ന്യൂസ് ഡെസ്ക്, മലയാളം യുകെ

ബ്രെക്സിറ്റിന് പിന്നാലെ ബ്രിട്ടനിൽ താമസിക്കാൻ അനുമതി ലഭിച്ച 1,500 ഓളം യൂറോപ്യൻ യൂണിയൻ പൗരന്മാരുടെ താമസാവകാശം റദ്ദാക്കിയ നടപടിക്കെതിരെ ബ്രിട്ടീഷ് ഹോം ഓഫീസിനെതിരെ നിയമനടപടി. ബ്രെക്സിറ്റ് പിൻമാറ്റ കരാറിലെ വ്യവസ്ഥകൾ ലംഘിച്ചുവെന്നാരോപിച്ച് യൂറോപ്യൻ പൗരന്മാരുടെ അവകാശങ്ങൾക്കായി പ്രവർത്തിക്കുന്ന ‘ദ ത്രീ മില്യൺ’ (the3million) എന്ന സംഘടനയാണ് ഹൈക്കോടതിയെ സമീപിച്ചത്. പ്രീ സെറ്റിൽഡ് സ്റ്റാറ്റസ് ലഭിച്ചിരുന്ന ചിലർക്ക് ഈ അനുമതി തെറ്റായി നൽകിയതാണെന്നും അതിനാൽ താമസത്തിനുള്ള അവകാശം നഷ്ടപ്പെടുമെന്നും ഹോം ഓഫീസ് അടുത്തിടെ അറിയിച്ചിരുന്നു. ഇതിനെതിരെയാണ് സംഘടനയുടെ നടപടി.

താമസാനുമതി റദ്ദാക്കുന്നതിന് മുമ്പ് ബന്ധപ്പെട്ട വ്യക്തികൾക്ക് അപ്പീൽ നൽകാനുള്ള അവസരവും അവരുടെ സാഹചര്യങ്ങൾ പരിശോധിക്കാനുള്ള നടപടികളും ഹോം ഓഫീസ് ഉറപ്പാക്കേണ്ടതായിരുന്നുവെന്നാണ് സംഘടനയുടെ വാദം. ബ്രിട്ടനിൽ വർഷങ്ങളായി താമസിക്കുകയും ജോലി ചെയ്യുകയും കുടുംബജീവിതം കെട്ടിപ്പടുക്കുകയും ചെയ്തവരുടെ അവകാശങ്ങൾ ഇത്തരത്തിൽ ഏകപക്ഷീയമായി എടുത്തുകളയാനാകില്ലെന്നും സംഘടന ചൂണ്ടിക്കാട്ടുന്നു. ലണ്ടനിൽ 2018 മുതൽ താമസിക്കുന്ന 33 വയസ്സുള്ള ബ്രസീൽ-ഇറ്റാലിയൻ എൻജിനീയറും നടപടിയുടെ ഇരകളിലൊരാളാണ്. ഇദ്ദേഹത്തിന് താമസിക്കാമെങ്കിലും ബ്രസീലിയൻ ഭാര്യക്ക് ബ്രിട്ടനിൽ തുടരാനാവില്ലെന്നായിരുന്നു ആദ്യത്തെ തീരുമാനം. പിന്നീട് പ്രതിഷേധങ്ങളെത്തുടർന്ന് ഈ തീരുമാനം തിരുത്തി. ഇറ്റാലിയൻ പൗരത്വം പാരമ്പര്യമായി ലഭിച്ചവരാണെന്ന് തെളിയിക്കാൻ ഇറ്റാലിയൻ പാസ്‌പോർട്ട് നിർബന്ധമാക്കിയതും നിരവധി പേർക്ക് തിരിച്ചടിയായി. കോവിഡ് കാലത്ത് സർക്കാർ ഓഫീസുകൾ അടഞ്ഞുകിടന്നതിനാൽ പലർക്കും പാസ്‌പോർട്ട് ലഭിക്കാൻ കഴിഞ്ഞിരുന്നില്ല.

ഹോം ഓഫീസിന്റെ നടപടി നിയമവിരുദ്ധമാണെന്ന് പ്രഖ്യാപിക്കണമെന്നും ബാധിക്കപ്പെട്ടവരുടെ അവകാശങ്ങൾ സംരക്ഷിക്കാൻ കോടതി ഇടപെടണമെന്നും ‘ദ ത്രീ മില്യൺ’ ആവശ്യപ്പെട്ടു. നേരത്തെയും പ്രീ സെറ്റിൽഡ് സ്റ്റാറ്റസ് കാലാവധി അവസാനിക്കുന്നവർ വീണ്ടും അപേക്ഷ നൽകി സെറ്റിൽഡ് സ്റ്റാറ്റസ് നേടണമെന്ന ഹോം ഓഫീസിന്റെ വ്യവസ്ഥയ്ക്കെതിരെ സംഘടനയും ബന്ധപ്പെട്ട നിരീക്ഷണ സമിതിയും കോടതിയെ സമീപിച്ചിരുന്നു. 2022ൽ ഹൈക്കോടതി ഈ വ്യവസ്ഥ നിയമവിരുദ്ധമാണെന്ന് വിധിച്ചിരുന്നു. പുതിയ കേസിലും ഹോം ഓഫീസിന്റെ നയത്തിനെതിരെ ശക്തമായ നിയമപോരാട്ടത്തിനാണ് സംഘടന ഒരുങ്ങുന്നത്. കേസ് കോടതിയുടെ പരിഗണനയിലായതിനാൽ പ്രതികരിക്കാനാവില്ലെന്ന് ഹോം ഓഫീസ് വക്താവ് അറിയിച്ചു.

ന്യൂസ് ഡെസ്ക്, മലയാളം യുകെ

ഇംഗ്ലണ്ടിൽ എൻഎച്ച്എസിന് കീഴിലുള്ള മിഡ്‌വൈഫുമാരുടെ നേതൃത്വത്തിലുള്ള ബർത്ത് സെന്ററുകൾ കൂട്ടത്തോടെ അടച്ചുപൂട്ടുന്നത് സ്ത്രീകളുടെ അവകാശങ്ങൾ നിഷേധിക്കുന്ന നടപടിയാണെന്ന് ആരോഗ്യരംഗത്തെ വിദഗ്ധരും വിവിധ സംഘടനകളും. 2019 മുതൽ ഇതുവരെ 12 ബർത്ത് സെന്ററുകളാണ് ഇംഗ്ലണ്ടിൽ അടച്ചത്. ഇതിൽ ആറെണ്ണം ലേബർ സർക്കാർ അധികാരത്തിലെത്തിയ 2024 ജൂലൈയ്ക്കുശേഷമാണ് സ്ഥിരമായി അടച്ചുപൂട്ടിയത്. ആശുപത്രികളിലെ ഡോക്ടർമാരുടെ നേതൃത്വത്തിലുള്ള പ്രസവവിഭാഗങ്ങൾക്കു പുറമേ, മിഡ്‌വൈഫുമാരുടെ മേൽനോട്ടത്തിലുള്ള ബർത്ത് സെന്ററുകളിലോ വീട്ടിലോ പ്രസവം നടത്താനുള്ള അവസരം സ്ത്രീകൾക്ക് ലഭിക്കേണ്ടതാണെന്നും എന്നാൽ ഇത്തരം സൗകര്യങ്ങൾ കുറഞ്ഞുവരികയാണെന്നും സംഘടനകൾ ചൂണ്ടിക്കാട്ടുന്നു.

ബർത്ത് സെന്ററുകൾ അടച്ചുപൂട്ടുന്നതിനും വീട്ടിലെ പ്രസവസേവനങ്ങൾ നിർത്തിവയ്ക്കുന്നതിനും പ്രധാന കാരണമായി ചൂണ്ടിക്കാട്ടുന്നത് എൻഎച്ച്എസിലെ മിഡ്‌വൈഫുമാരുടെ കുറവാണ്. ജനനനിരക്ക് കുറയുന്നതും പ്രസവസംബന്ധമായ സങ്കീർണതകൾ വർധിക്കുന്നതും സിസേറിയൻ ശസ്ത്രക്രിയകളുടെ എണ്ണം കൂടുന്നതും പ്രതിസന്ധി രൂക്ഷമാക്കുന്നു. ചില കേന്ദ്രങ്ങൾ താൽക്കാലികമായി അടച്ചിട്ടിട്ട് വർഷങ്ങളായിട്ടും തുറന്നിട്ടില്ല. ഹഡേഴ്സ്ഫീൽഡിലെ ബർത്ത് സെന്റർ കോവിഡ് കാലത്ത് അടച്ചതാണെങ്കിലും ആറുവർഷമായിട്ടും പ്രവർത്തനം പുനരാരംഭിച്ചിട്ടില്ല. സാൽഫോർഡിലെ ഇംഗ്ലിസൈഡ് കേന്ദ്രവും 2022 മുതൽ അടഞ്ഞുകിടക്കുകയാണ്. ഇതോടെ ഗർഭിണികൾക്ക് കൂടുതൽ ദൂരം യാത്ര ചെയ്യേണ്ടിവരുന്നതായും യാത്രാച്ചെലവും ബുദ്ധിമുട്ടുകളും വർധിക്കുന്നതായും നാഷണൽ ചൈൽഡ്ബർത്ത് ട്രസ്റ്റ് ചൂണ്ടിക്കാട്ടി. ഈ സാഹചര്യം സ്ത്രീകളെ സ്വകാര്യ മിഡ്‌വൈഫ് സേവനങ്ങൾ തേടുന്നതിനോ ആരോഗ്യപ്രവർത്തകരുടെ സഹായമില്ലാതെ വീട്ടിൽ പ്രസവിക്കുന്നതിനോ പ്രേരിപ്പിക്കാമെന്നും ആശങ്കയുണ്ട്.

അതേസമയം, അടച്ചുപൂട്ടിയ ചില ബർത്ത് സെന്ററുകൾ വീണ്ടും തുറക്കാനുള്ള നടപടികളും പുരോഗമിക്കുന്നുണ്ട്. ചെൽട്ടൻഹാമിലെ ബർത്ത് സെന്റർ 2027 ഫെബ്രുവരിയിൽ തുറക്കുമെന്നും 2025 മുതൽ നിർത്തിവച്ചിരുന്ന വീട്ടിലെ പ്രസവസേവനം ജനുവരിയിൽ പുനരാരംഭിക്കുമെന്നും ഗ്ലോസ്റ്റർ ആശുപത്രി അധികൃതർ അറിയിച്ചു. എന്നാൽ നോർഫോക്കിലെ ചില ആശുപത്രികളിലെ പ്രസവവിഭാഗങ്ങൾ അടച്ച് സേവനങ്ങൾ ഒരു കേന്ദ്രത്തിലേക്ക് മാറ്റാനുള്ള നിർദേശവും ഉയർന്നിട്ടുണ്ട്. ഇംഗ്ലണ്ടിലെ പ്രസവ-നവജാത ശിശു പരിചരണ സംവിധാനത്തിലെ പ്രതിസന്ധി പരിഹരിക്കാൻ ആരോഗ്യ സെക്രട്ടറി യെവറ്റ് കൂപ്പർ ക്രിസ്മസിന് മുമ്പ് പുതിയ പ്രവർത്തനപദ്ധതി പ്രഖ്യാപിക്കാനിരിക്കുകയാണ്. എൻഎച്ച്എസിൽ കഴിഞ്ഞ വർഷം 600-ലധികം മിഡ്‌വൈഫുമാരെ പുതുതായി നിയമിച്ചിട്ടുണ്ടെന്നും നിലവിൽ റെക്കോർഡ് എണ്ണം മിഡ്‌വൈഫുമാർ സേവനത്തിലുണ്ടെന്നും ആരോഗ്യവകുപ്പ് അറിയിച്ചു. എന്നാൽ പ്രസവസ്ഥലം തിരഞ്ഞെടുക്കാനുള്ള സ്ത്രീകളുടെ അവകാശം സംരക്ഷിക്കാൻ കൂടുതൽ നടപടികൾ വേണമെന്നാണ് ആരോഗ്യസംഘടനകളുടെ ആവശ്യം.

ന്യൂസ് ഡെസ്ക്, മലയാളം യുകെ

ബ്രിട്ടനിലെ ഗ്ലോസ്റ്ററിൽ സ്കൂളിന് സമീപമുണ്ടായ വാൾ ആക്രമണത്തിൽ 17 വയസ്സുകാരന് പരിക്കേറ്റു. സംഭവവുമായി ബന്ധപ്പെട്ട് 19, 18, 17 വയസ്സുള്ള മൂന്ന് പേരെ പൊലീസ് അറസ്റ്റ് ചെയ്തു. വെള്ളിയാഴ്ച രാവിലെ 8.50ഓടെ ടഫ്ലിയിലെ സെന്റ് പീറ്റേഴ്സ് ഹൈസ്കൂളിന് സമീപമുള്ള ചാൽഫോർഡ് റോഡിലാണ് സംഭവം. വാളുമായി എത്തിയ ഒരാൾ ഉൾപ്പെടെ രണ്ടുപേർ 17 വയസ്സുള്ള രണ്ട് കൗമാരക്കാരെ പിന്തുടരുന്നതായി വിവരം ലഭിച്ചതിനെത്തുടർന്നാണ് പൊലീസ് സ്ഥലത്തെത്തിയത്. അക്രമികൾ പിന്നീട് കാൽനടയായി രക്ഷപ്പെട്ടു.

ആക്രമണത്തിൽ ഒരാൾക്ക് വാൾ ഉപയോഗിച്ചുണ്ടായതെന്ന് കരുതുന്ന ചെറിയ മുറിവേറ്റതായി ഗ്ലോസ്റ്റർഷെയർ പൊലീസ് അറിയിച്ചു. രണ്ടാമത്തെ കൗമാരക്കാരന് ശാരീരിക പരിക്കുകളില്ല. സംഭവത്തെത്തുടർന്ന് സായുധ പൊലീസ് സ്ഥലത്തെത്തി തിരച്ചിൽ നടത്തി. സുരക്ഷാ മുൻകരുതലിന്റെ ഭാഗമായി സെന്റ് പീറ്റേഴ്സ് ഹൈസ്കൂളും സമീപത്തെ വില്ലോ പ്രൈമറി അക്കാദമിയും മണിക്കൂറുകളോളം അടച്ചിട്ടു. വിദ്യാർഥികളെ ക്ലാസ് മുറികളിൽ തന്നെ തുടരാൻ നിർദേശിച്ചു. സംഭവസമയം തങ്ങൾ ഏറെ ഭയന്നുപോയെന്നും മണിക്കൂറുകളോളം ക്ലാസ് മുറികളിൽ കഴിയേണ്ടിവന്നെന്നും സ്കൂളിലെ വിദ്യാർഥി പറഞ്ഞു. രക്ഷിതാക്കൾക്കും സ്കൂൾ അധികൃതർ സന്ദേശം അയച്ച് സ്ഥിതിഗതികൾ നിയന്ത്രണത്തിലാണെന്ന് അറിയിച്ചു.

സംഭവവുമായി ബന്ധപ്പെട്ട് വെള്ളിയാഴ്ച രാത്രി 19കാരനെയാണ് ആദ്യം അറസ്റ്റ് ചെയ്തത്. ശനിയാഴ്ച രാവിലെ 18കാരൻ സ്വമേധയാ പൊലീസിൽ കീഴടങ്ങി. പിന്നീട് 17കാരനായ മറ്റൊരാളെയും അറസ്റ്റ് ചെയ്തു. മൂവരും ഗ്ലോസ്റ്റർ സ്വദേശികളാണ്. ഇവർ പൊലീസ് കസ്റ്റഡിയിൽ ചോദ്യം ചെയ്യൽ നേരിടുകയാണ്. അക്രമികളെ സഹായിച്ചെന്ന സംശയത്തിൽ വെള്ളിയാഴ്ച അറസ്റ്റിലായ ഒരു സ്ത്രീയെ പിന്നീട് പൊലീസ് ജാമ്യത്തിൽ വിട്ടു. പ്രദേശത്ത് കൂടുതൽ ഭീഷണിയുള്ളതായി കരുതുന്നില്ലെന്ന് പൊലീസ് വ്യക്തമാക്കി. സംഭവത്തിന് ദൃക്‌സാക്ഷികളായവരോടും ഡാഷ്‌ക്യാമിലോ മറ്റ് ക്യാമറകളിലോ ദൃശ്യങ്ങൾ പകർത്തിയവരോടും വിവരങ്ങൾ കൈമാറാൻ പൊലീസ് അഭ്യർഥിച്ചിട്ടുണ്ട്.

ന്യൂസ് ഡെസ്ക്, മലയാളം യുകെ

ലണ്ടൻ: ഉൽപ്പാദനച്ചെലവിനേക്കാൾ കുറഞ്ഞ വിലയ്ക്ക് പാൽ വിൽക്കേണ്ടിവരുന്ന സാഹചര്യത്തിൽ യുകെയിലെ ക്ഷീരകർഷകർ കടുത്ത പ്രതിസന്ധിയിൽ. പ്രമുഖ പാൽ സംസ്കരണ കമ്പനികളായ ഫ്രെഷ്‌വേയ്‌സും ആർല ഫുഡ്‌സും കർഷകരിൽനിന്ന് പാൽ സംഭരിക്കുന്ന വില കുറച്ചതാണ് തിരിച്ചടിയായത്. ഡിസംബർ ഒന്നുമുതൽ ലിറ്ററിന് ഏഴ് പെൻസ് കുറയ്ക്കാനാണ് ഫ്രെഷ്‌വേയ്‌സിന്റെ തീരുമാനം. ഇതോടെ നിലവിലെ വില 29.4 പെൻസായി താഴും. നവംബർ മാസത്തിൽ ആർലയും ലിറ്ററിന് 0.45 പെൻസ് കുറച്ച് വില 40.41 പെൻസാക്കി. ജലക്ഷാമം, മൃഗങ്ങൾക്കുള്ള തീറ്റയുടെ ചെലവ്, ഇന്ധനത്തിന്റെയും വളത്തിന്റെയും വിലവർധന എന്നിവ നേരത്തേ തന്നെ കർഷകരെ പ്രതിസന്ധിയിലാക്കിയിരുന്നു.

ആഗോള വിപണിയിൽ പാൽ ലഭ്യത വർധിച്ചതും പാലുൽപ്പന്നങ്ങളുടെ വിലയിലുണ്ടായ ഇടിവുമാണ് വില കുറയ്ക്കാൻ കാരണമായി കമ്പനികൾ ചൂണ്ടിക്കാട്ടുന്നത്. വേനൽക്കാലത്തെ കടുത്ത ചൂടും വരൾച്ചയും കാരണം പാലുൽപ്പാദനം കുറയുമെന്നായിരുന്നു പ്രതീക്ഷയെങ്കിലും കർഷകർ പശുക്കൾക്ക് അധികമായി തീറ്റ നൽകിയതോടെ ഉൽപ്പാദനം കാര്യമായി കുറഞ്ഞില്ല. ഇതും വിപണിയിൽ പാൽ അധികമാകാൻ കാരണമായി. ഫ്രെഷ്‌വേയ്‌സ് അടുത്തിടെ രണ്ടു മാസത്തിനിടെ ലിറ്ററിന് ഒൻപത് പെൻസ് വില വർധിപ്പിച്ചിരുന്നു. എന്നാൽ പുതിയ ഏഴ് പെൻസ് കുറവ് ആ വർധനയുടെ ഭൂരിഭാഗവും ഇല്ലാതാക്കും. വിലക്കുറവ് കർഷകരെ കടുത്ത ആശങ്കയിലാക്കിയതായി ദേശീയ കർഷക യൂണിയന്റെ ക്ഷീരവിഭാഗം അധ്യക്ഷൻ ഇയാൻ ഹാർവി പറഞ്ഞു.

പാൽ സംഭരണവിലയിലെ ഇടിവിനിടയിലും ബ്രിട്ടനിലെ പ്രധാന സൂപ്പർമാർക്കറ്റുകൾ നാല് പൈന്റ് പാലിന്റെ ചില്ലറവില 10 പെൻസ് വർധിപ്പിച്ച് 1.75 പൗണ്ടാക്കിയിട്ടുണ്ട്. എന്നാൽ ഈ വിലവർധനയുടെ നേട്ടം കർഷകരിലേക്ക് എത്തുന്നില്ലെന്നാണ് പ്രധാന പരാതി. കർഷകർക്ക് പാൽ സംഭരിക്കുന്ന കമ്പനികളെ എളുപ്പത്തിൽ മാറ്റാനോ മെച്ചപ്പെട്ട വില ആവശ്യപ്പെടാനോ കഴിയാത്തതും പ്രതിസന്ധി രൂക്ഷമാക്കുന്നു. ചില സൂപ്പർമാർക്കറ്റുകൾ ഉൽപ്പാദനച്ചെലവ് കണക്കിലെടുത്ത് കർഷകർക്ക് വില നൽകുന്നുണ്ടെങ്കിലും ഈ സൗകര്യം എല്ലാവർക്കും ലഭ്യമല്ല. പാലിന്റെ വിലയിലെ തുടർച്ചയായ ചാഞ്ചാട്ടവും വർധിച്ച ഉൽപ്പാദനച്ചെലവും യുകെയിലെ ക്ഷീരമേഖലയുടെ നിലനിൽപ്പിനെക്കുറിച്ചുള്ള ആശങ്ക വർധിപ്പിക്കുകയാണ്.

ന്യൂസ് ഡെസ്ക്, മലയാളം യുകെ

യൂറോപ്പിലെ വിവിധ രാജ്യങ്ങളിൽ വിമാനങ്ങൾക്ക് നേരെ വീണ്ടും ബോംബ് ഭീഷണി. വെള്ളിയാഴ്ച ബ്രിട്ടൻ ഉൾപ്പെടെ ഒൻപത് രാജ്യങ്ങളിലേക്കും അവിടെനിന്നുമുള്ള കുറഞ്ഞത് 18 വിമാന സർവീസുകളെയാണ് ഭീഷണികൾ ബാധിച്ചത്. ബൾഗേറിയ, സൈപ്രസ്, ചെക്കിയ, ഫ്രാൻസ്, ഹംഗറി, ഇറ്റലി, പോർച്ചുഗൽ, റൊമാനിയ, ബ്രിട്ടൻ എന്നീ രാജ്യങ്ങളിലെ വിമാനങ്ങളിലാണ് സുരക്ഷാ മുന്നറിയിപ്പുണ്ടായത്. ഭീഷണി ലഭിച്ച വിമാനങ്ങൾ സുരക്ഷിതമായി ലാൻഡ് ചെയ്തു. തുടർന്ന് നടത്തിയ പരിശോധനകളിൽ സ്ഫോടകവസ്തുക്കളൊന്നും കണ്ടെത്തിയില്ല. ചൊവ്വാഴ്ചയും വ്യാഴാഴ്ചയും ഉണ്ടായ സമാന ഭീഷണികളെ തുടർന്ന് കുറഞ്ഞത് 35 വിമാനങ്ങൾ വഴിതിരിച്ചുവിടുകയോ വിശദമായ പരിശോധനയ്ക്ക് വിധേയമാക്കുകയോ ചെയ്തിരുന്നു.

വെള്ളിയാഴ്ച യൂറോപ്പിൽ ആകെ 26,709 വിമാന സർവീസുകളാണ് നിശ്ചയിച്ചിരുന്നതെങ്കിലും ഭീഷണി ബാധിച്ചത് 0.0674 ശതമാനം സർവീസുകളെ മാത്രമാണ്. അതേസമയം, അയർലൻഡിലെ ആർ.ടി.ഇ ഉൾപ്പെടെയുള്ള മാധ്യമ സ്ഥാപനങ്ങൾക്കും ബോംബ് ഭീഷണി ലഭിച്ചു. ഇതേത്തുടർന്ന് ആർ.ടി.ഇയുടെ ഓഫീസിൽനിന്ന് ജീവനക്കാരെ ഒഴിപ്പിക്കുകയും പൊലീസ് പരിശോധന നടത്തുകയും ചെയ്തു. ബ്രിട്ടീഷ് വാർത്താ ചാനലായ സ്കൈയ്ക്കും സുരക്ഷാ ഭീഷണി ലഭിച്ചതായി അധികൃതരെ അറിയിച്ചു. ഹീത്രൂ, ബർമിങ്ങാം വിമാനത്താവളങ്ങൾക്കും വ്യാഴാഴ്ച ഭീഷണി ലഭിച്ചിരുന്നെങ്കിലും അവ വിശ്വസനീയമല്ലെന്ന് കണ്ടെത്തിയതിനാൽ പ്രവർത്തനം സാധാരണ നിലയിൽ തുടർന്നു.

ഭീഷണികൾക്ക് പിന്നിൽ പ്രവർത്തിക്കുന്നത് ആരാണെന്ന് ഇതുവരെ വ്യക്തമായിട്ടില്ല. റഷ്യയോ ഇറാനോ പോലുള്ള രാജ്യങ്ങളുടെയോ ഭീകരസംഘടനകളുടെയോ പങ്കിന് തെളിവുകളില്ലെന്നാണ് അന്വേഷണ ഉദ്യോഗസ്ഥരുടെ നിലപാട്. എന്നാൽ യുക്രെയ്നെതിരായ റഷ്യൻ അധിനിവേശത്തിൽ യൂറോപ്യൻ രാജ്യങ്ങൾ സ്വീകരിക്കുന്ന നിലപാടുമായി ബന്ധപ്പെട്ട് ഇത്തരം നീക്കങ്ങൾ നടക്കുന്നുണ്ടോയെന്നും പരിശോധിക്കുന്നുണ്ട്. യൂറോപ്പിലെ വിവിധ രാജ്യങ്ങളിലെ സാധാരണ ജനജീവിതവും ഗതാഗതവും താറുമാറാക്കാനുള്ള ആസൂത്രിത നീക്കമായിരിക്കാമിതെന്ന് സ്പെയിൻ വിദേശകാര്യ മന്ത്രി ജോസ് മാനുവൽ അൽബാരസ് അഭിപ്രായപ്പെട്ടു. വ്യാജ ഭീഷണികൾ പോലും വലിയ രീതിയിൽ ആശങ്കയും തടസ്സവും സൃഷ്ടിക്കാമെന്നും ബ്രിട്ടനിലെ മെട്രോപൊളിറ്റൻ പൊലീസ് മേധാവി മാർക്ക് റൗളി മുന്നറിയിപ്പ് നൽകി.

ന്യൂസ് ഡെസ്ക്, മലയാളം യുകെ

ബ്രിട്ടീഷ് ടെക് കമ്പനിയിൽനിന്ന് 1.1 കോടി ഡോളറിലേറെ തട്ടിയെന്ന് ആരോപണം;
കൃത്രിമബുദ്ധി (എ.ഐ) സാങ്കേതികവിദ്യ ഉപയോഗിച്ച് പ്രമുഖ കമ്പനികളുടെ മേധാവികളുടെയും അഭിഭാഷകരുടെയും ശബ്ദവും രൂപവും അനുകരിച്ച് ലോകത്തിന്റെ വിവിധ ഭാഗങ്ങളിലുള്ള കമ്പനികളിൽനിന്ന് 12.9 കോടി ഡോളറിലേറെ (ഏകദേശം 11.2 കോടി പൗണ്ട്) തട്ടിയെടുത്തെന്ന കേസിൽ മൂന്ന് വിദേശ പൗരന്മാർക്കെതിരെ അമേരിക്കയിൽ കുറ്റം ചുമത്തി. ജേക്കബ് സോൾ, ഷാരോൺ ഹസാൻ, ഗൈ ഷീട്രിറ്റ് എന്നിവരാണ് പ്രതികൾ. ഇവരിൽ സോൾ, ഹസാൻ എന്നിവർ സ്പെയിനിൽനിന്നും ഷീട്രിറ്റ് ബ്രിട്ടനിൽനിന്നും അറസ്റ്റിലായി. 2024 മുതൽ 2026 വരെയാണ് തട്ടിപ്പ് നടന്നതെന്നാണ് അമേരിക്കൻ നീതിന്യായ വകുപ്പിന്റെ കുറ്റപത്രത്തിൽ പറയുന്നത്.

എ.ഐ ഉപയോഗിച്ച് കമ്പനികളുടെ ഉന്നത ഉദ്യോഗസ്ഥരായി വേഷമിട്ട പ്രതികൾ ജീവനക്കാരെ ഫോണിൽ ബന്ധപ്പെട്ട് രഹസ്യ സാമ്പത്തിക ഇടപാടുകൾക്കായി സഹായം ആവശ്യപ്പെടുകയായിരുന്നു. തുടർന്ന് അന്താരാഷ്ട്ര നിയമസ്ഥാപനങ്ങളിലെ അഭിഭാഷകരായി വീണ്ടും ശബ്ദവും രൂപവും അനുകരിച്ച് ജീവനക്കാരെ വിശ്വസിപ്പിക്കുകയും വലിയ തുകകൾ വിവിധ ബാങ്ക് അക്കൗണ്ടുകളിലേക്ക് കൈമാറാൻ നിർദേശിക്കുകയും ചെയ്തു. അമേരിക്കയിലെ ആശുപത്രികൾ, ബാങ്കുകൾ, മ്യൂച്വൽ ഫണ്ട് സ്ഥാപനങ്ങൾ, ഫ്ലോറിഡയിലെ വളർത്തുമൃഗങ്ങളുടെ ഭക്ഷ്യനിർമാണ കമ്പനി എന്നിവയുൾപ്പെടെ നിരവധി സ്ഥാപനങ്ങൾ തട്ടിപ്പിന് ഇരയായി. ബ്രിട്ടനിലെ ഒരു സാങ്കേതികവിദ്യാ കമ്പനിയിൽനിന്ന് മാത്രം 1.1 കോടി ഡോളറിലേറെ (ഏകദേശം 95 ലക്ഷം പൗണ്ട്) തട്ടിയെടുത്തതായും ആരോപണമുണ്ട്.

അമേരിക്ക, ബ്രിട്ടൻ, സ്പെയിൻ, പോർച്ചുഗൽ, ഗ്രീസ്, യു.എ.ഇ, സിംഗപ്പൂർ, ഓസ്ട്രിയ, സ്ലോവാക്യ, ചൈന തുടങ്ങിയ രാജ്യങ്ങളിലെ ബാങ്ക് അക്കൗണ്ടുകളിലേക്കാണ് പണം കൈമാറിയതെന്നാണ് അന്വേഷണ ഉദ്യോഗസ്ഥർ പറയുന്നത്. പിന്നീട് പണത്തിന്റെ ഉറവിടവും ഉടമസ്ഥതയും മറച്ചുവയ്ക്കുന്നതിനായി തുക ക്രിപ്റ്റോകറൻസിയാക്കി മാറ്റി പ്രതികൾക്കും കൂട്ടാളികൾക്കുമിടയിൽ വിതരണം ചെയ്തതായും കുറ്റപത്രത്തിലുണ്ട്. ഫോൺ, ഇന്റർനെറ്റ്, ഇമെയിൽ തുടങ്ങിയ ഇലക്ട്രോണിക് ആശയവിനിമയ സംവിധാനങ്ങൾ ഉപയോഗിച്ച് നടത്തുന്ന സാമ്പത്തിക തട്ടിപ്പ് , കള്ളപ്പണം വെളുപ്പിക്കൽ, വ്യക്തിവിവരങ്ങൾ മോഷ്ടിച്ച് ദുരുപയോഗം ചെയ്യൽ തുടങ്ങിയ കുറ്റങ്ങൾ ചുമത്തിയാണ് പ്രതികൾക്കെതിരെ കേസെടുത്തിരിക്കുന്നത്. എ.ഐയുടെ ദുരുപയോഗം വൻതോതിലുള്ള സാമ്പത്തിക കുറ്റകൃത്യങ്ങൾക്ക് വഴിയൊരുക്കുന്നുവെന്നതിന്റെ ഗൗരവമായ മുന്നറിയിപ്പാണ് ഈ സംഭവമെന്ന് അമേരിക്കൻ അന്വേഷണ ഏജൻസിയായ എഫ്.ബി.ഐ വ്യക്തമാക്കി.

ന്യൂസ് ഡെസ്ക്, മലയാളം യുകെ

ഇന്ത്യൻ വാഹന നിർമാതാക്കളായ മഹീന്ദ്ര മൂന്ന് ഇലക്ട്രിക് എസ്‌യുവികളുമായി ബ്രിട്ടീഷ് വിപണിയിൽ തിരിച്ചെത്താൻ ഒരുങ്ങുന്നു. BE 6, XEV 9e, BE 07 എന്നീ മോഡലുകളുമായാണ് കമ്പനിയുടെ പുതിയ നീക്കം. ബ്രിട്ടീഷ് ഉപഭോക്താക്കളുടെ താൽപര്യവും വാഹനങ്ങളുടെ വിപണന സാധ്യതയും വിലയിരുത്തുന്നതിനായി മഹീന്ദ്ര ഇതിനകം യു.കെയിൽ ഉപഭോക്തൃ സർവേകളും പഠനങ്ങളും നടത്തിയിട്ടുണ്ട്. ഇതിൽ കമ്പനിയുടെ ജനപ്രിയ ഇലക്ട്രിക് മോഡലായ BE 6 ആയിരിക്കും പ്രധാന ആകർഷണം. XEV 9e-യും മൂന്നാമത്തെ മോഡലായ BE 07-ഉം വിപണിയിലെത്തിക്കാനാണ് പദ്ധതി. BE 07 ഇന്ത്യയിൽ 2027-ൽ അവതരിപ്പിക്കാനാണ് കമ്പനിയുടെ ലക്ഷ്യം.

2022-ൽ തന്നെ ബ്രിട്ടനിൽ സാന്നിധ്യം ശക്തമാക്കാനുള്ള നീക്കങ്ങളുടെ ഭാഗമായി മഹീന്ദ്ര ഓക്സ്ഫോർഡ്ഷയറിൽ Mahindra Advanced Design Europe എന്ന ഡിസൈൻ സ്റ്റുഡിയോ ആരംഭിച്ചിരുന്നു. അന്ന് അഞ്ച് ഇലക്ട്രിക് എസ്‌യുവി ആശയങ്ങളും കമ്പനി അവതരിപ്പിച്ചു. ഇതിനു മുമ്പ് 2016-ൽ e2o എന്ന ചെറു ഇലക്ട്രിക് കാർ ബ്രിട്ടീഷ് വിപണിയിൽ അവതരിപ്പിച്ചിരുന്നെങ്കിലും വിൽപ്പന കുറഞ്ഞതിനെ തുടർന്ന് ഏതാനും മാസങ്ങൾക്കുള്ളിൽ പിൻവലിക്കേണ്ടി വന്നു. ഇന്ത്യ-യുകെ സ്വതന്ത്ര വ്യാപാര കരാർ പ്രാബല്യത്തിൽ വന്നത് പുതിയ വിപണി പ്രവേശനത്തിന് സഹായകമാകുമെന്നാണ് കമ്പനിയുടെ പ്രതീക്ഷ. 2026 ജൂലൈ 15 -നാണ് കരാർ പ്രാബല്യത്തിൽ വന്നത്. എന്നാൽ ഇലക്ട്രിക് വാഹനങ്ങളുടെ ഇറക്കുമതി തീരുവയിൽ ഇളവുകൾ ഘട്ടംഘട്ടമായാണ് നടപ്പാക്കുന്നത്.

മഹീന്ദ്രയുടെ ഓട്ടോമോട്ടീവ് വിഭാഗം സി.ഇ.ഒ നളിനികാന്ത് ഗൊല്ലഗുണ്ടയുടെ നേരത്തെയുള്ള വിലയിരുത്തൽ പ്രകാരം 2027-ൽ ബ്രിട്ടീഷ് വിപണിയിൽ പ്രവേശിക്കാനാണ് പദ്ധതി. എന്നാൽ വാഹനങ്ങളുടെ സൈബർ സുരക്ഷ, സോഫ്റ്റ്‌വെയർ അപ്‌ഡേറ്റ് തുടങ്ങിയ കാര്യങ്ങളിൽ യു.കെ. നിഷ്കർഷിക്കുന്ന UN R155, UN R156 മാനദണ്ഡങ്ങൾ പാലിക്കേണ്ടതുണ്ട്. ഇതുമായി ബന്ധപ്പെട്ട അംഗീകാര നടപടികൾ പൂർത്തിയാകാൻ വൈകിയാൽ വിപണി പ്രവേശനം 2028-ലേക്ക് നീളാമെന്നും റിപ്പോർട്ടുകളുണ്ട്. വാഹനങ്ങളുടെ ബ്രിട്ടീഷ് വിപണിയിലെ വില, ബാറ്ററി ശേഷി, ഡ്രൈവിങ് റേഞ്ച് എന്നിവ സംബന്ധിച്ച ഔദ്യോഗിക പ്രഖ്യാപനങ്ങൾ ഇതുവരെ ഉണ്ടായിട്ടില്ല. ഇന്ത്യൻ വാഹന നിർമാണ മേഖലയ്ക്ക് ആഗോള വിപണിയിൽ കൂടുതൽ സാന്നിധ്യം ഉറപ്പിക്കാനുള്ള സുപ്രധാന ചുവടുവയ്പ്പായാണ് മഹീന്ദ്രയുടെ നീക്കം വിലയിരുത്തപ്പെടുന്നത്.

ന്യൂസ് ഡെസ്ക്, മലയാളം യുകെ

നോർഫോക്ക്: വീട്ടിൽ കഞ്ചാവ് കൃഷി ചെയ്ത സംഭവത്തിൽ ബ്രിട്ടനിൽ 71-കാരന് മൂന്നര വർഷം തടവ്. ഇയാളുടെ 70-കാരിയായ ഭാര്യയ്ക്കും ഒൻപത് മാസം തടവുശിക്ഷ വിധിച്ചെങ്കിലും ഒരു വർഷത്തേക്ക് ശിക്ഷ മരവിപ്പിച്ചു. നോർഫോക്കിലെ ആറ്റിൽബറോയ്ക്ക് സമീപം ബർഗ് കോമണിൽ താമസിക്കുന്ന മാർക്ക് അയേഴ്‌സിനും ഭാര്യ മരിയൻ അയേഴ്‌സിനുമാണ് നോർവിച്ച് ക്രൗൺ കോടതി ശിക്ഷ വിധിച്ചത്.

ഇവരുടെ വീട്ടിൽ നടത്തിയ പരിശോധനയിൽ 25 കഞ്ചാവ് ചെടികളും വിൽപ്പനയ്ക്കായി തയ്യാറാക്കിയ നിലയിൽ 5.7 കിലോ ഉണക്കിയ കഞ്ചാവും കണ്ടെത്തി. പിടിച്ചെടുത്ത ലഹരിമരുന്നിന് വിപണിയിൽ 46,000 പൗണ്ടിലധികം (ഏകദേശം 55 ലക്ഷം രൂപ) വില വരുമെന്ന് പോലീസ് അറിയിച്ചു. കഞ്ചാവ് ചെടികൾ വീടിനുള്ളിൽ പ്രത്യേക സൗകര്യമൊരുക്കിയാണ് വളർത്തിയിരുന്നത്. ഉണക്കിയ കഞ്ചാവ് പ്രത്യേക റാക്കുകളിൽ സൂക്ഷിച്ചിരുന്നതായും പരിശോധനയിൽ വ്യക്തമായി. പ്രദേശത്തെ ലഹരിമരുന്ന് വിതരണത്തെക്കുറിച്ച് പോലീസ് നടത്തിയ അന്വേഷണത്തിന്റെ ഭാഗമായാണ് 2025 മേയ് 20-ന് ദമ്പതികളുടെ വീട്ടിൽ പരിശോധന നടത്തിയത്. തുടർന്ന് ഇരുവരെയും അറസ്റ്റ് ചെയ്തു. കഞ്ചാവ് ഉത്പാദിപ്പിച്ചെന്ന കുറ്റം ഇരുവരും കോടതിയിൽ സമ്മതിച്ചു. വിൽപ്പനയ്ക്കായി കഞ്ചാവ് കൈവശം വെച്ചെന്ന കുറ്റവും മാർക്ക് സമ്മതിച്ചിരുന്നു.

സംഭവത്തിൽ മാർക്കിന് മൂന്നര വർഷത്തെ തടവുശിക്ഷയാണ് ലഭിച്ചത്. മരിയന് ഒൻപത് മാസം തടവുശിക്ഷ വിധിച്ചെങ്കിലും അടുത്ത 12 മാസത്തേക്ക് അത് സസ്‌പെൻഡ് ചെയ്തു. അതായത് ഈ കാലയളവിൽ കോടതി നിശ്ചയിച്ച വ്യവസ്ഥകൾ ലംഘിക്കാതിരുന്നാൽ അവർക്ക് ജയിലിൽ പോകേണ്ടിവരില്ല. കഞ്ചാവ് ഉത്പാദനവും വിതരണവും പ്രാദേശിക സമൂഹത്തിൽ വലിയ ദോഷങ്ങളുണ്ടാക്കുമെന്ന് നോർഫോക്ക് പോലീസ് സർജന്റ് ഡാനിയൽ ഷെല്ലി പറഞ്ഞു. പ്രദേശങ്ങളിൽ ലഹരിമരുന്നുമായി ബന്ധപ്പെട്ട സംശയകരമായ പ്രവർത്തനങ്ങൾ ശ്രദ്ധയിൽപ്പെട്ടാൽ പോലീസിനെ അറിയിക്കണമെന്നും അദ്ദേഹം പൊതുജനങ്ങളോട് അഭ്യർഥിച്ചു. നോർവിച്ചിനും തെറ്റ്‌ഫോർഡിനും ഇടയിലുള്ള ചരിത്രപ്രാധാന്യമുള്ള ചെറുപട്ടണമാണ് ആറ്റിൽബറോ. പ്രദേശത്തെ ലഹരിമരുന്ന് വിതരണ ശൃംഖലകളെ കണ്ടെത്തുന്നതിനുള്ള പോലീസിന്റെ അന്വേഷണത്തിന്റെ ഭാഗമായാണ് ഈ കേസും പുറത്തുവന്നത്.

ന്യൂസ് ഡെസ്ക്, മലയാളം യുകെ

പാർക്കിൻസൺസ് രോഗനിർണയത്തിന് ശേഷവും സന്തോഷവും സൗഹൃദവും നർമ്മവും കണ്ടെത്തുന്ന രണ്ടുപേരുടെ കഥ പറയുന്ന ബ്രിട്ടീഷ് ചിത്രം ‘ഓൺവേർഡ്സ് ആൻഡ് സൈഡ്‌വേയ്സ്’ യുകെയിലെ തീയേറ്ററുകളിൽ എത്തുന്നു. ബിഎ‌എഫ്ടിഎ പുരസ്കാര ജേതാവ് റീസ് ഇവാൻസും മൂന്ന് ഓസ്കാർ നാമനിർദേശങ്ങളും എമ്മി, ഗോൾഡൻ ഗ്ലോബ് പുരസ്കാരങ്ങളും നേടിയ ലോറ ലിന്നിയും ആണ് ചിത്രത്തിൽ പ്രധാന വേഷങ്ങളിലെത്തുന്നത്. പാർക്കിൻസൺസിനൊപ്പം ജീവിക്കുന്ന യുകെ മലയാളി നേഴ്‌സായ ടിൻസി ജോസും ഈ സംരംഭത്തിന്റെ ഭാഗമാണ്. ടിൻസി ജോസ് നേഴ്സായി ജോലി ചെയ്യുന്ന നോർഫോക്കിലെ ക്യൂൻ എലിസബത്ത് ഹോസ്പിറ്റൽ വച്ചാണ് സിനിമയുടെ ചിത്രീകരണം നടന്നത്.

പ്രൈമറി സ്കൂളിലെ ഡെപ്യൂട്ടി ഹെഡ്‌ടീച്ചറായ ടോണിയും (റീസ് ഇവാൻസ്), സംഗീതജ്ഞയും സംഗീതസംവിധായികയുമായ എമ്മയും (ലോറ ലിന്നി) ഒരേ ദിവസം പാർക്കിൻസൺസ് രോഗനിർണയത്തെ അഭിമുഖീകരിക്കുന്നു. പരസ്പരം അറിയാതിരുന്ന ഇവർ തമ്മിൽ അപ്രതീക്ഷിതമായി രൂപപ്പെടുന്ന സൗഹൃദവും, സംഗീതവും നൃത്തവും നർമ്മവും കലർന്ന അവരുടെ യാത്രയുമാണ് ചിത്രത്തിന്റെ ഉള്ളടക്കം.

ഓസ്കാർ നാമനിർദേശം ലഭിച്ച ജോൺ മാഡൻ (ഷേക്സ്പിയർ ഇൻ ലവ്, ദ ബെസ്റ്റ് എക്സോട്ടിക് മാരിഗോൾഡ് ഹോട്ടൽ, ഓപ്പറേഷൻ മിൻസ്മീറ്റ്) സംവിധാനം ചെയ്യുന്ന ചിത്രത്തിന്റെ തിരക്കഥ പോൾ മേഹ്യൂ–ആർച്ചറിന്റേതാണ്. 2011-ൽ സ്വയം പാർക്കിൻസൺസ് രോഗനിർണയം ലഭിച്ച മേഹ്യൂ–ആർച്ചർ, സ്വന്തം അനുഭവങ്ങൾ തുറന്ന മനസ്സോടെ പങ്കുവെച്ച് ബോധവത്കരണത്തിൽ സജീവമാണ്; പാർക്കിൻസണുമായി ജീവിക്കുന്ന ഒരാൾ തന്നെ ഈ കഥ എഴുതിയത് ചിത്രത്തിന് പ്രത്യേക പ്രസക്തി നൽകുന്നു.

ജോൺ ഗോർ സ്റ്റുഡിയോസിനും ഹിൽടോപ് സ്ക്രീനിനും വേണ്ടി ഹിൽടോപ് സ്ക്രീൻ നിർമ്മിക്കുന്ന ചിത്രത്തിൽ മോണിക്ക ഡോലൻ, റോറി കിന്നിയർ എന്നിവരും അഭിനയിക്കുന്നു. ഈ വർഷം സെപ്റ്റംബർ 13-ന് ടൊറന്റോ അന്താരാഷ്ട്ര ചലച്ചിത്രമേളയിൽ ലോക പ്രീമിയർ നടന്ന ചിത്രം, നവംബർ 6 മുതൽ ഐക്കൺ ഫിലിം ഡിസ്ട്രിബ്യൂഷന്റെ കീഴിൽ യുകെ സിനിമാശാലകളിൽ പ്രദർശനത്തിനെത്തും; തുടർന്ന് ഈ വർഷം തന്നെ ബിബിസി വണ്ണിലും ബിബിസി ഐപ്ലേയറിലും സംപ്രേഷണം ചെയ്യും.

മികച്ച നേഴ്സിനുള്ള മലയാളം യുകെ അവാർഡ് ജേതാവായ റ്റിൻസി ജോസ് നോർഫോക്കിലെ ക്യൂൻ എലിസബത്ത് ഹോസ്പിറ്റൽ അക്യൂട്ട് മെഡിക്കൽ യൂണിറ്റിലെ നേഴ്സാണ്. സ്വയം പാർക്കിൻസൺ രോഗിയായി തിരിച്ചറിഞ്ഞതിനു ശേഷവും ഏറ്റവും വെല്ലുവിളികൾ നിറഞ്ഞ അക്യൂട്ട് കെയർ നേഴ്സായി ജോലി തുടരുന്ന റ്റിൻസി, രോഗികൾക്കായുള്ള സേവനങ്ങളിലും ഗവേഷണത്തിലും സജീവമാണ്. ജീവിതത്തിൽ ഏതെങ്കിലും രോഗാവസ്ഥ നേരിടേണ്ടിവരുമ്പോൾ, വിശ്വസിക്കുന്നവരോട് തുറന്ന് സംസാരിക്കുന്നതും അനുഭവങ്ങൾ പങ്കുവെക്കുന്നതും സമാന അവസ്ഥയിലൂടെ കടന്നുപോകുന്നവരോടൊപ്പം ചേരുന്നതും എത്രമാത്രം ആശ്വാസം നൽകുമെന്ന് ഈ ചിത്രം നമ്മെ ഓർമ്മിപ്പിക്കുന്നു എന്ന് റ്റിൻസി ജോസ് മലയാളം യുകെയോട് പറഞ്ഞു.

ന്യൂസ് ഡെസ്ക്, മലയാളം യുകെ

യുഎസ്–ഇറാൻ യുദ്ധത്തെ തുടർന്ന് ആഗോള വിപണിയിൽ എണ്ണവില ഉയർന്നതും പണപ്പെരുപ്പ ഭീഷണി ശക്തമായതും കണക്കിലെടുത്ത് ബാങ്ക് ഓഫ് ഇംഗ്ലണ്ട് അടിസ്ഥാന പലിശ നിരക്ക് 3.75 ശതമാനത്തിൽ നിന്ന് 4 ശതമാനമായി ഉയർത്തി. 2023 ഓഗസ്റ്റിന് ശേഷം ആദ്യമായാണ് പലിശ നിരക്ക് വർധിപ്പിക്കുന്നത്. മധ്യപൂർവദേശത്തെ സംഘർഷം അവസാനിച്ചില്ലെങ്കിൽ ഇനിയും പലിശ വർധന വേണ്ടിവന്നേക്കാമെന്ന് ബാങ്ക് ഗവർണർ ആൻഡ്രൂ ബെയ്‌ലി മുന്നറിയിപ്പ് നൽകി. ബ്രിട്ടനിലെ പണപ്പെരുപ്പം നിലവിൽ 3.5 ശതമാനമാണ്. അടുത്ത വർഷം ഇത് 4.9 ശതമാനത്തിലെത്താമെന്നാണ് ബാങ്കിന്റെ വിലയിരുത്തൽ.

പലിശ നിരക്ക് വർധന ഭവനവായ്പ, വ്യക്തിഗത വായ്പ, ക്രെഡിറ്റ് കാർഡ് എന്നിവയുടെ തിരിച്ചടവ് വർധിപ്പിക്കും. എന്നാൽ സമ്പാദ്യത്തിന് ലഭിക്കുന്ന പലിശ ഉയരാൻ സാധ്യതയുണ്ട്. ബ്രിട്ടനിൽ ട്രാക്കർ മോർട്ട്ഗേജ് വായ്പയെടുത്ത 5.10 ലക്ഷം പേർക്ക് പ്രതിമാസം ശരാശരി 31 പൗണ്ട് അധികമായി നൽകേണ്ടിവരും. സ്ഥിര പലിശ നിരക്കിലുള്ള വായ്പകളുടെ തിരിച്ചടവിൽ ഉടൻ മാറ്റമുണ്ടാകില്ലെങ്കിലും പുതിയ വായ്പകൾക്ക് ഉയർന്ന പലിശ നൽകേണ്ടിവരും. ബ്രിട്ടനിലെ സാധാരണ കുടുംബങ്ങളുടെ ജീവിതച്ചെലവിനും ഈ തീരുമാനം കൂടുതൽ സമ്മർദമുണ്ടാക്കുമെന്നാണ് വിലയിരുത്തൽ.

പണപ്പെരുപ്പം 2028-ഓടെ മാത്രമേ ബാങ്കിന്റെ ലക്ഷ്യമായ 2 ശതമാനത്തിലേക്ക് താഴുകയുള്ളൂ എന്നാണ് ഇപ്പോഴത്തെ കണക്ക്. യുദ്ധം കൂടുതൽ രൂക്ഷമാവുകയും എണ്ണവില വീണ്ടും കുതിച്ചുയരുകയും ചെയ്താൽ 2027-ൽ പണപ്പെരുപ്പം 6.2 ശതമാനത്തിലെത്താമെന്നും ബാങ്ക് മുന്നറിയിപ്പ് നൽകുന്നു. അതേസമയം, പലിശ വർധന അനിവാര്യമായ തുടർച്ചയല്ലെന്നും വരും മാസങ്ങളിലെ എണ്ണവിലയുടെയും പണപ്പെരുപ്പത്തിന്റെയും ഗതിയനുസരിച്ചായിരിക്കും അടുത്ത തീരുമാനമെന്നും ഗവർണർ വ്യക്തമാക്കി.