ്ങൾക്കും 10 ശതമാനം തീരുവ ബാധകമാകാനുള്ള സാധ്യതയുണ്ട്. നേരത്തേ ഈ വ്യവസ്ഥകൾ നടപ്പാക്കുന്നത് നീട്ടിവച്ചിരുന്നു. എന്നാൽ യൂറോപ്യൻ യൂണിയൻ മുന്നോട്ടുവച്ച പ്രാഥമിക നിർദേശം രണ്ടു വർഷത്തേക്കാൾ കുറഞ്ഞ കാലയളവിലുള്ള ഇളവാണെന്നാണ് റിപ്പോർട്ട്.

ബാറ്ററി നിർമാണത്തിൽ ബ്രിട്ടനും യൂറോപ്യൻ രാജ്യങ്ങളും പ്രതീക്ഷിച്ച വളർച്ച കൈവരിക്കാത്തതാണ് പ്രതിസന്ധിക്ക് പ്രധാന കാരണം. പുതിയ നിയമപ്രകാരം ഇലക്ട്രിക് വാഹനത്തിന്റെ മൂല്യത്തിന്റെ കുറഞ്ഞത് 55 ശതമാനവും ബാറ്ററി സെല്ലുകളുടെ 65 ശതമാനവും ബാറ്ററി പാക്കിന്റെ 70 ശതമാനവും ബ്രിട്ടനിലോ യൂറോപ്യൻ യൂണിയനിലോ ഉൽപ്പാദിപ്പിച്ചതായിരിക്കണം. ഈ നിബന്ധനകൾ പാലിക്കാത്ത വാഹനങ്ങൾക്ക് 10 ശതമാനം തീരുവ നൽകേണ്ടിവരും. ബാറ്ററി നിർമാണശാലകൾ സ്ഥാപിക്കുന്നതിലെ കാലതാമസവും ചൈന, ജപ്പാൻ, ദക്ഷിണകൊറിയ തുടങ്ങിയ രാജ്യങ്ങളിൽനിന്നുള്ള ബാറ്ററി ഘടകങ്ങളുടെ ഇറക്കുമതിയെ ആശ്രയിക്കേണ്ടിവരുന്നതും വാഹന നിർമാതാക്കൾക്ക് വെല്ലുവിളിയാണ്.

അതേസമയം, യൂറോപ്യൻ വാഹന നിർമാതാക്കളുടെ സംഘടനയായ എസിഇഎയുടെ കണക്കനുസരിച്ച് 2027ൽ യൂറോപ്യൻ യൂണിയനിൽനിന്ന് ബ്രിട്ടനിലേക്ക് കയറ്റുമതി ചെയ്യുന്ന ഏകദേശം 5.2 ലക്ഷം ഇലക്ട്രിക് കാറുകളിലും വാനുകളിലും 82 ശതമാനത്തിനും പുതിയ നിബന്ധനകൾ പാലിക്കാനാകില്ല. ഇതുമൂലം മാത്രം 147 കോടി യൂറോയുടെ അധിക ചെലവുണ്ടാകാമെന്നാണ് വിലയിരുത്തൽ. ബ്രിട്ടീഷ് വാഹന നിർമാതാക്കളുടെ സംഘടനയായ എസ്.എം.എം.ടി.യും തീരുവ ഏർപ്പെടുത്തിയാൽ വ്യവസായത്തിന് 140 കോടി പൗണ്ടിന്റെ അധിക ബാധ്യതയുണ്ടാകുമെന്ന് മുന്നറിയിപ്പ് നൽകിയിട്ടുണ്ട്. അതേസമയം, തീരുവ നീട്ടിവയ്ക്കുന്നതുമായി ബന്ധപ്പെട്ട് യൂറോപ്യൻ യൂണിയൻ വ്യവസായ മേഖലയുമായി ചർച്ച നടത്തുകയാണെന്നും ഒരു വർഷത്തെ ഇളവ് പരിഗണനയിലുണ്ടെന്നും റോയിട്ടേഴ്‌സ് റിപ്പോർട്ട് ചെയ്തു. എന്നാൽ രണ്ടു വർഷത്തെ ഇളവിനായുള്ള ബ്രിട്ടീഷ് വ്യവസായത്തിന്റെ ആവശ്യം അംഗീകരിക്കുമോ എന്നത് വ്യക്തമല്ല.

ന്യൂസ് ഡെസ്ക്, മലയാളം യുകെ

ലണ്ടൻ: പ്രായപൂർത്തിയാകുന്നതിന് മുമ്പ് ഗുരുതര കുറ്റകൃത്യങ്ങളിൽ ശിക്ഷിക്കപ്പെട്ട കുട്ടികൾക്ക് ക്രിമിനൽ റെക്കോർഡുകൾ ജീവിതകാലം മുഴുവൻ തൊഴിലുടമകൾക്കു മുന്നിൽ വെളിപ്പെടുത്തേണ്ടിവരില്ലെന്ന് ബ്രിട്ടീഷ് സർക്കാർ. ഇംഗ്ലണ്ടിലും വെയിൽസിലും നിലവിലുള്ള യുവജന നീതിന്യായ വ്യവസ്ഥയിൽ സമഗ്രമായ മാറ്റങ്ങൾ കൊണ്ടുവരുന്നതിന്റെ ഭാഗമായാണ് പുതിയ നിർദേശം. കവർച്ച, മറ്റു കുട്ടികൾക്ക് മയക്കുമരുന്ന് വിൽക്കൽ, അക്രമാസക്തമായ സംഘർഷങ്ങളിൽ പങ്കാളിത്തം തുടങ്ങിയ കുറ്റങ്ങൾക്ക് ശിക്ഷിക്കപ്പെട്ടവർക്കും ഭാവിയിൽ തൊഴിൽ തേടുമ്പോൾ പഴയ കുറ്റവിവരങ്ങൾ വെളിപ്പെടുത്തുന്നതിൽനിന്ന് ഇളവ് ലഭിക്കും. കുറ്റകൃത്യങ്ങളിൽ ഏർപ്പെട്ട കുട്ടികൾക്ക് ജീവിതത്തിൽ തിരുത്താനുള്ള രണ്ടാമതൊരു അവസരം നൽകുകയും തൊഴിൽസാധ്യതകൾ വർധിപ്പിക്കുകയുമാണ് പരിഷ്കാരത്തിന്റെ ലക്ഷ്യമെന്ന് മന്ത്രിമാർ വ്യക്തമാക്കി.

സർക്കാരിന്റെ ഔദ്യോഗിക കൺസൾട്ടേഷൻ രേഖയിൽ കൂടുതൽ വിശദാംശങ്ങളുമുണ്ട്. നിലവിലെ നിയമപ്രകാരം ചില ബാല്യകാല കുറ്റകൃത്യങ്ങൾ സ്റ്റാൻഡേർഡ്, എൻഹാൻസ്ഡ് ക്രിമിനൽ റെക്കോർഡ് പരിശോധനകളിൽ ജീവിതകാലം മുഴുവൻ പ്രത്യക്ഷപ്പെടാം. പുതിയ നിർദേശമനുസരിച്ച്, ചില കുറ്റങ്ങൾക്ക് ശിക്ഷിക്കപ്പെട്ടവർക്ക് 5.5 വർഷത്തിനുശേഷം രേഖകൾ വെളിപ്പെടുത്തേണ്ടിവരില്ല. രണ്ടു വർഷം വരെയുള്ള തടവുശിക്ഷ ലഭിച്ച ചില കുറ്റങ്ങൾക്കും ജീവിതകാലത്തെ വെളിപ്പെടുത്തൽ ഒഴിവാക്കാനാണ് നീക്കം. പിഴയുമായി ബന്ധപ്പെട്ട കുറ്റവിവരങ്ങളുടെ വെളിപ്പെടുത്തൽ കാലാവധി കുറയ്ക്കുക, കോടതിക്ക് പുറത്തുള്ള ഒത്തുതീർപ്പ് നടപടികളുടെ വിവരങ്ങൾ സ്വമേധയാ വെളിപ്പെടുത്തുന്നത് ഒഴിവാക്കുക തുടങ്ങിയ നിർദേശങ്ങളുമുണ്ട്. എന്നാൽ ഗുരുതരമായ ലൈംഗിക, അക്രമ, ഭീകരവാദ കുറ്റങ്ങൾക്ക് നിലവിലുള്ള സംരക്ഷണ വ്യവസ്ഥകൾ തുടരും. ഇത് നിലവിൽ നിയമമായിട്ടില്ല; പൊതുജനാഭിപ്രായം തേടുന്ന ഘട്ടത്തിലാണ്.

ന്യൂസ് ഡെസ്ക്, മലയാളം യുകെ

ലണ്ടൻ: യുവാവുമായുള്ള ബന്ധത്തെച്ചൊല്ലിയുള്ള തർക്കത്തിനിടെ 16കാരിയെ കുത്തിക്കൊലപ്പെടുത്തിയ കേസിൽ 18കാരി കുറ്റം സമ്മതിച്ചു. വെസ്റ്റ് യോർക്ക്ഷെയറിലെ ലീഡ്സിൽ മാർച്ച് 28നായിരുന്നു സംഭവം. ക്ലോയ് വാട്സൺ ഡ്രാൻസ്ഫീൽഡ് എന്ന പെൺകുട്ടിയെ കെയ്‌ല സ്മിത്ത് (18) കുത്തിക്കൊലപ്പെടുത്തുകയായിരുന്നു. ഇരുവരും ഒരേ യുവാവുമായി പ്രണയബന്ധത്തിലായിരുന്നുവെന്നും ഇതേച്ചൊല്ലി നേരത്തേ തർക്കമുണ്ടായിരുന്നുവെന്നും ലീഡ്സ് ക്രൗൺ കോടതിയിൽ നടന്ന വിചാരണയിൽ വ്യക്തമായി. ആദ്യം മനഃപൂർവമല്ലാത്ത നരഹത്യ (മാൻസ്ലോട്ടർ) എന്ന കുറ്റം സമ്മതിക്കുകയും കൊലപാതകക്കുറ്റം നിഷേധിക്കുകയും ചെയ്ത സ്മിത്ത്, വിചാരണയുടെ രണ്ടാം ദിവസമായ വ്യാഴാഴ്ച നിലപാട് മാറ്റി കൊലപാതകക്കുറ്റം സമ്മതിക്കുകയായിരുന്നു.

കോടതിയിൽ സമർപ്പിച്ച സിസിടിവി, ഡോർബെൽ ക്യാമറ ദൃശ്യങ്ങൾ പ്രകാരം സ്മിത്ത് മുത്തച്ഛന്റെ വീട്ടുവളപ്പിലെ അനുബന്ധ കെട്ടിടത്തിൽനിന്ന് കത്തിയുമായി പുറത്തേക്കിറങ്ങുകയായിരുന്നു. നേരത്തേ ഫോണിലൂടെ ക്ലോയിയെ കഴുത്തിൽ കുത്തുമെന്ന് ഭീഷണിപ്പെടുത്തിയിരുന്നതായും വിചാരണയിൽ മൊഴിയുണ്ടായി. ബ്ലേക്ക് ഡൗളിങ് ഇരുവരും തമ്മിലുള്ള ബന്ധത്തെച്ചൊല്ലിയുള്ള തർക്കം അറിയാമായിരുന്നിട്ടും ക്ലോയിയെ ടാക്സിയിൽ സ്മിത്തിന്റെ വീട്ടിലെത്തിക്കുകയായിരുന്നുവെന്നാണ് പ്രോസിക്യൂഷൻ ആരോപണം. തുടർന്ന് നടന്ന ആക്രമണത്തിൽ കഴുത്തിലും പുറത്തുമായി അഞ്ചുതവണ കുത്തേറ്റ ക്ലോയ് രക്തം വാർന്ന് മരിച്ചു. ആക്രമണത്തിന് 37 മിനിറ്റിന് ശേഷമാണ് ആംബുലൻസിനെ വിളിച്ചത്. ആശുപത്രിയിലെത്തിച്ചെങ്കിലും രാവിലെ 6.40ന് മരണം സ്ഥിരീകരിച്ചു.

സംഭവത്തിൽ പങ്കുണ്ടെന്ന് ആരോപിക്കപ്പെടുന്ന ബ്ലേക്ക് ഡൗളിങ് (18), ആർച്ചി റൈക്രോഫ്റ്റ് (20) എന്നിവർക്കെതിരായ വിചാരണ തുടരുകയാണ്. ക്ലോയിയെ ആക്രമണസ്ഥലത്തെത്തിച്ച് അക്രമത്തിന് സാഹചര്യമൊരുക്കിയെന്നാണ് ഡൗളിങ്ങിനെതിരായ ആരോപണം. സ്മിത്തിനൊപ്പം സ്ഥലത്തെത്തിയ റൈക്രോഫ്റ്റ് ആക്രമണം മൊബൈൽ ഫോണിൽ ചിത്രീകരിക്കാനും സഹായിച്ചെന്നാണ് പ്രോസിക്യൂഷൻ വാദം. എന്നാൽ ഇരുവരും കൊലപാതക, നരഹത്യാ കുറ്റങ്ങൾ നിഷേധിച്ചിട്ടുണ്ട്. കൊലപാതകക്കുറ്റത്തിന് ജീവപര്യന്തം തടവ് നിർബന്ധമാണെന്നും സ്മിത്ത് എത്രകാലം കുറഞ്ഞത് ജയിലിൽ കഴിയണമെന്നത് വിചാരണ പൂർത്തിയായശേഷം തീരുമാനിക്കുമെന്നും ജഡ്ജി അറിയിച്ചു.

ന്യൂസ് ഡെസ്ക്, മലയാളം യുകെ

ലണ്ടൻ: സൈപ്രസിൽ ബ്രിട്ടീഷ് സൈന്യത്തിലെ വനിതാ ഉദ്യോഗസ്ഥയെ ബലാത്സംഗം ചെയ്തെന്ന പരാതിയിൽ ബ്രിട്ടീഷ് സൈനികനെതിരെ കുറ്റം ചുമത്തി. റോയൽ റെജിമെന്റ് ഓഫ് സ്കോട്ട് ലൻഡിന്റെ നാലാം ബറ്റാലിയനിൽ (ഹൈലാൻഡേഴ്സ്) സേവനമനുഷ്ഠിക്കുന്ന ലാൻസ് കോർപറൽ നിക്കോളാസ് ഹോണിനെതിരെയാണ് കേസ്. ഒക്ടോബർ 23നാണ് ഇയാൾക്കെതിരെ ബലാത്സംഗക്കുറ്റം ചുമത്തിയതെന്ന് പ്രതിരോധ മന്ത്രാലയത്തിന് കീഴിലുള്ള ഡിഫൻസ് സീരിയസ് ക്രൈം കമാൻഡ് അറിയിച്ചു. ബ്രിട്ടീഷ് ഫോഴ്സസ് സൈപ്രസിൽ സേവനമനുഷ്ഠിക്കുന്ന വനിതാ സൈനികയെ പീഡിപ്പിച്ചെന്ന പരാതി ഒക്ടോബർ 17നാണ് അധികൃതർക്ക് ലഭിച്ചത്. തുടർന്ന് ഒക്ടോബർ 19ന് നിക്കോളാസിനെ അറസ്റ്റ് ചെയ്തു.

സംഭവത്തിൽ സൈനിക പൊലീസിന്റെ സഹകരണത്തോടെ ഡിഫൻസ് സീരിയസ് ക്രൈം കമാൻഡിന്റെ പ്രത്യേക സംഘം അന്വേഷണം നടത്തുകയായിരുന്നു. കേസിൽ കോടതി നടപടികൾ പൂർത്തിയാകുന്നതുവരെ നിക്കോളാസിനെ ജുഡീഷ്യൽ കസ്റ്റഡിയിൽ വിട്ടിരിക്കുകയാണ്. ലൈംഗികാതിക്രമങ്ങൾ റിപ്പോർട്ട് ചെയ്യാൻ മുന്നോട്ടുവരുന്നവരുടെ ധൈര്യത്തെ മാനിക്കുന്നതായി ബ്രിട്ടീഷ് സൈനിക വക്താവ് പറഞ്ഞു. ലൈംഗിക കുറ്റകൃത്യങ്ങളിൽ കുറ്റക്കാരെന്ന് കണ്ടെത്തുന്നവരെ സൈനിക സേവനത്തിൽനിന്ന് പുറത്താക്കുമെന്നും അധികൃതർ വ്യക്തമാക്കി. സായുധ സേനയിലെ ലൈംഗികാതിക്രമങ്ങളുമായി ബന്ധപ്പെട്ട പരാതികൾ കൈകാര്യം ചെയ്യാൻ പ്രത്യേക സംവിധാനങ്ങളും നിലവിലുണ്ട്.

ബ്രിട്ടീഷ് സൈന്യത്തിലെ ലൈംഗികാതിക്രമങ്ങളും ദുരുപയോഗങ്ങളും തടയുന്നതിനുള്ള നടപടികൾ പ്രതിരോധ മന്ത്രാലയം സമീപ വർഷങ്ങളിൽ ശക്തമാക്കിയിട്ടുണ്ട്. കഴിഞ്ഞ വർഷം ബ്രിട്ടനിലും വിദേശത്തുമുള്ള സൈനിക കേന്ദ്രങ്ങളിൽ പ്രത്യേക അന്വേഷണസംഘങ്ങളെ നിയോഗിക്കുമെന്ന് മന്ത്രാലയം പ്രഖ്യാപിച്ചിരുന്നു. സൈന്യത്തിലെ സ്ത്രീകൾ നേരിടുന്ന ലൈംഗികാതിക്രമങ്ങളെക്കുറിച്ച് 2025ൽ നടത്തിയ ആദ്യ ഔദ്യോഗിക സർവേയിൽ, മുഴുവൻ സമയ സൈനിക സേവനത്തിലുള്ള പത്തിൽ ഒരാൾക്കടുത്ത് സ്ത്രീകൾ കഴിഞ്ഞ ഒരു വർഷത്തിനിടെ ലൈംഗികാതിക്രമത്തിനോ സമ്മതമില്ലാത്ത മറ്റ് ലൈംഗിക പ്രവർത്തനങ്ങൾക്കോ ഇരയായതായി കണ്ടെത്തിയിരുന്നു. സൈന്യത്തിനുള്ളിലെ ഇത്തരം സംഭവങ്ങളുടെ ഗൗരവം വ്യക്തമാക്കുന്നതാണ് പുതിയ കേസ്.

ന്യൂസ് ഡെസ്ക്, മലയാളം യുകെ

ലണ്ടൻ: പ്രതികൂല കാലാവസ്ഥ, സൈബർ ആക്രമണം, യുദ്ധസമാനമായ സാഹചര്യങ്ങൾ എന്നിവ നേരിടാൻ ജനങ്ങൾ തയ്യാറായിരിക്കണമെന്ന പ്രധാനമന്ത്രി ആൻഡി ബേൺഹാമിന്റെ ആഹ്വാനത്തിനു പിന്നാലെ ബ്രിട്ടനിൽ അവശ്യസാധനങ്ങൾ വാങ്ങിക്കൂട്ടുന്നവരുടെ എണ്ണം വർധിക്കുന്നു. കുപ്പിവെള്ളം, ടിന്നിലടച്ച മത്സ്യ-മാംസ വിഭവങ്ങൾ, ഡ്രൈ ഫുഡ് തുടങ്ങിയവയാണ് ജനങ്ങൾ കൂടുതലായി വാങ്ങുന്നത്. ബാറ്ററി, ടോർച്ച്, മെഴുകുതിരി, പവർബാങ്ക്, വെറ്റ് വൈപ്പുകൾ തുടങ്ങിയവയുടെ വിൽപനയിലും വലിയ വർധനയുണ്ടായിട്ടുണ്ട്. കോവിഡ് കാലത്തെപ്പോലെ കൂട്ടത്തോടെ സൂപ്പർമാർക്കറ്റുകളിലേക്ക് ഒഴുകിയെത്തുന്ന സാഹചര്യമില്ലെങ്കിലും എത്തുന്നവരെല്ലാം ആവശ്യത്തിലധികം സാധനങ്ങൾ വാങ്ങിയാണ് മടങ്ങുന്നത്. ഓൺലൈൻ വിപണിയിലും ഇതിന്റെ പ്രതിഫലനം പ്രകടമാണ്.

ഒക്ടോബർ 23നാണ് പ്രധാനമന്ത്രി ആൻഡി ബേൺഹാം ‘ബി റെഡി’ (Be Ready) എന്ന പേരിൽ രാജ്യവ്യാപകമായ മുന്നൊരുക്ക ക്യാംപയിൻ പ്രഖ്യാപിച്ചത്. അടിയന്തര സാഹചര്യങ്ങൾ ഉണ്ടായാൽ കുറഞ്ഞത് മൂന്ന് ദിവസത്തേക്കെങ്കിലും ആവശ്യമായ ഭക്ഷണം, കുടിവെള്ളം, മറ്റ് അവശ്യവസ്തുക്കൾ എന്നിവ വീടുകളിൽ കരുതണമെന്നാണ് നിർദേശം. സൈബർ ആക്രമണങ്ങൾ മൂലം ബാങ്കിങ് ശൃംഖലകൾ ഉൾപ്പെടെയുള്ള സേവനങ്ങൾ തടസ്സപ്പെടാനുള്ള സാധ്യത കണക്കിലെടുത്ത് ഒരാഴ്ചത്തേക്കുള്ള ആവശ്യങ്ങൾ നിറവേറ്റാൻ മതിയായ പണവും കൈവശം കറൻസിയായി സൂക്ഷിക്കുന്നത് നല്ലതാണെന്ന് സർക്കാർ നിർദേശിച്ചിട്ടുണ്ട്. യൂറോപ്പിലെ മറ്റ് രാജ്യങ്ങൾ സ്വീകരിച്ചുവരുന്ന മുൻകരുതൽ നടപടികളുടെ ഭാഗമായാണ് ബ്രിട്ടനിലും ഇത്തരമൊരു ക്യാംപയിൻ ആരംഭിച്ചത്.

ക്യാംപയിൻ പ്രഖ്യാപിച്ച് പത്തുദിവസത്തിനുള്ളിൽ കുപ്പിവെള്ളത്തിന്റെ വിൽപനയിൽ 67 ശതമാനവും ടിന്നിലടച്ച ഭക്ഷണത്തിന്റെ വിൽപനയിൽ 37 ശതമാനവും വർധനയുണ്ടായി. ഹാൻഡ് സാനിറ്റൈസറിന്റെ വിൽപന 83 ശതമാനം ഉയർന്നു. പ്രതിദിനം 4 ലക്ഷം പേർ അധികമായി ടിൻ ഭക്ഷ്യവസ്തുക്കൾ വാങ്ങുന്നതായാണ് കണക്ക്. ഇതിനിടെ ഫ്രാൻസ്, സ്വീഡൻ തുടങ്ങിയ രാജ്യങ്ങളിലെ സൂപ്പർമാർക്കറ്റ് ശൃംഖലകൾക്കു നേരെയുണ്ടായ സൈബർ ആക്രമണങ്ങളും ജനങ്ങളുടെ ആശങ്ക വർധിപ്പിച്ചു. വൈഫൈ സംവിധാനങ്ങൾ ഹാക്ക് ചെയ്ത് ഫ്രീസറുകളുടെ പ്രവർത്തനം തകരാറിലാക്കിയുള്ള ആക്രമണം വൻ സാമ്പത്തിക നഷ്ടത്തിനും ഇടയാക്കി. ഇതോടെ അടിയന്തര സാഹചര്യങ്ങളെ നേരിടാൻ മുൻകൂട്ടി തയ്യാറെടുക്കണമെന്ന സർക്കാർ നിർദേശത്തെ ഗൗരവത്തോടെ കാണുകയാണ് ബ്രിട്ടിഷ് ജനത.

ന്യൂസ് ഡെസ്ക്, മലയാളം യുകെ

ലണ്ടൻ: ശമ്പള പരിഷ്കരണം ഉൾപ്പെടെയുള്ള ആവശ്യങ്ങൾ ഉന്നയിച്ച് നവംബർ 25, 26 തീയതികളിൽ നടത്താനിരുന്ന 48 മണിക്കൂർ സമരം ഇംഗ്ലണ്ടിലെ കൺസൾട്ടന്റ് ഡോക്ടർമാർ പിൻവലിച്ചു. ആരോഗ്യ സെക്രട്ടറി യെവെറ്റ് കൂപ്പർ ഡോക്ടർമാരുടെ സംഘടനയായ ബ്രിട്ടീഷ് മെഡിക്കൽ അസോസിയേഷനുമായി (BMA) ചർച്ചകൾക്ക് തയ്യാറായതോടെയാണ് സമരം താൽക്കാലികമായി നിർത്തിവയ്ക്കാൻ തീരുമാനിച്ചത്. ഒന്നര വർഷത്തിലേറെ നീണ്ട സർക്കാർ ചർച്ചകളിൽ ആവശ്യങ്ങളിൽ ധാരണയിലെത്താൻ കഴിയാത്തതിനെ തുടർന്നാണ് ഡോക്ടർമാർ സമരത്തിന് തീരുമാനിച്ചിരുന്നത്. സമരം നടന്നിരുന്നെങ്കിൽ അടിയന്തര ചികിത്സകൾ മാത്രമായിരിക്കും ലഭ്യമാകുക. ഇതോടെ സാധാരണ ചികിത്സകളും ശസ്ത്രക്രിയകളും ഉൾപ്പെടെയുള്ള സേവനങ്ങൾ തടസ്സപ്പെടാൻ സാധ്യതയുണ്ടായിരുന്നു.

2009-10 മുതൽ പണപ്പെരുപ്പം കണക്കിലെടുത്തുള്ള യഥാർത്ഥ ശമ്പളമൂല്യത്തിൽ 25 ശതമാനം ഇടിവുണ്ടായെന്നും ജോലി സമയം 10 ശതമാനം കുറയ്ക്കണമെന്നുമാണ് ഡോക്ടർമാരുടെ പ്രധാന ആവശ്യങ്ങൾ. ഈ വർഷം 3.5 ശതമാനം ശമ്പള വർധന ലഭിച്ചെങ്കിലും കഴിഞ്ഞ 17 വർഷത്തിനിടെ ശമ്പളത്തിന്റെ യഥാർത്ഥ മൂല്യം നാലിലൊന്നോളം കുറഞ്ഞതായി ബിഎംഎ ചൂണ്ടിക്കാട്ടുന്നു. എന്നാൽ 2026-27 സാമ്പത്തിക വർഷത്തിൽ അനുവദിച്ച 3.5 ശതമാനത്തിന് പുറമെ കൂടുതൽ ശമ്പള വർധന നൽകാനാവില്ലെന്നാണ് ആരോഗ്യ വകുപ്പിന്റെ നിലപാട്. ശമ്പളവും തൊഴിൽ സാഹചര്യങ്ങളും ചർച്ചയിൽ ഉൾപ്പെടുത്താമെന്ന ഉറപ്പ് ലഭിച്ചതായി ബിഎംഎ അറിയിച്ചു. അടുത്ത ആഴ്ച ചർച്ചകൾ ആരംഭിക്കുമെന്നാണ് പ്രതീക്ഷ.

സമരം ഒഴിവാക്കാനുള്ള ഡോക്ടർമാരുടെ തീരുമാനം രോഗികൾക്കും എൻഎച്ച്എസിനും ആശ്വാസമാണെന്ന് ആരോഗ്യ സെക്രട്ടറി യെവെറ്റ് കൂപ്പർ പ്രതികരിച്ചു. ശൈത്യകാലത്ത് ആശുപത്രികളിൽ ചികിത്സാ തിരക്ക് വർധിക്കുന്ന സാഹചര്യത്തിൽ സമരം ഒഴിവായത് വലിയ ആശ്വാസമാകുമെന്ന് എൻഎച്ച്എസ് അധികൃതരും വ്യക്തമാക്കി. എന്നാൽ ശമ്പള വർധന സംബന്ധിച്ച ആവശ്യത്തിൽ സർക്കാർ അനുകൂല നിലപാട് സ്വീകരിക്കാത്തതിനാൽ ചർച്ചകൾ എത്രത്തോളം വിജയിക്കുമെന്ന കാര്യത്തിൽ വ്യക്തതയില്ല. നിലവിൽ ഓവർടൈമും മറ്റ് ആനുകൂല്യങ്ങളും ഉൾപ്പെടെ ഇംഗ്ലണ്ടിലെ കൺസൾട്ടന്റ് ഡോക്ടർമാരുടെ ശരാശരി വാർഷിക വരുമാനം ഏകദേശം 1.52 ലക്ഷം പൗണ്ടാണ്. ആവശ്യങ്ങൾ അംഗീകരിക്കുന്ന തരത്തിലുള്ള ധാരണയിലെത്തിയില്ലെങ്കിൽ വീണ്ടും സമരത്തിലേക്ക് നീങ്ങുമെന്ന് ബിഎംഎ മുന്നറിയിപ്പ് നൽകിയിട്ടുണ്ട്.